Lefra Produksies vier die nalatenskap van die legendariese Gé Korsten met die produksie Gé Sing: Hoor My Lied. Maar dit is die vertolking van Algoabaai deur die geliefde aktrise en sangeres Stephanie Baartman wat tans gehore en musiekliefhebbers aan die praat het.

Baartman, wat tans as Lettie in kykNET (DStv-kanaal 144) se gewilde telenovela Diepe Waters te sien is, vertel dat sy die nuwe verwerking van Algoabaai as ’n besondere uitdaging ervaar het: “Die lirieke is deurdrenk met pyn, verlange en verraad – dis ’n liefdesdriehoek wat skeur. Om dit op die verhoog te sing, vra nie net tegniek nie, maar ook emosionele waarheid. Ek moes my hele hart en stem daarin gooi.”

Sy het haar televisie-debuut gemaak in die derde seisoen van Supersterre in 2010, waarna sy vinnig kykers se harte gewen het as Bianca “Bibi” Bhele in Getroud met Rugby. Vandag word sy as een van die sterk vrouekarakters in Diepe Waters herken, waar sy ook die diepte van emosie en dramatiese spel toon – ’n vermoë wat perfek aansluit by haar vertolking van Algoabaai.

Lees ook: Nuwe gesigte en intriges wag in Diepe Waters

Regisseur Frans Swart beskryf Stephanie se vertolking as die spilpunt van die nuwe verwerking: “Met net Josua Oosthuizen op kitaar en Stephanie se ongelooflike stem, het ek geweet ons het hier iets besonders. Haar dramatiese interpretasie laat jou die woorde vir die eerste keer écht hoor.”

Musiekregisseur Chanie Jonker, wat die verwerking gedoen het, beklemtoon dat die liedjie se donker verhaal juis deur Stephanie se stem tot sy reg kom. “Sy dra die teleurstelling en rou pyn só rou en eerlik oor dat die gehoor dit letterlik in hul bors voel,” sê Jonker.

Met hierdie enkelsnit gee Stephanie Baartman, saam met Lefra Produksies, nie net hulde aan Gé Korsten nie, maar wys sy ook hoe ’n klassieke liedjie nuwe lewe kan kry – só relevant en aangrypend soos op die dag toe dit die eerste keer gesing is.

Stephanie is as Lettie in die kykNET-telenovela Diepe Waters te sien.

KYK | Stephanie Baartman se vertolking van Algoabaai 

Skakel Maandae tot Donderdae om 18:00 in op kykNET (DStv-kanaal 144) vir Diepe Waters. Ook beskikbaar op DStv Stream.

Lees ook: Lize Beekman finalis in internasionale kunskompetisie

The post ‘Diepe Waters’ se Stephanie Baartman bring nuwe lewe aan Gé Korsten se ‘Algoabaai’ appeared first on rooi rose.

Frans Swart en Lefra Produksies se huldeblykproduksie aan superster, Gé Korsten, Gé Sing: Hoor My Lied! is in Februarie by die Atterbury-teater aangebied.  Hierdie speelvak was ‘n wegholsukses en alle produksies was binne ‘n week uitverkoop.  As gevolg van die publieke aanvraag na meer kaartjies, het die Atterbury Teater en Lefra Produksies besluit om hierdie gewilde produksie terug te bring na die Atterbury Teater vir drie aande alleen vanaf 4 tot 6 Junie 2024.  Gé Sing: Hoor My Lied! word aangebied met die trotse ondersteuning van Britz Couriers and Removals, Lift.co.za, Hollywood Costumes, RSG, Van Loveren Wines en WS Pianos.

Dit is vanjaar 25 jaar sedert die legendariese stem van Suid-Afrika se eerste ware superster, Gé Korsten, vir altyd stil geword het, en sy lewe, loopbaan en fenomenale talent word gevier in Lefra Produksies se huldeblykproduksie, Gé Sing: Hoor My Lied!  Lefra Produksies vier ook vanjaar hul dertigste jaar in die bedryf met verskeie top produksies soos Gé Sing: Hoor My Lied! 

Frans Swart, regisseur van Gé Sing: Hoor My Lied sê dit is vir hom ‘n besondere groot voorreg om hulde te aan hierdie ikoniese sanger en kunstenaar te bring.  “As daar ooit ‘n superster in Suid-Afrika was, dan was dit Gé!  Ek was bevoorreg om Gé persoonlik te kon geken het, want as jong kameraman by SAUK-TV, was ek kameraman vir ‘n paar seisoene van die gewilde TV-program, Gé Sing.  Daarna het ons baie goeie vriende geword en het ek die mees ongelooflike respek vir hierdie kunstenaar ontwikkel.  Hy was nie net sanger nie, maar hy was ‘n mentor vir soveel mense in die bedryf.  Hy was gesinsman, adminstrateur, vriend, akteur, sanger, orator, vegter vir die opera en legende!”

In die produksie Gé Sing: Hoor My Lied word oudiovisuele argiefmateriaal teen ‘n reuse skerm geprojekteer om die gehoor ‘n oorsig oor sy werk te gee, asook insigte oor Korsten as kunstenaar, mens en vader te bied.  Sy musikale nalatenskap word op ‘n vars manier herinterpreteer deur vier van die land se voorste kunstenaars: Andrè Schwartz, Louis Loock, Arina de Witt en Stephanie Baartman.  ‘n Volle orkes, onder leiding van musikale regisseur Chanie Jonker begelei die viermanskap. 

Korsten is op 6 Desember 1927 in Rotterdam, Nederland gebore.  Hy was die jongste van agt kinders en het in 1936 as negejarige seun saam met sy ouers na Suid-Afrika geëmigreer.  Hy het sy loopbaan as operasanger begin en was reeds op 20-jarige ouderdom lid van die SAUK se kore. Hy het in 1952 stemopleiding ontvang aan die South African College of Music in Kaapstad onder leiding van Adelheid Armhold.  In 1955 het hy na Pretoria verhuis waar hy verdere opleiding onder leiding van Albrecht Lewald ontvang het.  Hy was in dieselfde jaar ook een van die stigterslede van die Pretoria-operagroep.  Sy operadebuut maak hy in 1956 as Canio in Pagliacci. In 1962 word ‘n oorsese studiebeurs aan hom toegeken waarna hy in 1963 in Europa onder Judith Hellwig verdere opleiding ontvang en ook die geleentheid kry om in operas in Europese stede soos Wene en München op te tree. In 1976 het hy die Nederburgprys vir Opera ontvang vir sy hoofrol in Andrea Chénier.

Korsten het nege goue plate agter sy naam gehad. Hy het tydens sy loopbaan, wat oor 40 jaar gestrek het, 58 albums opgeneem. Hy het ses Sarie-toekennings ontvang en in 1979 ‘n Artestoekenning vir sy TV-program Gé Sing. Hy het ook die rol van Walt Vorster in die sepie Egoli gespeel. In 1985 is hy as hoofdirekteur van Kruik in Kaapstad aangestel en het die pos tot in 1989 beklee.  Korsten is op 3 Mei 2008 tydens die 14de Suid-Afrikaanse Musiektoekennings vereer vir ‘n leeftyd se bydrae tot plaaslike musiek.

Gé Sing: Hoor My Lied beloof ‘n aand se elegante vermaak, geskik vir die hele gesin, wat enersyds werk as vermaak, maar andersyds ook die nalatenskap van ons baanbrekers weer in fokus bring.  Kry jou kaartjies vir die ongelooflike teaterervaring nou by www.LTickets.co.za, of skakel (011) 815-3000, en druk opsie 2.  Vir groepbesprekings, kontak Monica Booysen by Lefra Produksies by (011) 815-3000 of stuur ‘n e-pos aan admin@lefra.com.

Lees ook: Vyf-vinnige-vrae-Vrydag met Armand Aucamp oor die suksesresep van die reeks, Plan B

The post Gé Sing: Hoor My Lied! terug by Atterbury-teater appeared first on rooi rose.

’n Stralende bruid in turkoois. ’n Bruidegom deftig geklee in ’n donkerblou pak. Blomrangskikkings in skakerings van sagte blou, room en vaalgroen. Lang houttafels, sjampanjeglase en kerse. Wat meer kan ’n bruidspaar vra?

Met Lettie (Stephanie Baartman) en Henry (Stiaan Bruwer) se bruilof, wat op 20 Maart uitgesaai is, het alles volgens plan vir die twee Diepe waters-verliefdes verloop. Volgens die vervaardigers, Penguin Films, is die beplanning vir die troue reeds lank voor die verfilming gedoen. Die tonele is in die voortuin van die huis wat vir Gys gebruik word, verfilm. Die opstel van die tent, al die dekor en blommerangskikkings, die opnames van die tonele en die afbreek en wegpak van alles daarna, het binne slegs twaalf ure gebeur.

“Dis mos maar altyd lekker om ’n bruid te speel,” sê Stephanie. “Veral omdat jy nie die stres van ’n gewone bruid het nie. Ek het al die spesiale aandag met my rok en grimering baie geniet, en dit was lekker om so baie van die ander spelers daardie dag saam met my op stel te hê. Kykers weet dit dalk nie, maar as ek nie in spesifieke tonele saam met sekere spelers is nie, sien ek hulle amper nooit nie. Dit het dus soos ’n reünie in die kleine gevoel.”

Sy sê dit het nie noodwendig langer as normaalweg geneem om reg te maak vir die tonele nie. “Ons haar- en grimeerspan is so professioneel, dat hulle presies weet wat om te doen wanneer jy in daardie stoel voor hulle beland.”

“Almal was so goed voorbereid vir hierdie tonele. So, dit het nie te lank geneem nie,” sê Stiaan. “Jy kry jou grimering en klere, repeteer die toneel een of twee keer en there you go. Magic!

Stephanie en Stiaan se raad aan paartjies wat op trou staan, is prakties en op die man af.

“Wees geduldig en realisties,” sê Stiaan. “Daar gaan dalk klein dingetjies verkeerd loop, maar dis alles oukei. Onthou hoekom julle daar is.”

“As jy genoeg geld het, kry ’n troubeplanner,” sê Stephanie. “Indien nie, trou voor die landdros en take the money and run!”

“ ’n Verhouding is nie altyd 50/50 nie. Somtyds is dit 30/70 en andere kere 60/40. Julle moet mekaar help. Dit gaan nie altyd perfek wees nie, maar as daar iemand aan jou sy is wat jou help, maak dit die wêreld se verskil,” sê Stiaan oor verhoudings en die liefde.

Stephanie se gunsteling-liefdesgedig is Antjie Krog se “êrens is jy”.

hier waar ek nou skrywe
weet ek dat jy êrens is
dat jy ook nou lê onder die oop venster
en uitkyk na die donsige maan op die werf
ek is al drie jaar lank op soek na jou
en waar jy ookal is
ek sal jou vind
en as ek voor jou staan
sal ek weet: ek is vir jou gemaak
na jou liggaam is ek geskape
na jou maat gevorm
ek is gesny uit jou been
jou denke sal myne omhels
jou begin sal my begin wees
jou einde my einde
jy sal my bestyg soos ’n gier
en in my maagdelikheid jou nes kom bou
want na jou liggaam is ek gemaak
na jou maat gevorm
en as ek die dag my hand in joune sit
sal ek my padkaarte bêre met die wete:
my reise op soek na jou is nou verby.

Lees ook: Lizz Meiring se KKNK-produksie is vars, vurig en vermaaklik-vreemd

The post Diepe waters se Lettie en Henry beloof ewige trou appeared first on rooi rose.

’n Vol en vervullende lewe

Haar lewe het ’n paar onverwagse draaie in die laaste jaar of drie gevat, maar Desiré Gardner meen sy’t weinig rede om te kla en verwelkom die nuwe uitdagings.

‘n Ma en dogter duisend 

Die verhouding tussen ‘n ma en dogter is iets besonders. Wat is dit wat julle s’n so spesiaal maak? Skryf in en julle kan ’n lekker ma-en-dogter-prys van meer as R40 000 wen!

rooi rose is op soek na ’n ma en dogter wat ’n baie hegte band het. Vertel ons wat dit is wat jul verhouding so spesiaal maak en julle het ’n kans om ’n oormaak- en fotosessie deur Willem Botha, ’n uitrusting vir elkeen deur Reandi Grey van Grey Creations,  juwele van Jenna Clifford en ’n geskenkpak van Mont blanc wen. Jul fotosessie sal ook in ’n uitgawe van rooi rose verskyn.

Ons loer in by: Simon Rademan, Stephanie Baartman en Waldemar Schultz

Daar is min bekende Suid-Afrikaners wat nog nie in ʼn Simon Rademan-uitrusting geklee was nie. Hy mag dalk al jare lank in die bedryf wees, maar hy begin elke dag weer nuut.

Hy verskil hemelsbreed van die karakter wat hy in die reeks Die Byl vertolk, sê Waldemar Schultz wat erken hy’s nie ’n man wat skaam is om sy emosies te wys nie.

As pastoriekind het die aktrise en sangeres Stephanie Baartman in haar jong dae na haar eie identiteit gesoek. Maar deur die jare het sy ’n stewige vastrapplek in die lewe en ook as kunstenaar in die bedryf gevind. Dit het haar geleer hoe om haarself te vernuwe.

8 onnies sê hul sê

Onderwysers stap dikwels die ekstra myl vir jou kind, en dit strek veel verder as klasgee. Hul rol in jou kind se lewe – en toekomsgeluk – is onmiskenbaar. Onderwysers vertel hoe jy ’n beter verhouding met hulle kan bou.

Breinkos

Toebroodjies hoef nie net kaas of konfyt op te hê nie. Hier is ’n paar smaaklike (en fênsie!) opsies wat jy in ’n japtrap voor skool of werk kan maak.

Verstaan (uiteindelik) jou verhoudingsmaat 

Hoekom is daar konflik in liefdesverhoudings? Een belangrike rede is dat verskillende persoonlikhede verskillende motiveringsdryfvere het en oorlewingsvrees ervaar sodra hulle bedreig word. ’n Dinamiese persoonlikheidstelsel werp lig op dié saak.

Servikale kanker – die goeie nuus

Servikale kanker kan suksesvol behandel word en beheer word, mits dit vroegtydig opgespoor word

2024: Jou mooiste jaar 

Dis ’n nuwe jaar en dit beteken nuwe skoonheidsneigings. Vind meer uit en probeer dit self! 

Wen ’n luukse wegbreek by Grootbos!

Een gelukkige leser kan twee aande se verblyf, wat onder meer ’n eet-ervaring van vyf gange insluit, ter waarde van R25 800 wen!

Oriëntering op skool: Bou of breek dit?

Die oriëntering op skole en universiteite is vandag baie makker as die ontgroening wat baie van ons en ons ouers verduur het. Maar is daar steeds ’n plek vir inlywingspraktyke of kan dit ook handuit ruk?

Lees ook: WEN ‘n Clicks Festive-mooimaakboks ter waarde van R3 700!

The post 10 redes waarom jy die Januarie-uitgawe van rooi rose móét lees! appeared first on rooi rose.