Bespreek vir Susan Coetzer se funksies:  

Saterdag  25 Julie 10:00 Klerksdorp Shack to Sanctuary  

Bespreek by Petro Kotze-Odendaal 076 986 5919 

Saterdag 1 Augustus 15:30 vir 16:30 Bloemfontein Warm Karoo  

Bespreek by Jacoline 082 377 1334 

Saterdag 8 Augustus 11:00 Zwartkloof Private Game Reserve (Bela Bela streek)  

Bespreek by Yolanda 082 444 5364 

Saterdagmiddag 15 Aug NG Elarduspark, Pta.  

Navrae: vs@voelgoed.co.za 

Saterdag 22 Aug NG Moedergemeente Vanderbijlpark  

Navrae: rieslouis@gmail.com 

Saterdag 29 Augustus 10:00 Ermelo, Nederduitch Hervormde Kerk  

Bespreek by Soekie@studiovdw.co.za of soekiehuman@gmail.com 

Sat 5 Sept Eensgesind Durbanville. 

bruis@bruis.co.za of whatsapp 063 065 4875

Sat 12 Sept NG Bryanston

Navrae: Corne van de Venter 082 925 6950

Sat 19 Sept NG Komati 

kantoor@ngkomati.co.za

Sat 10 Okt NG Coligny 

munnik79@gmail.com

Kontak Susan by susan@virdiesiel.co.za om as spreker op te tree. 

Lees ook: Susan Coetzer verjaar: ‘Ek leef in groot dankbaarheid’

The post Sien Susan Coetzer in aksie appeared first on rooi rose.

Saamgestel deur Elna Rossouw.    

Uit die beek 2026 deur Stephan Joubert

Stephan Joubert (Foto: Verskaf)

Uit die beek 2026 is ‘n Bybelse dagboek wat al langer as tien dekades verskyn. “Dit was deur die jare heen die doelwit van verskillende skrywers om lesers die hele Bybel te laat lees, nie net geliefde gedeeltes nie, God het immers sy hele Woord aan ons gegee om ons op sy pad te lei,” vertel die teoloog en skrywer Stephan Joubert. In dié 2026-uitgawe van Uit die beek (Lux Verbi, R270; wat vanjaar deur Stephan geskryf is) begin die reis by Genesis. “Ons lees in die Ou Testament ook uit Eksodus, Rut, die twee boeke van Samuel, Ester, Psalms, Spreuke, Prediker en Jesaja. In die Nuwe Testament lees ons uit Markus, 1 Korintiërs, Filippense, 1 Tessalonisense, 2 Tessalonisense en die boeke van Timoteus. Soos gewoonlik word die belangrikste seisoene van die kerkjaar in ag geneem met ’n spesiale boodskap vir Lydenstyd, Paasfees, Pinkster, Koninkrykstyd, Advent en Kersfees.”  

Sielkos, ‘n gebedsjoernaal deur Irene M Nel

Irene M Nel (Foto: Verskaf)

Irene M Nel, ’n Namibiër wat lank in Suid-Afrika gewoon het voor sy in 2001 na haar geboorteland teruggetrek het, skryf al tien jaar elke dag ’n geestelike boodskap op Facebook wat sy “Sielskos” noem. Dit bestaan uit ’n Bybelvers, gedagte en gebed om mede-Christene te voed en te bou “omdat so baie van ons meer gereeld net daardie ietsie nodig het om ons gemoed te lig”, sê sy. Nou het sy van hierdie dagstukkies uitgesoek en in boekvorm as Sielkos, ‘n gebedsjoernaal (Turksvy Publikasies, R350) en werkboek saamgestel. Irene sê sy bou haar lewe rondom haar gunsteling-Bybelvers, Jeremia 29:11. “Ek weet wat Ek vir julle beplan, sê die Here, voorspoed en nie teenspoed nie. Ek wil vir julle ’n toekoms gee, ’n verwagting.”  

Super C: van swaarmoedige Sannie tot supervrou deur Susan Coetzer

Susan Coetzer (Foto: Verskaf)

Susan Coetzer vertel sy was baie lank ’n swaarmoedige Sannie. Sy het gesukkel met onder meer swak selfbeeld en donker gedagtes. Sy het alte dikwels gevoel sy leef nie soos sy wou nie. Maar vandag is alles anders. In Super C: van swaarmoedige Sannie tot supervrou (Lux Verbi, R280) nooi Susan jou saam op haar reis. Sy deel haar terugslae en oorwinnings deur te vertel van die ou gewoontes wat sy moes afleer en die bemagtigende nuwe gewoontes wat sy aangeleer het. Sy hoop die boek sal jou aanspoor om nooit moed te verloor nie, maar aan te hou stap totdat jy ook jou swaarmoedige Sannie kan agterlaat en jou eie weergawe van ’n sonnige Super C word.  

Drie gelukkige lesers kan Super C: van swaarmoedige Sannie tot supervrou WEN!

Met die komplimente van Lux Verbi kan drie rooi rose-lesers elk ‘n kopie van Susan Coetzer se Super C: van swaarmoedige Sannie tot supervrou wen.

Bepalings en voorwaardes: Alle pryse in rooi rose is onderhewig aan beskikbaarheid en is nie oordraagbaar, herverkoopbaar of terugbetaalbaar vir kontant nie. Vir nog bepalings en voorwaardes, besoek www.rooirose.co.za

Om in te skryf, voltooi die onderstaande vorm:

*Slegs een inskrywing per persoon  

Sluitingsdatum: 27 Desember 2025

The post Nuut op die boekrak + Drie gelukkige lesers kan Susan Coetzer se nuwe boek WEN! appeared first on rooi rose.

Deur Elna Rossouw.  Foto’s: Theana Breugen, oorspronklik geneem vir die ATKV/ FAK.

Hier’s een van ons gunsteling-onderhoude met Susan, sy word vandag 68 jaar oud.

Ons besluit om op die laaste Woensdag in Augustus by haar huis in Linden te ontmoet … min wetende dat dit juis daardie aand bloumaan is. Toe ek voor Susan Coetzer se huis met die turkoois mure in ’n boomryke straat in Johannesburg stilhou, dink ek vanaand se ander naam vir supermaan pas nogal by die muurverf. 

Susan laat die swart ysterhek oopgly en ek ontdek haar wêreld van bontgeverfde mure en ’n binnehof vol potplante. Die oop deure nooi jou binnetoe, vorentoe tot op die groot kuierstoep met sy ekstralang tafel, witgeverfde houtstoele en rottangmeubels wat in ’n gemaklike kuierplek gerangskik is. Die water in die swembad onder die stoep lê stil en bo die tafel (“daar het al 70 vroue op die stoep gekuier”) hang stringe amulette en ligvangers. 

Susan maak koffie in ’n sypelkan en oor twee sterk koppies koffie speel haar lewe − in volkleur − voor my af. 

Sy is in Kaapstad as een van drie kinders gebore. Haar broer is al jare lank oorsee waar hy ’n sielkundige is en haar suster − hier op eie bodem − “is die musikale een”.                                            

“My ma was ’n wonderlike, kreatiewe mens. Een wat jy nie in ’n boksie sou kon plaas nie. Sy was haar eie mens. Nie ’n afskrif van ander nie. My pa was pittig met woorde. Ek het van kleins af vir die grootmense konsert gehou. Nooit kon droom dit sou my lewe word nie.” 

Susan se ouers het geskei toe sy hoërskool toe is en ná hulle letterlik van kus tot kus getrek het, het haar lewe dramaties verander. “Ek het gesukkel om aan te pas en ’n swak selfbeeld ontwikkel. Ek was uitstekend in atletiek en kon seker ’n Springbok-atleet geword het, maar het te veel gewig aangesit. Skryf het my stille vriendin geword.”

Vandag het Susan ’n lang lys inspirerende boeke agter haar naam. Boeke met titels soos Oros vir die siel, Tjoklits vir die siel, Custard vir die siel,  All-bran vir die siel,  Smarties vir die siel.  Boeke waarin sy op haar humoristiese manier (“ek weet eintlik nie hoekom mense dink ek is snaaks nie”) pitkos uit haar eie lewe deel. ’n Talent wat sy glo sy kon ontwikkel omdat Joan Kruger, ’n vorige redakteur van rooi rose, haar ’n kans gegee het. 

“Ná my en Frank (Opperman) se egskeiding, het ek ’n doelbewuste besluit geneem om daar te wees vir ons vierjarige seun, Frankie. Ek het as joernalis begin werk en moes meer geld verdien om te oorleef. Ek het agter ’n toe deur gesit en huil toe Joan instap en vra hoekom ek nie ’n rubriek oor die lewe en liefde van ’n eenlopende vrou skryf nie. Haar soektog na Mr Right. So is Uit die dagboek van Lisa de Waal* gebore en die res is soos hulle sê geskiedenis.”

Ek het Susan leer ken as die jong aktrise in Diepe grond, ’n toneelstuk deur Reza de Wet en onder die regie van die ontslape Lucille Gillwald waarvoor sy in die laat tagtigerjare “op een aand as beste nuweling én beste akteur” bekroon is. 

“Dit was móéilike tye. Ek het drama op Stellenbosch geswot,  ’n HOD gedoen en besef skoolhou is nie vir my nie. Ek het my beurs teruggewerk en Johannesburg toe sonder enige kontakte getrek.” Die oudisies vir Diepe grond was ’n vuurdoop. 

“Lucille het my vir die derde keer ingeroep … sy het getwyfel of ek  ‘angry enough’ vir die uitdagings van die rol sou kon wees. Sy het gedink ek is te veel van ’n Polyanna met lang lokke en pienk strikkies. Lucille het my uitgedaag om groot woede te demonstreer… en toe ek skilderye van die mure afruk, tafels en stoele begin omgooi, het sy geskree: ‘Enough, enough! You’ve got the part’.” 

“Dit was nie ’n maklike rol om te vertolk nie. Die stuk wat in die ou Suid-Afrika afgespeel het, was polities gelaai en ons is op sekere dorpe verban. Maar ek sal Lucille altyd dankbaar wees dat sy die underdog ’n kans gegee het. In my geglo het. Ek glo vandag nog: Almal moet ’n eerste kans kry.”

Later het Susan TV-kykers weer laat regop sit met hoofrolle in Laat vrugte, Meester, en die “bose” Daisy de Melker met regisseurs soos Koos Roets en Annie Basson. 

Sy het die rol van Griet vertolk in die verhoogstuk wat op Marita van der Vyver se roman Griet skryf ’n sprokie gegrond is, was Robyn de Swart in Sewende Laan, het ’n draai in die hospitaalgange van Binnelanders gemaak, en het pas ’n paar episodes vir Hartklop geskiet. Dit is slegs ’n paar van die bekender rolle op haar kerfstok. Sy het ook ’n paar verhoogstukke soos Die duiwel is ’n ding wat spring en Partners geskryf.

Vandag reis Susan as motiveringspreker die land vol, iets wat spontaan uit haar boeke ontwikkel het. Haar dagboek is propvol. “Ek probeer soveel as moontlik uitnodigings as wat ek kan akkommodeer. Ek is jammer wanneer ek iemand moet wegwys. Ek glo ons het almal ’n geskenkpakkie van die Skepper ontvang. Jy moet net diep in die sakkie kyk, dalk ’n bietjie delf, om by al jou spesiale talente uit te kom.  

“Op my eie lewensreis het ek my eie lesse geleer en ek het besef ek moet op iets groters as mense staatmaak. Ek glo ’n mens kan nie die teenwoordigheid van God in jou lewe ontken nie. In elk geval nie ek nie. Ek besef ook ek kan nie mense verander nie, ek kan hulle dalk net beïnvloed om almal om hulle met respek en integriteit te behandel. Om liewer ’n wyse uil as ’n blinde mol te wees. Om die teenwoordigheid van die Skepper in jou lewe te erken.”

Ons gesprek draai terug na die absolute verskrikking van die Covid-pandemie. Susan vertel hoe sy met dankbaarheid besef het sy en haar naastes is gesond. Lééf. Ja, sy het haar inkomste verloor, maar sy kon ’n plan maak om haar werkskamer en ’n deel van haar huis te verhuur om die paaiemente te betaal. 

“Ek het ook geleer met hoe min jy tevrede kan wees.” Sy het haarself gedwing om “elke dag lipstiek vir my computer aan te sit” en aan Blinde mol of wyse uil? te werk.                                                         

“Ek het geweldig baie navorsing gedoen om integriteit te definieer en ’n lysie met die goue bestanddele van integriteit op te stel. Dit was vir my ’n verrykende ervaring.”

Susan skryf nie net boeke met ’n geestelike inslag nie. Sy het haar net wyer gegooi en het al ’n hele paar romans geskryf. 

Ons tyd raak min en die koffiekoppies koud. 

Hoe sou sy haarself beskryf? Hoe sou sy haar talente as aktrise, joernalis, skrywer, motiveringspreker saamvat? 

“Ek’s ’n kreatiewe innoveerder. Ek hou daarvan om mense te ondersteun. Of jy nou ’n ma, skoonma of ouma is, is die ondersteunende rol − in my oë − die belangrikste rol. Ek sal ook graag onthou wil word as iemand wat met my skryfwerk lesers op ’n dieper reis geneem het. Om deur ’n lens vol lig te kyk en in dankbaarheid te leef.”

Susan loop saam met my motor toe. Sy vertel van die piekniekmandjie wat sy vanaand gaan pak om saam met ’n paar vriendinne vir die opkoms van die bloumaan te wag; ’n volmaan wat vanaand soveel helderder gaan skyn. 

Ek verstaan nou hoekom Susan so gewild is. Sy leef in lig en dankbaarheid. Sy het lankal haar innerlike vrede gevind.

Hierdie artikel het oorspronklik in ons Desember-uitgawe van 2023 verskyn. 

Lees ook: 10 redes waarom jy rooi rose se September-uitgawe móét lees!

The post Susan Coetzer verjaar: ’Ek leef in groot dankbaarheid’ appeared first on rooi rose.

Die fees word vanjaar van 1 tot 4 Mei gehou. 

Op die program:

Een van Suid-Afrika se gewildste akteurs Ian Roberts praat oor sy memoire Is dit jy? en speel vóór in Radio Kalahari Orkes se konsert. 

Clarens se eie musiekster Josh Mokoena kom huis toe met sy jazz-vertolking, terwyl die immergewilde André Schwartz met sy nuwe produksie “Gesigte” beloof om ‘n vol saal te trek. 

Die bekroonde musiekblyspel Vincent − met Daniel Anderson begelei deur Paul Ferreira − verken die lewe van die enigmatiese kunstenaar Vincent van Gogh. 

Kaartjies verkoop ook vinnig vir raconteur en Comrades-koning Bruce Fordyce se boekpraatjie Tales from the Road (Hy neem ook die voortou by die Clarens Parkrun op Saterdag 3 Mei).  

Die Aussie-superster Tony Park deel geheime oor die skryf van blitsverkopers en gesels oor sy liefde vir Suid-Afrika se natuurlewe. 

Uit Breyten se Boek:  

Skeppende kunstenaars Laurinda Hofmeyr, Bibi Slippers en Koos van der Merwe bring met woord en lied eer aan Breyten Breytenbach. Kaartjies is hier beskikbaar.

Storiekos: Frik de Jager:  

StorieKos is veel meer as net nog ʼn kookboek. In StorieKos nooi Frik de Jager jou uit om saam met hom op reis te gaan vanaf die Karoo tot in Kaïro en van Rusland tot in Rome. Dit is ʼn kos-reisverhaal waarin hy sy passie vir “peasant food” of plattelandse kos deel – resepte en stories van mense en ervarings versamel oor ʼn tydperk van bykans vier dekades. 

Hy deel die eenvoud en opregtheid van hierdie geregte wat die toets van tyd weerstaan het en deur die jare aangepas is in die kombuise van generasies van huiskokke. Kry jou kaartjie hier!

Sjampanje & Soetgoed:  

Kom vier die lewe saam met die skrywer en akteur Susan Coetzer en hoor die storie agter Haas en Harriët, haar jongste roman wat oornag sterstatus bereik het. As motiveringspreker − met ‘n rits boeke met ‘n geestelike inslag agter haar naam − trek sy landwyd vol sale met haar eg-menslike en humoristiese aanslag. Sorg dat jy nie die sessie saam met Susan op die daktuin van iL Castello misloop nie! (‘n Glasie borrels en ‘n paar happies by kaartjieprys ingesluit) 

Rillers & Raaisels:  

Die bekroonde joernalis, skrywer en uitgewer Marida Fitzpatrick vertel van die droom waaruit haar sielkundige riller, Mara ontstaan het. Nuweling Elmarie Viljoen-Massyn deel die verhoog met agtergrond oor haar nuwerwetse spanningsroman Vuurvoël wat met ‘n filmprys bekroon is. Marian Human-Nel van die Departement Afrikaans en Nederlands, Frans en Duits aan die UV lei die gesprek oor boeke wat jou laat naels kou. Klik hier vir kaartjies.

Op die dorpsplein trek sowat 40 visuele en beeldende kunstenaars saam om hul werk uit te stal. Vir die volledige lys van kunstenaars, klik hier.  

As jy brand om jou eie kunstigheid − of verbeelding − vrye teuels te gee, is daar werkwinkels wat jou sal besiel. As jy hou van poësie of pottebakkery, skryf of skilder, konsert of kook, boeke of bekendes; debatte of diepsinnige gesprekke … die Clarens Kunstefees bied iets vir elke smaak. 

Kyk na die volledige program en bespreek jou kaartjies hier. 

Lees ook: Vyf-vinnige-vrae met Anton Goosen oor die verloop van tyd en sy nuwe musiek

The post Kom Clarens toe vir die kunstefees op 1 Mei! appeared first on rooi rose.

Anri & Rina: ’n hegte band

Rina Hugo en haar dogter Anri van der Linde se verhouding is een van liefde, begrip en wedersydse respek. Dis gesetel in diep gewortelde gesinstradisies soos luilekker vakansies en Kers-samesyn op hul bosveldplaas.

‘n Ma en dogter duisend 

Die verhouding tussen ‘n ma en dogter is iets besonders. Wat is dit wat julle s’n so spesiaal maak? Skryf in en julle kan ’n lekker ma-en-dogter-prys van meer as R40 000 wen!

rooi rose is op soek na ’n ma en dogter wat ’n baie hegte band het. Vertel ons wat dit is wat jul verhouding so spesiaal maak en julle het ’n kans om ’n oormaak- en fotosessie deur Willem Botha, ’n uitrusting vir elkeen deur Reandi Grey van Grey Creations,  juwele van Jenna Clifford en ’n geskenkpak van Mont blanc wen. Jul fotosessie sal ook in ’n uitgawe van rooi rose verskyn.

So sê hulle: Annelie Botes se rubriek

Gesondheid en die ouderdom- Voor jy jou oë kan uitvee, het die dekades met jou weggedraf en jy is bejaard. Ongelukkig is dit só dat jou spyt en selfverwyt eers op daardie laatdag sal wakkerword.

’Ek leef in groot dankbaarheid’ 

As jong aktrise met hoofrolle in reekse soos Laat vrugte, Meester en Daisy de Melker was Susan Coetzer se naam op almal se lippe. Toe sy skei en ’n enkelouer word, het sy van loopbaan verander en ’n joernalis geword om die pot aan die kook te hou. Vandag het sy al meer as 30 boeke op haar kerfstok en as motiveringspreker reis sy die land vol

Stroopsoet vir Kersfees

As jy jouself die hele jaar mooi gedra het, is ’n bietjie bederf nou mos welverdiend. En met al die neute, kruie en vrugte is dit amper gesond!

Grootte én grootsheid 

Die Blacks wou meer ruimte gehad het – ’n tuiste waar al hul kinders en dié se vriende oor naweke kan kom kuier. En waar mense kan kom kuns kyk …

Oorleef Kersfees by die skoonfamilie

As jy trou, trou jy met jou huweliksmaat se familie ook. Ons kry raad by ’n paar kenners hoe om hierdie feestyd koel en kalm by familiekuiers te bly.

Stap na nuwe insigte toe 

Die camino-staptogte oorsee word al hoe gewilder en jy kan ook ’n pelgrimstog in Suid-Afrika onderneem. Hoekom vind mense dié togte as genesend en vernuwend? 

’n Diamant wat ander laat skyn

Wanneer jy aan die legendariese Jenna Clifford dink, dink jy aan blink juwele en edelstene, klassieke styl en statigheid. Sy is egter ’n 65-jarige internasionaal bekende sakevrou wat al met die ware én nagemaakte edelgesteentes van die lewe te doen gekry het.

Geestelik vs godsdienstig

Daar is baie mense wat hulself vandag as geestelik beskryf en wat van godsdiens en die kerk wegskram. Hoekom en wat beteken dit?

Lees ook: WEN velsorgprodukte van Lamelle se Nourish-reeks ter waarde van R 2025!

The post 10 redes waarom jy die Desember-uitgawe van rooi rose móét lees! appeared first on rooi rose.