Deur: Maryke Roberts. Foto’s: Clifford Roberts 

Die spyskaart is ’n viering van Suid-Afrikaanse fynbos. Nie net is daar takkies fynbos op elke bord of die potjies fynbos kulinêre sout om jou olyfolie vir jou brood mee te geur nie, maar ook kry elke gas ’n fynbos-geinspireerde drankie met boegoe en ander kruie met hul aankoms. 

Die gasheer vir die bekendstellings middagete is die hotel se nuwe bestuurder, Leon Meyer en Giselle Courtney van South African Fynbos was die spesiale gas van die dag. 

Leon vertel die Cape Grace Hotel is nou deel van Franse Accor Group, wat van die wêreld se gesogste hotelle insluit en die sesde grootste gasvryheidsmaatskappy in die wêreld, is. 

“Ek gaan nie sê dis die maaltyd wat julle vandag gaan geniet, is die beste kos in Kaapstad nie, maar wel die beste mense het dit berei. Maar ons gaan die beste restaurante in Kaapstad opdraende gee in die komende maande,” het hy trots verklaar. 

Selfs die brood en fynbos-gegeurde botter voor die maal, was ’n anderster smaak-sensasie. Die witwyne wat saam met die maal bedien is, was die Creation Chardonnay 2022 en Iona Monopole Sauvignon Blanc 2022. Die rooiwyne was die Zevenwacht Cabernet Sauvignon en die Thelma Merlot.

Chesray Assur, die uitvoerende sous sjef van die hotel, het vertel: “Hierdie spyskaart is saamgestel om ons weer terug te neem na dit waarmee ons grootgeword het; om sorgeloos in die veld te hardloop. Almal het al in ’n doringbos geval en ’n ouma of oupa het een of ander plant se sap aangesmeer vir die brand. Ons stories lê in die klein goedjies wat dikwels oorgesien word deur ander.” 

Hy sê die spyskaart wentel om klein bordjies waar disse gedeel kan word en samesyn om ’n tafel aangemoedig word. 

Giselle het vertel: “Skepe reis al vir eeue hier by die Kaap verby en hierdie fynbos lê onaangeraak. Ons ontgin nou die rykdom van geure en reuke wat al miljoene jare lank hier vir ons wag. Die antieke fynbos en kruie groei steeds op Tafelberg. Sy het uitgelig dat die San geglo het boegoe is die deurgang na die ander wêreld; renosterbos is anti-inflammatories en aan die Kaap gebruik vir die  Spaanse Griep.  

“Die bekende skrywer en diger, C Louis Leipoldt, wat ook ’n fynproewer was, het 84 jaar gelede verklaar: ‘Ons het so baie sade, plante en bas maar ons kos is so laf!’ en dit terwyl al hierdie wonderlike geure op ons drumpel het.” 

Leon het bygevoeg dat die nuwe spyskaart die hotel nou aan die voorpunt van ’n evolusie geplaas het en aan gaste die geleentheid bied om in hierdie wonderlike fynbos-erfenis te deel.  

“Dis die begin van ’n reis. Cape Grace gaan die skitterende ster wees in die toekoms.” 

Die spyskaart bestaan uit Umami, Suur, Sout, Speseryagtig en Soet. Die Umami was beet-en-bokmelkkaas slaai met fynbos slaaisous; Suur was Kaapse garnaal laksa met heuningbos en safraan aioli; Sout was tunalende met koljander, sojasous, groenmostert mayonaise en bok choy. Die speserydis vir die ete was biltong-gegeurde springboklende met boontjies, mango atchar en ’n tapioca beskuitjie en die Soet was donkersjokoladetert met Amarula roomys en Kalahari gesoute karamel. 

Meer inligting oor die spesiale Taste of the veld-spyskaart is by https://www.capegrace.com/category/restaurants-dining te kry en meer oor Giselle se fynbos-ervaring van South African Fynbos, by https://www.southafricanfynbos.com/. 

Lees ook: Geroosterde salmslaai

The post Nuwe fynbos spyskaart ontgin antieke smaak-sensasie appeared first on rooi rose.

Deur Maryke Roberts. Foto’s: Maryke Roberts 

Die vroegaand stap oor die Bascule-brug met bote wat in en uit die hawe gly; die wolke wat strepe oor Tafelberg gooi en seevoëls wat vis by restaurantgangers bedel, skets die regte agtergrond vir ’n heerlike aand. 

Die vroegaand stap oor die Bascule-brug met bote wat in en uit die hawe gly; die wolke wat strepe oor Tafelberg gooi en seevoëls wat vis by restaurantgangers bedel, skets die regte agtergrond vir ’n heerlike aand.

Gaste kry die geleentheid om ’n verwelkomingsdrankie van die Bar by Rhys met eienaar en kroegman Rhys Mcbeth, te geniet, voor hulle vier of vyf wyne saam met die betrokke wynmaker proe en dan aansit vir ’n heerlike ete deur Ninia de Vogel en Angelique da Silva van De Vogel Catering. 

Guy McDonald, die bekende radiopersoonlikheid en seremoniemeester, het onlangs begin met wynmakers etes onder sy gewilde blog, Via the Grapevine-vaandel by die Gin Emporium in die Kaapse V&A Waterfront. By hom staan Nederburg Wyne se witwyn-maker Pieter Badenhorst.

Ons het die Nederburg Wyne geselligheid met die witwyn-maker Pieter Badenhorst bygewoon.  

Pieter het meer as 20 jaar wynmaak-ondervinding. Guy het grappenderwys gesê hy het nog sy BMX gery, toe Pieter al probeer uitwerk het hoe gisrasse werk.  

Albei Pieter se ouers is gekwalifiseerde Biologie onnies en dit maak seker sin dat hy in die wetenskap sy brood en botter sou verdien. Pieter het vertel dat hy destyds ook gefassineer was deur Siviele Ingenieurswese en daarvoor ingeskryf en keuring gekry het, maar wingerdbou het gewen. 

Hy het in 2003 as wynmaker by Nederburg in die Paarl in sy eerste pos ingestap. Hy het oeste in Frankryk en Duitsland meegemaak en vertel dat dié reis na Duitsland op 28, sy eerste oorsese reis was. “Dit het my oë oopgemaak vir die wye wêreld. Ek het daar vir ’n reuse kelder gewerk en toe die presiese teenoorgestelde ervaar toe ek in Frankryk vir ’n klein kelder in familiebesit gewerk het. Nederburg is groot maar ons span kry die geleentheid om kleiner hoeveelhede ‘beste van die beste’ wyne ook te maak,” het hy vertel. 

Onder verskillende etikette kan hulle terroirs in verskillende oesjare vier, ander moet hulle sekere geurprofiel handhaaf. Pieter verduidelik die boublokke soos verskillende gisselle en verskillende gistemperature, suiker en veroudering, hout uit verskillende woude se eikehoutvate, verskillende roostergrade en of die vate 300 liter of 500 liter vate of amfora is, het alles ’n invloed op die eindproduk. 

Nederburg se totale wyn-portefeulje bestaan uit 35 verskillende wyne. Die plaas waarop Nederburg geleë is, voorsien net vyf persent van die kelder se behoeftes. Die res koop hulle van 50 produsente in verskillende wynstreke. 

Nederburg is die afgelope vier jaar ten volle vegan en nou in herlewingslandbou, waar hulle fokus op goeie grond met goeie ou natuurlike boerderymetodes, wat heeltemal volhoubaar is. 

Die wyne wat ons geproe het, is The Winemasters Rosé 2022 (die enigste wyn wat hulle net van Nederburg se druiwe maak) en die Sauvignon Blanc 2022; Heritage Heroes Old Vine Chenin Blanc en The Brew Master; en die Nederburg Double Barrel Reserve 2020. 

Pieter het met die Rosé aan gaste vertel: “Dis Nederburg. Die wyn is in die Franse Provensaalse styl, wat ligter in smaak en ligter in kleur ook is. Die wyn is meer elegant en blomagtig.” 

Gaste kon vrae vra, voor Pieter, wat bekend staan as The Singing Winemaker, almal met sy diep baritonstem vermaak het. 

Die ander wyne kon almal met aandete geniet word en teen afslag bestel word. Die spyskaart het bestaan uit Burrata, ertjie gazpachio en Vignarolaslaai, Botterskorsie ravioli met ’n ryk beesstert en tamatiesous en tuisgemaakte pistasieneut roomys met Turkse roos makrolletjies. 

Guy se wynreis het in 2003 begin, toe hy die Certificate Wine Course deur die Cape Wine Academy voltooi het en begin het om ’n wynprogram, Via The Grapevine, op Good Hope FM uit te saai. Die program het ten doel gehad om luisteraars op ’n onpretensieuse manier aan die wynwêreld bekend te stel. Hy vertel: “Dit was ’n uur uit ’n 3-uur middageteprogram wat Vrydae ’n besliste hoogtepunt geword het!”  

In 2015 het hy die program in sy volgende pos by Magic 828 AM, laat herleef en in 2017 die internasionaal-gerekende Wine & Spirit Education Trust (WSET) Vlak 2 Wine Award behaal met vergunning van The International Wine Education Centre (IWEC). Sy pad kruis ook met Hector McBeth, die bekende whisky-invoerder en soos Guy hom noem: “geheime wynmeester”. 

Via The Grapevine het in 2020 werklik lewe gekry via Zoom webinare en proebinare met meer as 50 Suid-Afrikaanse wynmakers, -meesters en wynkelders tot op hede. 

Via The Grapevine LIVE, wat nou saam met Hector se whiskey-besigheid by The Gin Emporium in die V&A Waterfront woon, is ’n maandelikse byeenkoms van 30-50 gaste wat meer wil leer oor wyn terwyl hulle snuif, teug, lag en eet. 

“Ons streef daarna om jou op ’n ‘wynryke’ reis te neem deur die wingerde van Suid-Afrika, die druiwe waarmee hulle ons beloon, en die meesters wat wyn daaruit skep. Kom ons leer, lag en teug saam! Vertel jou vriende dat jy daarvan gehoor het #viathegrapevine,” verkonding Guy. 

Die volgende twee aandetes en wynproeë is Kunjani Wines op Donderdag, 10 November met eienaar Pia Watermeyer en Donderdag, 8 Desember met Haskell Vineyards se keldermeester, Rudolph Steenkamp.  

Pia sal meer oor Kunjani se reis vertel en ook verklap waar die Stolen Chicken Rosé se naam vandaan kom. Haskell Vineyards vier vanjaar sy 20ste verjaardag en Rudolph sal meer vertel oor die storie agter hul talle bekroonde wyne. 

Van die wynkelders wat in 2023 kom saamkuier, sluit onder meer La Vierge in Hemel-en-Aarde, Blaauwklippen, The Good Stuff Wine deur Richard Gunn en wyn handelsmerke wat deur Damn Fine Brands verteenwoordig word.  

Alle geleenthede is 17:30 vir 18:00. Bespreek jou sitplek by die tafel by 083 377 1113 of https://whiskyshop.co.za/book-a-tasting/ 

Lees ook: Spesiale Chateau Libertas Magnum huldig Duimpie Bayly

The post Heerlike aand van wyn en kos wag op jou appeared first on rooi rose.

In die bui vir ’n uitsig wat jou asem wegslaan?

Moenie die Tafelberg Kabelspoor se spesiale aanbod misloop nie – sondersondergang-kaartjies teen halfprys! Kyk hoe die ondergaande son die moederstad en die see in skemerlig baai, eet en drink iets lekkers by die Table Mountain Café of loer by die Shop at the Top in vir aandenkings.

Vra vir: Table Mountain Cableway’s 1/2 price Sunset Special tickets
Datums: 1 November tot 18 Desember 2015 en 4 Januarie tot 29 Februarie 2016
Tyd van die dag: vanaf 18.00 (6 nm)
Koste: volwassenes R120 en kinders van vier tot sewentien R57.50
Kaartjies te kry by die kabelspoor se kaartjieskantoor (Cableway’s Ticket Office)
Die kabelspoor loop slegs wanneer die weer dit toelaat.
Meer inligting by www.tablemountain.net of (021) 424 8181

The post Raak “”hoog”” appeared first on rooi rose.