– Genoeg vir 1 groot tert (6-8 mense)

Bestanddele

Tertdeeg

• 200 g polenta
• 100 g botter
• 50 g parmesaankaas
• hand vol pietersielie, fyngekap
• hand vol orego, fyngekap
• 2,5 ml (½ t) sout
• 2,5 ml (½ t) bakpoeier
• 1 eier, geklits
• 150 g gekookte koue aartappels, fyngemaak

Vulsel

• 45 ml (3 e) olyfolie
• 250 g kersietamaties
• 5 klein of 2 groot eiervrugte, in kwarte gesny
• 3 eiers
• 180 ml (¾ k) room
• 125 g bloukaas, gekrummel of camembertkaas, gesny, indien jy nie van bloukaas hou nie
• 2 takkies tiemie, blaartjies van die takkies afgestroop
• hand vol pietersielie, fyngekap
• hand vol basiliekruid

Metode

1. Voorverhit die oond tot 200 °C. Sproei ’n 21 cm x 21 cm-riffelpan met kossproei.
2. Verwerk die polenta, botter, parmesaankaas, pietersielie, orego, sout en bakpoeier tot krummelrig. Voeg die eier en aartappels by en verwerk totdat dit ’n deeg vorm.
3. Rol die deeg tussen 2 velle bakpapier tot 10 mm uit. Sit vir 30 min. in die yskas.
4. Sit intussen die kersietamaties op ’n oondpan, sprinkel 15 ml olyfolie oor en geur met sout en swartpeper. Rooster vir 20-25 min. of totdat die velle begin oopbars. Haal uit.
5. Voer die voorbereide pan met die deeg uit. Bak die terkors blind.
6. Verhit die oorblywende olyfolie in ’n braaipan oor matige hitte. Braai die eiervrug daarin vir 2 min. aan elke kant of tot goudkleurig. Haal uit.
7. Vul die tertkors met die eiervrugte en tamaties.
8. Klits die eiers, room, bloukaas, tiemie en pietersielie in ’n mengbak. Gooi die mengsel oor die tert.
9. Bak vir 25-30 min. of tot goudkleurig. Dien met vars basiliekruidblare op.

The post Mediterreense groentetert appeared first on rooi rose.

Genoeg vir vier.

Bestanddele

Pasta

• 300 g koekmeel
• ’n knypie sout
• 3 eiers
• 15 ml (1 e) olyfolie

Sous

• 30 ml (2 e) olyfolie
• 250 g (5-6) handgemaakte Italiaanse worsies soos salsiche of enige ander gehalteworsie
• 1 ui, fyn gekap
• 2 kort selderystingels, fyn gekap
• 2 middelslag-wortels, geskil en fyn gerasper
• 2 knoffelhuisies, fyn gekap
• 15 ml (1 e) tamatiepasta
• 1 x 400 g-blik heel, geskilde tamaties – druk dit met ’n vurk in die sous fyn
• sout en gemaalde swartpeper
• 80 ml (1⁄3 k) parmesaan, fyn gerasper
• ’n hand vol basiliekruid

Metode

1. Sif die meel en sout in ’n groot mengbak saam en maak ’n holte in die middel. Breek die eiers en olyfolie in die holte en werk dit in die meel in. Knie vir 10 min. tot elasties en
   ’n gladde deeg gevorm het. Draai styf in kleefplastiek toe en laat die deeg vir minstens 45 min. in die yskas rus.
2. Rol die deeg met die pastamasjien tot op die nommer 6-stelling uit en laat die velle hang om winddroog te word. Sny in tagliatelle-vorm op die snykant van die pastamasjien. Hang dit op terwyl jy die pastasous maak.
3. Verhit die helfte van die olyfolie in ’n kastrol. Druk die gemaalde vleis uit die worsie om frikkadelle te vorm en braai tot goudbruin. Haal uit en hou eenkant.
4. Verhit die oorblywende olie en braai die ui, seldery en wortels tot goudbruin. Voeg die knoffel by en braai vir ’n paar minute.
5. Voeg die tamatiepasta, heel geskilde tamaties en kruie by. Sit die worsiefrikkadelle weer by. Prut vir 10-15 min. oor lae hitte. Geur na smaak met sout en peper.
6. Kook die vars pasta vir 3-5 min. of tot aldente in ’n groot kastrol kokende soutwater. Gooi die water af en sprinkel olyfolie oor die pasta.
7. Roer die tamatiesous deur die warm pasta. Sit voor met die parmesaankaas en ’n hand vol basiliekruidblare.

The post Worsiepasta appeared first on rooi rose.

Die ragù word langsaam in die oond in ’n oondpan gekook, en daarom maklik om baie te maak. Ons het 4 k vir die kitslasagne gebruik. Resep deur Vickie de Beer

Maak sowat 3,5 kg

60 ml (¼ k) olyfolie
4 uie, gekap
4 wortels, gekap
4 selderystingels, gekap
2 knoffelhuisies, fyn gekap
sout en gemaalde swartpeper
250 g pancetta of dik spek, in stukkies gesny
200 g hoenderlewer, fyn gekap
1 kg varkmaalvleis
1 kg binneboud-beesmaalvleis (topside)
90 ml tamatiepasta
4 x 410 g-blikke heel, geskilde tamatie
500 ml (2 k) rooiwyn
bouquet garni: ’n paar takkies pietersielie, tiemie en 2 lourierblare met kombuistou gebind

1 Verhit 30 ml (2 e) van die olie in ’n groot pan en braai die uie, wortels en seldery oor lae hitte daarin tot sag en dit net begin kleur kry. Sit die pancetta by en braai goudbruin.
2 Stoot die groente en spek na die kant van die pan en braai die hoenderlewer, knoffel en tamatiepasta vir 4-5 min. tot net gaar. Skep alles in ’n groot oondpan en hou eenkant.
3 Verhit nog 15 ml olie in dieselfde pan en braai die beesvleis bietjies op ’n slag daarin tot dit begin kleur kry. Skep in die oondpan.
4 Voorverhit die oond tot 140 °C.
5 Braai die varkmaalvleis ook in dieselfde pan. Voeg die helfte (250 ml) van die wyn by en skraap die boom van die braaipan skoon. Gooi alles in die oondpan.
6 Verhit die oondpan en roer al die bestanddele saam tot dit prut. Gooi die blikkies tamatie, res van die wyn, aftreksel en bouquet garni by. Geur met sout en peper. Bedek die oondpan met foelie en sit in die middel van die warm oond. Bak vir 3 uur. Verwyder die foelie en bak vir nog ‘n uur.

Kitslasagne

Meng 250 ml crème fraîche, 250 ml dubbeldikroom, 30 ml melk, 1 eier, 120 g mozzarella en 60 g parmesaan en hou eenkant. Gebruik sowat 1,5 kg van die ragù. Skep ’n lagie vleis in ’n 30 cm x 25 cm diep oondpan en pak ’n laag lasagnevelle (1 boks vir die hele lasagne is genoeg) bo-op. Smeer van die crème fraîche-mengsel bo-oor en herhaal die lagies. Eindig met ’n laag vleis en die crème fraîche-mengsel. Strooi nog 60 g parmesaan oor en bak vir 30-45 min. in ’n voorverhitte oond van 200 °C. Laat vir 30 min. afkoel en sny in blokke.

#rooirosewenk
Skep die afgekoelde ragù in gemerkte 1 liter-houers en vries porsies vir maklike gebruik.

Lees ook: Ragù … wat jy benodig

The post Klassieke ragù à la bolognese appeared first on rooi rose.

Beplan vir elke week

* Koop ook vars vrugte, groente en sappe saam met die bestanddele vir die week se middagetes en kosblikhappies
* Maak van die geregte wat gevries kan word. ’n Mens het naweke meer tyd vir bak, laat die kinders help en bak sommer al Sondagaand die muffins of neutkoekies
* Koop genoeg koeldrankbotteltjies en vries vyf sappies vir die komende week
* Koop liefs volgraanbrood vir die toebroodjies

LEES OOK: Kosblik-idees week 1

LEES OOK: Kosblik-idees week 2

LEES OOK: Kosblik-idees week 3

Maandag (middagete-idee)

Basiese macaroni-en-kaas
– genoeg vir 4

Dis maklik om die geurige, basiese macaroni te maak. Ons het soetmieliepitte, ertjies en klein kersietamaties deur die macaroni gemeng, maar jy kan dit net so voorsit. Onthou om die basiese mengsel oor die naweek dubbel aan te maak en die helfte vir Woensdag se spek-eneier-nessies te hou.

• 200 g macaroni
• 125 ml (½ k) room
• 310 ml (1¼ k) melk
• 375 ml (1½ k) gerasperde cheddar
• sout en swartpeper na smaak
• gerasperde neutmuskaat na smaak

1 Kook die macaroni in ’n kastrol met kokende water en ’n bietjie sout tot nét sag. Dreineer en sit terug in die kastrol. 2 Voeg die room, melk en kaas by en plaas oor lae hitte tot die kaas gesmelt is. 3 Geur met sout, peper en neutmuskaat. Roer versigtig deur en dien op.

Maniere om dit voedsamer te maak
* Voeg ’n hand vol soetmieliepitte, ertjies en gekapte kersietamaties net voor opdiening by.
* Vlok ’n gerookte forel, snoek- of makrielfilet met jou vingers en roer deur die pasta. Geblikte tuna of salm wat deeglik gedreineer is, werk ook goed. Gaar oorskietvleis soos hoender, worsies of lamsvleis kan vinnig deur die macaroni geroer word.
* Popeye se kos: Was ’n hand vol spinasieblare deeglik, sny die stingels af en soteer oor lae hitte in ’n pannetjie met ’n bietjie olyfolie. Roer deur die macaroni.
* Kombineer dié basiese resep met die basiese maalvleismengsel van Maandag, Week 1. Rasper ekstra kaas oor en sit vinnig onder die oondrooster vir ’n heerlike aandete.

Dinsdag (kosblik-idee)

Viskoekies
– genoeg vir 6

’n Heerlike en voedsame gereg. Die mengsel kry patats én aartappels in wat dit heilsamer maak. Onthou dit sommer volgende keer wanneer jy kapokaartappels maak: Patats gemeng met gewone aartappels smaak vorentoe.

• 1 groot aartappel (±250 g), geskil en in blokkies gesny
• 1 groot patat (±250 g), geskil en in blokkies gesny
• 1 x 200 g-blik gehalte-salm
• uitgedrukte sap en gerasperde skil van ’n suurlemoen
• sout en swartpeper
• 30 ml (2 e) gekapte pietersielie
• koekmeel om die koekies in te rol
• sonneblomolie vir vlakbraai.

1 Kook die aartappels en patats sag, dreineer en laat effens afkoel.
2 Meng die res van die bestanddele tot by die pietersielie deur die aartappels en patats. Moenie die mengsel te veel meng nie, anders raak dit te pap.
3 Vorm ronde viskoekies. Rol eers in ’n bietjie meel en braai dan in die olie tot gaar en goudbruin.
4 Klad op kombuispapier en laat effens afkoel voor opdiening. (Die viskoekies kan vir twee dae in die yskas gehou word.)

Heilsame snoephappie-idees

* AVOKADO is superkos vir kinders en ’n lekker middagete.
* GROENTE soos kersietamaties, klein worteltjies, mielies, ertjies en komkommerstokkies werk goed.
* SPRINGMIELIES is ’n goeie alternatief vir aartappelskyfies.
* DROËVRUGTE, neute en sade is voedsaam en uitstekende bronne van energie.

Woensdag (middagete-idee)

Spek-en-eier-nessies
– genoeg vir 4

Gebruik die ander helfte van die macaroni wat vir Maandag berei is. Gebruik die kleinste eiertjies wat jy kan kry vir dié resep.

• 1 hoeveelheid basiese macaroni-en-kaas (resep by Week 4, Maandag)
• 8 repies swoerdlose rugspek
• 4 eiertjies

1 Voorverhit die oond tot 200 °C.
2 Braai die spek tot bros en klad op kombuispapier.
3 Pak twee repies spek in elk van 4 bakkies met ’n inhoudsmaat van omtrent ’n koppie – dit moet die binnekant van die bakkie uitvoer.
4 Skep die macaroni in die spekomhulsel. Maak ’n gaatjie in die macaroni en breek ’n eier in elke gaatjie.
5 Bak tot die eiertjie gaar is. Sit warm voor.

Donderdag (kosblik-idee)

Heuning-en-piesang-brood
– genoeg vir 1 middelslagbroodjie of 6 individuele broodjies

Ons het ons broodjies in klein broodpannetjies gebak, maar jy kan die beslag ook in ’n muffinpannetjie bak. Ons het nie versiersuiker gebruik nie omdat dit mors in ’n kosblik, maar ek sluit die resep in – dis ’n heerlike, gesonde opsie vir ’n partytjiekoek.

• 125 g botter
• 30 ml (2 e) heuning
• 15 ml (1 e) lemoensap
• 50 g (½ k) sultanas
• 155 g (1¼ k) koekmeel
• 10 ml (2 t) bakpoeier
• 2,5 ml (½ t) koeksoda
• 110 g strooisuiker
• 2 eiers, liggies geklits
• 2 piesangs, fyn gemaak

Versiersuiker (opsioneel)
• 1 x 250 g-houertjie roomkaas, sag gemaak
• 80 ml versiersuiker
• 25 ml (1 e + 2 t) suurlemoensap

1 Voorverhit die oond tot 150 ºC. Spuit ’n broodpan van 19 x 9 cm met kleefwerende sproei.
2 Smelt die botter, heuning en lemoensap oor lae hitte en roer nou en dan. Voeg die sultanas by en laat afkoel.
3 Sif die meel, bakpoeier en koeksoda saam in ’n groot mengbak. Voeg die suiker, eiers en afgekoelde bottermengsel by en klits vir 3 min. met ’n elektriese klitser of handklitser.
4 Vou die fyn piesang in die mengsel in en skep in die broodpannetjie.
5 Bak vir ’n uur of tot ’n toetspen skoon uitkom. Laat die broodjie in die pannetjie afkoel.

Indien jy versiersuiker wil oorgooi
Meng die roomkaas, versiersuiker en suurlemoensap in ’n mengbak en klits tot glad met ’n elektriese of handklitser. Giet oor die broodjie, sny in skywe en sit voor.

Vrydag (middagete-idee)

Eier-en-sousboontjie-broodjie
– genoeg vir 2

Ons het ’n kampeer-roosterbroodpannetjie gebruik, maar jy kan ’n outydse jafelpan gebruik.

• 4 snye witbrood (of volgraanbrood vir ’n gesonder weergawe)
• margarien om die brood te smeer
• 60 ml (¼ k) sousboontjies
• 2 klein eiertjies

1 Verhit die pannetjie op ’n stoofplaat.
2 Smeer die brood met margarien. Sit eers die onderste sny in die pannetjie met die margarienkant na onder.
3 Skep twee lepels vol sousboontjies in die middel van die brood en versprei dit oor die hele sny. Maak ’n holtetjie in die boontjies en breek ’n eier versigtig daarin.
4 Sit die ander sny brood bo-op met die margarienkant na bo.
5 Bak vir 8-9 min. of totdat die eier gaar, maar steeds sag is.

Nog idees
* Voeg ’n repie bros gebraaide spek by.
* Gebruik oorskiethoender of lappies toebroodjieham saam met skyfies tamatie en kaas. Onthou, tamatie word baie warm en kan klein mondjies brand.

The post Kosblik-idees week 4 appeared first on rooi rose.

Genoeg vir 4

Avokadohoemoes
• hand vol kruisement
• 50 g babaspinasie
• 5 ml (1 t) komynsaad, liggies gerooster en gemaal
• 2,5 ml (½ t) gerookte paprika
• 1 knoffelhuisie, fyn gekap
• 45 ml (3 e) suurlemoensap
• 1 x 400 g-blikkie kekerertjies, gedreineer
• 1 avokado, geskil
• 15 ml (1 e) tahini
• sout en swartpeper

1 Bring ’n kastrol met water tot kookpunt.
2 Dompel die kruisement en spinasie vir 15-30 sek. in die kookwater. Dreineer en laat lê vir 1 min. in yswater.
3 Druk al die vloeistof uit en hou eenkant.
4 Meng die kruisement, spinasie, komyn, paprika, knoffelhuisie, suurlemoensap, kekerertjies, avokado en tahini in ’n voedselverwerker tot glad.
5 Geur met sout.

Krakerige antieke grane

• Meng 125 ml (½ k) heel bokwiet, 125 ml (½ k) heel gars, 125 ml (½ k) okkerneute, 125 ml (½ k) pampoensaad, 30 ml (2 e) heuning, 30 ml (2 e) olyfolie, 2,5 ml (½ t) komynsaad, liggies gerooster, 2,5 ml (½ t) gerookte paprika en 1 fyn gekapte knoffelhuisie.
• Verhit die oond tot 180 °C. Voer ’n bakplaat met bakpapier uit. Versprei die mengsel eweredig oor die bakplaat. Bak vir 30-35 min. of tot goudkleurig en krakerig.

LEES OOK: Beet-falafels met platbrode van antieke grane

LEES OOK: Dadel-en-graan-beskuitjies met botterskorsie-hoemoes

Slaai
• 4 hoenderborsies (sonder vel en been), oopgevlek
• 45 ml (3 e) olyfolie
• gerasperde skil van 1 suurlemoen
• 1 knoffelhuisie, gekap
• 10 ml (2 t) heuning
• 250 g kersietamaties
• 4 eiers, sag gekook, afgedop en middeldeur gesny (ons het die eiers vir 4 min. in borrelende water gekook).

1 Verhit die oond tot 200 °C.
2 Sit die hoenderborsies in ’n mengbak met 30 ml van die olyfolie, suurlemoenskil, knoffel en heuning. Marineer vir 30 min.
3 Verhit ’n riffelpan oor matige hitte. Braai die hoender vir 5 min. aan elke kant of totdat riffelmerke verskyn. Geur met sout.
4 Sit die hoenderborsies en kersietamaties op ’n oondpan. Sprinkel die oorblywende olyfolie oor.
5 Rooster vir 15-20 min. of totdat die vleis gaar en die tamaties liggies gerooster is.
6 Sny die hoender in dun repies. Pak die slaai in bakkies uit met die avokadohoemoes, avokado, hoenderrepies, kersietamaties, eier en krakerige grane.

The post Hoenderslaai met avokadohoemoes en krakerige antieke grane appeared first on rooi rose.

Genoeg vir 6

6 x 300 g lamskenkels
meel
30 ml (2 e) olyfolie
2 uie, gekap
4 knoffelhuisies, fyn gedruk
250 ml (1 k) rooiwyn
2 x 400 g geblikte heel tamaties
500 ml (2 k) hoenderaftreksel
15 ml (1 e) bruinsuiker
4 vars lourierblare
’n paar takkies vars tiemie

1 Strooi die meel oor die lamskenkels en skud die oortollige meel af.
2 Verhit die olyfolie oor hoë hitte in ’n groot swaarboom kastrol en braai die lamskenkels daarin vir sowat 2 min. aan albeikante, of tot hulle mooi goudbruin is.
3 Haaluit en houeenkant.Soteer die uie en knoffel in dieselfde kastrol tot sag en goudbruin.
4 Voeg die wyn geleidelik by terwyl jy deur en tyd roer. Skraap die geurige aanpaksels op die boom van die kastrol met ’n houtlepel af. Laat vir sowat 1 min. kook.
5 Voeg die tamaties, water, suiker en lourierblare en tiemie by. Sit die lamskenkels terug in die kastrol. Bring tot kookpunt, verlaag die hitte en sit die deksel op. Laat vir 2 uur stadig prut, of tot die vleis sag is en die sous verdik het. Bedien met romerige polenta of kapokaartappels

The post Stadig geroosterde rooiwyn-en-tamatie-lamskenkels appeared first on rooi rose.