Verwerk deur Catherine Schenck. Foto: Johan Wilke

Kfm het die gewilde TV-persoonlikheid Tracey Lange teruggelok radio toe en sy sal haar nuwe program, Mid-Mornings with Tracey, elke weeksdag tussen 9:00 en 12:00 aanbied.

Lees ook: Tracey Lange se stylgeheime

“Ek is mal oor Kfm se wêreldklasbenadering tot die uitsaaiwese, so toe die geleentheid opduik om my stem op ’n oggendprogram by hierdie stasie te laat hoor kon ek dit nie weerstaan nie. Ek sien uit daarna om ’n vars benadering te volg op hierdie program vir werkplekluisteraars,” sê Tracey.

Kfm-staatmaker Ryan O’Connor sal Tracey Lange volg met sy program tussen 12:00 en 15:00 en hy sal die ontbytprogram op Saterdae tussen 07:00 en 10:00 aanbied. Verder sal die Flash Drive met Carl Wastie met een uur verleng word vanaf 15:00 tot 19:00 op weeksdae en laataandaanbieder Andy Maqondwana sal nou ook Sondagoggende saamgesels tussen 07:00 en 10:00.

Vir meer nuus en inligting oor Kfm 95.4, besoek gerus www.kfm.co.za

Het jy geweet? Tracey Lange was ons voorbladgesig in ons Julie 2017-uitgawe. Loer hier agter die skerms met Tracey.

The post Tracey Lange skuif agter die mikrofoon in by Kfm appeared first on rooi rose.

Hoe beskryf jy jou modestyl?

My eie modestyl is klassiek, maar met helder kleure en ’n goeie skeut Carrie Bradshaw (van Sex in the City) veral in terme van tekstuur.

Wat is jou staatmakers vir elke dag?

• Vir elke dag in die winter: Gemaklike jeggings of skinny jeans, stewels (ek het meer as 100 pare), ’n trui of warm baadjie met ’n helder serp. Ek is ook gaande oor gemaklike sneakers.

• In die somer is ek gaande oor rokke in alle kleure en lengtes – lank, kort of midi. Almal werk vir my. Solank daar helder kleure is, is ek okay.

Foto: Corné Greeff

Wat is jou gunstelingvoorkoms vir die aand?

In die aand hou ek van ’n blink bostuk of hemp saam met ’n mooi broek.

Vir ’n rooitapytgeleentheid verkies ek enige aandrok, solank dit nie eenvoudige swart is nie. Ek gee nie om vir swart nie, maar dan moet dit patrone of iets hê.

Wat is jou gunstelingkleur?

Alle kleure, maar ek sal begin by groen, geel, oranje, turkoois en pers.

Waar koop jy graag klere vir elke dag?

Oral waar ek ’n winskopie sien! Dit help dat ek mal is oor helder kleure, so ek sien maklik iets nuuts en anders raak, iets wat ander nie noodwendig sou raaksien nie. Ek spandeer ’n bietjie meer geld op die basiese items en sal by enige plek van Woolworths tot Etselec Designs klere koop.

Van watter deel van jou voorkoms of lyf hou jy die meeste?

Deesdae my bene. As kind en tiener het ek jare lank met ekseem gesukkel en verskriklike letsels gehad. Die letsels is nie meer prominent nie en ek het ook net besluit om my nie meer daaraan te steur nie. So nou is ek tevrede met wat ek het.

Lees ook: Voorkom ’n vel-irritasie

Wat is jou gunsteling-grimeervoorkoms?

Sterk ooggrimering en die res, natuurlik.

Hoe gereeld laat doen jy jou hare?

Ek was elke tweede dag my hare, maar blaas dit eintlik nooit self nie. As gevolg van al die stilering vir Bravo! se shoots, verkies ek om op die dae wat ek nie nodig het om my hare te doen nie, dit natuurlik te laat droog word. Dit help dat dit nie oorstilleer word nie en help met die glans. Een keer elke tweede maand laat ek dit kleur – ja, ek is maar net 32 en alreeds lekker grys. Dit pla my nie, maar ek voel dis nog nie heeltemal die tyd om daardie kleur té prominent te dra nie, ek weet my tyd sal kom.

Wat is jou beste stylwenk?

Dra klere waarin jy gemaklik voel. As dit te styf, te los, of enigiets ‘te’ is, sal jy ongemaklik voel en dit sal wys.

Kleur is koning vir Tracey. Hierdie mooi rooi rok is van Jacques LeGrange Couture.

The post Tracey Lange se stylgeheime appeared first on rooi rose.

Vertel ons meer van Relate Bracelets. Hoe het die inisiatief ontstaan?
Die doel was om ’n volhoubare oplossing te vind wat mense in nood kan help met ’n geleentheid om hul omstandighede te verbeter en om van ons land se probleme aan te spreek. Dit skep werksgeleenthede en hierdie individue verdien nie net vir ’n rukkie geld nie, maar hulle kan ook werk na onafhanklikheid toe. Relate gaan nie oor wins nie, elke sent word teruggeploeg in diegene wat die bandjies maak en dan ook in die verskillende liefdadigheidsorganisasies.

Waarvoor staan Relate? 
“Relate” is ’n woord met dieper betekenisse wat direk verband hou met dit waarvoor die armbandjies staan. Betekenisse soos “verband hou” en “aansluiting vind” en “verhoudings” en “verwantskap”. Relate bind mense saam en die armbandjies is ’n tasbare ding – iets wat wys dat mense weet hoe om hul liefdadigheidsbydraes op ’n verantwoordelike manier te maak om te weet dat elke sent gebruik word om goeie dinge te probeer doen.

Word die armbandjies vir ander vorme van liefdadigheid as Movember gebruik? 
Baie organisasies wat geld insamel vir liefdadigheid maak gebruik van Relate Bracelets om die armbandjies te maak, en dit word dan in verskillende winkels verkoop, maar is ook beskikbaar op Relate se webwerf. Tussen April 2010, toe Relate begin het, en September 2014, kon Relate R21.5 miljoen belê en skenk. Hulle het 60 liefdadigheidsorganisasies ondersteun en meer as 1.4 miljoen armbandjies wêreldwyd verkoop. Daagliks word 300 mense bemagtig om ’n inkomste te verdien met die maak van die armbandjies.

Wat is jou grootste droom vir liefdadigheid? 
Liefdadigheid kan so maklik iets wees wat jy vandag vir mense gee en môre van vergeet. Maar Relate maak seker dat die mense nie van ‘handouts’ lewe nie, hulle ‘vang self hulle vis’ en verseker sodoende dat hulle elke dag kan eet. Relate doen dit so goed en dis hoe ek voel elke liefdadigheidsorganisasie behoort te wees.

Waarom is liefdadigheidsveldtogte vir jou so belangrik?

Sodat ons kan onthou dat ons nie alleen hier is nie, dat daar so baie mense is wat nie in staat is om net die basiese in die lewe te kan bekostig nie.

The post Ons gesels met Tracey Lange van Bravo! appeared first on rooi rose.