As jy terugdink aan jou skooldae, is daar altyd ’n paar dinge wat uitstaan. Die hoogtepunte. Die tawwe tye. Daardie een onderwyser wat uit hul pad gegaan het om vir jóú die pad na ’n blink toekoms oop te maak. Die goeie ou dae van skooldanse, vriendskappe, eksamens, mislukkings en suksesse.

Sommige skole het al hierdie eienskappe, maar ook ’n donker kant wat vir leerders die lewe ekstra moeilik maak. In die dapper nuwe kykNET-dramareeks, Juffrou X lê die leerders van Victory Heights Hoërskool in die Suid-Kaap se toekoms aan die ander kant van struikelblokke, soos armoede, bendes, misdaad en dwelms. Gelukkig is daar ’n handjie vol onderwysers en mense in die gemeenskap wat alles sal doen om die kaf van die koring te skei en daardie klippe vir hulle uit die pad te rol.

Trix Vivier, bekend vir haar oortuigende rolle in Trackers, Waterfront, Legacy en Fraksie is Juffrou X oftewel Inge Bester, die hardekwas-wiskunde-onderwyseres wat aan haar werk en haar kinders toegewyd is. Sy kom dalk sinies en outoritêr voor, maar in haar hart is sy ’n idealis wat potensiaal in elke kind sien.

Wanneer ’n nuwe, dodelike dwelm die plattelandse dorp tref, word dit ’n saak van lewe en dood en sy bevind haarself in die middel van ’n oorlog, met die skool as prys. Kort voor lank begeef sy haarself in die wêreld en rol van ’n vigilante, totdat sy sélf moet veg vir haar lewe.

Wie kan sy vertrou? En wie gaan uiteindelik oorwin?

Juffrou X wys ’n outentieke kant van die onderwys wat in min Suid-Afrikaanse stories gesien word. Die reeks, met draaiboek en regie deur Hertzogpryswenner Tertius Kapp, bestaan uit agt episodes.

Karlien Meiring het met Trix oor die aangrypende reeks gesels wat “die snykant van skole en onderwysers wat ’n verskil probeer maak,” wys.

Wat het jou na die rol van Inge Bester in Juffrou X aangetrek?

Dis eenvoudig: Tertius Kapp se skryfwerk, en die feit dat ek nog nooit ’n anti-hero-vigilante-onderwyseres gespeel het nie.

Wat hoop jy sal kykers die meeste van jou karakter en die storie onthou?

Geloofwaardigheid. Ek hoop hulle herken nie vir Trix daarin nie, maar sien slegs vir Inge. Dis hoe ek op die ou einde van die dag ’n indruk sal maak en mense wil raak. Verder hoop ek dat die feit dat Suid-Afrika se kinders meer verdien as wat hulle kry, mense bybly.

Wat het jy geleer oor die toewyding en opofferings van werklike opvoeders terwyl jy ’n onderwyser vertolk het?

Ons het die eerste twee weke by ’n hoërskool in Wildernis deurgebring. Ek het elke dag 14 dae lank die daaglikse doen en late van die onderwysers dopgehou. Ek het besef dat die storie wat ek uitbeeld deur my verbeelding te gebruik, húl werklikheid is. En so ’n werklikheid kos toewyding en baie, baie passie. Anders sal ’n mens dit nie maak nie.

As jy nadink oor jou eie skooldae, was daar ’n onderwyser wat ’n beduidende impak op jou gehad het?

Ja, Juffrou Mauermann, my Engels-huistaalonderwyseres. Dis in haar klas waar ek leer debatteer, leer krities dink en myself deur digkuns ontdek het. Ek het ook in haar klas besef dat ek ’n groot liefde vir skryf het – iets wat ek nie vantevore van myself geweet het nie.

Watter tipe student was jy op hoërskool?

Ek was iets van alles: aanvanklik cheeky en vol selfgeloof, toe rebels en skynbaar verlore tot ek op hoërskool toneel gevind het. Daarna was ek absoluut toegewyd en vasbeslote om A’s te kry en ’n prefek te word.

Juffrou X wys Dinsdae om 20:00 op kykNET (DStv-kanaal 144) en is ook op DStv Stream en CatchUp beskikbaar.

Lees ook: Vyf-vinnige-vrae-Vrydag met liedjieboer, Anton Goosen – oor sy nuwe musiek

The post Vyf-vinnige-vrae-Vrydag met Trix Vivier oor die dapper dramareeks ‘Juffrou X’ appeared first on rooi rose.

Dink terug aan jou skooldae, en daar is altyd ’n paar dinge wat uitstaan. Die hoogtepunte. Die tawwe tye. Daardie een meneer of juffrou wat uit hulle pad gegaan het om vir jóú die pad oop te maak. Die goeie dae van skooldanse, vriendskappe, eksamens, mislukkings en suksesse. In kort: ’n skool wat jou vir die toekoms voorberei.

Sommige skole het al hierdie kwaliteite, maar ook ’n donker kant wat vir leerders die lewe ekstra moeilik maak. In die grinterige nuwe kykNET-dramareeks, Juffrou X lê die leerlinge van Victory Heights Hoërskool in die Suid-Kaap se toekoms aan die ander kant van struikelblokke soos armoede, bendes, misdaad en dwelms. Gelukkig is daar ’n handjievol mense wat alles sal doen om die kaf van die koring te skei en daardie klippe vir hulle uit die pad te rol.

Juffrou X wys ’n outentieke kant van die onderwys wat in min Suid-Afrikaanse stories gesien word. Die reeks, met draaiboek en regie deur Hertzogpryswenner Tertius Kapp, bestaan uit agt episodes.

Wanneer ’n nuwe, dodelike dwelm die plattelandse dorp tref, word dit ’n saak van lewe en dood. Juffrou X, die wiskunde-onderwyseres (vertolk deur Trix Vivier), bevind haarself in die middel van ’n oorlog, met die skool as prys. Al dieper begeef sy haarself in die wêreld en rol van ’n vigilante, totdat sy sélf moet veg vir haar lewe. Wie kan vertrou word? En wie gaan uiteindelik oorwin?

Deel van die ster-rolverdeling is De Klerk Oelofse as Cameron le Roux, die nuwe, idealistiese Afrikaans-onderwyser. Hy was voorheen by ’n privaatskool in diens, maar besef vinnig daar is twee wêrelde wanneer dit by skole kom…

Ons het met De Klerk oor die aangrypende reeks gesels wat “die snykant van skole en onderwysers wat ’n verskil probeer maak,” wys.

Wat het jou na die rol van Cameron le Roux in Juffrou X aangetrek?

Cameron was vir my interessant in terme van sy naïwe aanslag tot ’n verskil in sy leerders se lewens maak. Hy hoop dat digkuns en storievertelling genoeg van ’n ontsnapping van die uitdagings in hierdie kinders se daaglikse lewe kan bied. Hoewel dit ’n baie romantiese gedagte is, word die omstandighede waarin hierdie kinders grootword dikwels onderskat. Ek vermoed nie net deur Cameron nie, maar ook deur Jan Alleman.

Wat het jy geleer oor die toewyding en opofferings van opvoeders terwyl jy ‘n onderwyser vertolk het?

Wel, albei my ouers was onderwysers, so ek het grootgeword met daai toewyding en opofferings. Ek dink nie dis maklik om ’n onderwyser te wees nie. Ek dink een van die grootste uitdagings is om die potensiaal in elke leerder te sien en dit dan te koester.

Wat hoop jy sal kykers die meeste van die storie onthou?

Ek dink die reeks het tog ’n tema van opstaan teen jou boelies. Dit gee dalk net iemand daar buite die moed om dieselfde te doen.

As jy oor jou eie skooldae nadink, was daar ‘n onderwyser wat ‘n beduidende impak op jou gehad het?

My Gr. 9 Afrikaanse meneer, Marius Botha, het nogal ’n indruk op my gelaat. Hy het my op sy stil manier baie bewus gemaak van die waarde en impak van stories, nie net d.m.v voorgeskrewe werk nie, as jy gelukkig was, het hy ’n paar van sy eie verhale gelees.

Watter tipe student was jy op hoërskool?

My pa sê altyd ek was nie juis ’n skoolvriendelike kind nie. Ek het maar vir pouse en interaksie met mense geleef. As ek moet eerlik wees, was ek nie veel met my skoolwerk gepla nie. Nie dat dit iets is om op trots te wees nie. Ek het wel op universiteit akademies goed presteer, wat dalk vir ‘n mens iets sê oor die waarde van ’n vakgebied kies waarin jy werklik belangstel.

Wat was vir jou van die lekkerste aspekte van Juffrou X se verfilming?

Om in Wildernis te kon verfilm was vir my die lekkerste. Die gemeenskap het ons met ope arms ontvang, soveel so dat ek en Brendan Daniëls een middag saam met die Wildernis Rolbalklub ’n paar balle gaan afstuur het!

‘Juffrou X’ wys Dinsdae om 20:00 op kykNET (DStv-kanaal 144) en is ook op DStv Stream en Catch Up beskikbaar.

Lees ook: Die twee kante van Luan Jacobs in ‘Diepe waters’

The post De Klerk Oelofse gesels met ons oor ‘Juffrou X’ en die impak van onderwysers appeared first on rooi rose.