Foto’s: Instagram/ Natasha Joubert / Bahama Burgundy Photography

Klink ‘n glasie op meneer en mevrou Vermaak!

Die pragtige Natasha Joubert en haar hoërskoolliefde, Enrico Vermaak, het op Sondag, 16 Maart, afgehaak.

En ná dae van afwagting het die voormalige Mejuffrou Suid-Afrika uiteindelik foto’s en ’n pragtige video van hulle sjiek sprokiestroue gedeel.

Die swierige seremonie het in die Kaapse Wynlande by die luukse Cavalli-landgoed plaasgevind.

Natasha, wat die eerste Mej. SA was wat tydens haar termyn verloof geraak het, het Woensdagaand ‘n kort video van die groot dag op sosiale media gedeel.

In die video kry kykers ‘n vinnige blik op haar drie glansryke trourokke, almal ontwerp deur Jolache Couture, en ‘n asemrowende onthaal wat soos iets uit ‘n sprokie lyk. Pragtige wit blommerangskikkings en kandelare het die venue versier, terwyl lang tafels met sagte kerslig ’n intieme, romantiese atmosfeer geskep het. Verder sien ons hoe die skoonheidskoningin met haar manlief dans, ’n sjampanjetoring geniet en hul indrukwekkende seslaag-troukoek sny.

KYK | Natasha en Enrico se stylvolle sprokiestroue

 

View this post on Instagram

 

A post shared by Natasha Vermaak (@natasha_joubert)

Die paartjie se liefdesverhaal het in hul hoërskooldae by Hoërskool Eldoraigne in Pretoria begin. Enrico, ‘n projekbestuurder, het in Februarie verlede jaar Natasha op ‘n seiljag in Kaapstad verras waar hy haar die groot vraag gevra het.

Op die oggend van haar troudag het Natasha haar opgewondenheid met haar Instragram-volgelinge gedeel deur te skryf: “Ek kan nie wag om jou vandag my man te noem nie,” terwyl Enrico met sy eie romantiese boodskap gereageer het: “Vandag trou ek met my beste vriend, my grootste liefde en my vir altyd.”

View this post on Instagram

 

A post shared by Natasha Vermaak (@natasha_joubert)

Lees ook: Margaret oor selfvertroue en snedige kommentaar: ‘Ek’s benoud vir wat mense oor my gaan skryf’

The post KYK | Natasha Joubert deel foto’s van sprokiestroue! appeared first on rooi rose.

Stof jou dansskoene af vir ’n spoggerige geleentheid! Binnelanders se geliefde paartjie, dr. Tertius Jonker (Reynardt Hugo) en Tracy Smit (Melinda Viljoen), se langverwagte troudag breek Vrydag die 7de Februarie aan.  

Tertius en Tracy se liefdespaadjie lees soos ’n sprokiesverhaal, al was dit nie altyd maanskyn en rose nie. Aanvanklik was hulle net goeie vriende, toe woonstelmaats wie se gevoelens vir mekaar geleidelik begin posvat en groei het – nie dat hulle dit aanvanklik aan hulleself, wat nog te sê mekaar, erken het nie!  

Maar die liefde laat hom nie voorskryf nie en het gelukkig oorwin, ten spyte van haas onoorkomelike struikelblokke. ’n Onverwagse swangerskap het byna hulle liefdesbootjie op die rotse laat beland, veral na Tracy se onthulling dat dr. Conrad Bester (Hykie Berg) met wie sy in ‘n vorige verhouding was, die pa is en nie Tertius nie. Tracy en die baba se verdwyning is gevolg deur skokgebeurtenisse, maar dit het een voordeel ingehou: Al die betrokke partye moes noodgedwonge die strydbyl begrawe. Nou maak Tertius en Tracy vir klein Leah (Liebe Viljoen) saam groot, sonder om die belangrike rol wat Conrad in sy dogtertjie se lewe kan en wil speel, gering te skat.  

Lees ook: Die sosiale media-ster Ruben Lambrechts gesels oor sy kaalvoet-plaaslewe en vreemde versoeke

Die tyd het aangebreek vir Tertius en Tracy om die knoop deur te haak.  

Elsje Stark, ’n Binnelanders–vervaardiger, sê oor die troue: “Die rok hang teen die kas, die troukoek is bestel – kortom, alles is gereël. Die bruidegom beplan selfs ‘n verrassing vir die bruid! Nou moet almal net duim vashou alles verloop volgens plan…” 

Binnelanders-kykers word hartlik uitgenooi na die geleentheid. Teken dit in jou dagboek aan: Vrydagaand, 7 Februarie en Maandagaand, 10 Februarie om 19:30, net op kykNET, kanaal 144. 

Lees ook: Vyf-vinnige-vrae-Vrydag met die mooimaakprogram ‘Stralend’ se Fafa de Klerk

The post Maak gereed vir Tertius en Tracy se ‘Binnelanders’-bruilof! appeared first on rooi rose.

Alle troues is op hul eie manier anders, maar almal wil hê hulle s’n moet die meeste van almal s’n uitstaan.

Nicola Woodgate, wat aan die hoof van trousake by ANEW Hotels & Resorts staan, deel bietjie inspirasie vanuit huidige toptrouneigings sodat jy seker kan maak jou troue is vars, modern en innoverend: 

Trouskilderye tydens die geleentheid 

Om skilderye te laat maak terwyl die troue aan die gang is, is tans ’n groot neiging. Kunstenaars soos Danielle Jordaan daag vroeg vir jou troudag op om die hele seremonie op doek vas te vang. Teen die einde van die aand, het sy ’n uitsonderlike skildery klaargemaak wat vir blywende herinneringe sal sorg. Sekere paartjies kies klein sketse of skilderye met waterkleure vir hul gaste om huis toe te neem. Hierdie kunswerke dien as spesiale aandenkings, om die herinnering vir nog baie jare lank lewendig te hou by dié wat dit bygewoon het. 

(Foto: Danielle Jordaan)

Draai jou blomme kop onderstebo 

Een van die grootste neigings tans is dakinstallasies van blomme wat oor die dansvloer neerreën. Die dansvloer word in ’n magiese vertoning van feetjieliggies en blomme wat van bo af hang verander. Dit vervang die tradisionele roete om ’n blom op elke tafel te sit. Feetjieliggies is steeds ’n groot gunsteling, en paartjies kies gereeld ’n baldakyn met ligte om die hele dak mee te dek om die grootste effek te skep. 

Die koek is dood, lank lewe poeding! 

Die tradisionele troukoek het plek gemaak vir ’n heerlike poedingtafel wat met happiegrootte lekkernye spog en in almal se smake sal voorsien. As jy die tradisie wil behou, kan jy steeds ’n kleiner koek sny terwyl daar ’n soete fees is van bruintjies, makrolletjies en sjokolademousse wat in klein koppies bedien word. Jy kan ook iets hiervan vir jou gaste verpak om huis toe te neem. 

Praktiese dankiesêgeskenke 

Dankiesêgeskenke het ’n heerlike wenteling gemaak: Baie paartjies kies eetbare lekkernye wat met hul gaste se name verpersoonlik is. Dit dien dan sommer ook as oulike plekhoukaartjies. Aandenkinge in die vorm van botteloopmakers of klein flesse wat heerlike, tuisgemaakte, ingelegde goedere bevat, vir seker dat jou gaste met ’n bruikbare aandenking van die dag wegloop.  

Hou jou trouruiker 

Die tradisie om jou ruiker in die lug te gooi, het ietwat in moderne troues verander. Pleks daarvan dat hulle hul ruikers gooi, kies bruide nou om eerder hul strooimeisies se ruikers te gooi en hul eie as aandenking te hou – deur dit of in kuns te skep wat ewig sal hou deur dit te laat druk of om dit net so te hou. Die bruid heg sentimentele waarde aan die ruiker. 

Sê ja vir die rok! 

Die rokke in Aspoestertjiestyl het plek gemaak vir moderne silhoeëtte. Moue wat losgemaak kan word, word al hoe gewilder en bied verskeidenheid en ’n tikkie elegansie. Sluiers word minder algemeen aangesien die koste relatief is tot die kort tydperk wat dit vir die diens of foto’s gebruik word.  

Lees ook: Berei so voor vir jou troue: Kenners se top-skoonheidswenke

Individuele styl  

Strooimeisies wat dieselfde rokke dra, is uit. Elke strooimeisie dra ’n rok wat by hul persoonlikheid en figure pas, wat die moderne gevoel komplementeer van ’n troue wat individualiteit en kreatiwiteit voorstaan. 

’n Lang kuier en beloftes wat privaat uitgeruil word 

Die jongste neiging is dat paartjies nes Amerikaners geleenthede die aand voor die troue hou. Hierdie gesellighede het gewoonlik ’n tema, soos die sewentigerjare of ’n wilde safari. Dit skep ’n lekker atmosfeer veral vir gaste wat ver gereis het. Paartjies kies ook meer intieme byeenkomste met minder mense wat dit bywoon sodat daar ’n groter begroting is vir meer uitspattige besonderhede, soos uitvoerige blommerangskikkings. Nog iets wat kop uitsteek is om voor die seremonie reeds troubeloftes te ruil. Sodoende kan paartjies uit die hart praat sonder om mekaar te sien wat ’n kragtige, intieme oomblik skep. Sommige paartjies kies om briefies op die dag uit te ruil om hul gevoelens vir mekaar uit te druk en om enige senuwees voor die troue hok te slaan. 

Mediterreense gevoel 

Onlangs is daar ’n groot neiging in troues spesifiek in die omgewing van KwaZulu-Natal om dekor in ’n Mediterreense styl te gebruik. Tafels word in blou en wit met Mediterreense sweempies gedek. Bougainvilleas verleen ’n spatsel kleur en romanse aan die toneel. Baie bruide kies ook ’n moderne minimalistiese, monochromatiese voorkoms met wit en swart as dekortema.  

Lees ook: 5 dinge wat niemand jou vertel voor jy trou nie

The post Van ruikers tot poedingtafels: Hier’s die nuutste trouneigings appeared first on rooi rose.

Julle is verlief en dis al wat nou saak maak. Julle het mekaar met sterre in die oë die jawoord gegee en julle daarmee tot ’n lewenslange huwelik vol liefde en geluk verbind. Die fokus is op die troue en julle bestee soveel tyd en energie daaraan; praat ure lank daaroor; beplan alles haarfyn. Dan is dit maklik om te dink die huwelik is ’n lang, romantiese en gelukkige wittebrood, want dis hoe alles nou voel en lyk.

Maar vir ’n lewenslange huwelik is daar is veel meer voorbereidings nodig as net die trourok, die gastelys, die wittebrood en waar julle gaan bly. Doen julle dit nie, kan daardie liefdesvlammetjie wat nou so passievol en helder brand binne ’n jaar of twee taan of selfs uitdoof.

As mense maar soveel tyd, aandag, energie en selfs geld kon bestee om hulle op die huwelik voor te berei, sou baie paartjies die huweliksgeluk wat hulle so begeer wel ervaar. Voor die troue is juis die tyd om die fondament vir ’n gelukkige huwelik te lê.

Baie paartjies betree die huwelik onvoorbereid. Hul verwagtinge is onrealisties, hulle ken mekaar nie werklik nie en hul rolle en doelwitte is ongedefinieerd. Hulle het dikwels ook nie die emosionele vaardighede nie, of het nie rolmodelle gehad om sinvol vir mekaar te kan gee wat werklik nodig is om die verhouding te laat werk nie.

Paartjies moet besef die liefde verg konstante aandag en werk. As jy verlief is, word die verhouding deur romantiese liefde gedryf. Cornelia Swart, ’n huweliksterapeut, onderskei tussen romantiese liefde, vriendskapsliefde en toewydingsliefde.

Navorsing toon dat die aanvanklike romantiese fase veral in die eerste maande deur talle bedwelmende hormone aangehelp en aangevuur word. Testosteroonafskeidings verhoog mans en vroue se seksuele aangetrokkenheid en behoefte. Dopamien en norepinefrien gee verhoogde obsessionele gevoelens van vreugde en ekstase. Dan bewerk fenieletielamien ’n behoefte aan nabyheid, en oksitosien en vasopressien gee ’n kalm, hegte en intieme band soortgelyk aan wat ’n borsvoedende ma en haar baba ervaar. Die afskeiding van dié hormone bring aanvanklik intense gevoelens van verliefdheid, wat mense se oordeel en gedrag verander. Maar dis ongelukkig tydelik, want die intensiteit daarvan neem binne die eerste twee jaar dramaties af.

In die romantiese fase ervaar mense ’n euforiese, energieke en passievolle verbintenis. Hulle het verhoogde seksuele gevoelens en die geliefde oorheers hul emosies en gedagtes. Hulle gee hul beste self vir die ander een en sien die beste eienskappe van die geliefde raak.

Cornelia sê ’n verhouding is in die moeilikheid as romantiese liefde die enigste grondslag is vir ’n paartjie se besluit om te trou. Hulle moet ook vriendskapsliefde en toewydingsliefde ontwikkel en ervaar.

In vriendskapliefde gaan dit daaroor dat die paartjie dinge deel, dit geniet om dinge saam te doen en sonder pretensie kan speel. Hulle deel hul drome, vrese, mislukkings en hoogtepunte met weerlose eerlikheid met mekaar. Hulle heg waarde aan hul maat se mening en perspektief en gee werklik vir die ander een se welstand om. Hierdie liefde maak die huwelik gesond en gelukkig.

In toewydingsliefde gaan dit oor die wilsbesluit wat paartjies neem om permanensie aan die verhouding te gee en nie net oor gevoelens nie. Dit gaan oor meer as net ek of jy, dit gaan oor óns. Dit gaan oor volle toewyding aan getrouheid; dat ons permanent net aan mekaar behoort. Hierdie liefde laat die verhouding hou.

Mense in die romantiese staat van verliefdheid word verswelg deur die emosie daarvan en bestee nie altyd tyd daaraan en kry genoeg afstand om eerlik te besluit of die maat reg vir jou is nie. Dis belangrik om te weet wat die huwelik vir elkeen van julle beteken. As jy twyfel, of ander waarsku jou, moenie jou twyfel of die waarskuwings sommer in die wind slaan nie. Praat met mense en kundiges oor jou twyfel, of woon saam ’n kursus by.

Gevaartekens vir ’n langtermynverhouding

• Alkohol en middelmisbruik
• Fisieke geweld en mishandeling
• Beherende gedrag – jy mag nie dit of dat doen nie
• As mense nie vriende het nie, of glad nie met hul familie en kollegas oor die weg kom nie
• As hulle glad nie ’n werk kan hou nie
• Wanneer daar emosionele of persoonlikheidspatologie is wat nie behandel word nie, en waarin hulle geen insig het nie.
Die fisieke wys en ervaar van liefde en eerlikheid is belangrike boustene om enige verhouding te laat werk. ’n Paartjie moet soveel inligting moontlik met mekaar deel. Hulle moet sonder om vir die ander persoon se reaksie te vrees eerlik kan wees oor hul emosies, hul gewoontes, hul voorkeure en afkere, hul finansies, hul vriendskappe en ander verhoudings, hul verlede, hul daaglikse aktiwiteite en hul planne vir die toekoms.

Kry vooraf uitsluitsel hieroor

• ’n Huwelikskontrak: Gaan spreek saam ’n kundige met ’n regsagtergrond wat goeie leiding kan gee, want elke paartjie se omstandighede is uniek met unieke behoeftes en eise. Hoe lyk die kontrak rakende die besit van eiendomme, motors, beleggings, geld?

• Finansies: Dis dikwels ’n bitter strydpunt in huwelike. Hoe werk ons begroting? Waaraan en hoe bestee ons geld? Wie beheer die finansies, of watter deel van die finansies? Watter bates en hoeveel skuld het elkeen? Een bankrekening of twee? Watter betekenis heg julle aan geld en waarvoor dit gebruik moet word?

• Kinders: Wil julle kinders hê? Hoeveel? Wanneer? Hoe gaan julle hulle grootmaak? Volgens watter waardes en watter ouerskapstyl? Wil julle jul loopbane opoffer om meer tyd saam met die kinders deur te bring? Wie gaan dit doen en op watter grondslag?

• Aktiwiteite wat julle saam gaan doen: afsprake net vir julle twee? Tye met familie en kinders, religieuse aktiwiteite, projekte, sport en ander aktiwiteite?

• Aktiwiteite waar julle mekaar ruimte gee om afsonderlik te doen: werk, sport, verdere studie, ontspanning, kuier met eie vriende?

• Elkeen se lewenstyl en gewoontes: Hoeveel tyd bring elkeen voor die televisie, die rekenaar, iPad, of op die foon deur? Is rook en drankgebruik vir jou aanvaarbaar? Hoe dink julle oor gesondheid, kos en oefening?

• Verwagtinge en denke oor seks: Hoe dink en voel julle oor ander seksuele verhoudings – is dit aanvaarbaar of taboe? Bespreek kwessies soos masturbasie, pornografie, ander seksuele fantasieë en praktyke. Wat is regtig jul seksuele behoeftes, voorkeure en wat is vir elkeen lekker? Wie doen die aanvoorwerk? Wat is jou maat se seksuele verlede en watter impak kan dit op die verhouding hê?

• Die verlede: Die huis waarin elkeen grootgeword het; die verhouding met die ouers en die impak daarvan op elkeen; vorige verhoudings; finansiële en werksgeskiedenis; mediese en psigiatriese gesiedenis.

• Die rol en verhouding met ouers en skoonouers: Hoeveel tyd gaan julle saam met hulle deurbring en wanneer. Wat is ouers en skoonouers se verwagtinge van julle, en wat is jul verwagtinge van hulle?

• Verwagtings oor huishoudelike take en rolle: Wie gaan wat doen? Hoe raak dit elkeen se beroep en ambisie? Wat is verwagtinge oor die styl, netheid en organisasie van die huis?

• Kommunikasie, waardes en beginsels vir jul huwelik: Hoe gaan julle verskille en konflik hanteer? Kan elkeen foute erken en jammer sê, of speel een of albei manipulerende speletjies? Hoor en verstaan julle mekaar?

• Godsdiens: Kan julle oor jul geloof en spiritualiteit praat en mekaar ruimte daarvoor gee?

• Behoeftes: Wat is die maat se primêre en emosionele behoeftes? Wat is sy of haar liefdestaal?

Hierdie besprekings help ’n mens ook om die verhouding se sterktes en potensiële gevare (of groeigebiede) te identifiseer. Hierdeur ontwikkel julle openheid en bepaal julle reeds voor die huwelik die beginsels vir jul samesyn. Dis baie makliker om oor hierdie goed te onderhandel as julle op ’n liefdevolle en positiewe plek in die verhouding is. Dit voorkom konflik en onmin en leer julle om mekaar met goeie kommunikasievaardighede in ag te neem. Dit verseker ook dat julle nie met onrealistiese verwagtinge in die huwelik instap nie.

In verliefdheid bespreek mense dikwels nie die dinge nie omdat alles dan so goed gaan en so lekker en reg voel. Of hulle dink dit sal klink of hulle die ander een nie vertrou nie en dan bespreek hulle nie belangrike kwessies nie. En dit veroorsaak juis later bittere ongelukkigheid en konflik.

’n Huwelikvoorbereidingskursus is van onskatbare waarde en ’n groot geskenk wat ouers hul kinders of ’n paartjie mekaar as trougeskenk kan gee.

’n Goeie kursus sal verseker dat al die kwessies hanteer word. Dit voorkom konflik en leer hulle om konflik te hanteer. Dit bemagtig die paartjie om die vaardighede te ontwikkel om doeltreffend met mekaar te kan kommunikeer. Dit gee hulle vaardighede om die gevoel van liefde lewend te hou. En dit gee aandag aan hul vrese of die huwelik regtig kan werk.

Cornelia Swart sê die belangrikste dinge wat paartjies moet leer, is om werklik na mekaar te luister, werklik hul emosies en verwagtinge te kan deel en mekaar waarlik te ken. Wanneer mense verskil, hoor hulle dikwels nie wat die ander een sê en voel nie. Hulle wil net hê die ander een moet soos hy voel en dink. Emosies word ontlaai en bestuur as elkeen ervaar dat hy gehoor word en dat daar ruimte en erken-ning vir elkeen se mening, behoeftes en perspektief is.

Berei jou vir die huwelik voor

• Woon ’n huweliksvoorbereidingskursus by of gaan spreek saam ’n huweliksterapeut of sielkundige en maak seker dat julle goeie kommunikasievaardighede ontwikkel, en mekaar werklik ken en verstaan.
• Lees saam en bespreek boeke oor die huwelik en voorbereiding vir die huwelik, of kyk saam na sulke video’s.
• Vul huweliksvoorbereidingsvraelyste soos © Roy Sheppard 2009 Pre-Marriage Due Diligence Checklist eerlik in en bespreek dit met mekaar. Dis gratis op die Internet beskikbaar.
• Voer eerlike dieptegesprekke oor die huwelik: oor jul verwagtinge, verantwoordelikhede en rolle.
• Spreek professionele mense oor regs- en finansiële aspekte soos die huwelikskontrak, finansiële beplanning en besluite, polisse, testament en eiendombestuur.

Boeke of artikels om te lees

• All-in-One Marriage Prep deur Suzanne M Alexander
• 365 Questions for Couples deur Michael J Beck en Seanna Beck
• The Hard Questions: 100 Essential Questions to ask before you say ‘I do’ deur Susan Piver

Huweliksvoorbereidingskursusse

• Imago-terapiekursusse
• Lewensverryking Seminare
• Emotional focused couple therapy
• Emotional Centred Couple therapy
• Eie ontwikkelde kursusse deur huweliksterapeute soos Cornelia Swart Telnr.083 6255 685 / www.premaritalcounselling.co.za

Maak net seker dat die persoon wat die kursus aanbied ervare en goed opgelei is.

Jy moet vooraf weet of julle dinge kan oplos en uitpraat, of anders moet jy werklik baie katvoet wees vir ’n huwelik… jakkals verander nie sommer van haar, streek of kleur nie. Die eienskappe wat verhoudinge maak werk, is respek, eerlikheid, betroubaarheid, vertroue, getrouheid, hulpvaardigheid, openheid, goedharigheid en dankbaarheid. En die dinge wat verhoudinge vernietig is voortdurende kritiek, minagting, vernedering, blamering, beheer, aggressiewe uitbarstings en emosionele en fisieke ignorering en onttrekking.

Dis so belangrik dat huweliksmaats aan mekaar moet sê waarom hulle mekaar kies. Wat dit is wat jou vir my so spesiaal maak, dat ek niemand anders begeer nie! Wat waardeer ek. Wat bewonder ek … wat is dit van jou wat my betower! En dat ek in hierdie verhouding myself en my toekoms en geluk in jou hande vertrou.

Die seksualiteit en die passie in ’n verhouding verander. Die uitdaging is om ’n balans te vind tussen ’n gesonde afstand en konneksie met mekaar, om nuut en begeerlik vir mekaar te bly en voortdurend romantiese en intieme situasies te skep. In die volhoudende intieme gesprekke, fisiese liefdesrituele en deel met mekaar lê die geheim wat jou huwelik sal maak werk … as albei na jare steeds geliefd voel … dan bly die engele sing, die sterre skyn … die glimlag in ons oë en om ons mond en die hemel in ons huis, bed en harte! Dan verstaan ons iets van die ewigheid en die hemel!

Lees ook: Swaai uit vir dié slaggate in jou verhouding

The post Vir ewig en altyd? Lê die fondament vir ’n gelukkige huwelik appeared first on rooi rose.

Die egpaar, wat die eerste keer in 2019 ontmoet het, het in Junie verlede jaar verloof geraak terwyl hulle op safari was, net drie maande voordat die Bokke na Parys vertrek het vir die Wêreldbeker-rugbytoernooi, volgens The Citizen. Holly is ‘n sjef en volgens haar Instagram-biografie, ook ‘n dermgesondheidspesialis.

Sy het pragtige foto’s van hul spesiale dag met die skilderagtige berge van die Wes-Kaap as agtergrond, op sosiale media gedeel.

Die troue, wat by ’n onbekende plek in Franschhoek plaasgevind het, is volgens Maroela Media deur voormalige Springbokkampioene, Steven Kitshoff, Jesse Kriel en Schalk Britz, asook die miljardêr-sakeman Johann Rupert bygewoon.

Lees ook: Ontmoet die Springbokke se ‘bokkies’

Die nou-getroude paartjie, wat vir byna twee jaar aan hul huis in die Paarl se Val de Vie-landgoed gebou het, het in Mei verlede jaar in hul droomhuis ingetrek. Holly het die goeie nuus met hierdie byskrif op sosiale media gedeel:

“Om ’n huis van nuuts af te bou is nie ‘n maklike taak nie, maar as jy die regte persoon aan jou sy het en ’n ervare span het wat jou idees in plek sit, kan jy werklik iets heel uniek skep.”

“Ek droom al jare lank oor hierdie huis se ontwerp en dit is werklik alles wat ek my voorgestel het en meer. Ek voel baie geseënd om hierdie spesiale plek my huis te kan noem.”

Wie is volgende?

Die volgende Bok-bruidegom blyk Manie Libbok te wees. Die Springbok-losskakel en sy verloofde, Verna Arries, het onlangs foto’s van hul ram- en hennepartytjies op sosiale media gedeel.

Hooffoto: Instagram / @hollyclareleroux @riesography_

Lees ook: Faf word ‘n pa! Kyk na Miné se groen en goue babatee

The post KYK: Springbok Willie le Roux en sy Holly sê ja in Franschhoek appeared first on rooi rose.

Trouklokke lui vir twee jong dames, Ankia en Tilana, wat onlangs die troue van hul drome gewen het, ter waarde van ‘n allemintige R464 600.

Ankia en Tilana se storie vier liefde deur die lewe se eenvoudigste, maar mees spesiale oomblikke – dans op ‘n grondpad, sit op die kombuisvloer, en eenvoudige oomblikke benut om hul liefde vir mekaar te vier. En al het hulle baie struikelblokke op die pad teëgekom, het hulle nooit uit die oog verloor wat werklik belangrik was nie: hul liefde vir mekaar.

Uiteindelik is hul liefdesverhaal nie een van grootse gebare of dramatiese oomblikke nie. Dit is ‘n verhaal van twee jongmense wat mekaar gevind het en geweet het hulle is bedoel om saam te wees. ‘n Verhaal van ‘n liefde wat eenvoudig, dog filosofies is. ‘n Verhaal van ‘n liefde wat gegrond is op die klein dingetjies in die lewe, maar wat sterk genoeg is om ‘n leeftyd te hou.

Ankia en Tilana het besluit om groot te droom toe hulle ingeskryf het vir ons WEN ‘N SPROKIESTROUE-kompetisie, wat in 2023 oor Habari-titels gestrek het, insluitend Woman&Home, rooi rose, Getaway en Bona.

Ankia en Tilana – saam met twee ander paartjies wat deur die beoordelaars se streng keuringsproses gegaan het – is deur die kompetisie se beoordelaarspaneel ondervra en uiteindelik het die jong paartjie se liefde alles oorwin en hulle die troue van hul drome besorg!

Hierdie ongelooflike prys ter waarde van meer as R464 600 sluit in:

1. Boschendal troulokaal
• Drie peuselhappies per persoon en ’n driegangmaaltyd vir 40 mense.

2. Murdocks

• Oorspronklike 18 ka-geelgoudring.

3. Wittebrood by Jock Safari Lodge

4. Blanco Bridal Couture

• Een huurtrourok vir die bruid (die wenner van die kompetisie).

5. Verblyf by Zorgvliet Wine Estate

6. Weddings By Marius

• Marius sal met die wenpaar werk om met verskaffers te koördineer en te skakel, hy sal ekstra verskaffers vind indien nodig en hy sal uitvoering van die trouplanne tot die spesiale dag oorsien.

7. Summerheart Photography

8. Classic Rides

• ‘n 1956 Rover en ‘n 1938 MG Tickford.

9. Cards by Nadia

• Uitnodigings en plekaanduidings

10. Amy Cottle’s Events

• Ruiker, skouerruikers en knoopgatjies vir trougeselskap.

Lees ook: Berei so voor vir jou troue: Kenners se top-skoonheidswenke

The post Sprokiestroue-kompetisie: Hier’s die wen-paartjie! appeared first on rooi rose.

Die paartjie, wat sedert 2019 saam is, het in Desember verlede jaar verloof geraak toe Damian Domenica – wat toe swanger was met hul tweede kind, Alessia– met ’n romantiese stranduitstappie verras het.

Nadat hulle na ‘n suksesvolle Wêreldbeker-oorwinning in Parys in Oktober vanjaar na Kaapstad teruggekeer het, het Damian en sy Italiaanse lewensmaat van vier jaar begin gereed maak vir hul troue, wat Saterdag, 18 November by die Belair Pavilion in die Kaapse Wynlande plaasgevind het.

Die troufotograaf Sarah van Mint Tea Photography het Saterdag foto’s van die pasgetroudes se spesiale dag gedeel.

Een van die foto’s wys hoe Domenica in ‘n Blanco Bridal Couture-rok straal, terwyl sy ‘n soen op die lippe van haar aantreklike bruidegom, Damian, plant.

 

View this post on Instagram

 

A post shared by Sarah – Destination wedding photographer (@mintteaphoto)

 

View this post on Instagram

 

A post shared by Domenica de Allende (@domenicadeallende)

In sommige van die Instagram-kiekies wat Domenica de Allende ná haar groot dag gedeel het, sien ons ‘n paar bekende Springbokgesigte.

Saskia Snyman, vrou van die Springbok RG Snyman, het ‘n groepfoto gedeel van die Springbokke se vroue tydens die De Allende-troue. In die foto sien ons die stralende bruid saam met Layla Kolbe, Anlia Etzebeth, Ingrid Malherbe en Hope Mortimor, asook Michele Burger, Annelee Murray, sowel as krieketspeler Jacques Kallis se vrou, Charlene.

Lees ook: Ontmoet die Springbokke se ‘bokkies’

In een van haar plasings skryf Domenica: “Dankie dat jy my altyd laat lag, selfs op die moeilike dae ”

 

View this post on Instagram

 

A post shared by Domenica de Allende (@domenicadeallende)

Lees ook: Swemkampioen Tatjana Schoenmaker en Joel Smith hak die knoop in Robertson deur

The post KYK: Springbok Damian de Allende en Domenica Vigliotti se Kaapse wynlande troue appeared first on rooi rose.

Hooffoto: Instagram / @tatjanaschoen

Die egpaar, wat in April 2022 verloof geraak het, het die naweek hul ewige trou aan mekaar in die welige omgewing van die Pat Busch-bergreservaat in Robertson belowe. Tatjana en Joel het Maandag op Instagram hul spesiale dag met pragtige troufoto’s deur Olivia Booyse van Veld Films gevier.

 

View this post on Instagram

 

A post shared by -TATJANA-SCHOENMAKER- (@tatjanaschoen)

Rachel Kolisi, wat toevallig die bruidegom se ouer suster is, het ook na die troue ‘n plasing op Instagram gemaak en geskryf:

“My boetie het met die skouspelagtigste vrou getrou en ek kon letterlik nie meer dankbaar wees vir hierdie liefde nie ”

Die gelukkige getroudes, wat in Februarie vanjaar hul verhouding bekend gemaak het, het hul verlowing twee maande later in April bevestig, toe Joel die groot vraag tydens ‘n staptog in Constantia aan die wêreldkampioen in 200 m-borsslag gevra het.

‘n Instagram-plasing deur Tatjana, wat hul verlowing aankondig, lui:

“Moenie worry nie, ek weet wat julle almal dink: ‘Hoekom het hy so lank geneem?’ ONS IS VERLOOF ”

 

View this post on Instagram

 

A post shared by -TATJANA-SCHOENMAKER- (@tatjanaschoen)

Schoenmaker het in September haar kombuistee saam met vriende, familie en Joel gevier – al woon die bruidegom tradisoneel nie die kombuistee by nie.

 

View this post on Instagram

 

A post shared by -TATJANA-SCHOENMAKER- (@tatjanaschoen)

In afwagting vir haar troudag het Tatjana geskryf:

“Dit het alles begin met ‘n dm… Kan jy glo dit het alles hierop neergekom? ”

Baie geluk aan mnr en mev Smith!

Lees ook: ‘n Pollard-pienkvoet is op pad!

The post Swemkampioen Tatjana Schoenmaker en Joel Smith hak die knoop in Robertson deur appeared first on rooi rose.

Illse Roos blom steeds dankbaar voort

Illse Roos wat binnekort  as ’n opgesmukte aktrise in die rolprent #lovemyselfie te sien is, is eintlik ’n kaalvoet-, skoongesig-plaasmeisie met haar voete vierkantig op die aarde

Wen ’n sprokiestroue!

Een gelukkig leser kan hul droomdag ter waarde van ’n allemintige R435 907,50 wen.

Sy naam is in die sterre geskryf

Op 70 is daar geen keer aan Leon van Nierop nie. Duiwelsroos, sy splinternuwe spanningsroman, is nou op die rakke. ’n Moordstorie wat hy binne drie maande geskryf het. Dié skrywer, regisseur en rolprentresensent het met byna 40 boeke, talle bekroonde radiovervolgverhale én TV-reekse, en seker ’n 1 000 rolprentresensies naam gemaak. Hy skryf sy sukses aan selfdissipline toe.

Ja, mans kry ook borskanker

Dink jy dadelik aan vroue wanneer jy die woord ‘borskanker’ hoor? Hoewel mans in ’n mindere mate daaraan blootgestel is, kom dit wel by hulle voor. Kom ons skerp algemene bewustheid op – gesels met die man in jou lewe of sorg dat jou seun die feite ken

G’n saai slaai

Moeg vir die gewone groenslaai wat jy tot vervelens maak? Probeer hierdie voedsame en heerlike slaaie  

Somer vol styl

Ons kan uiteindelik ons dik truie wegpak en dit vir ligter klere verruil. Die sonskyndae is hier!

Stoksielalleen

Eensaamheid is nie net om alleen te wees nie. Jy kan tussen jou vriende en familie steeds voel of jy verlore en op jou eie is

Kyk anders na groente

Jy het dalk nie plek vir ’n groentetuin nie, maar jy kan ander planne maak om jou eie groente te kan geniet

Dinamies, doelgerig en dapper

Die aktrise Odelle de Wet, wat die rol van die selfversekerde Delia Richter in die sepie Binnelanders speel, moes van jongs af verskeie uitdagings die hoof bied,  maar het altyd sterker en wyser aan die anderkant uitgekom. Sy vertel waar en hoe sy haar motivering, kalmte en vrede vind.

Jou mooiste dag

Die seisoen vir troues het aangebreek en ons is hier om jou te inspireer!

Lees ook: WEN FitFlop se moet-hê-sandale vir die seisoen!

The post 10 redes waarom jy die Oktober-uitgawe van rooi rose móét lees! appeared first on rooi rose.

’n Fotograaf se wenke vir jou troudag. Deur Corné Greeff. Hooffoto: Emma Bauso vir Pexels

Troues is stresvol, maar die troufoto’s, beknopte aantrekkamers en selfs kinders wat rondhardloop, kan die spanning vererger. Hier is ‘n paar wenke vir jou troudagfoto’s wat die stres sal ontlont, en selfs ‘n lysie van alles wat vir die wis en onwis in jou “noodsakkie” moet wees.

Wenke vir jou en jou troudagfoto’s

Markus Gericke van Boland Weddings was seker al by meer troues as die meeste van ons. Hy neem foto’s en video’s by troues en het al gesien wat werk en wat werk nie.

Hier is ‘n paar van sy wenke wat goeie foto’s verseker, en hoe jy die stres vir jou en die mense om jou minder kan maak.

1. Moenie te veel strooimeisies of strooijonkers aanstel nie, twee of drie is genoeg. Die res gaan net in die pad wees.
2. As jy meer as twee of drie het, laat hulle eerder in ‘n ander lokaal aantrek en klaarmaak.
3. Pasop vir kinders in die kamer wanneer jy aantrek. Jou stresvlakke gaan reeds hoog wees en kinders kan dit vererger.
4. Slegs mense wat betrokke is by die aantrek en regmaak, behoort in die vertrek te wees. Meer mense dra by tot die gevoel van beknoptheid en kan in die pad van die fotograaf of videograaf wees.
5. Vra jou ma en strooimeisies om eerder nie foto’s te neem gedurende die regmaakproses nie. Tyd is reeds min en die fotograaf is daar om ‘n rede.
6. Trek verkieslik naby die trouplek aan. Sodoende spaar jy tyd en hoef jy nie te sweet in die voertuig op pad na die troue nie.
7. Laat die fotograaf en videograaf voor jou vertrek na die plek waar jou troue plaasvind. Dit gee hulle ‘n paar minute ekstra om seker te maak alles lyk reg en is reg sodat jy spesiale foto’s en video’s kan kry van jou wat by jou troue aankom.
8. Die lokaal waar jy aantrek, is baie belangrik. Kies jou vertrek reg, want as die vertrek nie mooi lyk nie, kan die eindproduk nie mooi lyk nie.
9. Maak seker die vertrek is groot genoeg vir almal wat moet inpas (ook die fotograaf en videograaf).
10. Sorg dat die kamer netjies is voor jy begin aantrek, bottels en vuil glase op die agtergrond lyk nie mooi op die foto’s nie.
11. Kies ‘n vertrek met genoeg vensters. Die meeste fotograwe gebruik natuurlike beligting vir die aantrekfoto’s en donker vertrekke gaan nie werk nie.
12. Maak seker jy weet waar die ringe is wanneer die fotograwe opdaag. As die ringe nog by jou broer is, gaan die fotograwe dit nie kan afneem nie.
13. Begin vroeg genoeg met jou hare en grimering en om aan te trek. Sodoende is daar genoeg tyd vir foto’s en hoef niemand te haas nie.

#rrWenke:

1. Maak vooraf ‘n afspraak met die fotograaf en videograaf sodat julle ‘n lys saamstel met al die foto’s wat jy graag sou wou hê.
2. Maak ook ‘n lys vir die fotograaf van plekke waar julle graag sou wou foto’s neem by die onthaal.
3. Kommunikasie is baie belangrik. Gee eerder te veel inligting as te min.
4. Gee op die troudag vir een van die strooimeisies, of iemand by die troue, ‘n lys van wie wanneer afgeneem moet word sodat iemand solank die familie of vriende kan bymekaarmaak. Julle spaar tyd en dit maak die lewe vir die fotograaf en videograaf ook makliker.
5. Maak seker jy voel gemaklik by die fotograaf en videograaf, want hy/sy gaan baie in jou persoonlike ruimte wees.
6. Maak seker jou parfuum en al die spesiale items wat jy graag wil laat afneem is byderhand.
7. Wanneer jy jou dag beplan, neem in ag dat sekere tye van die dag beter is vir troufoto’s. Gesels  met die fotograaf en probeer die foto’s neem wanneer die lig goed is.
8. Wanneer julle die gesamentlike foto’s neem, neem iemand van jou gevolg saam wat verantwoordelik is vir jou lipstiffie, rok en die fyner detail.
9. Beplan vir ingeval die weer nie saamspeel nie.  Maak seker jy het ‘n plan B vir ingeval dit reën, en maak seker daar is ‘n plekkie waar julle foto’s kan neem indien dit reën.
10. Onthou, die fotograaf en videograaf het tyd nodig ná jou troue. Gun hulle genoeg tyd om jou foto’s reg te kry. Moenie ‘n week ná die troue al begin neul oor wanneer jou foto’s klaar gaan wees nie. Alle goeie goed vat tyd.
11. Neem ook foto’s van die bruidegom wanneer hy gereed maak. Reël dat die foto’s saam met sy ouers geneem word wanneer jy regmaak. Dit spaar tyd later.
12. Bespreek jou fotograaf vroegtydig sodat jy die fotograaf kry wat jy graag wil hê.
13. Geniet jou troue. Onthou, niks verloop altyd volgens plan nie.

Jou troudag-“noodsakkie”

Maak seker jou strooimeisie het ‘n sakkie by haar met die volgende:

•  Parfuum
•  Lipstiffie
•  Gesigpoeier
•  Gesigsproei
•  Haarsproei
•  Handeroom
•  Naald en gare
•  Sneesdoekies
•  Nat doekies (wet wipes)
•  Tandevlos
•  Super Glue
•  Pleisters
•  Haarknippies
•  Haarrekkies
•  Doekspelde
•  Haartangetjie
•  Deursigtige naelpolitoer

Lees nog: Lipstiffie: Vind die perfekte kleur vir jou vel

The post ’n Fotograaf se wenke vir jou troudag appeared first on rooi rose.

Cindy wil elke oomblik inkleur

In Binnelanders red sy lewens en breek harte, maar in die werklike lewe is Cindy Swanepoel ’n skaam, sensitiewe siel wat graag met poppe speel.

Vir ewig en altyd 

Die akteurspaar Bennie Fourie en Mila Guy het in die hartjie van die Elgin-vallei, omring deur woude en die majestueuse Hottentotsberge, in die teenwoordigheid van meer as ’n 100 uitgesoekte gaste, ewig trou aanmekaar gesweer. 

Schalk doen dit op ’n drafstap

Die man met die bont truie, krulkop en astrante snor is nie net een van Suid-Afrika se mees geliefde en bekende komediante nie, hy’s ook ’n voorslag op die rolbalbaan. 

As saambly sneuwel…

Stel eers ’n omvattende saamblykontrak met jou lewensmaat op voordat julle besluit om saam te woon en nie te trou nie. Anders kan jy die spit lelik afbyt en groot verliese ly …

SA sjefs se gunsteling-sop

Wintertyd is sinoniem met stomende bakke sop. Ons het vier sjefs gevra om hul trefferresepte te deel.

‘n Wintersbal

Wintersklere hoef nie vaal te wees nie. Met hierdie idees lyk jy asof jy uit ‘n Jane Austen-boek gestap het.

Daai tyd van die jaar

Jou neus is toe, jou keel is seer, jy hoes jou longe uit en jy voel ellendig. Beur jy maar voort of gaan jy dokter toe?  

Groet jou fobies vir goed 

Steel ’n fobie vir vlieg, honde, openbare optrede of iets anders jou geluk? Voel jy verleë omdat hierdie vrees jou aan bande lê terwyl jy wéét dis irrasioneel? Wees gerus – jy word bloot deur jou brein se reaksie meegesleur.

Wen ’n safari-wegbreek na Inverdoorn- privaat wildreservaat

Een gelukkige leser kan verblyf vir twee nagte vir twee mense ter waarde van R20 000 by Inverdoorn- privaat wildreservaat in die majestueuse Tankwa-Karoo wen.

Warm voete in die winter     

Dis baie makliker as wat jy dink om sokkies te brei en dis heerlik sag. 

Lees ook: WEN ’n Vadersdaggeskenkbewys van Chalmar Farm Kitchen!

The post 10 redes waarom jy die Julie-uitgawe van rooi rose móét lees! appeared first on rooi rose.

The post Die liefde blom vir hierdie twee SA bekendes – een verloof en die ander op die kansel se drumpel appeared first on rooi rose.

B’loved troukompetisie: Michelle en Willie se wentroue . Inligting verskaf deur B’loved. Hooffoto: Renske de Klerk-Engelbrecht

Wanneer jy na die Suid-Afrikaanse ekonomie kyk, hoef jy nie hooggeleerd te wees om te besef dat ons finansies effens stram is nie. Selfs dít het nie van Suid-Afrika se topdiensverskaffers teruggehou om saam te span om vir een paartjie ’n troue van hul drome te gee nie!

rooi rose en B’loved, ’n aanlyn-funksieplatform, het kragte saamgespan, honderde inskrywings ontvang en ’n klompie finaliste op die kortlys geplaas. Willie en Michelle was onder hulle. Hul storie is een van deursettingsvermoë, hekkies hardloop oor die struikelblokke van die lewe, en die liefde van ’n ridder wat sy prinses uit ’n moeilike situasie red.

Nie net het Willie sy sole deurgeloop om mense bewus te maak van hul deelname aan die kompetisie en om  stemme te werf nie, hulle het familie en vriende gekry om hul deelname met oulike video’tjies op sosiale media te deel. Dit wys jou net: ’n aanlyn-aflyn-bemarkingstrategie werk nie net vir multimiljoenrand-ondernemings nie! Hulle het die kompetisie gewen!

Noem dit bederf, of uit jou sokkies geseën, een ding is seker: die twee het die opskop van hul lewe gehad!

Ilze Saunders Buys (Above the Curve) was die troubeplanner. Sy het verseker dat alles vlot verloop en dat elke klein detail op sy plek was.

Die grafiese en papierontwerpe (Nadia van Laboeh) was die goue draadjie wat die tema van die troue deurgetrek het – van die kombuistee-uitnodigings tot die vreeslike oulike confetti met hul troudatum as staafkode.

Michelle en haar gaste is met die allermooiste kombuistee by Die Kleijne Pienkhuis in Potchefstroom bederf. Jacqueline en haar span het verseker dat  Frans-klassieke ondertone sierlik in elke hoekie en draaitjie van hierdie Alice in Wonderland-koffiehuis se tuin pryk. AE Wedding and Function Decor het hier al die dekor verskaf om te verseker Michelle kry alles wat haar hart begeer. En wat is ’n fees dan as dit nie gedokumenteer word nie? Corene Photography het seker gemaak die spesiale dag word tot in die fynste detail verewig.

Die kombuistee is afgehandel en die bruidspaar is in tweede rat – ’n ontmoeting by Diaan Daniels Couture om ’n trourok en pak te bespreek. Diaan se kundigheid het verseker dat Michelle haar droomtrourok met die eerste ontmoeting gekies het – en Willie is bederf met ’n pak wat oor sy swemmerskouers kon pas.

Michelle Kok Image Consultant het raad by die daad gevoeg, en die paartjie met haar warm persoonlikheid en besonderse oog vir styl touwys gemaak oor watter kleure en klere wel by hulle pas.

Soos die gebruik vandag, is die immergewilde Renske van RDK Photography en Heinz (Heinz Boesenberg Films) die span wat ongelooflike verlowingsessie-foto’s en ’n video geneem het. Die video was deel van die elektroniese uitnodiging.

The post B’loved troukompetisie: Michelle en Willie se wentroue appeared first on rooi rose.

rooi rose se voormalige mode-assistent, Daniela van den Berg, se troue is groot nuus op die internet omdat haar bruidegom, Christiaan van den Berg, haar verras het met ’n onverwagse dansvertoning tydens die onthaal.

Daniela en Christiaan het mekaar op hoërskool ontmoet en gaan sedert 2010, toe hulle in graad 11 was, uit. Hulle het in April 2016 verloof geraak en is op 26 November 2016 by die Anura-wynlandgoed net buite Stellenbosch getroud.

Daniela, wat deesdae ’n vryskutstilis is, sê sy het glad nie verwag dat Christiaan en sy strooijonkers vir haar sou dans nie. Christiaan voer nie elke dag sulke goed geoefende danspassies uit nie, maar hy is ’n man wat van pret en vermaak hou en hy geniet dit om te dans.

Christiaan en sy strooijonkers het voor die troue omtrent vier keer bymekaargekom om die danspassies uit te werk en te oefen, maar ’n paar van die strooijonkers kon nie al die oefeninge bywoon nie. Baie van hulle het dus net eenkeer saam geoefen. Niemand anders het geweet van dié verrassing nie, behalwe vir Christiaan se ouers. Daar is by hulle huis geoefen aan die danspassies. Die liedjies het nie enige spesifieke betekenis nie, Christiaan het dit net gekies omdat dit by die “boy (of girl) band“-tema gepas het.

Christiaan was in 2012 tydens sy eerste jaar op universiteit in ’n frats-vierwielmotorfietsongeluk. Sy een been het baie slegte skade opgedoen en binne een jaar het hy 11 operasies ondergaan – alles van been- tot veloorplantings. Die herstelproses het omtrent twee jaar geduur en amputasie is gereeld oorweeg. Hy was ook vir lank in ’n rolstoel. Hierdie danspassies was dus ’n spesiale oomblik vir die paartjie as bewys van sy herstelproses en sy gesondheid. Daniela het met ons gesels oor dié herstelproses. “Ons het net gebid en Christiaan se vertroue in die Here was aansteeklik. Die Here is so goed – die dokters getuig self dit was ’n wonderwerk dat hy sy been kon behou en dat hy nou so kan dans. Ons is so dankbaar en gee regtig alle eer aan die Here!”

Kyk net hoe dans die man!

The post Bruidegom verras sy bruid met oulike danspassies appeared first on rooi rose.