Genoeg vir ongeveer 40

Bestanddele

• 125 ml (½ k) mielieblom, gesif
• 300 ml water
• 500 g (2 k) suiker
• 25 ml (5 t) rooswater
• sap van 2 suurlemoene
• 25 g (25 ml) gelatien
• 125 ml (½ k) water
• pienk voedselkleursel
• 125 ml (½ k) versiersuiker
• 125 ml (½ k) mielieblom

Metode

Voer ’n 20 x 25 cm-pannetjie met bakpapier uit.

1. Voeg net genoeg water by die mielieblom om ’n gladde pasta te vorm. Strooi die gelatien oor 125 ml (½ k) water en hou eenkant.
2. Meng die res van die water, suiker, rooswater en suurlemoensap in ’n middelslagkastrol en roer oor lae hitte tot die suiker opgelos is. Voeg die mielieblompasta by terwyl jy deurentyd klits. Kook vir sowat 10 min. of tot die mengsel deursigtig is en gaar proe.
3. Smelt die gelatien in die mikrogolf op die ontvriesstelling of oor warm water. Hou die die gelatien ’n entjie bokant die kastrol en voeg by die mielieblommengsel. Voeg die voedselkleursel by en meng goed.
4. Gooi in die voorbereide pan. Sit bakpapier bo-oor en laat set by kamertemperatuur.
5. Meng die ekstra mielieblom en versiersuiker en hou eenkant. Sny die Turkse lekkers in ewe groot blokkies van sowat 3 cm x 3 cm. Strooi die versiersuiker-en-mielieblom-mengsel oor die lekkers.
6. Laat die lekkers vir ’n dag of twee in die versiersuikermengsel lê tot die suiker al die vog geabsorbeer het. Indien die versiersuikermengsel te klam raak, kan jy dit deur nuwes vervang.

#rooirosewenk

Maak seker die mengsel borrel wanneer dit kook, anders sal die lekkers ’n melerige tekstuur hê.

Lees ook: Groot sjokolade-en-bosbessie-kraakkoekie

The post Turkse lekkers appeared first on rooi rose.