velsorgraad | rooi rose

Kry jou vel gereed vir herfs

Karlien Meiring — Mon, 07 Apr 2025 07:54:26 +0000

Wanneer dit kouer word, verander ons vel se behoeftes, veral ten opsigte van die vog wat dit nodig het. Dis tyd om jou ligte jelvogroom vir ’n ryker opsie te verruil.

Dr Alek Nikolic, ’n befaamde spesialis in estetiese medisyne en die eienaar van SkinMiles, het ’n gids uitgebring, wat verduidelik hoe om gedurende die kouer maande na jou vel te kyk en die bestanddele wat jy in jou skoonheidsroetine moet insluit.

Lees ook: Lyk minder moeg met hierdie 16 skoonheidswenke!

Waarom voel jou vel droër in die winter?

Voordat ons na oplossings begin kyk, moet ons weet wat maak dat die vel gedehidreer raak. Die vel voel gewoonlik droër in die kouer maande as gevolg van sekere klimaatsveranderinge wat ’n direkte impak op die vel het. Dit sluit in:

Koel lug is droër en bevat minder humiditeit. Dit stroop die vel van vog.
Binnenshuise verhitting kan ’n verwoestende effek op jou vel hê. Die meeste verwarmers en selfs lugverkoelers vervaardig droë hitte wat verder die vog uit jou vel neem.
Ons almal hou van ’n lang warm stort of bad gedurende die kouer maande, maar dit stroop die vel van natuurlike vetstowwe wat die vel se deurdringbaarheid verhoog en water laat verloor.
Die kouer maande woord ook met winderige en stormagtige weer geassosieer. Dit vermeerder ook die hoeveelheid water wat die vel verloor.

Na watter bestanddele moet ek op die uitkyk wees?

As ons droë of gedehidreerde vel moet behandel, is dit belangrik dat ons na die bestanddele kyk wat die vel se beskermingslaag weer sal aanvul, bevog en herstel. Dr Nikolic meen die bestanddele waarna ’n mens veral op die uitkyk moet wees, is versagtingsmiddels, humectante en antioksidante.

Versagtingsmiddels kan voorkom dat jou vel vog verloor en dit bied ook ’n luukse, versagtende effek op die vel. “Versagtingsmiddels se dikte kan dun of dikker wees, so dit is belangrik om nie ’n vogroom op grond van die tekstuur te beoordeel nie,” voeg dr Nikolic by. Voorbeelde van versagtingsmiddels is nie-geurige plantolies saam met galambotter, kakaobotter, vetsure, komkommerkruid, linoleïensuur, oliesuur, klapperolie, aandblomolie, sonneblomolie, en mangobotter.

Bestanddele wat die vel vervang, kan ook help om vog in die vel te herstel. Dit kan verder die stratum corneum (die buitenste laag van die vel) se vermoë verhoog om vog te behou. Voorbeelde van dié bestanddele sluit hialuronsuur, keramiede, natrium, PCA, gliserien, gliserol, silikoon, petrolatum, salisielsuur en alfahidroksiesure in.

“Wanneer jy na die beste vogroom op soek is, beveel ek aan dat jy ’n produk kies wat spesifieke bestanddele bevat wat ’n ryker gevoel en tekstuur op die vel se oppervlak bied. Die ligter vogrome wat ons in die winter gebruik, moet ons dus vir die komende wintermaande vervang. Gedurende hierdie seisoen kan die vel dof lyk omdat ons in die algemeen meer van binnenshuise verhitting gebruik maak, wat die vel van helderheid en vog ontneem. Goeie bevogtiging van die vel sal met hierdie probleem help. Ek sal selfs aanbeveel dat jy ’n serum byvoeg wat ryk in hialuronsuur is om verder jou vel se vermoë om water op te neem, te versterk,” verduidelik dr Nikolic.

Lees ook: Jy kan jou eie haarmasker maak

Behoort ons ’n afskilferaar te gebruik?

Dr Nikolic stel voor dat ons versigtig moet wees om gedurende die kouer maande van ’n afskilferaar gebruik te maak en sy raad is om afskilfering tot een keer ’n week te beperk. “Afskilfering kan of wonders vir jou vel verrig of dit kan baie skade doen,” sê dr Nikolic. “Ek is ten gunste van afskilfering selfs in die winter, want sonder dit sal jou vel droog bly, maak nie saak hoeveel rome jy aansmeer nie. Dis omdat dooie velselle keer dat jou vel jou velsorgprodukte optimaal opneem. Die veiligste manier om jou vel af te skilfer is om van ’n chemiese afskilferaars eerder as fisieke afskilferaars soos skropborsel gebruik te maak. Laasgenoemde is te hard op die vel.”

Chemiese afskilferingsure breek die verbindings tussen dooie velselle af, wat dit makliker maak om daardie laag dooie velselle weg te was. Dr Nikolic stel voor jy kyk uit vir ’n alfahidroksuur (AHA) soos melk- of glikolsuur. Nog ’n goeie wenk wat dr Nikolic gee is om van ’n roomreiniger, wat sagkens te werk gaan in die oggend te gebruik en ’n reiniger wat afskilfer, saans te gebruik.

Lees ook: Die geheim van sagte lippe? Rooibos! Probeer hierdie skrop

Dit is belangrik om jou vel die spesiale versorging te gee wat dit gedurende kouer maande nodig het.

Lees ook: Pragtig op enige ouderdom: Sorg só vir jou vel

The post Kry jou vel gereed vir herfs appeared first on rooi rose.

Die geheim van sagte lippe? Rooibos! Probeer hierdie skrop

Karlien Meiring — Fri, 07 Feb 2025 07:30:45 +0000

Deur Amy Steenkamp. Foto’s: Getty Images

Rooibos vir lipsorg

Wanneer dit by die versorging van jou lippe kom, is natuurlike en doeltreffende bestanddele die beste om gesonde, plomp lippe te verseker.

Rooibos kry wêreldwyd aansienlik aandag as ’n bestanddeel wat natuurlike skoonheid bevorder. Dit is afkomstig van die blare van die Suid-Afrikaanse Aspalathus linearis-plant wat bekend is daarvoor dat dit ’n magdom voordele vir die vel, veral die lippe, bied.

Rooibos is bevogtigend. Die delikate vel op ons lippe kort ’n bietjie ekstra sorg, en rooibos verskaf die sagte voeding en beskerming wat dit nodig het.

Die voordele is merkwaardig. Rooibos se bevogtigende eienskappe voorkom dat jou lippe in koue weerstoestande (soos die winter waarin ons ons tans bevind) droog en gebars raak, en dit kan ook as ’n beskermende lagie gebruik word, wat vog verseël en jou lippe teen faktore soos wind, koue temperature en UV-strale beskerm.

Maak jou eie rooibos-lipskrop by die huis

2 t rooibos (as jy nie gedroogde blare byderhand het nie, breek ’n teesakkie oop en gebruik dit)
1 t klapperolie
’n Druppel heuning
2 t suiker

Meng bestanddele saam en jy het ’n heerlike rooibos-afskilferskrop!

Hoe om die skrop te gebruik:

Begin met skoon, droë lippe.
Plaas ’n klein hoeveelheid van die lipskrop op jou vingerpunt of ’n skoon lipborsel.
Masseer die skrop vir ongeveer 1 minuut in sirkelbewegings saggies op jou lippe. Die suiker- en rooibostee sal help om die dooie velselle af te skilfer, terwyl die heuning en klapperolie jou lippe sal bevogtig en voed.
Spoel die skrop met warm water af.
Wend nou ’n lipsalf of bevogtiger aan om jou lippe bevog en sag te hou.
Onthou, hierdie tuisgemaakte lipskrop is slegs vir eksterne gebruik. Dit is altyd ’n goeie idee om ’n pleistertoets te doen voordat jy iets op jou lippe aansit, veral as jy ’n sensitiewe vel het of vermoed dat jy allergieë vir enige van die bestanddele het.

Die voordele van rooibos

Dit is kafeïenvry.
Dit verhoog hartgesondheid.
Dit help met slaap.
Dit spog met anti-inflammatoriese eienskappe.
Hierdie trots Suid-Afrikaanse juweel kan ’n natuurlike, doeltreffende oplossing bied vir die handhawing van die gesondheid en skoonheid van jou vel en lippe.

Geniet jou rooibos-lipskrop!

Lees ook: Velsorg vir mans

The post Die geheim van sagte lippe? Rooibos! Probeer hierdie skrop appeared first on rooi rose.

Teetydskoonheid: Rooibosresepte vir ‘n stralende vel

Karlien Meiring — Tue, 21 Nov 2023 14:31:43 +0000

Gesigspoel

Trek twee rooibosteesakkies in drie koppies kookwater.
Laat toe om tot louwarm af te koel en gebruik dit om gesig af te spoel.

Dit streel en verfris jou vel.

Wenk: Rooibos het teenallergiese eienskappe wat ekseem en velirritasies streel. Voeg ’n paar sakkies by jou badwater om geïrriteerde vel te streel.

Opknapper

Rooibos-en-suurlemoen-opknapper

Meng ’n ¼ koppie sterk rooibostee (afgekoel) met ¼ k suurlemoensap.
Maak ’n stukkie watte effens nat met afgekoelde rooibos-en-suurlemoen-mengsel om jou vel te verfris. Hou dit aan vir 10 minute voor jy dit met lou rooiboswater afspoel (voeg teesakkie by jou water wat jy gebruik om mee af te spoel).

Moenie jou gesig met warm water spoel nie, dit maak jou porieë oop.

As jy enige van die mengsel oor het, kan jy dit vir ’n week in ’n lugdigte houer in jou yskas hou.

Gesigmasker

Rooibos-, heuning- en avokadogesigmasker

Jy het die volgende nodig:

1 e fyngedrukte avokado

1 e gewone volvetjogurt

1 e heuning

50 ml sterk rooibostee (afgekoel)

Wenk: Jy kan ’n teelepel suurlemoensap byvoeg wat sal keer dat die avo oksideer en bruin raak.

Meng al die bestanddele saam en plaas dit op vel. Los vir 15 minute aan voor jy dit met louwarm rooiboswater afspoel.

Gesigskrop

’n Mengsel van rooibosteeblare en heuning sal wondere vir jou gesig doen. Dit verwyder dooie velselle en maak jou veld glad. Rooibos het anti-inflammatoriese eienskappe wat letsels en littekens verminder. Gebruik sagte, sirkelvormige bewegings om van enige dooie selle ontslae te raak.

Pofferige oë

Gebruik twee afgekoelde rooibosteesakkies en plaas dit op jou oë om pofferige oë te streel. Rooibos sal moeë en rooi oë streel.

Voetskrop

Meng rooibosblare met druiwepitolie en Engelse sout of seesout om jou voete mee te skrop. Druiwepitolie bevat antioksidante en bevogtigende eienskappe wat help om die vel sag te laat voel en dit te bevog.

Engelse soute is ryk in magnesium en sulfate.

Magnesium het kalmerende eienskappe en kan help om seer ledemate te streel.

Sulfate raak van die gifstowwe in die liggaam ontslae.

Draai jou lyf hierin toe

Verwerk papaja saam met sade. Meng dit met rooibosblare en gebruik dit regoor jou lyf. Plaas palmblare of kleefomhulsel om jouself en spoel dit met rooiboswater af.

Die ensieme in die papaja help om van droogheid en skilfers op jou vel ontslae te raak sodat jou vel goed bevog is. Jy kan dit ook as gesigmasker gebruik. Papajas is ryk in vitamiene A wat help om die vel te herstel en vernuwe.

Rooiboseienskappe

– Rooibos bevat sterk antioksidante wat help om jou vel teen omgewingsfaktore, insluitend besoedeling en UV-skade, te beskerm.

– Dit het teenallergiese eienskappe om geïrriteerde vel te streel.

– Die anti-inflammatoriese eienskappe help om die vel te streel en aknee te beveg.

Suurlemoensapeienskappe

– Suurlemoen se suur eienskappe help om porieë toe te maak.

– Suurlemoen het ligte bleikeienskappe wat help om rooiheid en inflammasie te verminder. Dit help om jou velkleur egalig te laat lyk.

– Dit bevat vitamiene C wat ’n natuurlik antioksidant is en jou vel helderder laat lyk.

Heuningeienskappe

– Dit is ’n natuurlike antioksidant

– Dit het anti-bakteriese eienskappe wat help om aknee te beveg.

Avokado-eienskappe

– Die vette in avokado help om die vel te bevog

– Dit is ryk in vitamiene en minerale en sal help om jou vel te voed

Jogurteienskappe

– Bevat melksuur wat help om die vel glad te maak en porieë te verfyn

Lees ook: Die gesondheids- en skoonheidsvoordele van rooibos

The post Teetydskoonheid: Rooibosresepte vir ‘n stralende vel appeared first on rooi rose.

Verstaan die binnewerking van veroudering: Die volume-dilemma

Karlien Meiring — Wed, 18 Oct 2023 06:55:39 +0000

Die wêreld van velsorg is een wat konstant verander. Tans geniet die idee van “verjonging” heelwat aandag. Dit is ’n strategiese benadering om jou vel gesond te hou om die beste vel moontlik op elke ouderdom te hê. In die arsenaal van maniere wat jy hierdie verjonging mee kan bring, is daar dermale vullers wat soos helde na vore tree om op subtiele dog waarneembare wyse die probleem van volumeverlies hok te slaan.

Hoe dermale vullers werk en watter rol hulle speel om kwessies soos volumeverlies, dieper plooie en slap vel te hanteer.

Soos die jare aanstap, ondergaan ons vel ’n natuurlik metamorfose. Die verlies aan kollageen, elastien en hialuroonsuur – noodsaaklike elemente wat die vel plomp en elasties hou – skep ’n leemte wat as volumeverlies sigbaar is. Hierdie verskynsel word nie net tot een gedeelte van die gesig beperk nie: Jy sien dit in jou wange, slape en die delikate vel rondom die oë en mond. Volumeverlies is ’n stille vyand – ons onderskat dikwels die rol wat dit in die vorming van plooie en insakking speel.

Dis waar dermale vullers inkom wat soos argitektoniese towenaars op die gebied van verjonging optree. Hierdie inspuitbare middels, wat uit hialuroonsuur of ander bioversoenbare materiale bestaan, is soos beeldhouers wat verlore volume help aanvul en die kontoere van jeug herstel. Anders as hul chirurgiese eweknieë, bied dermale vullers ‘n vinnige dog nie-indringende oplossing vir die eeue oue probleem van volume wat afneem.

View this post on Instagram

A post shared by Dr Nerina Wilkinson + Associates (@drnerinawilkinson)

Dermale vullers is egter nie ’n kuur wat vir almal op dieselfde manier werk nie. Ná ’n deeglike konsultasie om die pasiënt se estetiese kwessies te verstaan, werk ’n skoonheidsdokter baie versigtig om vullers presies daar te plaas waar dit nodig is om sodoende die kontoere van jou gesig glad te maak en slap vel weer te lig. Jou slape en die periokulêre gedeelte (onder die oog, onder andere) herwin hul lewenskragtigheid wat tot ’n algehele verfrissende voorkoms bydra.

Behalwe vir die onmiddellike plompeffek wat dit bied, blink dermale vullers uit as voorkomende middels, wat die vordering van dieper plooie belemmer. Deur volumeverlies strategies aan te spreek, ontwrig hierdie vullers in wese die trajek van plooivorming. Die nasolabiale voue en marionetlyne, wat daarvoor berug is om met ouderdom te verdiep, word met behulp van dermale vullers versag.

Slap vel gaan dikwels met volumeverlies gepaard. Dit is waar dermale vullers help: deur die vel van binne op te lig en te ondersteun. Die inspuiting van hierdie kragtige hialuroonsuur-gegronde jel, ’n bevogtigende kragbron wat natuurlik in die vel voorkom, vul nie net nie, maar stimuleer kollageenproduksie, en bevorder ’n strukturele raamwerk wat lig. Hierdie dinamiese duo – volumeherstel en kollageenstimulasie – skep ’n veerkragtige steier vir die gesig.

Een van die bekoringe van dermale vullers is in hul vermoë om natuurlike resultate te lewer. Die dae van gevriesde uitdrukkings is lankal verby; in plaas daarvan is die effek wat die moderne dermale vullers het meer genuanseerd, wat die unieke karakter van elke gesig behou. En die feit dat jy nie baie tyd hoef af te neem na hierdie spesifieke behandeling nie, maak dit ‘n aantreklike opsie vir diegene wat ‘n oplossing soek sonder die ongerief van langdurige herstel.

Terwyl dermale vullers groot potensiaal vir transformasie op ‘n nie-indringende manier inhou, is dit baie belangrik om ’n goeie praktisyn te gebruik. ‘n Bekwame skoonheidsdokter verstaan die nuanses van gesigsanatomie, en pas die behandeling by individuele behoeftes aan. Dit word sterk aangeraai om ‘n betroubare kliniek te kies, nie net vir optimale resultate nie, maar ook vir ‘n veilige en gemaklike ervaring.

Vir ’n persoonlike estetiese en velsorgbehandelingsplan wat daarop gemik is om optimale resultate te lewer, beveel ons aan dat jy Dr Nerina Wilkinson + Associates vandag kontak.

Lees ook: Begin jou verjongingskuur vroeg

The post Verstaan die binnewerking van veroudering: Die volume-dilemma appeared first on rooi rose.

Begin jou verjongingskuur vroeg

Karlien Meiring — Fri, 22 Sep 2023 12:43:22 +0000

Daar is groeiende neiging om meer proaktief met velsorg om te gaan en subtiele aanpassings (gespesialiseerde estetiese en velsorgbehandelings) te maak om die proses van velveroudering te vertraag en steeds daardie vars voorkoms te kry.

Wanneer dit kom by resultate wat jou jonk sal laat lyk, is daar geen wonderkuur, -produk of -behandeling nie. Maar deur nou al met belangrike skoonheidsgewoontes te begin, soos om sekere sleutel- skoonheidselemente by jou roetine by te voeg, en dit met verjongingsbehandelings wat vir jou pasgemaak is op te volg, kan jy jou vel die beste kans vir goeie gesondheid en glans gee terwyl jy ook die noodsaaklikheid vir meer indringende behandelings later kan uitstel.

Jou vel is ’n lewende orgaan wat asem haal en om dit te kan doen wat dit moet doen en met grasie oud te word, het die vel deurlopende ondersteuning nodig. Ons het ons nuutgevonde en doeltreffende voorkomingsprotokol in drie maklik verteerbare stappe opgedeel:

1. Beskerm wat jy het

Ons preek die heeltyd oor sonskerm, maar ons kan dit nie genoeg benadruk nie. Deur ’n sonskerm met ’n breë spektrum-SPF elke dag aan te wend, maak nie saak of dit reën of die son skyn nie, beskerm jy jou vel teen UV-strale. Hierdie skadelike strale spoor fotoveroudering (wat die ontwikkeling van fyn lyntjies en plooitjies insluit) aan en kan ook tot ernstige kwessies soos velkanker lei. Saam met die SPF wat daagliks aangewend moet word, is dit ook belangrik om ’n breërandhoed en beskermde klere te dra – veral om die delikate gedeelte van jou hals. Oorweeg dit om vitamien C-serum by jou velsorgroetine in die oggend te voeg aangesien hierdie kragtige antioksidant vrye radikale wat deur UV-strale en besoedeling veroorsaak word, beveg en kollageenvervaardiging binne die vel bevorder wat vir jou ’n jonger voorkoms gee.

2. Sluit retinol by jou velsorg in

Retinol is al vir vele jare die gonswoord op mense se lippe. Dit is van vitamien A afgelei wat gebruik word om die vel af te skilfer en dus selomset versnel. Dit help ook met die vervaardiging van kollageen en dit verminder die voorkoms van lyntjies en plooitjies. Aangesien dit die vel sensitiewer vir UV-strale maak, moet dit liefs in die aand gebruik word, in die oggend afgewas word en met ’n SPF opgevolg word vir deur die dag. Aangesien Retinols sulke gespesialiseerde produkte is, is dit belangrik om altyd eerste met ’n velsorgdeskundige te praat voordat jy dit tot jou velsorgroetine voeg.

3. Sluit die jongste aanpassings en behandelings by jou velsorg in

Daar is so baie behandelings beskikbaar om jou te help om die algehele voorkoms van jou vel te verbeter: van behandelinge wat daarop fokus om die tekstuur, plooie en pigmentasie te verbeter of aanpassings wat daarop gemik is om jou huidige pragtige gelaatstrekke te beklemtoon.

Hier is drie hedendaagse verjongingsbehandelings wat vir jou stralende, jeugdige en blywende resultate sal gee:

– Bababotoks

Vergeet van die ou gevriesde uitdrukking! Vandag is die effek van botoks baie subtieler en kan dit vir jou ’n natuurlike voorkoms met ooglopende resultate (veral as dit deur ’n ervare kenner aangewend word) gee. Voorkomende “bababotoks” is wanneer ’n klein hoeveelheid neurotoksien ingespuit word om die spiere liggies te laat ontspan om te voorkom dat diep plooie en fyn lyntjies vorm. Met hierdie behandeling bly jou uitdrukking natuurlik, maar dit kan ook geweldig voordelig wees om te voorkom dat dieper vellyne in die toekoms wys, of om ’n frons te versag en dieper lagplooie te verbloem. Dit lig ook sekere gedeeltes van die gesig vir ’n varser voorkoms.

– Mesobooster

Wie wil nie of het nie ’n hupstoot vir hul vel nodig nie? Soos om jou selle met vitamiene, peptiedes en vog oor te laai vloei. Dit is presies wat hierdie inspuitbare middels op ’n epidermale vlak doen. Mesoboosters is soortgelyk aan dermale vullers, met ’n paar verskille. Dink aan hulle as gesonde opknappers vir jou vel – hulle gee jou vel net die goeie goed (vitamiene, peptiedes en vog) wat tot ’n stralende en jeugdige voorkoms lei terwyl tradisionele gesigvullers daaroor gaan om meer volume aan jou gesig te gee. Al die bestanddele wat in die Mesobooster-behandelings is, help om die vel se eie kollageen, elastien en watervlakke te aktiveer en ’n hupstoot te gee wat die velkleur, papperigheid, fyn lyntjies en plooie ooglopend beter laat lyk. Die behandeling werk ook wondere oor gedeeltes soos die nek en hals, en kan selfs aan jou hande gesmeer word.

– 3D MD PRP (oftewel dokter vampier-gesigsbehandeling)

Vampiergesigsbehandelinge is hoogs gespesialiseerde behandelings waarin bloed getrek word en vir hierdie rede, is dit die moeite werd om na gespesialiseerde geriewe te gaan. Die 3D MD PRP is ’n treetjie op van die tradisionele vampiergesigsbehandeling en word by Dr Nerina Wilkinson + Associates, ’n toonaangewende medies-estetiese kliniek in Kaapstad, aangebied. Hier word die behandeling (wat ook as Dr Vampire bekend staan) deur ’n estetiese dokter en velsorgspesialis te uitgevoer wat hipermoderne toerusting en tegnologie gebruik sodat jy gemoedsrus kan hê. Die behandeling self (wat baie minder vreesaanjaend is as wat dit klink) behels klein inspuitings en “microneedling” in jou bloedryke velplasma wat groeifaktore bevat waarvan jou vel hou. Daar is ’n goeie rede hoekom die behandeling so gewild is: Dit sorg vir ’n soepel, stralende gloed en is veral doeltreffend wanneer dit by die behandeling van veroudering, pigmentasie, en akneelittekens en ander velprobleme kom.

Om later in die lewe ’n natuurlike jeugdige vel te geniet, is dit beter om vroeg met verjonging te begin. Vir ’n persoonlike estetiese en velsorgbehandelingsplan wat daarop gemik is om optimale resultate te lewer, beveel ons aan dat jy Dr Nerina Wilkinson + Associates vandag kontak.

Lees ook: Weet jy watter tipe vel jy het? Ontleed jou vel met ons 5 stappe

The post Begin jou verjongingskuur vroeg appeared first on rooi rose.

Bekendes se top skoonheidswenke

Zoe Salzwedel — Wed, 08 Mar 2023 09:03:02 +0000

Bekendes se top skoonheidswenke deur Zoë Salzwedel. Hooffoto: Pixabay

Kom ons wees gou eerlik: ons almal wonder altyd watter produkte, wenke en truuks bekendes gebruik om hul perfekte voorkomste te skep.

As jy as bekende op die rooitapyt of die silwerdoek verskyn, het jy dikwels ’n baie indrukwekkende groep wat agter die skerms vir jou voorkoms sorg en jou met raad en daad bystaan – van top grimeerkunstenaars en die beste haarstiliste tot stiliste wat jou uitrustings kies. Om nie eers te praat van die uitsoek-skoonheidsprodukte tot jou beskikking nie!

Met dit alles tot jou beskikking, kan dit seker regtig nie té moeilik wees om altyd prentjiemooi en perfek te lyk nie, nè? Maar bekendes het al erken dat die hope grimering en baie produkte op jou hare ook sy tol eis …

Lees ook: Hoe om perfek te lyk op foto’s

Hoe dan gemaak met ’n sensitiewe vel, ligte gelaatskleur of ’n droë kopvel? Wat is die geheim vir daardie pragtige velle en blink hare, of grimering wat ure lank perfek lyk? Hier is ’n klompie bekendes se gunstelingskoonheidswenke en grimeergeheime, spesiaal uitgesoek om jou te help om op jou beste te laat lyk.

Halle Berry se gemaalde koffie-wenk

View this post on Instagram

A post shared by Halle Berry (@halleberry) on Feb 20, 2019 at 9:26am PST

Al ooit gewonder oor Halle Berry se perfekte vel? Ons het! Wel, volgens haar lê die geheim in gemaalde koffiebone. Sowaar! Halle voeg dit by die vloeibare reinigingsgel wat sy vir haar lyf gebruik, en gebruik dit dan as ’n afskilferaar om selluliet te voorkom. Die sagte afskilfering wat die gemaalde koffiebone bied, saam met die kafeïen, verhoog die bloedvloei terwyl die vel ook glad word. Dit verhoog ook sirkulasie en help voorkom water-retensie. Jy kan ook die gemaalde bone met warm water meng in plaas daarvan om dit met jou lyfwasproduk te meng.

Hillary Duff se gloeiende vel!

View this post on Instagram

A post shared by @hilaryduff (@hillaryduff) on May 19, 2018 at 9:47am PDT

Hoe kry Hilary haar gloeiende voorkoms? Die antwoord is eenvoudig: gebruik ’n verfrissende gesigsproei (spray mist) voordat jy jou grimering aanwend. Dit help om ’n dowwe en moeë vel vinnig te verfris en weer te laat gloei. Kies ’n sproei wat anti-oksidante bevat en jou vel die hele dag gehidreer hou.

Lees ook: 20 wenke vir fotomooi-grimering

Rachel Bilson se grimeerverwyderaar

View this post on Instagram

A post shared by @rachelbilson on Sep 12, 2018 at 8:19pm PDT

Rachel Bilson vertel dat sy daarvan hou om saans haar grimering met Vaseline af te haal. Sy sê dis ’n vinnige en maklike manier om alle grimering na ‘n lang dag te verwyder. Boonop is dit ook sag op die vel en uiters bevogtigend.

Wenk: Jy kan ook Vaseline in sy roomformaat gebruik om jou grimering te verwyder. Maak net seker dat jy een gebruik wat geen reuke bevat wat dalk jou vel kan irriteer nie.

Lees ook: Tracey Lange se heel beste skoonheidsgeheime

Die sangeres Jewel se rooskleurige wange

View this post on Instagram

A post shared by Jewel (@jewel) on Aug 25, 2018 at 5:33pm PDT

Die gewilde sangeres Jewel sê liptint is haar geheim vir perfekte rooskleurige wange. Sy wend die tint onder haar onderlaag aan om ’n perfekte en natuurlike gloed te skep. Deur dit onder die onderlaag te gebruik, verseker sy dat die kleur nie te intens en oorweldigend is nie, en die onderlaag versag die voorkoms nog verder.

Lees ook: Erica Wessels se skoonheidsgeheime

Miranda Kerr se skitterende oë

View this post on Instagram

A post shared by Miranda (@mirandakerr) on Mar 4, 2019 at 9:53am PST

Miranda Kerr is bekend vir haar groot, potblou oë, maar min mense ken haar geheim om dit nóg verder te beklemtoon… Dié supermodel vertel dat sy ’n deurskynende lipsalf as ’n verhelderaar rondom haar oë gebruik. Maak net seker as jy van dié wenk hou dat jy ’n natuurlike lipsalf gebruik en nie ’n lipglans nie.

Lees ook: Ons beste raad vir sagte, soenbare lippe

Shakira se velgeheim

View this post on Instagram

A post shared by Shakira (@shakira) on Jul 28, 2018 at 3:55pm PDT

Shakira weet hoe belangrik dit is om jou vel teen die son te beskerm. Daarom gebruik sy nie sonskerm vir volwassenes nie, maar baba-sonskerm. Dis dikwels sterker as gewone sonskerm – op dié manier word haar vel uiters goed teen skadelike sonstrale beskerm.

Lees ook: Skep ’n sonskermroetine vir jou kinders

Catherine Zeta-Jones se altyd-blink hare

View this post on Instagram

A post shared by Catherine Zeta-Jones (@catherinezetajones) on Jan 18, 2019 at 8:36am PST

Glo dit of nie, maar Catherine se geheim vir haar lang, blink, bruin hare is bier! Die vitamiene en aminosure in bier help om te verhoed dat hare vaal word, en die alkohol help om die opbou van vullis te verwyder. Die vitamiene B reguleer die olieproduksie van die kopvel. Die gis speel ook ’n belangrike rol – dit het ’n suur pH-vlak, wat beteken dat dit die haarskag sluit en as gevolg daarvan mooi, blink hare veroorsaak.

Volwasse aknee: Ons klop by ’n kenner aan

Karlien Meiring — Mon, 07 Nov 2022 07:53:56 +0000

Deur Bianca Muller. Hooffoto: Pexels

Wat is volwasse aknee?

Volwassenes kan aknee kry en soms begin dit eers op 30-, 40- of 50-jarige ouderdom. Ons noem dit dan volwasse-aankoms-aknee. Dit kom meer algemeen by vroue as by mans voor. Daar is egter ook gevalle waar hardnekkige aknee wat in die tienerjare begin net nooit opklaar nie.

Wat is die oorsake van volwasse aknee en waarom sukkel slegs sommige mense daarmee?

Hormone speel ’n groot rol omdat dit die oliekliere stimuleer wat porieë laat verstop en swart- en witkoppies (komedone) laat vorm. ’n Mens sien dit nie altyd nie omdat dit mikroskopies klein kan wees. Wanneer dit met bakterieë ontsteek raak, vorm daar puisies.

Dit is algemeen om puisies rondom menstruasie te ontwikkel, asook in die tydperk nadat ’n vrou opgehou het om ’n voorbehoedmiddel te gebruik. Verder kan hormonale veranderinge gedurende swangerskap, menopouse en die premenopousale lewensfase ook aknee teweegbring. Sommige mense wat meer as ander met hul oliekliere sukkel, is sensitiewer vir die hormone wat in die bloed sirkuleer.

Watter produkte sal jy vir diegene wat met volwasse aknee sukkel, aanbeveel?

Ek beveel gewoonlik ’n eenvoudige velsorgroetine aan wat min produkte insluit.

Was jou gesig soggens en saans met ’n skoonmaakproduk wat sagkens met die vel te werk gaan – verkieslik een wat nie skuim maak of skrop nie. Miselwater is byvoorbeeld ’n doeltreffende reiniger wat ook gebruik kan word om grimering te verwyder.

Wend gesigsonskerm in die oggend aan – dis belangrik om dit te doen selfs al reën dit of al is jy meestal binnenshuis. Sonskerm help onder meer om die pigmentasie wat deur die aknee agtergelaat word, te verlig.

Gebruik liefs ’n onderlaag met ’n waterbasis en gebruik saans ’n vogroom wat geen kleur- of geurmiddels bevat nie.

Lees die etikette van jou velsorgprodukte noukeurig deur en soek vir frases soos: “Geskik vir veltipes geneig tot aknee”, of “Sal nie die porieë verstop nie”.

Wat moet mense wat met volwasse aknee sukkel nie doen nie?

● Probeer om nie die puisies te druk nie.

● Moet liefs nie verfrissers (toners) gebruik nie.

● Moenie tandepasta op die puisies smeer nie!

Watter mites is daar oor volwasse aknee?

Aknee is slegs ’n skoonheidsprobleem. Dit is glad nie die geval nie! Aknee beïnvloed ’n persoon se selfvertroue en gemoed, en dit kan permanente littekens los.

Het jy enige ander wenke om volwasse aknee te voorkom en behandel?

● Probeer om minder te stres. Konstante chroniese stres kan die probleem vererger. Wanneer ons stres, vervaardig dit androgene (ook ’n hormoon) wat die oliekliere in die vel stimuleer en tot aknee kan lei.

● Volg ’n gesonde dieet. Daar is ’n eiland in Papoea-Nieu-Guinee waar tieners en volwassenes geen aknee het nie. Die verskynsel word toegeskryf aan hul gesonde dieet van vrugte, groente met baie vis en geen suiwelprodukte nie.

● Topikale retinoïede is een van die belangrikste behandelinge vir aknee wat dokters en dermatoloë voorskryf. Dit raak van die komedone ontslae en voorkom só puisies. Let wel daarop dat retinoïede gedurende swangerskap teenaangedui word.

Wanneer is dit die regte tyd om ’n dermatoloog te besoek?

Volwasse aknee is ’n groot frustrasie. Diegene wat bogenoemde wenke probeer en steeds op moedverloor se vlakte staan, kan gerus by ’n dermatoloog aanklop of selfs sterker medikasie oorweeg.

Besoek dr Jacques du Toit se webwerf by https://dermatologistcapetown.net/

Daddy’s Deals het ’n wye verskeidenheid fantastiese skoonheidspakkette wat vir jou geskik is. Besoek hul webwerf vir meer inligting oor dermaplaning, mikronaald- en ander skoonheidsbehandelings.

Lees ook: Tuissorg-gesigbehandeling – doen dit self!

The post Volwasse aknee: Ons klop by ’n kenner aan appeared first on rooi rose.

Dr Judey se vyf topwenke om jou vel dié somer te beskerm

Karlien Meiring — Mon, 31 Oct 2022 08:27:12 +0000

Dit raak nou somer in Suid-Afrika. Die dae word warmer en langer en dit beteken ons bring meer tyd buite deur en ons dagboeke raak propvol sosiale aktiwiteite. Dit het ’n impak op ons vel. “Minstens 80% van alle tekens van velveroudering is die gevolg van faktore wat van buite af kom (blootstelling aan die son, spanning, slaap, dieet, ens.) en selfs meer as jou dieet heelwat suiker bevat of as jy rook,” sê dr Judey Pretorius, ’n vername biomediese wetenskaplike en stigter van Biomedical Emporium. Gelukkig is daar ook goeie nuus, want dit beteken jy kan velveroudering tot ’n groot mate vertraag.

Dr Judey het bekendheid verwerf vir haar unieke formulerings wat ’n radikale invloed het op die koers wat nuwe ontwikkelinge in skoonheid en wondversorging inslaan. Sy bring vernuwing na selkultuurprosesse, en sy spog ook met haar eie mediese en estetiese velsorgreeks. ’n Konsekwente skoonheidsroetine gerugsteun met geteikende, wetenskaplik gegronde produkte, sal volgens dr Judy, die impak wat seisoenale stressors op jou vel het, verminder.

Loer bietjie na vyf slim wenke waarmee jy dié somer velveroudering kan bekamp:

1. Keer die puisies

As jy dan en wan met puisies sukkel, gebruik gerus ’n reiniger (wat jy oornag kan aanhou) om knoppies mee te behandel. Kies ’n reiniger wat salisielsuur of melksuur bevat aangesien dit anti-inflammatories is en jou op ’n natuurlike wyse teen skadelike mikrobes, dikwels die rede vir hierdie skielike uitbrake, te beskerm.

2. Hou dit vars

Jy sal nie kos eet waarvan die vervaldatum reeds verby is nie – waarom dan velsorgprodukte gebruik wat wel het? Die gevolge is dalk nie so erg nie, maar die feit bly staan dat velsorgprodukte wat verval het, nie naastenby so goed werk soos nuwes nie. As jy jou velsorgroetine gereeld volg, sal jou produkte nooit te oud raak nie.

3. Werk saggies

As jou vel maklik geïrriteerd raak of allergies is (veral ligte veltipes), moet jy wegbly van enige velsorgprodukte wat geure en kleurstowwe bevat. Vermy ook velsorgprodukte wat preserveermiddels (en prikkelstowwe) soos metiel of propiel parabene bevat.

4. Behou jou glans

As jy ’n binnekort ’n belangrike afspraak het, wil jy graag hê jou vel moet lewendig en natuurlik glansend lyk. Maak die dag ekstra spesiaal en bespreek vir jou ’n 25% glikolsuurafskilfering (peel) vier dae voor jou geselligheid. Hierdie gewone afskilferingsbehandeling werk sagkens met jou vel, en help om dooie selle te verwyder en kollageen in te krimp.

5. Volg ’n instandhoudingsplan

Jy kan elke oggend en elke aand dieselfde basiese velsorgroetine volg. My voorstel vir een met slegs drie stappe is: