Sjef Snoekie Hoofstuk 1: Hartsake deur Martie Swanepoel. Hooffoto: iStock/eclipse_images

Klik hier om die agtergrond tot die storie te lees.

Sjef Snoekie Hoofstuk 1: Hartsake

Die begin van die einde van die amperse toekomstige liefdestragedie het met die oshart begin.

En, met Snoekie se ouma Lucille se skerp waarnemersoog.

Lucille Roux het al vir drie jaar geweet Werner is nie die regte man vir Snoekie nie. Ver te lig in die broek om ‘n Vrystaatse plaasmeisie gelukkig te hou. Sy het ook met goeie rede vermoed die ventjie het meer sy oog op die Roux’s se rykdom en op ander meisies as op Snoekie.

Werner het toenemend ‘n probleem met Snoekie se kurwes ontwikkel en haar met ander meisies begin vergelyk. Vir Lucille was dit ‘n gevaarteken dat haar kleindogter op verkeerde liefdespad is.

Buiten die slap ogie, wat Werner openbaar het by distriksbyeenkomste as daar mooi meisies paradeer, het hy gedurig met ‘n nuwe dieet op die plaas begin opdaag om Snoekie te inspireer.

‘n Groot deel van die probleem was, die Roux’s hou van lekker eet. Daarby was Snoekie se groot droom ‘n toekoms as sjef. Nie een van dié twee redes en Werner wou rym nie.

“Snoek, as die man nie tevrede is met jou lyf nie, moet jy hom wegjaag. Jy kan nie die res van jou lewe dieet om ‘n man tevrede te stel nie. Ons is kosmense. Ons kook. Ons eet lekker. Ons knibbel nie aan gesondheidskossies nie. Jy is ‘n uitstekende kok. Wat gaan van jou droom word as jy nie meer aan jou eie geregte mag proe nie?”

Lucille wou keer vir Snoekie se hart, en haar toekoms.

“Maar Ouma, hy is reg, ek is dik,” het Snoekie teëgestribbel.

“My kind, Aletta Fick van die dorp is dik. Ons het gesonde kurwes. Wat gaan jy maak? Ophou kook? Hierdie mannetjie se voorskrifte maak my bekommerd. Hy het jou gekry soos jy is, en nou is hy skieklik nie meer tevrede met jou nie? Steun hy jou in jou drome of gaan dit net oor sy drome? Jy kook al minder die goed waarvoor jy so lief is. Dis vir my asof hy alles aan jou wil verander om by hom in te pas. Wat doen hy om by jou aan te pas?”

Snoekie wou niks weet van waarskuwings nie. Sy was verlief. Dolverlief op ‘n man wat haar op slaaiblare wil laat leef, en dit terwyl sy saans van vetkoek, brioche, profiteroles en suur lewer op krummelpap droom.

“Hy gaan nooit tevrede wees voor hy jou nie in ‘n Barbie-kloon verander het nie. Dis wat hy soek, my kind, ‘n meisie met ‘n perfekte lyf wat by sy leefwyse inpas. Een wat nie kook en eet nie.”

Snoekie was ontkennend oor Werner. Hy het haar so lief dat hy haar gesondheid wil oppas, het sy geglo.

Lucille het vermoed Werner is heeltemal té bewus dat Snoekie haar pa se enigste erfgenaam is en dat Stefaans ‘n wewenaar is wat nie ‘n gesonde man is nie. Maar boer op die plaas, was beslis nie op sy prioriteitslys nie. Net Stefaans se bankbalans, vermoed Lucille.

Lucille het toenemend haar plannetjies in aksie begin stel.

Snoekie was van kleins af bekwaam agter die kospotte. Eintlik begaafd, het Lucille besef, en sy ken van kos. Sy het na die Tweede Wêreldoorlog uit Frankryk na Suid-Afrika gekom om met Faan Roux van die Viljoenskroon-distrik te kom trou. Sy kom uit ‘n familie van sterk sjefs en familiekokke en haar familie het steeds ‘n groot familierestaurant in Parys. Kosmense wat van eet hou. Dit en die Roux’s se voorliefde vir gesonde boerekos was ‘n wenkombinasie.

Dit is als deel van Snoekie se DNA waaraan Werner wil karring.

Omdat die Franse nog altyd alles van die hoender se snawel tot sy poepholletjie gekook het, het Lucille soos ‘n handskoen gepas by die Roux’s se liefde vir enigiets van afval tot skaappeertjies op die spyskaart. Toe sy op die plaas aankom, kon sy reeds enigiets van ‘n hoender, ‘n vark, eend of fisant slag en verwerk en smullekker berei. Van die bek tot die stert se punt.

Sy het weer by haar ouma geleer dat mens niks vermors nie. Die Franse het deur twee Wêreldoorloë swaargekry en die boere ook. Dié twee swaar geskiedenisse in kombinasie het die spyskaarte op die Roux’s se plaas deur die jare oorheers. Niks word vermors nie.

Die Roux’s se leuse is: Dis jou eie skuld as jy nie lekker eet nie.

Dis soos Snoekie grootgeword het. In ‘n plaaskombuis, voor ‘n koolstroof waar die allerheerlikste lekkernye prut, braai, stoom en bak.

Sjef Snoekie Hoofstuk 1: Hartsake

Dis juis met die Roux’s se voorliefde vir eksotiese geregte soos gebakte skaapkop en gestoofde varkstertjies wat Lucille die krake in Werner se fasade begin sien het. Sy het hom fyn dopgehou aan tafel en gesien hoe hy diskreet die lekkernye soos skaapogies en selfs die Pous se neus op die hoender se stuitjie probeer vermy.

Snoekie self was te verlief-blind om dit raak te sien. Sy het gedink hy vind haar sult en lewerkoekies onweerstaanbaar smaaklik, maar Lucille het gesien hoe groen raak hy om die kiewe toe Snoekie hom met groot liefde skaapbreins op roosterbrood aanbied.

Hy het dit met yslike slukke water afgesluk … terwyl hy skynheilig ge- “oe” en ”aa” het.

Swerkater.

“Daar is groot moeilikheid op die horison,” het Lucille vir Stefaans gewaarsku. Dié het dit toe ook al raakgesien.

Werner het Snoekie probeer oortuig dat die geregte des aanstoots (vir hom) hoog in kilojoules is en dat hy wat Werner is, saam met Snoekie die pad na beter gesondheid sal aanpak.

Met Snoekie se lyf was daar niks verkeerd nie, het Lucille geweet. Snoekie het normale kurwes. Haar lyfie is net te kort om die proporsies te hanteer.

Snoekie is ‘n pragtige meisiekind. Haar lang swart krulhare, viooltjieblou oë, spierwit vel en vol borste het sy van die Franse kant geërf. Die kuiltjies in haar wange, fyn neusie en kort lyfie van die Roux’s en haar ma.

So kom dit toe dat Werner ‘n goeie voorbeeld vir Snoekie wil stel en by die gym in die stad aansluit. Hy werk mos daar as makelaar. Daar in Sandton. Hy het Snoekie begin aanmoedig om ‘n gym op die plaas in te rig.

Sy het haar pa gehelp om die varkplaas te bestuur en was in beheer van die verwerking van die vleisprodukte. Sy het heeldag op die plaas rondgedraf en nie juis tyd of energie gehad vir gym nie. Maar sy wou Werner tevrede stel.

Met ‘n wrewel in haar hart het Lucille gesien hoe een van die ou melkkamers in ‘n gym op die plaas omskep word.

“Mors van geld,” het Stefaans ook geknor.

Lucille het al hoe slegter begin slaap oor haar kleinkind se hartsake. Die gym-ding het Snoekie se lewe begin oorheers. Sedert Nonnie se dood was Lucille ekstra beskermend teenoor Snoekie en sy was nie gelukkig oor die manier hoe Werner die kind wil hiet en gebied nie.

Naweke wou Werner net tennis speel en langs die swembad op Wonderfontein uitspan … en Snoekie in die gym laat sweet. Hy het haar al meer weggelok van die plaaswerk, en van die kombuis.

Arme Snoekie het ‘n ongesonde obsessie begin ontwikkel oor haar voorkoms.  Sy het nie meer aan haar eie kos gesmul nie en haarself in die gym gemoor. Als ter wille van Werner, wie se jeans volgens haar pa en ouma (tereg) “darem vreeslik styf sit”.

Toe wink Valentynsdag soos ‘n baken van hoop op die horison vir Lucille. Snoekie het gedroom dat Werner die groot vraag sal vra, en Lucille het gehoop op ‘n Rubicon, ‘n skeidslyn, wat Snoekie sal wys dat Werner nie edele bedoelings het nie.

Lucille was nog altyd haar kleindogter se mentor in hart- en kulinêre sake, en dit is die kans waarvoor sy gewag het.

“Watter spesiale gereg kan ek vir Werner voorberei vir Valentynsdag?” het Snoekie een oggend gevra.

Lucille het hard probeer om haar vreugde in te hou.

“My familie se Coeur de boeuf farci! Ons Du Monds berei dit al geslagte lank voor vir ons geliefdes.”

(Sy het nie genoem dat die resep eintlik ‘n familietradisie is om ‘n geliefde te toets nie!)

“Ek het jou oupa se hart met dié gestopte oshart-resep verower. Dié dat hy my na die oorlog Suid-Afrika toe laat kom het om te trou. Hy het gesmul, en besluit ‘n meisie wat ‘n hart so kan voorberei, kan hy nie na die oorlog in Frankryk agterlaat nie.”

Snoekie was dadelik oortuig.

Op 28 het die troulus toenemend van haar besit geneem en met haar dieet sterk op dreef, het sy gevoel dis tyd dat Werner die vraag vra.

Lucille en Stefaans het afwagtend gelag.

Gestopte oshart is nie jou fiemieserige eter se speelmaat nie!

Skakel elke Vrydag 11h00 in om die volgende hoofstukke van Sjef Snoekie te lees.

Lees solank: Hoofstuk 2

Hoofstuk 3

Hoofstuk 4

Hoofstuk 5

Hoofstuk 6

Intussen kan jy solank inhaal met ons ander vervolgverhale, en begin luister aan ons nuutste een!

Ons nuwe voorlesing:

Lam in Wolfsklere

Geskryf deur Bernette Bergenthuin, voorgelees deur Elma Postma. Begin sommer nou luister.

Vlam

Lees al die hoofstukke van die gewilde vervolgverhaal uit die pen van Martie Swanepoel.

Botox, Barbies & Bietse

Dans met die rooi rok

The post Sjef Snoekie Hoofstuk 1: Hartsake appeared first on rooi rose.

vDans met die rooi rok Episode 19: In die murasie se skaduwee deur Martie Swanepoel. Voorgelees deur Bettie Kemp. 

Dans met die rooi rok Episode 19: In die murasie se skaduwee

Die verskrikte gesigte van haar kinders by die polisiekantoor sny deur Amelie se gewete. Sy het hulle saam met haar by die gemors ingetrek.

As jy hierdie geniet het, weet ons jy sal van ons vorige vervolgverhaal, Botox, Barbies en Bietse hou!

Het jy geweet?

Ons het nog heerlike podsendings waarna jy kan luister!

Tussen Ons

Jy is mooi nes jy is! In Tussen Ons seisoen 2 gesels rooi rose-joernalis Mariette Snyman met kundiges en inspirerende vroue oor hoe jy gelukkiger kan voel in jou lyf – ongeag jou ouderdom, agtergrond of liggaamstipe. Vir meer inligting besoek rooirose.co.za of e-pos rrradio@caxton.co.za

Tee  & Taai Toffies

Bekendes soos Ruda Landman, Cindy Swanepoel, Nadia Beukes, Christel van den Bergh, Lindie Strydom en Werner Stander gesels elke tweede week openhartig met bekroonde joernalis en radio-aanbieder Ilse Salzwedel oor hul doen en late en lief en leed. Boonop gaan hulle probeer om vir luisteraars raad te gee oor hul verhoudings- en lewensprobleme. Gaan dit werk? Luister en oordeel maar! Ons waarborg ’n luisterervaring vol deernis en humor.

Botox, Barbies en Bietse

In dié vervolgverhaal deur Martie Swanepoel neem die bekende aktrise en stemkunstenaar Elize Cawood jou op ’n boeiende reis deur Liesl Burger se lewe. Liesl is ’n kunstenaar wat die plooie van haar man se verraad met ’n vintage Barbie uit haar lewe botox. Gedurende die 16 episodes gaan jy elke week saam met haar lag en ’n bietjie huil. En dalk jou vrouwees herontdek … Jy sal dit nie wil misloop nie!

#rrWenk: Jy kan gerus met oorfone luister

The post Dans met die rooi rok Episode 19: In die murasie se skaduwee appeared first on rooi rose.

Vlam hoofstuk 52: Jupiter deur Martie Swanepoel     

Voordat jy met Vlam hoofstuk 52 begin, lees eers die vorige hoofstukke. Klik hier

Vlam hoofstuk 52: Jupiter

Dit is soos ‘n pelgrimstog. Vir ‘n buitestaander sou die drie reisgenote ‘n vreemde kombinasie gewees het: die rolprentheld, en die oudsoldaat en sy vyand.

Alano Gumba en Niek Branders sit stil langs mekaar in die helikopter. Hulle gedagtes reis ver terug terwyl hulle oor die landskap van Owamboland ry. Hulle kyk by die venster uit na die terrein waar hulle eens as vyande tot die dood toe geveg het.

Skielik vat Alano Niek aan die arm.

“Ek is bly ons het gekom.”

Niek knik sy kop. Sy mond voel droog en sy hart klop in sy keel. Byna soos daardie dag.

Duard sit langs hulle met sy eie gedagtes. Hy veg al jare ‘n eie oorlog met sy pa in sy kop, en vandag hoop hy daardie oorlog kom tot ‘n punt. Hy wil vrede maak met Ewie du Preez, die dapper soldaat met die medalje. Vandag wil hy vrede maak met ‘n pa wat hom en sy ma emosioneel verniel het.

Voor die eerste tonele van Border War Patrol geskiet word, wil hy sy eie grensoorlog klaar fight. Die geveg tussen die grense van die kinder- en volwassejare.

Met die landing slaan die hitte teen hulle op. Die son is fel, Niek stap vooruit. Sy oë fynkam die terrein vir bekende bakens. Herinneringe bring die reuk van kordiet, en in sy kop hoor hy die kleingeweervuur, die mortiere, die kanonne. Die gesuis van RPG7-vuurpylvuur ruk sy gedagtes tot stilstand. Hy kyk om hom na die bosgebied wat nou so vreedsaam en verlate lyk. Hy kyk na Alano en hy weet, hy onthou ook. Die weermagman en die SWAPO-man aan weerskante van die jare tagtig se oorgrensoperasies.

Niek en Ewie was betrokke by operasie Jupiter en Alano en sy manne se basis was hulle teiken.

“Hier het die ops-tent gestaan,” beduie Niek. Hy vertel van die haarfyn beplanning en Alano vul detail van die ander kant van die munt in. Vir Duard is dit asof die fliek waarin hy in die volgende weke gaan speel nou voor sy oog afspeel.

“Ek en jou pa was reg vir daardie dag. So reg as wat kan kom.”

Niek stap vooruit. Hulle ry met Jeeps tot by die plek waar Niek en Ewie se peletons as stoppergroepe ontplooi is.

Alano onthou hoe die mirages gekom het. Dit was verwoestend. Hulle het gevlug vir hul lewens … en Niek en Ewie se manne het vir hulle gewag.

“Ons was die Bravo- stoppergroep. My manne dié kant van die donga, en Ewie-hulle daardie kant. Duard, jou pa was na aan sy manne. Jy moet dit weet. Ons was almal saam in die ding. Die RPG7 se vuur het Ewie-hulle getref. Sy makkers het voor hom gesterf. Dit het hom gebreek. Elkeen het sy oomblik wat hy crack-punt bereik. Daardie dag was Ewie se oomblik. Ek het lank gesukkel om hom daarvoor te vergewe.”

Duard luister na die ouer man se vertelling, maar hy onthou hoe hy as seuntjie bang weggekruip het as sy pa uithaak.

“Ek verstaan hoe my pa moes voel, maar wat hy na daardie dag geword het … Dit is waarmee ek en my ma moes deal. Ons moes vlug en in my ma se vaderland  nuut begin.  My ma het baie goed geweet wat my pa voor die tyd was, en ek dink sy het probeer verstaan hoe die grens hom verander het, maar dit wat hy na die tyd geword het, het ons lewens vernietig. My pa kon nie saam met sy leuen saamleef nie en hy het my en my ma daarvoor gestraf.”

Hulle stap stil in die rigting van waar Niek vir Ewie gekry het.

“Ek dink dit was hier rond. Duard, ek kan nie vir jou probeer verduidelik hoe ‘n man se kop verander word deur so ‘n ding nie.  Ek verskoon Ewie nie, maar ek het baie manne sien breek. Baie kon aangaan met hul normale lewe, party nie. Ons kan nie verander wat daardie dag aan jou pa gedoen het nie, maar ons kan dalk verander hoe ek, jy en Alano vandag daaroor dink. Die fliek waarin jy gaan speel, dit gaan ‘n goeie storie vertel. Ek is tevrede met die storie wat julle fliek gaan vertel, en ek glo Alano ook. Dit was ‘n oorlog. Teenpole word saamgegooi in ‘n situasie wat hom een of ander tyd uitwoed. Die grensoorlog het uitgewoed en nou staan ons vandag hier langs mekaar, ek en Alano. Twee ou mans wat die oorlog van ons jeug onthou.”

Hulle stap in die koers waar Ewie en Niek vir Alano gekry het.

“Ek sou daardie dag onder hierdie bos gesterf het aan my beserings as jy my nie gevang het nie, Niek. Jy het my gevang, maar ook my lewe gered. En ja, jy het Ewie ook daardie dag gered. Dis jammer dit het so skeef uitgedraai. Maar ons is mos vandag hier om daardie dag agter ons te los? Of hoe?”

Tewyl die twee ouer mans gedagtes uitruil oor wat na daardie dag met hulle gebeur het, sit Duard eenkant en luister. Dan staan hy op en stap die veld in.

“Los hom,” sê Niek. “Laat hy die ding met homself gaan uitsorteer.”

Dis eers laataand toe die helikopter naby die rolprentspan se kamp land.

Niekie staan en toekyk hoe die drie mans mekaar omhels, en sy wonder watter soort recce het hulle saam beleef.

Sy sien hoe Duard met geboë skouers na sy woonwa stap. Skielik lyk hy nie soos ‘n beroemde rolprentheld wat Melissa uitbeeld nie. Hy lyk soos iemand wat ‘n swaar las dra.

Sy wonder wat gaan aan in dié geheimsinnige man se kop. En sy kan nie help om te dink haar pa ken die held beter as wat hy voorgee nie.

Dalk beter as Melissa?

Sy neem haar voor dat sy Duard Wayne se geheime gaan ontrafel nog voor die fliek in die blik is.

As jy van Vlam hoofstuk 52: Jupiter gehou het, gaan jy gaande wees oor ons twee GRATIS voorlesings – albei uit die pen van Martie Swanepoel! Luister sommer nou:

Botox, Barbies en Bietse

Dans met die rooi rok

Klik hier vir nog lekker podsendings

The post Vlam hoofstuk 52: Jupiter appeared first on rooi rose.

Vlam Hoofstuk 51: Gevaarligte deur Martie Swanepoel

Vang eers op met die vorige hoofstukke van Vlam. Klik hier.

Vlam Hoofstuk 51: Gevaarligte

Die twee vroue staan mekaar en aangluur.

“Vir wat kruip jy hier in die bosse rond? Nie dat dit vir my ‘n tranerige besigheid gaan wees as jy iets oorkom nie, maar ons is nou in die bos en hier is regtig wilde diere. Dit sal aaklig wees as die heldin van die fliek sterf voor die fliek nog begin.”

Melissa druk haar gesig byna teen dié van Niekie.

“Dink net watter lekker stories sal jy kry as ‘n ongedierte my byt? Jy is mos uitgehonger vir ‘n goeie storie?”

Melissa se smerige onderhoud met Vroulief is nog lank nie vergete nie.

“Ek dink weer dit is jy wat uitgehonger is vir ‘n goeie storie. Hoeveel is jy betaal vir die onderhoud? Suid-Afrikaanse geld kan seker nie veel aan jou bankrekening doen nie? Sê my, hoekom het jy dit gedoen?”

Melissa se laggie ritsel deur die bosse.

“Ai, sal jy nie graag wou weet nie? Maar miskien moet jy Duard bietjie uitvra oor al die publisiteitstruuks wat vir hierdie fliek beplan word. Julle Suid-Afrikaners is tog so goedgelowig en naïef. Julle verstaan duidelik nie hoe die rolprentbedryf werk nie. Dit gaan als oor geld, my skat. Katjieng. Die paar randjies wat Mediahuis in die projek sit, is by verre nie genoeg om my en Duard te betaal nie. Het jy gedink die storie gaan by Vroulief ophou? Die oorsese media wag soos uitgehongerde honde op enige sappige brokkie van hierdie filmstel af.”

Niekie wens sy kan die vrou deur haar smalende gevreetjie klap.

“Die storie van hierdie fliek is vir ons Suid-Afrikaners belangrik. Dit is na aan my pa en sy geslag. Hierdie oorlog was vir hulle belangrik. Dit is nie net nog ‘n Hollywood-fliek nie. Ek sal nie toelaat dat jy … dat julle dit uitbuit om julself nog ryker te maak nie.”

Weer daardie smalende laggie.

“Og, tog so sentimenteel. Geen wonder jy fassineer Duard nie. Hy is ook soms so ‘n sentimentele siel. Dis die dat hy so moet keer vir sy verlede in Hollywood, daar is nie plek vir mense met sentimentele geheime in ons bedryf nie.”

Niekie se ore is dadelik gespits.

“So, watter geheim dra Duard nogal in hom rond?”

“Sou jy nie graag wou weet nie? Maar sê my, wil jy weet omdat dit ‘n goeie storie kan wees of omdat jy jou bes probeer om Duard te vang? Laat ek jou baie hartseer spaar, Skat. Duard sal nie vir ‘n gewone ou meisietjie soos jy gaan nie. Ek het jou klaar uitgekyk. Jy is die soort wat huis wil opsit en ‘n gesinnetjie wil hê wat dolgelukkig in ‘n voorstedelike ou huisie bly. Wel, Duard is nie die soort ou wat saam met jou so ‘n gewone ou lewetjie sal kan aanpak nie. Hy hou van die kollig en die geld. Jammer, Skat, dié een gaan jy nie wen nie.”

Niekie kook in die skemerte.

“Weet jy, ek dink jy is verkeerd. Ek dink Duard is nie die tipiese Hollywood-man nie. Ek dink dit is hoekom jy hom nog nie kansel toe kon sleep nie. Jy probeer te hard, en hy skop vas, nè?”

Melissa gooi haar golwende hare agteroor soos sy lag.

“Sjoe, jy glo aan fairy tales? Jammer om jou teleur te stel, maar ek en Duard het ‘n geskiedenis. Ons ken mekaar van toe ons nog nie in die kollig was nie. Ons weet dinge van mekaar wat niemand anders weet nie. Ons kom ‘n lang pad. Ons kan oor dinge praat wat ons met niemand anders kan deel nie. Lang gesprekke deur die nag.”

Dit lui ‘n klokkie by Niekie.

“Maar dan gun ek julle vir mekaar. Regtig. Ek wil nie ‘n man hê wat agteraf met ‘n ander vrou sal flirt nie.”

Melissa staan dreigend nader.

Niekie het ‘n teer snaar geraak.

“Ag, is dit weer oor die ou soentjie? Duard het my vertel hoe maklik jy jou lippies aangebied het. Ons het lekker daaroor gelag. Duard vertel my altyd van die meisies wat in sy web beland. Ons vind dit so vermaaklik, die sentimentele spel van die liefde wat ander mense speel. Maar vir ons is ons loopbane die belangrikste. Dis hoekom ons so goed oor die weg kom. Ons dink dieselfde. As ek jou raad kan gee, vergeet die verliefdheid. Jy is nou heeltemal buite jou liga. Gaan eerder vir ‘n gewone outjie soos daardie Henk-fotograaf. Duard sê juis hy hardloop soos ‘n verliefde skoothond agter jou aan. Foei, in die klein ou dammetjie van Suid-Afrika is jou skoonheid seker nogal ‘n treffer. Maar in ons wêreld is jy bloot interessant. Jy het jou oomblikkies van roem in Cannes gehad. Neem dit en bly daarby. Moenie verder die kollig-speletjie probeer speel nie. Jy gaan net seerkry.”

Niekie snak na haar asem.

Soveel gemeenheid in een pakket. Melissa se woorde maak seerder as wat sy sou hoop.

Maar die verraad laat haar byna lighoofdig voel. Sy het dit darem nie van Duard verwag nie. Sy smalende woorde oor Henk is onverdiend. Hy maak dan of Henk sy vriend is!

Sy besef Melissa is reg, sy wat Niekie is, is nie gesout in die kolligwêreld nie. Soveel agterbaksheid en gemeenheid is vir haar onbegryplik.

Lank nadat sy weggestap het van Melissa, eggo die aktrise se woorde in haar kop, en dit maak haar bekommerd.

As Duard en Melissa hierdie fliek gaan misbruik vir hulle eie publisiteit, gaan sy hulle keer. Sy gaan uitvind wat hulle planne is nog voor die kameras begin rol.

Sy sal nie toelaat dat haar pa en sy vriende se bosoorlog so misbruik word nie.

As jy van Vlam Hoofstuk 51: Gevaarligte gehou het, gaan jy mal wees hieroor! Luister nou na ons gratis voorlesings van Martie Swanepoel se gewildste werke: Botox, Barbies en Bietse en Dans met die rooi rok. 

The post Vlam Hoofstuk 51: Gevaarligte appeared first on rooi rose.

Dans met die rooi rok Episode 16: Die ontnugtering deur Martie Swanepoel, voorgelees deur Bettie Kemp

Dans met die rooi rok Episode 16: Die ontnugtering

Die lewensles wat sy die twee dogters moet gee, is seer, en onbepland. Sy is jammer dat sy hulle vertroue in mans so moet skend.
**LET WEL: Die episode bevat ‘n gewelddadige toneel wat sensitiewe luisteraars mag ontstel.**

As jy hierdie geniet het, weet ons jy sal van ons vorige vervolgverhaal, Botox, Barbies en Bietse hou!

The post Dans met die rooi rok Episode 16: Die ontnugtering appeared first on rooi rose.

Dans met die rooi rok Episode 12: Die arrogansie! deur Martie Swanepoel, voorgelees deur Bettie Kemp

Dans met die rooi rok Episode 12: Die arrogansie!

Amelie voel hoe haar wange van woede begin gloei. . Sy vertel vir Adrien presies wat sy van sy maniere dink, maar weerhou haar darem daarvan om sy ma by sy gebrek aan ordentlikheid te betrek.

As jy hierdie geniet het, weet ons jy sal van ons vorige vervolgverhaal, Botox, Barbies en Bietse hou!

The post Dans met die rooi rok Episode 12: Die arrogansie! appeared first on rooi rose.

Dans met die rooi rok Episode 11: Franse gasvryheid deur Martie Swanepoel, voorgelees deur Bettie Kemp

Dans met die rooi rok Episode 11: Franse gasvryheid

Dit voel vir Amelie of eindelose winterlandskappe voor haar verbyvlieg voor die imposante hekke van Le Crotoy voor hulle opdoem. Hulle kronkel deur wingerde tot die wit château in die mistigheid sigbaar word.

As jy hierdie geniet het, weet ons jy sal van ons vorige vervolgverhaal, Botox, Barbies en Bietse hou!

The post Dans met die rooi rok Episode 11: Franse gasvryheid appeared first on rooi rose.

Dans met die rooi rok Episode 10: Die erfporsie deur Martie Swanepoel, voorgelees deur Bettie Kemp

Dans met die rooi rok Episode 10: Die erfporsie

Die omstandighede van Phil se dood begin al meer by Amelie spook. Een van die inskrywings op die slaapkamermuur het die saadjie van nuuskierigheid by haar geplant.

As jy hierdie geniet het, weet ons jy sal van ons vorige vervolgverhaal, Botox, Barbies en Bietse hou!

The post Dans met die rooi rok Episode 10: Die erfporsie appeared first on rooi rose.

Dans met die rooi rok Episode 9: Die briewe deur Martie Swanepoel, voorgelees deur Bettie Kemp

Dans met die rooi rok Episode 9: Die briewe

Amelie staal haar solank om met Adrien Marceaux oor die weg te kom. Iets aan sy gedrag laat haar net vermoed dat hulle koppe gaan stamp en dat hy arrogant is.

As jy hierdie geniet het, weet ons jy sal van ons vorige vervolgverhaal, Botox, Barbies en Bietse hou!

The post Dans met die rooi rok Episode 9: Die briewe appeared first on rooi rose.

Dans met die rooi rok Episode 8: Ouma Alett se geheim deur Martie Swanepoel, voorgelees deur Bettie Kemp

Dans met die rooi rok Episode 8: Ouma Alett se geheim

Amelie kan nou verstaan dat die Groenewalds haar juis oor haar verbintenis met Amelia uit Mon Abri probeer wou verjaag, maar dit maak steeds nie vir haar sin hoekom hulle vorige moontlike kopers ook wou afskrik nie. Daar moet ’n rede wees hoekom die Groenewalds nie wou hê iemand moet in Mon Abri bly nie.

As jy hierdie geniet het, weet ons jy sal van ons vorige vervolgverhaal, Botox, Barbies en Bietse hou!

The post Dans met die rooi rok Episode 8: Ouma Alett se geheim appeared first on rooi rose.

Dans met die rooi rok Ep 1: Sonde met die bure deur Martie Swanepoel, voorgelees deur Bettie Kemp

Dans met die rooi rok Episode 2: Sonde met die bure

Amelie het die kinders net gekalmeer oor die gerugte van spoke in die huis, toe hulle skielik ‘n aardige geluid hoor – soos ‘n baba wat huil …

As jy hierdie geniet het, weet ons jy sal van ons vorige vervolgverhaal, Botox, Barbies en Bietse hou!

The post Dans met die rooi rok Episode 2: Sonde met die bure appeared first on rooi rose.

Dans met die rooi rok Ep 1: Die blou windklingels deur Martie Swanepoel, voorgelees deur Bettie Kemp

Dans met die rooi rok Ep 1: Die blou windklingels

“Dis Mon Abri. Die plek staan jare al leeg. Niemand wil dit koop nie. Glo my, ek probeer al jare. Dit het aan ’n Franse kluisenaar behoort en almal op die dorp glo die ou vrou spook steeds hier.”

As jy hierdie geniet het, weet ons jy sal van ons vorige vervolgverhaal, Botox, Barbies en Bietse hou!

The post Dans met die rooi rok Ep 1: Die blou windklingels appeared first on rooi rose.

Vlam Hoofstuk 35: Cheers! deur Martie Swanepoel. Hooffoto: pexels

Om op te vang met die vorige hoofstukke van Vlam, klik hier. 

Vlam Hoofstuk 35: Cheers!

Na die eerste deadline staan Elsie Geselsie snipperig nader.

“Daar is ‘n man by ontvangs wat jou wil sien.  Flippie sê hy lyk nie soos een van jou polisiekontakte nie, maar hy lyk verdag. Donkerbril wat hy nie wil afhaal nie en ‘n pet laag oor sy voorkop. Jy weet, daai soort.”

Elsie en Flippie ag dit hulle plig om elke besoeker as  ‘n verdagte te beskou.

Flippie, die sekuriteitsman, immer gereed met sy Glock aan sy sy en sy knuppel byderhand. Hy werk al sedert die tagtigs by Dagblad en hunker immer na die dae toe die terroriste nog die koerantgebou wou opblaas.

“Jy en Flippie kyk te veel speurreekse. Sê vir die man ek wag net dat die nagredakteur my storie check. Hy moet ’n bietjie wag.”

Na ‘n rukkie is Elsie terug.

Sy bewe van opwinding.

“Hy sê julle het ‘n date! Ek was netnou daar onder. Hy is hot hoor! Selfs met die donkerbril waaragter hy wegkruip. Het jy ‘n date met hom?”

Niekie kyk geïrriteerd op van die rekenaarskerm.

“Ek het nie ‘n date nie en ek moet gou aan my storie verander. Sê vir Flippie die man moet wag. “

Niekie bel een van haar kontakte.

“Is jy seker Immerman is op borgtog uit? Herman het pas op Today gelees hy is nog nie uit nie?”

Sy tik terwyl hulle praat en sy sien nie die man wat agter haar kom staan nie. Na ‘n ruk sien sy Elsie maak allerlei tekens en beduie na iets agter haar.

Flippie staan langs Elsie, gereed vir aksie.

Niekie draai om in haar kantoorstoel.

Blikskottel!

Gelukkig het hy nog sy donkerbril en pet op.

“Wanneer maak jy klaar? Ons het ‘n date.”

Sy vererg haar.

Die man het die manier om haar bloed te laat kook.

“Haal af jou bril. Jy is nie nou in Hollywood nie. Jy hoef nie cool te lyk nie.”

Hy buk af en soen haar op die wang.

Hy fluister sag. “Jy is sexy as jy kwaad is.”

Sy voel hoe die hele redaksie na haar staar.

Die manne in die sportkantoor lag hoorbaar.

“Flippie, hierdie man het nie ‘n afspraak met my nie. Hoekom het jy hom laat inkom?”

Flippie en Elsie is nou grensloos opgewonde oor die aksie.

Almal kyk na Flippie vir aksie, en dis net die aanmoediging wat hy nodig het.

Hy spring vorentoe en neem die man aan die arm.

Hy buig sy arm na agter.

Niekie lag in haar binneste oor die potsierlike prentjie.

Flippie is klein en maer en die filmster, wat hard probeer om anoniem te bly, troon bo hom uit.

Dis Pieta wat laggend ingryp.

“Ou pel, dis beter as jy daar in my kantoor kom sit en wag tot Niekie klaar is. Netnou het ons moeilikheid en so laat in die dag sien ek nie kans vir nog aksie nie. My skof is amper verby.”

Pieta trek sy kantoordeur agter hom toe.

Hy trek sy laai oop, haal twee whiskyglase uit, en skink vir hom en die ster elkeen ‘n dop.

Duard lig sy glas in Niekie se rigting.

“Niekie het uiteindelik ‘n date!” hoor sy spottend uit die sportkantoor.

Sy kan skaars tik, so kwaad is sy.

As sy die groen lig vir haar storie kry, vat sy haar sak en stap sonder Duard by die kantoor uit. In die voorportaal keer Flippie haar voor.

“Ons moet ‘n incident report invul oor daai man! Hy kan bly wees ek was besig met ‘n ander besoeker anders het hy nie verby my geglip nie!”

Net toe gaan die hyser se deur oop.

Duard troon in die voorportaal.

Flippie spring agter die toonbank uit en druk die besoekersboek onder sy neus.

“Ek weet nie wie jy dink jy is nie, maar hier het ons veiligheidsregulasies wat gevolg moet word. Dis my gebou en jy het dit onwettig betree!”

Duard neem die boek gelate en vul sy naam in.

Duard Wayne.

Dan haal hy sy bril af en glimlag vir Flippie.

Flippie kyk ‘n ruk na die naam voor dit by hom registreer.

As hy opkyk, lyk dit of hy ‘n floute gaan kry.

Duard beduie met sy vinger Flippie moet stilbly.

“Ek is op ‘n geheime missie hier. Dankie dat jy die gebou so veilig hou. Ek kan sien jy is ‘n parate man van aksie.”

Hy skud blad met Flippie.

“Ons hou my identiteit maar tussen ons? Jy weet? Met al die joernaliste in die omgewing?”

Dit voel vir Niekie of sy na ‘n komedie staan en kyk.

Flippie spring op aandag en salueer die ster!

“Ek het al jou flieks gesien! Jy is my hero! Kan ons ‘n selfie saam neem?”

Duard vou sy sterk arm om Flippie se maer skouertjies.

Hy gee sy skitter-glimlag.

Dan voel Niekie sy hand ferm onder haar elmboog.

“Soos ek gesê het, ons het ‘n date, Niekie Branders.”

Uit die hoek van haar oog sien sy hoe Flippie bel.

Sy weet Elsie gaan binne sekondes haar verskyning maak.

“Kom, laat ons gaan,” sê sy en stap voor die glimlaggende man uit.

Sy motor staan reg voor die deur, op ‘n geel streep.

“Jou arrogansie ken geen perke nie,” sê sy as sy inklim.

“Hoe lyk dit? Is jy honger? Italiaans?”

Hy wag nie vir ‘n antwoord nie.

Sy sit woordeloos en toekyk hoe hy die motor deur die laat spitsverkeer van Johannesburg stuur.

Asof hy die pad ken.

Hy vleg af met Beyers Naudé en draai in by een van die systraatjies van Linden.

Dié restaurantjie is een van die bes bewaarde geheime in Johannesburg.

“Die beste pasta in die stad!”

Niekie is steeds verstom.

Duard neem haar na ‘n bespreekte stil tafeltjie.

Hy sorg dat hy met sy rug na die res van die gaste sit.

“Bring vir ons julle beste chardonnay. En ‘n groot kraffie sangria. Maak Mamma nog die beste calzone in die stad?”

Die chardonnay skitter in die kerslig.

Duard skink haar glas vol en laat glip twee blokkies ys in, soos sy daarvan hou.

“Niekie Branders, op ons vriendskap.”

Sy neem ‘n groot sluk voor sy haar woorde terugvind.

“Ons is nie vriende nie.”

Duard gee sy skitterglimlag.

“O, maar ons gaan nog baie goeie vriende word  … Cheers!”

As jy Vlam Hoofstuk 35 geniet het, sal jy beslis van ons voorlesing, Botox, Barbies en Bietse hou! PLUS ons het ’n nuwe voorlesing wat volgende week begin, Dans met die rooi rok. Dis alles gratis en jy kan enige tyd daarna luister!

The post Vlam Hoofstuk 35: Cheers! appeared first on rooi rose.

Botox, Barbies en Bietse: Episode 16 Slot deur Martie Swanepoel, voorgelees deur Elize Cawood. 

Meer oor Botox, Barbies en Bietse: Episode 16 Slot

Emily en Roxy gluur Liesl aan asof sy die vreeslikste sonde begaan het. Dis te veel inligting vir Liesl om te verwerk. Sy wil huil as sy dink hoe Harry moes toekyk hoe sy die hele aand in die arms van ’n Argentynse sjef dans …

Hierdie is die laaste episode van Botox, Barbies en Bietse, maar moenie kommer nie! Ons het iets opwindends op pad! Klik hier om meer uit te vind … 

Meer oor Botox, Barbies en Bietse

In dié vervolgverhaal deur Martie Swanepoel neem die bekende aktrise en stemkunstenaar Elize Cawood jou op ’n boeiende reis deur Liesl Burger se lewe. Liesl is ’n kunstenaar wat die plooie van haar man se verraad met ’n vintage Barbie uit haar lewe botox. Gedurende die 16 episodes gaan jy elke week saam met haar lag en ’n bietjie huil. En dalk jou vrouwees herontdek … Jy sal dit nie wil misloop nie!

Indien jy die res van die episodes wil luister, loer gerus hier!

Nog wonderlike fiksie

Ons stel voor jy loer ook hier, waar ons opwindende vervolgverhale net vir jou het! Dis gratis en jy kan soveel lees as wat jy wil.

Het jy geweet?

Ons het hierdie seisoen 3 podsendings waarna jy kan luister!

Buiten Botox, Barbies en Bietse, het ons die volgende podsendings:

Tee  & Taai Toffies

Bekendes soos Ruda Landman, Cindy Swanepoel, Nadia Beukes, Christel van den Bergh, Lindie Strydom en Werner Stander gesels elke tweede week openhartig met bekroonde joernalis en radio-aanbieder Ilse Salzwedel oor hul doen en late en lief en leed. Boonop gaan hulle probeer om vir luisteraars raad te gee oor hul verhoudings- en lewensprobleme. Gaan dit werk? Luister en oordeel maar! Ons waarborg ’n luisterervaring vol deernis en humor.

’n Nuwe episode word elke tweede Woensdag om 09h00 bekendgestel.

Klik hier om te begin luister

Tussen Ons

In die eerste seisoen gesels ons spesialis-joernalis, Mariette Snyman, elke week met verskeie kenners soos, dr. Jireh Serfontein, dr. Elna Rudolph en dr. Melodie de Jager oor vroue se hartsake, seksuele gesondheid en gelukkige verhoudings. As jy al ooit enige vrae gehad het oor sensitiewe onderwerpe soos pynlike seks, erektiele disfunksie, kontrasepsie, libido, seks en die menopouse, en seksuele etiket, is hierdie reeks vir jou.

’n Nuwe episode word elke Dinsdag om 09h00 bekendgestel.

Klik hier om te begin luister

The post Botox, Barbies en Bietse: Episode 16 Slot appeared first on rooi rose.