Oogsorgstudies die afgelope 20 jaar verbind gesonde eetgewoontes met ’n verlaagde kans tot ouderdomverwante makulêre-degenerasie. Hierdie toestand is die oorsaak van ’n klein kolletjie naby die sentrale deel van die retina, die deel wat noodsaaklik is vir sentrale visie.

Hierdie studies toon dat ouderdomverwante visie probleme verhoed kan word deur voedingryke kosse wat sink, luteïen, zeaxanthin, vitamiene C en E en omega 3-vetsure bevat, gereeld by jou dieet in te sluit:

• Sink: sink is een van die mees gekonsentreerde minerale in die oog. Dit werk ook as as ’n ‘molekuulhelper’ of ‘vervoermineraal’ omdat dit vitamien A vanaf die lewer na die retina help vervoer. Dié vervoerproses is noodsaaklik vir die produsering van melanien, ’n beskermende pigment in die oog. Spinasie, pampoensade, neute en sjokolade is goeie voedingsbronne van sink.
• Luteïen en zeaxanthin: hierdie voedingstowwe verminder jou kanse om chroniese oogsiektes, insluitend ouderdomverwante makulêre-degenerasie en katarakte, te ontwikkel. Katarakte veroorsaak wasigheid in die oog wat dit moeilik maak om te sien. Maak seker jy eet baie groen blaargroentes en moenie skaam wees om aan ’n vullende ontbyt met eiers weg te lê nie – eiers is ryk aan beide luteïen en zeaxanthin.
• Vitamien C: vitamien C is ’n belangrike mineraal wat die ontwikkeling van katarakte beveg. Wanneer dit saam met ander noodsaaklike bestanddele ingeneem word, kan vitamien C ook help om ouderdomverwante makulêre-degenerasie en die verswakking van visie te verhoed. Hou by die vyf-porsies-per-dag reël om genoegsame vrugte en groente in te neem.
• Vitamien E: vitamien E is ’n sterk antioksidant wat oogselle en -weefsel teen vrye radikale beskerm. Dit kom in neute, aangemaakte pap en patats voor.
• Vetsure (omega 3): nog ’n goeie rede om vette by jou dieet in te sluit is vir die instandhouding van die senuweestelsel wat ook belangrik is vir die ontwikkeling van goeie visie en goeie retinale funksionering. Voeg vis soos sardientjies of tuna by slaai en toebroodjies, kikker soutbeskuitjies en ryskoekies op met ’n geurige avokadosmeer of begin jou dag deur vlassaad by pap of muesli te voeg.

‘Sien’ jouself deur die digitale era met goeie oogsorg

Om voor digitale skerms vir lang tydperke te werk kan jou oë irriteer en selfs beskadig. Dit kan lei tot oogspanning, dowwe visie, probleme om op voorwerpe op ‘n afstand te fokus, droë oë (veral met kontaklense), hoofpyne sowel as nek-, rug- en skouerpyn. Die volgende wenke sal help:

• Maak seker dat jou huidige lensvoorskrif steeds gepas is vir jou oë en goed genoeg is vir rekenaargebruik.
• Vervang jou kontaklense met ’n bril wanneer jy voor die rekenaar werk. Dit kan help om oogspanning, wat deur kontras en flikkering van die rekenaarskerm veroorsaak word, te verminder.
• Stel jou rekenaarskerm sodat die boonste deel van die skerm dieselfde hoogte as jou oë is en dat jy effens af na die skerm kyk.
• Kies ’n gemaklike stoel wat ’n goeie postuur ondersteun. Stel die stoel se hoogte sodat jou voete plat op die vloer is.
• As jou oë droog is, knip hulle meer of gebruik oogdruppels.
• Rus jou oë elke 20 minute. Kyk ses tot sewe meter weg vanaf die skerm vir 20 sekondes.
• Strek jou bene ten minste elke twee uur en gaan stap vinnig vir 10 tot 15 minute.

Lees ook: Kolonoskopie: wat jy moet weet

The post Eet jou pad na goeie sig: Kos & gewoontes vir gesonde oë appeared first on rooi rose.

Koejawels kom oorspronklik uit die trope van Suid-Amerika en is een van ons lekkerste laatwintervrugte. Genoeg van die vrug in jou dieet sorg vir ’n gesonde vel en gestel. Dit bevat, per gewig, vyf keer meer vitamien C as lemoene en is ook ryk aan kalium wat bloeddruk reguleer. Selfs die geblikte soort is steeds hoog in vitamien C en boonop heeljaar op ons rakke. Die geel skilletjie kan soms ’n bietjie bitter wees, maar word deur die soet koraalpienk vlees oorheers.

Koejawels se geurpasmaats

Gerookte en geroosterde vark, bloukaas, basiliekruid, tiemie, kerrie, roomkaas, appel en peer, brandrissie, sjerrie, asyn, gemmer, klapper en klappermelk, heuning, kaneel, anys, kardemom, swartpeper, vanielje.

2 blitsidees met hierdie lekker vrug:

Koejawelpuree

Gooi 1 x 410 g-blik koejawels (dreineer en behou die stroop) en 2 cm gerasperde vars gemmer in ’n houer en verpulp met ’n stokmenger. Verdun die koejawelpuree met van die stroop wat jy eenkant gehou het, indien nodig. Skep in ’n glashouer en hou in die yskas. Skep lepels vol oor jogurt vir ontbyt, of oor roomys as nagereg.

Heuningkoejawels-en-spek-slaai

Genoeg vir 4
Verhit 10 ml olyfolie in ’n pan en braai 2 dik repe spek, in stukkies gesny, oor matige hitte tot bros. Skep uit en hou eenkant. Smelt 10 ml botter in dieselfde pan en braai 4 koejawels, geskil en in kwarte gesny, vir sowat 3 min. aan elke kant daarin tot goudbruin. Drup 15 ml heuning oor terwyl die koejawels braai. Pak 125 g gekrummelde bloukaas en ’n hand vol kruieblare soos basiliekruid en bronkors op ’n bord en rangskik die koejawels en spekblokkies bo-op. Meng 30 ml (2 e) balsemiekasyn, 10 ml (2 t) heuning, 60 ml (¼ k) olyfolie, geur met sout en peper en sit saam met die slaai voor.

Koop só

Koop geelgroen vrugte sonder kneusplekke wat net-net ryp begin word en nie meer so baie ferm is nie. Volg jou neus met die koopslag, sommige variëteite se skilletjie bly groen – hoe skerper die geur hoe soeter die vrug.

Bêre só

Hou die tropiese vrug op ’n rak in ’n warmer vertrek tot dit ryp word. Ryp vrugte met hul sterk geur kan in die yskas gehou word. Skil en kook liggies in ’n suikerstroop indien jy die vrugte wil vries.

Maak só

Die skilletjie is bitter en kan afgeskil word voor die vrugte in suikerstroop ingemaak word. Sny middeldeur en skep liefs die harde pitte uit indien die vrug in ’n bredie gebruik gaan word, of vryf die pulp deur ’n sif om die pitte te verwyder.

Gebruik só

Koejawels word gewoonlik met soet geregte geassosieer maar waag ’n bietjie en gebruik hulle ’n keer in sout geregte as marinade vir gerookte varkribbetjies, of saam met skerp kase.

Lees ook: 2 blitsidees met tiemie

The post Twee blitsidees met koejawels appeared first on rooi rose.

Omhels selfliefde en begin jou reis na stralende vel met Sorbet se nuutste velsorg-superhelde: Brightening Vitamien C-serum en gesiglappies.

Die Brightening Vitamien C-serum het ‘n kragtige mengsel van vitamien C, vitamien E en feruliensuur wat donker kolle en hiperpigmentasie verminder!

Die resultaat? Stralende, fermer en meer jeugdige vel.

Die Vitamin C-Brightening gesiglappies bied ‘n vinnige en gerieflike manier om jou vel skoon te maak en te verfris. Jou vel sal jou later bedank!

Die Sorbet Vitamien C-reeks is beskikbaar by uitgesoekte Clicks-winkels en Sorbet salonne of aanlyn by www.clicks.co.za.

Staan ’n kans om Sorbet Vitamien C-serum, gesiglappies en ‘n sak te WEN!

Bepalings en voorwaardes: Alle pryse in rooi rose is onderhewig aan beskikbaarheid en is nie oordraagbaar, herverkoopbaar of terugbetaalbaar vir kontant nie. Vir nog bepalings en voorwaardes, besoek www.rooirose.co.za

Om in te skryf, voltooi die onderstaande vorm:

Sluitingsdatum: 19 Junie 2024

The post WEN Vitamien C-velsorg van Sorbet! appeared first on rooi rose.

Wat kan jy vir iemand in die hospitaal saamneem wanneer jy gaan kuier?

• Maak dit iets wat gesondheidswaarde het, want navorsing wys 40% van pasiënte wat langer as ’n week in die hospitaal is, ly aan wanvoeding.
• Kos ryk aan vitamien C, sink en proteïen help om wonde gouer te laat genees. Maak jou presentjie iets ryk hieraan, soos:
• Vir proteïen en sink bring biltong, biltongpoeier om oor kos te strooi as hulle sukkel om te kou, kaasblokkies, neute (veral kasjoeneute), droëwors, vars volroommelk, gegeurde melk en volvetjogurt. Sjokolade bevat ook baie sink.
• Vir vitamien C bring vars vrugte, veral kiwi’s, aarbeie en bessies wat nie so baie suiker bevat nie.
• Vir iemand met min eetlus werk ’n maaltydvervanger goed. Meng dit in pap, jogurt, melk of fyn gedrukte groente vir ekstra voedsaamheid.

The post Help iemand gouer genees appeared first on rooi rose.

1 Maak dit ’n duvet-dag … of drie

Party mense dink hulle is so taai dat hulle hul verkoue kan weg wérk. Maar wees versigtig hiervoor. Daar is oorgenoeg bewyse dat die streptokok-bakterie wat dikwels ná ’n verkoue toeslaan jou hartspier kan aantas – soos ook die griepvirus as jy jouself tydens griep ooreis. Wat jy werklik nodig het – meer as enige medikasie vir jou verkoue – is rus. Jou liggaam kan homself baie goed teen verkoue verdedig, maar dit vra energie. Dié dat rus regtig die beste raad is.

Haal ekstra kussings uit die linnekas, trek jou skootrekenaar, tablet of selfoon nader en laat www.rooirose.co.za jou inspireer terwyl jy rus terwyl die verkoue genees.

2 Troetel jou lippe en neus van die begin af

Die area rondom die neus en lippe raak dikwels baie teer. Gebruik sagte snesies, en beskerm die vel vóór dit teer raak met vaselien, Burnshield of ’n bababoudjieroom soos Bepanthen. Pasop vir gesigroom: sekere komponente daarin, soos AHAs (alpha hydroxyl acids) kan die reeds teer vel irriteer.

3 Drink iets voedsaam

Jy nies, jou neus loop en jy sweet, en verloor dus baie vloeistof. Vervang dit deur elke uur iets te drink. Dit kan water wees, maar heuningbostee en rooibostee is albei ryk aan anti-oksidante en ondersteun jou immuunstelsel.

• Vars lemoene en vars lemoensap verskaf ’n bietjie ekstra vitamien C. Verdun dit met baie water omdat dit ook baie suiker bevat, wat volgens party bronne eerder die kieme voed as vir jou.

As jy lemoensap koop, kyk op die bestanddeellys op die etiket of daar werklik niks anders as 100% onversoete lemoensap in die houer is nie. Baie bevat suiker, preserveermiddels, geurmiddels en hersaamgestelde (‘reconstituted’) lemoensap, wat nie werklik vitamien C bevat nie.

• Nog ’n opsies is tuisgemaakte sop. Hopelik is daar iemand wat dit vir jou kan aandra.

4 Kry ekstra vitamien C vir jou verkoue

Help vitamien C vir verkoue? Niemand weet regtig nie. Party ondersoeke wys dit help; ander wys dit maak geen verskil nie. En dan is daar diegene wat glo vitamien C het niks meer as ’n plasebo-effek nie. Met ander woorde: dit werk so goed as wat jy glo dit werk. Dit kan nogtans nie skade doen nie, en dalk werklik help. As jy op vitamien C besluit, neem die volgende in ag:

• Beplan om genoeg vitamien C in te kry want in hierdie geval is meer wel beter.
• Dit lyk asof rondom 800- 1 000 mg vitamien C per dag (terwyl jy siek is), ’n goeie goue middeweg is.
• Hoewel meer beter is, is baie op een slag nié.
• Jy liggaam sal ’n ligte, maar gereelde aanvulling baie doeltreffender opneem.
• Verdeel jou vitamien C in drie tot ses dosisse vir die dag.
• Hoeveel vitamien C is genoeg? Jou liggaam skei die oormaat vitamien C in die uriene uit of selfs deur diaree. As jy skielik los stoelgange het, drink minder vitamien C.

5 Wees higiënies

Dit is onbedagsaam om die hele wêreld aan te steek met ’n genies en geproes. (Wie gaan jou bederf as hulle ewe siek is?)

Maak so:

• Hou ’n snesie oor jou nes en mond elke keer dat jy hoes of nies.
• Hou ’n plastieksak byderhand en gooi die snesie dadelik daarin.
• Jou hande is nou ’n kiemtaxi soos min. Jy vryf oor jou oë waar die kieme ‘opklim’ en vat aan die suikerpot of koerant, waar hulle ‘afklim’ en werklik ’n hele paar uur kan oorleef. Netnou tel iemand anders die koerant op en laai die verkouevirus op sy vingers. Sodar hy aan sy gesig raak, land die kiem daar en kort voorlank het hy ook verkoue.
• Vat so min as moontlik aan jou gesig en was jou hande kort-kort.

6 Vars lug

Dit is goed vir jou en help dat die kieme wat jy uitnies en uithoes afsterf voor hulle iemand anders kan aansteek. Maar moenie in ’n trek sit nie.

7 Maak jouself gemaklik

Trek so aan dat jy nie te koud of te warm kry nie. ’n Serp is heerlike troos vir ’n seer keel.

The post Gesonde selfliefde teen verkoue appeared first on rooi rose.