Jy hoef nie die maerste, mooiste of slimste te wees om ’n selfversekerde vrou te wees nie. Soos die cliché dit stel, begin selfvertroue binne jou en werk dit sy weg na buite. Jou gesin sal ook baat by jou nuutgevonde selfvertroue. Hier is 5 uitgangspunte om meer selfvertroue te kry.

1. Leer om alleen te wees (en om daarvan te hou)

Ons ken hierdie een – wees lief vir jouself voordat jy liefde van enigiemand anders kan aanvaar. Jy moet leer hoe om gelukkig te wees op jou eie en om jou eie liefde te aanvaar. Jy kan nie staatmaak op ander mense se mening om jou selfwaarde te bepaal nie. Dit is jou eie verantwoordelikheid.

2. Let op die woorde wat jy gebruik en vermy negatiewe selfspraak

Wend ’n bewuste poging aan om op ’n positiewe manier met jouself te praat. Praat met jouself soos wat jy met jou gesin praat. Jou brein sal uiteindelik begin glo wat jy sê en jou ’n positiewe gevoel oor jouself gee.

3. Leer om komplimente te aanvaar

Dit is ’n maklike een wat niemand regtig ernstig opneem nie. Wanneer iemand sê: “Jy lyk mooi”, sê dankie, want die kans is goed dat dit opreg is. Niemand hoef jou te komplimenteer nie, maar hulle het dit gedoen, en dit beteken iets. Moenie komplimente wegwys nie, dit sal net jou negatiewe uitkyk op jouself versterk.

4. Moet dinge nie persoonlik opneem nie

Dit is in ’n vrou se natuur om te veel oor iets na te dink. Een klein opmerking kan jou in ’n spiraal van negatiwiteit en selfverwerping stuur. Leer om dit te ignoreer. Moet jou nie te veel aan die klein dingetjies steur nie. Neem die kommentaar van wie dit kom en moenie jou tyd mors deur jou daaraan te steur nie. Gebruik eerder daardie tyd om positiewe gedagtes te genereer. Dink terug na ’n gelukkige tyd sodra ’n negatiewe gedagte in jou kop nesskop.

5. Liggaamstaal

Selfvertroue gaan nie net oor wat jy sê en hoe jy dit sê nie, dit gaan ook oor wat jou liggaam sê. As jy by ’n vertrek instap, hou jou rug regop, glimlag en maak oogkontak. Selfs al het jy ’n moeilike dag gehad, glimlag. As jy met iemand praat, behou oogkontak, moenie wegkyk as jy klaar is nie, behou oogkontak met daardie persoon totdat hy reageer. Ander mense sal reageer op wat jou liggaam sê en positief daarop reageer.

Lees ook: Is jy ’n perfeksionis? Hoe vind jy balans?

The post 5 maniere om meer selfvertroue te hê appeared first on rooi rose.

Stimuleer jou serotonienvlakke

• Eet gereeld rys, pasta, aartappels, piesangs, brandrissies, bone, peulgroente, okkerneute, amandels, sesam- en pampoensaad

• Gebruik ’n ioniseerder in jou slaapkamer

• Oefen gereeld – seks tel ook as oefening!

• Kry tien tot twintig minute son per dag, verkieslik vroeg soggens of laatmiddag

• Gebruik essensiële olies: laventel-, roos- en lemoenbloeisel

Vind só vreugde

• Doen gereeld dinge wat jou plesier gee, soos om gedigte of inspirerende woorde te lees of jou ’n tydjie in die natuur te gun.

• Verbeter jou bui deur jou liggaam te beweeg; dans of skud sommer net rond op die maat van musiek

• Luister na musiek na gelang van jou stemming. Kies kalm klanke as jy oorangstig voel, of ’n op en wakker ritme as jy moeg of lusteloos is.

• “Sou dit nie lekker wees nie as … ” Voltooi hierdie sin op verskillende maniere en kyk hoe anders dit jou laat voel!

• “Dagdroom.” ’n Fokus op jou begeertes verbeter die kans dat dit werklikheid word – of jy dit glo of nie. Dink aan iets wat jy graag wil hê of wil ervaar, beleef die gevoel, visualiseer dit, en herhaal gereeld. Gebruik ’n “vision board” of droombord waarop jy prente van jou drome plak om jou te inspireer.

• ’n Troeteldier beloon jou met onvoorwaardelike liefde.

• Gee aandag aan jou geloof.

Watter tipe persoonliheid het jy? Vind hier uit en volg dan die onderstaande wenke

Wenke vir elke persoonlikheid

• Tipe A
Omdat uitbranding in jou geval ’n groot moontlikheid is, moet jy werklik leer om te ontspan. Gebruik jou behoefte aan kontrole positief deur jou asemhaling bewustelik te beheer. Doen hierdie kalmerende oefening wanneer jy gespanne raak: tel stadig tot drie terwyl jy deur jou neus inasem en jou maag uitstoot. Hou jou asem vir drie tellings en blaas dit dan deur jou mond uit terwyl jy tot ses tel. Herhaal ’n paar keer en voel hoe die druk wegvloei.

• Medeafhanklik
Wanneer alles vir jou te veel word, kan jy ’n visualiseringsoefening probeer. Skep ’n helder prentjie van jouself waar jy iets prettigs of ontspannends doen. Dit maak nie saak wat dit is nie – enigiets van ’n seksuele fantasie tot ’n dag sonder horlosies.

• Hulpeloos-hopeloos
Probeer daardie negatiewe gedagtes in hul spore stuit! Vervang hulle deur positiewe affirmasies soos “Ek kan dit regkry!” of “Ek kan dit hanteer!” Herhaal hierdie frases met oortuiging en geesdrif.
Kyk of jy die verligting kan voel, of met die opbouende energie identifiseer. As jy belaglik voel wanneer jy dit hardop sê, kan jy die stellings op notatjies skryf en dit neersit
waar jy dit gereeld kan sien.

• Veerkragtig
Hoewel stres jou kwalik raak, is dit belangrik dat jy tyd maak om te herlaai. Doen ’n paar keer per week ontspannende oefeninge soos joga of t’ai chi – die gekontroleerde bewegings versterk daardie gevoel van beheer in liggaam en siel.

• Oorlewingspersoonlikheid
Kreatiwiteit is jou allerbeste wapen teen stres. Maak tyd vir ontspannende, skeppende aktiwiteite wat jou help om die logiese linkerbrein en kreatiewe regterbrein te integreer – maak nie saak of dit nou skilder of pottebakkery of iets anders is nie.

• R-persoonlikheid
Hoewel jy van nature kanse waag, moet jy waak daarteen om uitgeput en ongeluksvatbaar te word. Dis belangrik dat jy die avontuur en aksie in jou lewe met ontspanning balanseer. Probeer ’n meditasie wat jou lei om jou sintuie aan te skakel: Kyk nuut na die wêreld en waardeer die skoonheid rondom jou. Maak jou oë toe en fokus een vir een op jou sintuie. Wat kan jy hoor, ruik, proe, en voel? Maak jou oë oop en voel hoe ’n gevoel van ontspanne bewustheid oor jou spoel.

The post Vind só vreugde appeared first on rooi rose.