Waterwys blomme vir die lente. Deur Elandrè Swart. 

Bloulelie (Agapanthus)

Die bloulelie kom voor in meeste tuine en parke en is inheems tot Suid-Afrika. Hierdie blom groei maklik en kry nie sommer peste of siektes nie. Hoewel die noemnaam van hierdie blom “bloulelie” is, is daar eintlik ’n verskeidenheid kleure om van te kies en te keur, soos wit.

Hoe om bloulelies in jou tuin te groei

Lig: Bloulelies benodig baie lig

Water: Baie water, een tot twee keer ’n week

Grond: Plant bloulelies in ryk, goed gedreineerde en grond met goeie kompos

Bemesting: Bemes jou grond met ’n stadig-vrystellende kunsmis elke tweede week

Geelkatstert (Bulbine frutescens)

Geelkatstert is ’n droogte-weerstandige plant met geel of oranje stervormige blomme. Geelkatstert bied kleur en tekstuur tot jou blombedding. Nog ’n goeie ding van hierdie plant is dat dit min aandag verg.

Hoe om geelkatstert in jou tuin te groei

Lig: Plant jou geelkatstert in volson of halfskadu.

Water: Lei dit in die aande lekker lank nat, sodat die water diep kan intrek. Lei eenkeer ’n week nat.

Grond: Geelkatstert kan by meeste grondtipes aanpas, maar dit groei die beste in goedgedreineerde grond.

Bemesting: Bemes maandeliks met ’n gebalanseerde kunsmis.

Botterblom (Gazania krebsiana)

Botterblomme is laag-groeiende plante en die beste keuse vir ’n tuin wat min instandhouding kort. Botterblomme groei goed in blombeddings en selfs in hangmandjies.

Hoe om botterblomme in jou tuin te groei

Lig: Botterblomme groei die beste in baie son.

Water: Jy hoef net die blomme nat te lei wanneer die grond droog is.

Grond: Botterblomme verkies sanderige of kleigrond.

Vygies

Vygies is Suid-Afrika se kleurvolste groep blomme en het meer as 1 800 verskillende spesies om van te kies!

Hoe om vygies in jou tuin te groei

Lig: Vygies groei die beste in volson, maar kan ’n bietjie skadu hanteer.

Water: Maak dadelik jou vygies nat nadat dit geplant is, maar laat die grond toe om ’n bietjie uit te droog voordat jy weer water gee.

Grond: Vygies kan floreer in verskillende tipes grond en benodig min voedingstowwe.

Bemesting: Vygies reageer goed op vloeibare kunsmis.

Lees nog: Maak self kweekglasies om plante uit te stal of as geskenke

The post Waterwys blomme vir die lente appeared first on rooi rose.

Volhoubare tuinmaak vir ’n groener toekoms

Suid-Afrika, wat stoei met waterskaarstes as gevolg van droogtes, klimaatsverandering en die munisipaliteit se mislukking om in basiese dienslewering te voorsien, moet waterwyse tuinmaakpraktyke gebruik om te help om hierdie kosbare bron te bewaar.

Tanya Visser is ’n bekende tuinpersoonlikheid wat beslis ’n hand met ’n plant het. Sy is ’n tuinier van formaat en maak weer vanjaar haar verskyning by East Coast Radio House & Garden Show.  Sy meen ’n goeie manier om meer waterwys te wees, is om inheemse plante te gebruik wat by die plaaslike klimaat aangepas is en minder water nodig het om te oorleef.

“Dit is noodsaaklik om waterwyse plante in ons tuine te prioritiseer om die gebruik van hierdie skaars waterbron te verminder, veral in streke met beperkte watervoorsiening.”

Hier is vyf inheemse waterwyse plante wat in Suid-Afrikaanse tuine ingesluit kan word:

’n Gunsteling in menigte huishoudings, is die spekboom (Portulacaria afra – ook bekend as “olifant se kos”) is ’n vetplant wat water in sy blare berg. Dit is boonop ’n wonderlike plant wat koolstof berg en daar is bevind dat dit hoogs doeltreffend is om die impak van klimaatsverandering te versag.

Agapanthus (Agapanthus africanus) se blou-en-wit blomme vang die oog en dit word landwyd in tuine gevind. Hulle is droogtebestand en kan met min water oorleef, wat hulle die ideale keuse vir waterwyse tuine maak. Agapanthus lok ook bye en voëls wat van nektar hou, en daarom is dit ’n goeie keuse as jy wil hê hulle moet jou plante bestuif. Agapanthus is nie net ’n gewilde plant in Suid-Afrikaanse tuine nie, hulle het hul weg oor die wêreld heen gevind en kan in huise se tuine en parke gesien word. Die omvangryke kruisbestuiwing van hierdie plante het aanleiding tot die wonderlikste kleure gegee, van swart tot ’n fluweelpers.

Nog ’n waterwyse plant is die aalwyn (aloe ferox) wat goed in Suid-Afrika se droë weersomstandighede doen. Dit kort nie baie water nie en dit groei steeds goed in swakker grond. Die plant het helende eienskappe en word in tradisionele medisynes gebruik om ’n hele paar kwale soos aknee en skaafplekke te behandel. As die groot aalwyn nie vir jou is nie, kyk uit vir die meer kompakte aalwynhibriede. Hulle word nie geneties aangepas nie en word deur selektiewe teling en kruisbestuiwing geskep. Aangesien hulle kort en klein is, is hulle ideaal vir klein tuine en werk natuurlik goed in potte en bakke.

Die Kaapse heuningbos (Tecoma capensis)  is ’n fynbossie wat vinnig groei en dit gee klosse  buisvormige blomme in oranje en geel wat voëls en bye lok. Die Kaapse Heuningbos doen goed wanneer dit gesnoei word. Dis ’n gewilde keuse om heinings mee te maak.

Die kleurryke blomme van die Afrika-gousblom (Oseaospermum ecklonis), sal met sy skakerings van pers, pienk en wit in enige tuin uitstaan. Die Afrika-gousblom is nie net die beste keuse vir waterwyse tuine nie, maar dit is ook gewild in kliptuine en randakkers. Vlinders is mal oor die groot oop gesiggies van hierdie blomme.

Deur inheemse plante, wat tot die plaaslike klimaat aangepas is en minder water nodig het, te plant kan Suid-Afrikaners help om waterbronne te bewaar en sodoende tot ’n meer volhoubare toekoms bydra. Cairey Baxter-Bruce, die skoudirekteur van die East Coast Radio House & Garden Show, voeg by: “Om waterwyse plante by ons tuine in te sluit, is ’n noodsaaklike stap om seker te maak ons gebruik ons waterbronne op ’n verantwoordelike en volhoubare manier. Hierdie jaar is ‘My huis, my volhoubaarheid’ een van die hoofpilare van ons “My huis, my manier”-gespreksonderwerpe. Ons is opgewonde om te hoor watter ander wonderlike insigte en wenke Tanya Visser en ons ander tuindeskundiges of uitstallers, wat hul oplossings vir volhoubaarheid vertoon, met ons by die vertoning sal deel.”

Moenie die East Coast Radio House & Garden Show vanaf 1 tot 9 Julie 2023 by die Durbanse uitstalsentrum misloop nie. Vir meer inligting oor die East Coast Radio House & Garden Show, besoek die webwerf www.housegardenshow.co.za of volg hulle op Instagram en Facebook deur @housegardenshow te gebruik.

Lees ook: Maak tuin met min geld en min moeite

The post Vyf inheemse plante vir waterwyse tuinmaak in Suid-Afrika volgens Tanya Visser appeared first on rooi rose.