Deur Maryke Roberts. Foto’s: Clifford Roberts

Die Toyota Stellenbosch Woordfees vier vanjaar 25 jaar van kuns, kultuur en uitdrukking en word tot 19 Oktober regoor die Eikestad gehou. Vanjaar se tema is “Deel” en kunstenaars en die feeskomitee nooi almal uit om in dié feestelikhede te kom deel. Met nagenoeg 400 unieke program-items is daar werklik iets vir elkeen.

Die feesprogram is propvol en die komende naweek is daar heelwat om te sien, te doen en te proe.

Het jy vergeet om kaartjies te bespreek? Besoek die #SpaarBar in Ryneveldstraat voor Erfurthuis sowat vier ure voor sekere vertonings en betaal halfprys vir jou kaartjies. Dis darem nie te versmaai nie.

Verskeie gratis aanbiedinge is ook beskikbaar en kans om na gesprekke onder die bome te luister met ‘n glas wyn of koffie, of rondleidings met kunstenaars te doen, is ook beskikbaar. Die volledige feesgids is hier beskikbaar.

Twee verskillende roetes word op die argitektoniese wandelinge deur die middedorp aangebied. Die wandelinge duur 50 minute en vertrek voor Voor Erfurthuis in Ryneveldstraat. Die kultuurhistorikus Matilda Burden laat kyk jou met nuwe oë na die hart van die Eikestad met sy argitektoniese juwele. Daar is nog wandelinge om 17:00 vanaand en ook op 17 Oktober om 17:00. Kaartjies kos R60 en R90 by die deur.

In Die onderhoud met Mia Spies het dié multimediajoernalis en TV-aanbieder Mia Spies met vyf inspirerende Suid-Afrikaners gesels. Hier is sy saam met Professor Thuli Madonsela, die voormalige Openbare Beskermer wat deesdae professor is aan die US en direkteur van die Sentrum vir Sosiale Geregtigheid. Hulle het gesels oor die huidige stand van ons demokrasie, die rol van etiese leierskap en die ontkaping van die staat.

Die musiekmaestro Coenie de Villiers het in Coenie de Villiers: Wie kan my sê van die liefde? diep in sy liedereskat van bykans 50 jaar gedelf en komposisies en lirieke wat die liefde in al sy gedaantes bekyk, gesing. Hy was ook deel van Nic de Jager (aanbieder van die geliefde radioprogram Nic se goed)  se vertoning, Nic de Jager: In my eie woorde as aanbieder en musikant.

Die gratis VIA: Bier-uur met Arno onder die Leefstyl-kategorie by Die Plataan-kafee was vet pret. VIA se musiekvasvraprogram Klankbank was propvol opwinding, verraad en spanwerk. Feesgangers kon lekker onder die bome en bistroliggies sit en kyk of hulle die titels van bekende liedjies kon ontsyfer en sommer hul musiekkennis toets, terwyl hulle aan ‘n yskoue biertjie geteug het, terwyl die VIA-aanbieder Arno Greeff, hulle vermaak het.

’n Hemel wat kan opvou met Deon Meiring was deel van die Toyota Musiekfees.  Deon het geglo liedjieskryf sou vergoed vir sy onbeholpenheid in rugby en romanse. Vandag het hy darem nog die liedjies – uit Glaskas, Dans Dans Lisa en sy soloprojek. In ’n Hemel wat kan opvou het hy dié musiek saam met sy briewe wat hy sedert 2020 skryf, aan niemand in die besonder nie, gedeel.

Xhanti Zwelendaba en Benjamin Stanwix is vanjaar se feeskunstenaars en het ’n samewerkende kunsduo waarin hulle grond, die landskap en die geskiedenis van Suid-Afrika as ’n gedeelde belangstelling ondersoek. Deur werk te skep vanuit hul eie ervarings en ook hul begrip van die nalatenskap van kolonialisme en apartheid, verwys hul samewerking dikwels na teenstrydige uitbeeldings van die verlede as ’n manier om sin te maak van ons individuele en gesamentlike hede.

Tony Leon is bekend as politikus, rubriekskrywer en politieke ontleder. In Being There: Backstories from the Political Front het hy feesgangers saam om agter die skerms te kyk na presies wat gebeur het toe hy by was terwyl geskiedenis gemaak is. Die biograaf, sakejoernalis en Suid- Afrika se koning van algemene kennis, Theunis Strydom, het met hom gesels.

Selfie-raam: Voor die Erfurthuis is hierdie interessante stoel-installasie wat feesgangers aanmoedig om hier van hulself foto’s te neem en dit dan op Instagram te deel, met die hutsmerke #ToyotaStellenboschWoordfees #Woordfees2025 #Deel #Share. Dis ook ‘n lekker plek om net vir ‘n minuut asem te skep, voor jy verder in die feepret deel.

’n Oorsigtentoonstelling van deelnemers aan vanjaar se Ateljeebesoeke-program word deur IS Art en Blaauwklippen wynlandgoed gehou. Rudolph Gouws het die Woordfees-atelier geopen. Ilse Schermers-Griesel, kurator, IS Art-eienaar en kunshistorikus staan by hom.

Kleurglasvensters van die Moederkerk val onder die Leefstyl-kategorie. Die kleurglasvensters is kunswerke wat ryk is aan simbole. Zorada Temmingh se blik op die simboliek in die vensters ontsluit verrassende interpretasiemoontlikhede – veel meer as dié wat opgeskryf is sedert die installasie van die eerste vensters ongeveer 50 jaar gelede. Daar is nog een geleentheid om dié interessante praatjie mee te maak op 19 Oktober om 11:30. Kaartjies kos R100 en R130 by die deur.

Stellenbosch Wynroetes se Woordfees-wynskool: Chenin 101 het ‘n stampvol saal gelok in die Hofmeyrsaal. Leer, proe, spoeg of sluk… Die Woordfees- wynskool is ’n prestigeryke – maar allermins snobistiese – geleentheid waar jy meer kan leer oor wyn. Daar is drie klasse oor verskillende kultivars en style, aangebied deur wynmakers, wynpersoonlikhede en ’n komediant. Ná elke suksesvolle bywoning kry jy boonop ’n sertifikaat sodat jy tuis kan spog met jou geleerdheid.  Die laaste van die wynskole word vanaand om 18:00 aangebied en die fokus is Pinotage, wat vanjaar 100 jaar oud is.

In die eenmanstuk, Ek is nie Danie, geweef rondom ’n keur uit Danie Marais se vier digbundels, trek Albert Pretorius die skrapnel van ’n vreesaanjaende gewone lewe skerf vir skerf uit mislukte huwelike in die buitenste ruimte van Duitsland en die bevoorregte gemors van middelklas-Suid-Afrika. Saam met hom op die verhoog is Schalk Joubert. Nico Scheepers is die regisseur. Daar is nog drie vertonings by die Spier-ouditorium oor: 17 Oktober om 17:00 en 20:30, 18 Oktober om 13:00 en 19 Oktober om 13:00.

Dana Snyman deel in Seun die deel van sy storie waaroor hy nog nooit gepraat het nie: sy ervarings in die 1980’s. Dit is die tyd van P.W. Botha se vinger, die Voëlvry- toer, AWB-saamtrekke, onderhandelings en die laaste dae van diensplig. In dié stuk is Wilhelm van der Walt as Seun en Nico Scheepers die regisseur.  Daar is nog drie vertonings van Seun oor: 15 Oktober om 20:30, 17 Oktober om 15:00 en 19 Oktober om 10:00. Die toneelstuk speel by Idasvallei Primêr.

Al die foto’s is geneem met die nuwe Canon spieëllose R6. Sy tjoepstil sluiterspoed beteken aksiefoto’s kan in die teater of by boekbesprekings geneem word, sonder dat teatergangers die ewige gekliek-kliek hoor en die RF100-400 lang lens bring daai akteur se gesigsuitdrukking tot amper op jou neus. Loer hier.

Lees ook: Vyf-vinnige-vrae met Judi Hattingh, die 13-jarige wat die teaterwêreld aan haar voete het

The post Die Toyota Stellenbosch Woordfees vier vanjaar 25 jaar! appeared first on rooi rose.

Deur Maryke Roberts. Foto’s Clifford Roberts 

Elke moontlike saal, gallery, ouditorium en kuierplek is spesiaal ingerig vir die fees. Vanjaar se feestema is “Speel” en dis beslis wat daar op die dorp gebeur. 

Die fees bied waarlik iets vir almal en daar is klassieke musiek uitvoerings in die Endler; orrel-uitvoerings in die Moederkerk, die feeskunstenaar, Marlene Steyn, se werk in die Sasol Kunsmuseum, boekbesprekings, opelug musiekkonserte en lewendige uitsendings van RSG vanaf Die Khaya.  

Lees ook: Pieter Smith vertel die storie van Afrikaanse musiek op Pretoria FM

Dr Kosmologiese klavier-improvisasies en kwantum-doedelsak-uitvoerings: Dr. Philip Southey – of vir sy Afrikaanse studente aan die US Doktor Soutie – is benewens fisikadosent ook ’n bekwame pianis en kitaar- en doedelsakspeler. Hy het ‘n wonderlike uiteenlopende vertoning van wetenskap en musiek aangebied.

Daar is rondwandelings met kunstenaars, besoeke aan Dylan Lewis se beeldhoutuin en sommer baie leefstyl-geleenthede waar jy met bekendes kan skouerskuur. 

Saans begin die vermaak met insiggewende wynskool-aanbiedings deur die Stellenbosch Wynroetes, waar jy meer oor Suid-Afrika se vonkelwyn en unieke wynkultivars kan leer, met wynmakers gesels en sommer van die land se voorste wyne proe. 

Die Stellenbosch Wynroetes Wynskool het verskeie kultivars en wynstyle op hul program. Hier is die wynmakers wat die Cap Classique aanbieding en -proe gelei het, van links: Narina Cloete (Blaauwklippen), Shawn Mathyse (Ken Forrester), Nathan Valentine (Villiera), Danna de Jong (Simonsig) en twee vrolike vroue Lizemari Geldenhuys (Kleine Zalze en Heidi Dietstein (Spier).

Die fees het verlede naweek afgeskop met ‘n langtafel in die Open Window-kampus by Oude Molen waar meer as 450 gaste saamgekuier het met lekker musiek en die wonderlike braaikos van Johnny Hamman van John Joseph Anatomy of Food. Gure weer het die straatfees binnetoe gedwing, maar tóé is dit so intiem en gesellig, dat niemand die lang laning eikebome bo hul koppe mis nie. 

Die pragtige langtafel moes vanjaar binnenshuis aangebied word, maar die gure weer het beslis nie die speel-gees gedemp nie.

Die ateljee-besoeke by kunstenaars is ‘n groot treffer. Hier kuier feesgangers by Andries Gouws in Jamestown waar hy sy kunsreis beskryf, terwyl daar na sy kunswerke gekyk kan word.

Die program is nog propvol en aan tot Sondagaand en daar is kaartjies vir verskeie produksies beskikbaar.

Meer inligting hier: https://woordfees.co.za/ 

Lees ook: Die Emmy-toekennings se nápartytjie: Wenners en wonderwerke

The post Die Woordfees is een groot speel-plesier appeared first on rooi rose.

Vanjaar is hy vir sy blywende nalatenskap vereer: Hy het by die onlangse Aitsa Afrikaanse Musiektoekennings in Pretoria die toekenning vir sy lewenslange bydrae tot die plaaslike musiekbedryf ontvang.

Du Toit, wat sy eerste professionele verhoogoptrede in 1971 gehad het en in 1979 bekendheid verwerf het, sê oor hierdie besonderse toekenning: “Wat ’n eer en aanmoediging vir die pad vorentoe.”

En inderdaad word sy reis met ’n reeks opwindende hoogtepunte op sy kalender vir die res van die jaar voortgesit.

Op 24 September doen hy ’n baie spesiale Erfenisdagkonsert, getiteld Die Musiek van Jannie en Christa, saam met die FAK Jeugsimfonie-orkes by die Voortrekkermonument se Heldesaal.

Dan, op 4 en 5 Oktober, gaan Jannie gehore by Aardklop met sy splinternuwe vertoning, “Margaretastraat”, boei.

Aanhangers sal teruggeneem word na die legendariese liedjie-aande van 1981/82 wat by sy huis in Margaretastraat 28 in Pretoria gehou is, onder begeleiding van sy pianis van die afgelope tien jaar – die begaafde Chanie Jonker. Hierdie optrede beloof om die ikoniese era van “Musiek en liriek” te laat herleef. Nie net gesels hy oor daardie ikoniese tydperk vanaf die einde van die jare sewentig nie, hy kleur ook die verhaal in met die treffermusiek van kunstenaars soos Koos Doep, Lucas Maree, Coenie de Villiers, Anneli van Rooyen, Janita Claassen en Marietjie Stoop.

Van 7 tot 15 Oktober 2023, tydens die Toyota US Woordfees in Stellenbosch, bring hy hulde aan sy jarelange vriendin, Marie Tredoux, met die verhoogproduksie, Die maan deur ’n gaatjie in die nag.

Marie Tredoux, ’n Jacobsbaai-legende, wat onlangs haar 94 verjaardag gevier het, skryf steeds liedjies. Sy is veral bekend vir die aangrypende Jacobsbaai se Aandlied wat in die nuwe FAK- sangbundel opgeneem is en Mis oor Jacobsbaai wat deur Laurika Rauch opgeneem is. Met die hulp van Jannie du Toit en Dana Snyman, ’n oud-inwoner van Jacobsbaai en Marie se vriendin, sal haar merkwaardige werk die middelpunt vorm en die gehoor se harte boei.

Karlien Meiring het meer oor sy diep spore in die plaaslike musiekbedryf gaan uitvind.

Jou splinternuwe produksie, “Margaretastraat”, gaan legendariese musiek uit die laat jare sewentig herleef. Wat het jou geïnspireer om hierdie ikoniese tydperk te herskep?

My vriend Coenie wil al lankal hê ek moet dit doen omdat die Liedjie-aande so ’n belangrike komponent van die “Musiek en liriek”-era was. Omdat ek die een persoon is, wat die hele verhaal van begin tot einde kan vertel, en omdat ek die waarde daarvan nou nog beter verstaan as wat ek destyds het, was dit vir my nou die aangewese tyd.

Wat motiveer jou om steeds ná al die jare gehore met jou musiek en talent te betower?

Die wonderlike gawes van taal en musiek wat my van kleins af aangryp en inspireer.

Wat was van die onvergeetlikste oomblikke en mylpale in jou loopbaan?

Onregverdige vraag. Die totstandkoming van ons folk-groep Trilogie in die vroeë sewentigerjare, my aanstelling by Tukkies in 1981 om musiekblyspele te skryf en die voorstel van oom Michal Grobbelaar van die Johannesburgse Stadskouburg om saam met Christa Steyn te begin werk. Dié samewerking het 25 jaar geduur. Dan ook ’n uitnodiging om tien jaar gelede by ’n kitaarfees op die Volga in Rusland te gaan optree, tien geseënde jare met ’n tiental nuwe produksies en albums wat gevolg het op Christa se afsterwe, my huwelik in 2018 met Therina vir wie ek my mooiste liefdesliedjie “Jy kyk sag”, geskryf het … En nog so ’n klompie ander wonderlike oomblikke.

Foto: Carolyn Gregorowski Photography

As jy met enige kunstenaar, lewend of dood kon saamwerk, wie sou dit wees?

Behalwe dié waarmee ek reeds saamgewerk het, Mynie Grové.

Wat is die mees ongewone of onverwagte plek waar jy inspirasie vir ’n liedjie gekry het?

Die vendusiekrale op Rouxville, waar ek ’n paar jaar gelede opgetree het – sulke plekke het aanleiding tot my liedjie “Vat die pad” gegee.

Foto: Carolyn Gregorowski Photography

Lees ook: Vyf-vinnige-vrae-Vrydag met Joshua na die Reën – oor sy nuwe album

The post Vyf-vinnige-vrae-Vrydag met musieklegende Jannie du Toit appeared first on rooi rose.

Deur Maryke Roberts. Foto’s: Clifford Roberts 

Daar was meer as 250 aanbiedings in meer as 40 venues in en om Stellenbosch. Feesgangers kon toneel-, dans, musiek kyk, deel wees van boekbesprekings, op wandelinge gaan, terwyl hulle met ’n glas wyn van die Stellenbosch Wynroetes-lede by elke lokaal kon geniet.  

Nuwe boeke is bekend gestel, nuwe vriende gemaak en die Afrikaanse kultuur en erfenis, was in veskeie gesprekke in die kollig. 

Lees ook: Twee suksesse vir SA se ou wingerde gevier

The post Stellenbosch weer gasheer vir fisiese Woordfees appeared first on rooi rose.