Pantene het die geleentheid aan ’n paar skoonheidskenners gebied om haargesondheidskenner, Dr. John Gray, te ontmoet. Dr. Gray is ’n mediese dokter, skrywer van vele haar- en vel artikels en boeke. Dr John Gray was jare lank ’n mediese adviseur vir Procter & Gamble.

“Sorg net so mooi vir jou hare soos wat jy vir jou vel sorg.”

Het jy geweet dat die gemiddelde vrou met skouer lengte hare altesaam ongeveer 40km se hare op haar kop het, en dat jy daagliks 50 tot 80 hare van jou kopvel af verloor? Dit is duidelik dat ons nie alles van haargesondheid verstaan nie, hier is ’n paar interessante antwoorde op jul vrae:

Hoeveel keer per week moet mens hare was, en kan mens elke dag jou hare was?

Jy kan elke dag jou hare was; dit is ’n mite dat jy slegs elke derde dag jou hare moet was om te keer dat dit vinnig weer vuil word. Jou leefstyl en haartipe bepaal hoe gereeld jy jou hare was; as jy byvoorbeeld daagliks die gim besoek, word jou hare soos die res van jou lyf vuil en moet jy jou hare daagliks was. En nee, jou hare sal nie meer olierig word, omdat jy jou hare elke dag was nie. Gebruik sjampoes wat vir olierige hare bedoel is en nie jou hare sal uitdroog nie.

Hoekom val vrouens se hare uit/ en verander vrouens se hare na swangerskap?

Tydens swangerskap is vrouens se estrogeenvlakke hoër, wat die groeifase van die hare verleng. Tydens swangerskap verloor jy dus minder hare (jou hare is in ’n rusfase) daarom is vrouens se hare tydens swangerskap dikker en voller. Na geboorte keer estrogeen vlakke weer terug na normaal, daarom sal jy meer hare begin verloor. Jou hare sal ’n rukkie neem voordat dit terugkeer na normaal toe.

Waarom val my hare uit soos ek ouer word?

Haarverlies soos ons ouer word is normaal (gelukkig verloor meeste vrouens minder hare as mans) As jou hare wel baie erg uitval, kan dit moontlk dui op allopecia, (blesword). Navorsing bewys dat die gebruik van sjampoe en stileerprodukte nie haarverlies kan veroorsaak nie,

Waarom irriteer sekere sjampoe’s my kopvel?  

Die sjampoe wat jy gebruik is waarskynlik te sterk vir jou. Maak seker dat jou sjampoe en opknapper van goeie gehalte is en dat dit by jou spesifieke haartipe/kopvel pas.

Enige advies vir hare wat koek?

Kam of borsel jou hare goed voordat jy dit was terwyl jou hare nog droog is. Gebruik meer sjampoe op jou wortels (waar dit meer olierig is) en werk dit deur na jou haarpunte. Wanneer jy sjampoe aanwend maak seker dat jy nie jou hare te veel vryf nie omdat nat hare baie makliker beskadig kan word.

Jou haarpunte is die oudste hare op jou kop en het meer sorg nodig; begin dus altyd om jou opknapper op jou punte aan te wend en dan van onder na bo (jou wortels) aan te wend. Hou ’n kam met wye tande in die stort en kam ook jou hare van onder na bo nadat jy opkapper aangewend het. Dit sal help dat jou hare minder koek.

Gebruik ’n kam in die stort en kam die opknapper deur jou hare, maar begin ook eers van onder na bo. Dit sal ook versker dat jou hare minder sal koek. So was van bo na onder en knap op van onder na bo.

Hoe weet ek watter tipe hare ek het en watter tipe sjampoe en opknapper ek moet gebruik?

Normale hare is as dit nie olierig of droog is nie, nie gekleur is nie en gesond lyk. Fyn of olierige hare is hare wat plat is en min volume het, hare wat nie maklik ’n styl hou nie en vinnig vuil word nadat dit gewas is. Droë hare is hare wat droog lyk en voel, maklik koek, moeilik is om deur te kam en maklik kroes.

Gebruik ’n sjampoe en opknapper volgens jou haartipe asook jou haar-gewoontes, byvoorbeeld reekse wat voorsorg tref vir gekleurde hare en hitte stileering.

Lees ook: Gesonde haargroei

The post Kopkrapvrae appeared first on rooi rose.

Deur Leandri de Kock

Deesdae is daar ‘n hele woordeboek van begrippe wat gebruik word om sogenaamde “natuurlike” skoonheid te beskryf, maar dis nie altyd verstaanbaar nie. Die skoonheidsbedryf se penarie is dat daar geen universele definisie vir “skoon” skoonheid is nie. Daarom gebruik baie handelsmerke die woord “skoon” of “natuurlik” op hul produkte se etikette, maar dit beteken nie noodwendig dat dit op standaard is nie.

Om volhoubaar te wees, behels meer as om net nou en dan te herwin, of om bewus te wees van waar jou groente vandaan kom. In die skoonheidswereld sien ons baie ongereguleerde en verwarrende begrippe, waar sommige handelsmerke nog ‘n lang pad het om te stap om die gaping, wat deur vorige onetiese praktyke geskep is, te oorbrug.

Skoonheidsmiddels (in die breë skoonheidsin), soos baie ander sektore (dink aan kos en mode), maak gebruik van ‘n verskeidenheid bestanddele en materiale om die produkte op ons badkamerkaste en in ons grimeersakkies te vervaardig. Ons koop so dikwels net produkte vir die mooi verpakking, die laer prys of die gewilder handelsnaam, maar ons oorweeg nie die uitwerking wat die aankoop van sommige van hierdie produkte kan hê nie.

Waarna moet ons oplet as ons seker wil wees dat ons die beste ding vir die planeet doen? Eerstens moet ‘n mens verstaan wat volhoubaarheid in die breër spektrum beteken, en hoe die produkte wat ons vandag gebruik en koop, uiteindelik ons negatief kan beïnvloed. Deur beter en meer ingeligte keuses te maak, selfs al is dit nou op ‘n klein skaal, kan ons ‘n beduidende rol speel om te help om die skoonheidsbedryf, en ons pragtige aarde, ten goede te verander.

‘n Meisie smeer room op haar gesig. Foto: Andrea Piacquadio

Wat beteken dié begrippe?

Palmolie-vry | Die produksie van palmolie is na bewering verantwoordelik vir die verwoesting van reënwoude en die gepaardgaande fauna en flora. Daar is egter gesertifiseerde palmolie wat volgens die standaarde van die Roundtable of Sustainable Palm Oil (RSPO) vervaardig word. Laasgenoemde is ‘n inisiatief wat ‘n volhoubare palmoliebedryf ondersteun. Besoek www.palmoilscorecard.panda.org

Gesertifiseerd organies | Boerderymetodes wat gebruik word om rou bestanddele te produseer, sluit dikwels plaagdoders, geneties gemodifiseerde sade en ander chemikalieë in, wat beteken dat die produkte wat van hierdie bestanddele gemaak word nie as organies beskou kan word nie. Dit beteken egter nie dat dit sleg vir jou (en jou vel) is nie, maar eerder dat dit die potensiaal het om die omgewing waarin die bestanddele gekweek word negatief te beïnvloed.

As jy produkte koop wat organies gesertifiseer is, kan jy seker wees dat meer volhoubare grondbestuur betrokke is, geen GMO’s of groeireguleerders gebruik is nie en geen antibiotika, kunsmatige preserveermiddels of chemikalieë gebruik is nie.

Volhoubaar | Produkte mag dalk sê dis natuurlik, maar hoe hulle die bestanddele bekom, is nie noodwendig volhoubaar nie.

Veganisties | Hierdie produkte bevat geen diereprodukte of dierebyprodukte soos heuning, propolis, koninginjellie, byewas, kollageen, sy, melk of lanolien nie.

Wreedheidsvry | Dit beteken geen diere is gebruik of betrokke by die toets van die produkte of die bestanddele nie. Tot vandag toe toets baie maatskappye steeds hul produkte op diere in lande soos China waar dieretoetsing deur die wet vereis word. Dis wel belangrik om op te let dat sommige handelsmerke – hoewel hulle nie self op diere toets nie – hul produkte in China verkoop waar die produkte dan in elk geval eers getoets word.

Koraalvriendelik / koraalveilig | Dit beteken dat die sonskerm wat jy kies nie oksibensoon, oktinoksaat, oktokrieleen, 4-metiëlbensilideen of butielparaben moet insluit nie. Daar is gevind dat hierdie bestanddele ‘n negatiewe impak op koraalriwwe kan hê, wat die larwes beskadig en die immuniteit daarvan verminder. Om dinge makliker te maak, maak net seker dat jou sonskerm ‘n mineraal-sonskerm is, eerder as ‘n chemiese een as jy van plan is om in die see te swem. Vir elke dag se dra (tydens die res van die jaar) is jou chemiese sonskerm aanvaarbaar.

‘n Vrou sit ‘n gesigmasker op. Foto: Karola G, Pexels

Sertifiserings om na op te let:

• Leaping Bunny | Wreedheidsvry
• Cosmos | Organies en natuurlik
• EcoCert | 95% van die formule is van natuurlike bestanddele gemaak
• Fairtrade | Bied werkers in ontwikkelende lande ‘n goeie handelsooreenkoms om te help om hul toekoms te verbeter.

Wat is ‘skoon’?

Produkte wat in die algemeen aan die definisie van ‘skoon’ voldoen, bevat nie:

• Parabene
• Natriumlaurielsulfaat
• Ftalate
• Silikon
• Polipropileen (mikrokrale)
• Aluminiumsoute
• Mineraalolie
• PEG’s
• Talkum
• Petrolatum
• Formaldehied
• Tolueen
• Triclosan
• Hidrokinoon

Lees ook: 5 behandelings vir ‘n jeugdiger vel ná 50

The post Skitterskoon … of nie? appeared first on rooi rose.

Willem Botha tooi alledaagse vroue én bekende persoonlikhede in ’n pragprentjie met sy talent én gehalteprodukte.   

Een leser kan ’n Willem Botha Beauty-geskenkpak ter waarde van R3 050 wen.

 Dit sluit die volgende in:  

• Oogskadupalet
• Borsel-stel
• Blosserpoeier
• Highlighterpoeier
• Sculptpoeier
• Lip-gloss
• Liquid Matte Lipstick

Bepalings en voorwaardes: Alle pryse in rooi rose is onderhewig aan beskikbaarheid en is nie oordraagbaar, herverkoopbaar of terugbetaalbaar vir kontant nie. Vir nog bepalings en voorwaardes, besoek www.rooirose.co.za

Om in te skryf, voltooi die onderstaande vorm:

*Slegs een inskrywing per persoon    

Sluitingsdatum: 28 Augustus 2026    

Lees ook: Boer soek ’n vrou: Reandi ontmoet die tien boere vir die eerste keer

The post WEN ’n Willem Botha Beauty-geskenkpak ter waarde van R3 050! appeared first on rooi rose.

Deur Suzanne Kotzé

Senior lugwaardin Michele Snyman se raad:

Wat is jou moet-hê produkte op ’n vliegtuig?

• Grimeerverwyderingslappies
• ’n Intensiewe vogroom om gedehidreerde vel te voorkom
• ’n Getinte vogroom eerder as ’n swaar onderlaag
• Gesigsproei (ek verkies een met vitamiene E)
• Oogdruppels om te keer dat jou oë uitdroog
• ’n Getinte lip-balsem
• Maskara
• ’n Buisie Tea Trea-jel vir ingeval jy ’n puisie kry
• Hand-skoonmaker
• Kougom om jou asem vars te hou

Wat doen jy voor ’n vlug om jou vel voor te berei?

• Ek drink baie water voor en na die vlug, dit help beslis met vlugvoosheid
• Ek skrob en bevogtig my lyf van kop tot tone
• Ek volg my hele velsorgroetine: ek was, skilfer af en dra ’n masker
• Dit is ’n moet om jou hare te was: vuil hare en ’n vuil vel op ’n vliegtuig is net vuil
• Drink meer vitamiene C wat jou imuunstelsel versterk en verkoues voorkom

Wat is passasiers se irriterendste skoonheidsgewoontes?

Wanneer hulle hul kaal voete op die armleunings laat rus om te voorkom dat hulle enkels swel. Jy kan dit doen, maar trek net sokkies aan!

Om kaalvoete toilet toe te gaan. As passasiers maar weet wat alles op daardie vloere kan wees.

Om swaar grimering te dra: dit smeer teen die vliegtuig se sitplek af en as jy wakker word met gesmeerde grimering is dit nie altyd ’n mooi gesig nie.

Die reuk van swaar parfuum of naskeermiddel wat die hele vliegtuig oorrompel.

Om parfuum aan te spuit terwyl ander mense eet en drink. Doen dit in die badkamer.

Wat kan jy doen om te keer dat jou skoonheidsprodukte lek tydens ’n vlug?

• Sit alle vloeibare produkte in zip lock-sakkies om te keer dat dit op jou klere uitloop.
• Probeer om doppies te gebruik wat toedraai eerder as oop-flip, dit is minder geneig om te lek.
• Gebruik “cling-wrap” om bottel-openings toe te maak voordat jy die doppie opdraai.
• Probeer om soveel moontik ekstra lug uit die botteltjie te druk voordat jy die bottel toedraai.

Suzanne se wenk:

Onthou om gratis monsters van vogrome, sonskerm, parfuum, serums, handeroom ens. bymekaar te maak, dit is klein en jy kan dit jy sommer in jou handsak gooi.

Produkte gebruik in hooffoto

• Cetaphil Cleansing Cloths
• Elizabeth Arden Eight Hour Miracle Hydration MistSkinderm Hydrating repair
• Dior Hydra Life Deep hydration Sorbet Water Essence
• Skinderm Hydration Repair Mask
• Vichy Eau Thermal
• Biomedical Vitamin E Therapy
• Catrice Rock Couture Extreme Volume Mascara
• Dr. Paw Paw
• Clarins Hydraquench Cream-Gel
• Sisley Paris Black Rose Cream Mask
• Elemis Super Food Facial Oil
• Tangle Tezeer Compact Markus Lupfer

The post Mooi vlieg appeared first on rooi rose.

Deur Elzette Calitz, stigter van Beauty is Life by Spice Route Destination in Paarl

1. Mikronaaldterapie

Mikronaaldterapie is een van die doeltreffendste behandelings vir verouderde vel. Dit skep beheerde mikrobeserings met klein naalde wat die liggaam se natuurlike genesingsreaksie aktiveer.

‘n Mikronaaldterapie-prosedure. Foto: Anva Marketing, Pexels

Resultate

• Vermindering van fyn lyntjies en plooie
• Verhoogde kollageenproduksie
• Verbeterde veltekstuur en -kleur
• Vermindering van littekens en pigmentasie
• Verbeterde absorbering van velsorgprodukte

2. LED-ligterapie

Rooilig- en infrarooi-ligterapie dring verskillende velvlakkebinne. Dit is ‘n nie-indringende opsie wat ander behandelings aanvul en lantermynvelgesondheid bevorder.

‘n LED-ligterapie behandeling. Foto: Alex Lam, Unsplash

Resultate

• Verhoogde kollageenproduksie
• Verminderde rooiheid en inflammasie
• Versnelde genesing en verbeterde bevogtiging
• Stralende, gesonde gelaat

3. Fraxel Laser (Fractional Dual Resurfacing)

Fraxel-lasertegnologie teiken diep lae in die vel om plooie, sonskade en ongelyke tekstuur te verbeter. Dit skep beheerde mikrobeserings wat intense kollageenheropbou stimuleer. Dit is veral doeltreffend vir ‘n volwasse vel met tekens van veroudering.

Resultate

• Gladder, verfynde veltekstuur
• Vermindering van diep plooie en fyn lyntjies
• Omgekeerde sonskade en verminderde pigmentasie
• Langtermynkollageenverbetering vir ‘n egalige vel

4. Chemiese skilferbehandelings

Chemiese skilferbehandelings verwyder dooie velselle en stimuleer selvernuwing. Met ouderdom vertraag hierdie proses en lei dit tot ‘n vaal en oneweredige vel. Medium-diep afskilferaars (peels) met TCA, glikoliese of melksuur kan velkleur helderder laar voorkom en fyn lyntjies en pigmentasie verminder.

‘n Chemiese skilfering. Foto: Rosa Isela Sias Talamantes, Pexels

5. Hoëfrekwensie- of radiofrekwensieterapie

Radiofrekwensieterapieë gebruik hitte-energie om diep in die vel in te dring.

Resultate

• Vermindering van vel wat verslap, veral rondom die kakebeen en nek
• Verbeterde bloedsirkulasie en suurstof in die vel
• Beter absorbering van velsorgpordukte vir langtermynvelgesondheid

Lees ook: Beskerming teen blou lig

The post 5 behandelings vir ‘n jeugdiger vel ná 50 appeared first on rooi rose.

Deur Suzanne Kotzé. Hooffoto: Pexels

Deesdae word ’n groot ophef van slaap gemaak en hoe noodsaaklik dit is om genoeg te slaap. Volgens slaapkundige dr. Dale Rae het die ontdekking van die gloeilamp ons sirkadiese ritme deurmekaargegooi omdat daar nie meer natuurlike lig en donker is nie.

’n Groot deel van daglig bestaan uit blou ligstrale, en energiebesparende LED-liggies en elektroniese apparate soos skootrekenaars en slimfone straal ook ’n groot hoeveelheid blou lig uit.

Wanneer ons aan blou lig blootgestel word, skei ons liggame nie serotonien af wat ons help slaap nie.

Vir jou vel om te herstel het dit genoegsame slaap nodig (nie minder as ses uur nie, maar ook nie meer as 12 uur nie). Terwyl jy slaap, maak jou vel nuwe selle en die menslike groeihormoon word afgeskei (baie kenners bestempel dié hormoon as die “fontein van jeugdigheid”). Die menslike groeihormoon (human growth hormone) herstel en vernuwe alle weefsel, ook jou vel, terwyl jy slaap. As jy nie genoeg slaap nie, onderbreek jy die afskeiding van die hormoon. As jou sirkadiese ritme versteur word, lei dit ook tot oksidatiewe spanning wat veroudering aanhelp.

Foto: Polina Kovaleva, Pexels

Wat kan jy doen om beter te slaap?

• Vermy koffie en alkohol saans.
• Vervang blou gloeilampe, veral in jou slaapkamer, deur geel gloeilampe.
• Keer straatligte wat in jou kamer inskyn met gordyne of blindings.
• Slimfone bevat ook ‘n “blue light filter” waar jy jou foon se liggie heeltemal na ‘n warmer kleur kan stel.
• Belê in goeie beddegoed.
• Hou jou kamer aan die kant en rustig sodat klere wat rondlê en ‘n chaos jou nie laat dink aan wat jy eintlik nog moet doen voordat jy gaan slaap nie.
• As jy geneig is om te jeuk, smeer ‘n strelende lyfroom (sonder bestanddele soos parfuum en alkohol) aan voordat jy gaan slaap.
• Hou die temperatuur in jou kamer gemaklik (nie te koud of te warm nie).

Sommige dermatoloë meen blou lig-radiasie kan ook tot pigmentasie en aknee lei.

Die oplossing? Gebruik produkte wat anti-oksidante bevat om jou te beskerm.

Lees ook: Wat jy kan doen wanneer bekommernis oor werk jou wakker hou

The post Beskerming teen blou lig appeared first on rooi rose.

Deur rooi rose

Hare wat sterk en gesond is, begin by ’n gesonde kopvel. ’n Afskilfering is elke nou en dan voordelig om jou kopvel skoon te maak van droë vel, olie en produkte wat opbou. Die produkte wat jy gebruik, kan ook ’n natuurlike afskilferingsproses begin (soos wat glikolsuur vir ons gesigte doen).

Wees dus op die uitkyk na bestanddele soos aalwyn, salisielsuur, gemmer, appelasyn en bentonietklei. Gee jou kopvel ’n goeie skrop met ’n produk met suiker of sout as die afskilferingsmiddel.

Diegene wat haarverlies begin ervaar, kan ook by produkte baat vind wat die kopvel teiken. Bestanddele soos teeboom- en roosmarynolie is voordelig vir ’n tuisbehandeling wanneer dit met ’n draerolie (soos hennep- of druiwepitolie) gemeng word. Hierdie essensiële olies is albei anti-inflammatories, strelend en verbeter sirkulasie. Dus is dit ook ideaal vir diegene met skilfers.

Lees ook: Winterwenke vir jou hare: Pas jou roetine aan

The post Gesonde haargroei appeared first on rooi rose.

Deur Leandri de Kock

Die koue, droë lug is nie net sleg vir ons vel in die winter nie, maar ook vir ons hare. Is jou hare droog en bros, dun en gebreek? Die oplossing lê dalk net by ‘n produk of twee. Die winter is nie goed vir ‘n mens se hare nie. Die hare kan brosser en droër voel, gesplate punte is meer opsigtelik en jou hare is heeltyd staties.

Die koue en droë lug veroorsaak dat die buitenste gedeelte van die haarskag effens lig en wanneer jy weer binnenshuis is waar dit warmer is, ontsnap die vog. Dit maak dit ook moeiliker vir enige vog om geseel te bly.

Hoe gemaak? Dit is noodsaaklik om in die winter anders oor jou haarsorgroetine te dink. Omdat jou hare bloot nie dieselfde in die winter as in die somer reageer nie en ander elemente moet verduur, moet jou keuse van sjampoe en bevogtiger eerstens aangepas word.

Gebruik ‘n meer bevogtigende sjampoe en hou jou verhelderende sjampoe vir elke nou en dan wanneer jou hare ‘n bietjie oemf nodig het. So sorg jy vir ekstra vog wanneer jou hare dit die meeste nodig het sonder om dit swaar te laat voel.

Probeer om jou hare minder te was – slaan ‘n dag of twee oor. Kies ‘n bevogtiger en masker wat bestanddele soos gliserien, keratien en keramiede bevat om jou hare te versterk. Bestanddele soos galambotter (shea butter) heuning, jojoba-, mapper- en arganolie is ideaal vir hare wat ekstra droog is.

Lees ook: Kry die “half nat”-voorkoms

The post Winterwenke vir jou hare: Pas jou roetine aan appeared first on rooi rose.

Stap 1

The post Kry die “half nat”-voorkoms appeared first on rooi rose.

Stoor kleiner juwele in pilhouers

As jy ringe, klein oorringe of ander juwele het wat maklik verlore kan raak, pak dit in ’n pilhouer (dié wat elke dag van die week aandui). Dit is perfek om jou klein juwele bymekaar en heel te hou.

Ryg halssnoere deur ’n strooitjie

Sny ’n paar strooitjies middeldeur, trek dan ’n enkele string van jou halssnoer of armband daardeur. Maak seker dat ’n gedeelte van die halssnoer of armband aan elke kant uithang, sodat jy dit steeds kan vasmaak. Dit sal verhoed dat die item nie knoop nie.

Gebruik kleefplastiek

Sit jou juweliersware tussen twee velle kleefplastiek om te voorkom dat dit in jou tas rondskuif. Kleefplastiek is ideaal om jou halssnoere afsonderlik te verseël, sodat hulle nie inmekaar vasgevang word nie. Wanneer jy dit wil dra, trek dit uit die plastiek en seël dit weer om dit netjies te hou.

Ziploc-sakkies

Plaas halssnoere in ’n Ziploc-sakkie en sorg dat ’n gedeelte van die kettinkie by die sakkie uitsteek. Maak dan die sakkie in die middel toe en rol dit op sodat die halssnoere nie verstrengel raak nie.

Pak dit tussen jou klere

Pak jou juwele plat tussen gevoude klere sodat die platgedrukte klere die juwele in plek hou. Jy kan ook langer halssnoere in sneespapier rol en dit in die oop gleuwe tussen jou klere sit, sodat dit nie aan jou klere haak nie (die bogenoemde Ziploc-sakkies en kleefplastiek sal verhoed dat die kettings aan jou klere haak.)

Koop ’n juweelorganiseerder

’n Juweelorganiseerder werk uitstekend vir wanneer jy reis. Maak net seker dit is sterk, prakties en bevat individuele kompartemente.

Lees ook: Beklemtoon die kleur van jou oë

The post 6 reiswenke vir jou juwele appeared first on rooi rose.

Jou velsorgroetine behels in die winter meer as net bevogtiging met ’n goeie room. Daar is ander maniere om jou vel deur hierdie temperatuurskommeling te kry.

Hier is ’n paar wenke om jou vel se glans terug te kry.

• Sonskerm, sonskyn

Die feit dat dit winter is, beteken nie jy moet nie sonskerm gebruik nie. Die winter se sonstrale is net so hard op jou vel soos die somerson. Wend sonskerm aan voor jy soggens die huis verlaat en as jy weet jy gaan deur die dag buite wees, hou die room in jou handsak sodat jy gedurig daarvan kan aanwend.

• Bevogtig die lug

Gebruik ’n vogsproeier in jou woon- en slaapkamer. Verwarmers versprei warm lug wat jou vel uitdroog – vogsproeiers plaas vog terug in droë lug wat help om jou vel te bevogtig.

• Moet dit nie aftrek nie

As jou vel deur ’n baie droë stadium gaan, vermy growwe gesigmaskers wat belangrike olies uit jou vel trek. Jy het juis hierdie olies in die winter nodig. Kies eerder ’n ligte reiniger sonder alkohol.

• Vermy hitte

’n Lekker warm bad in die middel van die winter is wonderlik, maar ’n vuurwarm bad is nie goed vir jou vel nie. Die hitte haal belangrike olies uit jou vel. Al klink ’n louwarm bad nie so lekker soos ’n warm bad nie, is dit beter vir jou vel. Probeer dit eerder.

• Versorg jou lippe

Moenie jou lippe vergeet nie – hulle verdien dieselfde hoeveelheid liefde as die res van jou lyf. Belê in ’n goeie lipbalsem wat jou lippe beskerm en bevogtig. Wend dit saans aan, asook soggens onder jou lipstiffie.

Lees ook: Raad vir ’n tienervel

The post Wenke vir ’n mooi wintervel appeared first on rooi rose.

Dit kan stresvol wees om ooggrimering te koop. Daar is so baie kleure dat dit soms intimiderend kan wees, maar sodra jy die regte kleure gevind het, maak dit die proses heelwat makliker. Die regte skakering oogskadu kan die kleur van jou oë laat uitstaan.

Onthou: jou persoonlikheid speel ’n groot rol in die grimering wat jy kies, jy moet gemaklik wees met wat jy dra. Daar is een groot reël van grimering … daar is geen reëls nie! Eksperimenteer ’n bietjie met die grimering wat jy het en kyk wat vir jou werk.

Blou oë

“As jou oë blou is, vermy koel kleure en probeer eerder ’n warmer kleur, dit sal jou oë se natuurlike kleur beklemtoon. Skakerings van grys en bruin is perfek vir diegene wat blou oë het, vermy blou oogskadu.” Dit is die raad van Muzi Zuma van die grimeerreeks 3INA.

Probeer ook meer oranje skakerings, soos koraal of self sjampanje.

“Brons of bruin werk ook goed. As jy jou grimering aanwend, maak ’n driehoek in die derde van jou oog en eindig dan deur ’n sagte roomkleurige oogskadu onder jou wenkbroue aan te wend.”
– David White van L’Oreal

Groen oë

As jy groen oë het, is dit reeds helder en het jy nie noodwendig baie oogomlyner of helder oogskadu nodig nie. Wat vir my werk, is skakerings van bruin of selfs ’n bietjie pers. Vir ’n aandjie uit kan jy eksperimenteer met metaal- of helder kleure, maar as jy jou daggrimering aanwend, probeer iets meer natuurlik.

“Die warmer skakerings is baie vleiend vir diegene met groen oë. Probeer skakerings soos sepia, roesbruin, donkerpers, pienk/appelkoos, goud en ligpers.” Stel Muzi voor.

“Jy kan ook ’n pers maskara probeer.” stel David voor.

Bruin oë

Vroue met bruin oë is gelukkig, want amper enige kleur sal hul oë komplimenteer.

Probeer ’n sagte, neutrale kleur soos ’n sagte pienk of bruin en eindig dit af met ’n oogomlyner. “Neutrale bruin skakerings met ’n diepblou oogomlyner sal die oë vars laat lyk” sê David.

“Jou persoonlikheid gaan ’n groot rol speel in die kleur wat jy kies. Skakerings wat baie goed sal werk, is goudbruin, rooi, blou, groen, brons, helderblou, ligblou en pers.” Stel Muzi voor.

Grys oë

“Donker skakerings werk die beste. Begin met ’n silwerwit kleur in die hoek van jou oog en wend donkerder grimering aan die buitenste gedeelte van jou oë, stel Muzi voor.

Jy kan ook eksperimenteer met olyfgroen, helderblou, swart, donkerbruin en pers.

Lees ook: WEN ’n Willem Botha Beauty-geskenkpak ter waarde van R3 050!

The post Beklemtoon die kleur van jou oë appeared first on rooi rose.

1 Probeer die prettige pixie

As jy fyner hare het, probeer dalk ’n speelse pixie-snit, stel Shelene Shaer (eienaar van TANAZ Hair Body Nails) voor. Dit is ’n jeugdige styl wat baie vroue pas. Hou die snit kort genoeg sodat daar heelwat volume op die wortels is. As die hare te lank is, sal die styl eenvoudig plat lê.

Die pixie-snit is ook perfek vir ouer dames wat graag min tyd aan hul hare wil bestee, maar steeds jonk en modern wil lyk. Kies ’n styl wat jou gesig sal raam (met ’n kuif of daarsonder) en jou beste gelaatstrekke sal beklemtoon, is haarstilis Gary Rom se raad.

2 Die LOB is vleiend

’n Bob of ’n LOB (lang bob) is universeel vleiend vir byna alle gesigvorme en figure. Dit werk vir dun hare, dik hare, krulhare en reguit hare, sê Elsa Kruger, skoonheidskrywer vir verskeie publikasies. Gary Rom stem saam – die lang bob is steeds groot nuus onder oud en jonk. Ideaal vir vroue met fyner hare omdat dit jou hare voller laat lyk en boonop versag dit jou gelaatstrekke en dit laat jou nek langer lyk), wat ideaal is vir die ouer vrou.

Bonus – hierdie styl vereis lae onderhoud en kan in verskeie maniere gestileer word: dra dit reguit, krul dit effens of steek dit vas.

3 Gaan vir grys

Moenie bang wees vir grys word nie. Pak die proses saam met jou haarstilis aan en dit kan ’n avontuurlike reis word, stel Elsa voor. Grys hare is vandag hoogmode en die jonger generasie spandeer baie geld om hul lokke die perfekte grys skakering te kry. Haarstilis Shelene sê die beste sal wees om jou hare uit te groei hoewel min dames kans sien om met ligte wortels en donker punte rond te loop. Daarom stel sy voor dat ligstrepies aangewend word om die proses te versnel totdat jou grys heeltemal uitgegroei het. Dit kan tot ’n jaar neem vir die grys om uit te groei. Die belangrikste is om seker te maak jou hare bly deur die proses gesond. Moet dit nie aanjaag nie, wees geduldig!

#rooirosewenk: Gebruik ’n pers sjampoe of opknapper om te verhoed dat jou hare geel lyk en om die silwer/grys kleur te behou.

4 Hou dit lank

Dit is bog dat ouer vroue nie lang hare kan hê nie. As jy mooi hare het en lang hare jou vlei, kan jy dit dra so lank as wat jy wil. Boonop steek langer hare die plooie in jou nek weg én dit beskerm die delikate nekvel teen sonskade, sê Elsa.

Gary Rom sê ook jy moet vergeet dat jy geleer is om op ’n sekere ouderdom jou hare af te knip. As jy geseën is met gesonde en voller hare, kan jy dit beslis in ’n langer sjiek styl dra.

Kyk net hoe pragtig lyk Jennifer Aniston se lang hare:

5 Knip ’n kuif

Wees slim en knip ’n kuif of sagte lae rondom jou gesig, dit is dit beste manier om op botoks te bespaar! Shelene sê ’n kuif steek die plooie op jou voorkop weg en hare rondom die gesig versag die plooie rondom jou oë. As jy nie ’n kuif wil waag nie, kam jou hare in ’n skuins kantpaadjie, nog ’n vleiende haarstyl wat jou ouderdom sal versag.

Aktrise Anne Hathaway se haarstyl is die perfekte voorbeeld:

Haarwenke vir ouer hare

• Hidreer, hidreer, hidreer!

Net soos ons vel droër word met ouderdom, verdroog ons hare ook. Daarom is dit belangrik om hidrerende produkte te gebruik, stel Gary Rom voor. Kyk uit vir sjampoe, opknapper en maskers wat hidrasie gee. Probeer ook gerus ’n salon-behandeling wat intensiewe hidrasie bied.

#rooirosewenk: As jy voel jou hare benodig nog hidrasie, sluit ’n haar-olie by jou haarsorg-roetine in.

• Hou die blink kant bo

Gebruik ’n stileerproduk wat jou hare glans gee. Ouer hare verloor vinnig glans, maar gelukkig is daar verskeie produkte wat jou hare kan laat blink. Elsa sê daar is niks meer jeugdig as ’n pragtige en goed versorgde haredos nie.

• Beskerm teen hitte

Gebruik ’n produk wat jou hare teen hitte en omgewingsfaktore beskerm – dit sal verhoed dat jou hare enige ekstra vog verloor en boonop lyk jou hare meer gesond en voel sagter.

Lees ook: ‘n Velsorggids vir elke ouderdom

The post 5 haarstyle vir ’n moderne voorkoms appeared first on rooi rose.

Dit is nie sommer net nog ’n kompetisie nie. Dit is die eerste keer dat skoonheids- en welstandstoekennings van hierdie omvang eksklusief in Afrikaans in rooi rose aangebied word. Ons vier die innovasie, gehalte en passie van produkte wat vroue help om op hul heel beste te lyk en te voel.

Laat jou produk skitter

Is jou produk die geheime wapen in duisende vroue se daaglikse roetine? Of dit nou ’n deurbraak in velsorg, luukse grimering, of ’n noodsaaklike welstandsproduk is, ons wil daarvan weet. Deelnemers word nou genooi om hul produkte in te skryf vir ’n kans om daardie gesogte rooi rose-stempel van gehalte te verower. Om te wen, beteken nie net erkenning in die bedryf nie, maar ook direkte blootstelling aan ’n lojale gemeenskap van lesers wat waarde heg aan uitnemendheid.

Sewe kenners, een doel

Om te verseker dat slegs die heel beste produkte bekroon word, het ons ’n gedugte paneel van sewe beoordelaars saamgestel. Hierdie spesialiste, elkeen ’n leier in hul onderskeie velde binne die skoonheids- en welstandbedryf, sal die beoordeling met die grootste sorg en integriteit hanteer. Van wetenskaplike formulering tot praktiese resultate – elke aspek sal onder die vergrootglas geplaas word.

Moenie hierdie kans misloop nie

As jy glo dat jou produk die standaard stel vir skoonheid en welstand in Suid-Afrika, is dit tyd om na vore te tree.

Inskrywings is nou oop! Klik hier vir meer besonderhede en laat jou produk die erkenning kry wat dit verdien.

Lees ook: 10 redes waarom jy rooi rose se Maart-uitgawe móét lees!

The post Is jou produk ’n rooiwarm wenner? rooi rose se skoonheids- en welstandstoekennings is hier! appeared first on rooi rose.