Gerduan Kemp het as sanger, liedjieskrywer, videograaf en fotograaf al diep spore in die Afrikaanse musiekbedryf getrap.  

Sy splinternuwe enkelsnit, “Toe jy omdraai”, is ’n eerlike blik op verwagtinge, liefde en die illusie van perfekte verhoudings, en beloof om luisteraars aan die hart te gryp.  

“Ek dink die titel vang die kern van die lied perfek vas – daardie oomblik wanneer jy besef dinge is nie soos jy gedink het dit is nie,” verduidelik Gerduan oor die liedjie wat hy saam met Emil Paul geskryf het. 

Hy het self die redigering van die musiekvideo, wat in die Witzands Aquifer-natuurreservaat verfilm is, behartig en meen die indrukwekkende ligging dien as ’n treffende visuele metafoor vir verlies – met eindelose sandduine wat die hartseer van die lirieke weerspieël. 

“Ek het juis die woestyn gekies omdat dit die liedjie se kontraste beklemtoon: die hemel en die hel, die reën en die droogte. Die woestyn en daardie gevoel van eensaamheid illustreer die reis van verlange,” vertel hy.  

Buiten vir sy eie musiekloopbaan, is Gerduan ook die kreatiewe oog agter die skerms van talle musiekvideo’s met sy eie onderneming, Gerduan Kemp Photo & Film, en het al saam met kunstenaars, soos Brendan Peyper en Karlien van Jaarsveld, gewerk.  

Hy is ook gereeld die videograaf verantwoordelik vir die video’s van rooi rose se voorblad-fotosessies.  

“Dit is vir my ongelooflik lekker om my eie musiekvideo’s te redigeer en al werk ek met my eie beeldmateriaal, is my benadering presies dieselfde as met ander kunstenaars se video’s. Dit gaan oor die emosie wat op skerm uitgebeeld moet word. Ek moet die beeldmateriaal kies om daardie emosie oor te dra.” 

Met sy talent vir storievertelling –in klank en beeld – is dit duidelik dat 2025 nog groot dinge vir hom gaan inhou.  

Hy neem ons agter die skerms van sy loopbaan.  

Jou debuutalbum Sesde sintuig is al meer as 3 miljoen keer gestroom. Wat het jy sedert daardie eerste vrystelling oor jouself as kunstenaar geleer? 

Ek sien vreeslik baie groei in my skryfvermoë en stemgebruik. In die drie jaar sedert ek my eerste album uitgereik het, het ek baie tyd bestee om my stem te verbeter en my aanslag tot liedjies skryf te vorm. Omdat ek met soveel ander kunstenaars aan hul musiekvideo’s werk, kon ek baie by hulle leer, presies sien watter aspekte van Afrikaanse musiek werk en dit in my eie musiek toepas.   

Watter kunstenaar en album het die grootste indruk op jou gemaak en hoekom? 

Elandré! Nog lank voordat ek saam met hom aan ’n musiekvideo gewerk het, het ek al na hom en sy skryfstyl opgekyk. Hy het ’n ongelooflike manier om stories in sy musiek te vertel. Toe ons aan sy musiekvideo gewerk het, was ek weereens stomgeslaan oor sy kreatiewe aanslag tot alles wat hy in sy lewe aanpak. 

Die eerste CD wat ek gehad het, was 30 + 30 Goue Sokkietreffers. Dit was ’n versameling van 60 Afrikaanse en Engelse liedjies. Ek het daardie CD elke dag geluister en ek dink dit het ’n groot rol gespeel in waar my liefde vir musiek vandaan kom. 

Jy het nou al ’n paar trefferliedjies gehad. Is daar een wat ’n spesiale plek in jou hart het? 

My liedjie “Langpad na môre” lê my baie na aan die hart. Ek het hierdie liedjie geskryf oor my besluit om Bloemfontein agter te laat en na Pretoria te verhuis. Ek het 24 jaar lank in Bloemfontein gewoon en om Pretoria toe te trek was die beste, maar tog moeilikste besluit van my lewe.   

Baie mense wil deesdae hul eie inhoud skep. Wat is jou topwenk vir iemand wat beter video’s of foto’s met hul selfoon wil neem? 

Beligting is die belangrikste aspek van enige foto of video. Jy hoef nie noodwendig duur kameras of beligting te besit om mooier foto’s en video’s te neem nie. Eenvoudige keuses maak ʼn groot verskil, soos om eerder die foto te neem voor ’n venster waar die natuurlike lig meer is, of as jy buite is, eerder in die skaduwee te staan sodat die son se lig nie harde lyne oor jou gesig maak nie. As jou beligting perfek is, kan jy enige foto of video goed laat lyk. 

 

View this post on Instagram

 

A post shared by Gerduan Kemp (@gerduan_kemp)

Wat is die vreemdste of snaaksste ding wat al tydens ’n vertoning met jou gebeur het? 

Ek het een keer ná ’n vertoning gou iets gekry om te eet. Ek was so honger dat ek dalk té entoesiasties begin eet het en verstik toe so erg dat my klankman moes inspring om my te help. Gelukkig het dit nie op die verhoog gebeur nie, want dit sou ’n baie snaakse toneel gewees het om te aanskou! 

KYK| Toe jy omdraai – Amptelike musiekvideo

Die snit is nou beskikbaar op alle digitale stromingsplatforms. Kry dit hier.

Lees ook: Jaci en JP is terug! Netflix word Semi-Soeter met nog Afrikaanse kykstof

The post Vyf-vinnige-vrae-Vrydag met Gerduan Kemp oor sy nuwe musiek appeared first on rooi rose.

In die wêreld van Suid-Afrikaanse musiek is daar sterre, en dan is daar legendes. Jannie du Toit, die geliefde en bekroonde sanger-liedjieskrywer, val ongetwyfeld in die laasgenoemde kategorie.  

Jannie, wat sy eerste professionele verhoogoptrede in 1971 gehad het en in 1979 bekendheid verwerf het, sê oor sy bydrae tot Afrikaanse musiek: “Ek sal wil hê dat mense my moet onthou as iemand wat elkeen van die liedjies met respek vir taal en musiek aangepak het – iemand wat regtig omgegee het. Ek probeer om met elke liedjie ’n positiewe bydrae tot ons taal, musiek en kultuur te lewer.” 

En inderdaad gaan sy positiewe bydrae voort met ’n reeks opwindende hoogtepunte op sy 2025-kalender.  

Jannie beplan sy vierde Kunstefees in die kleine oor die naweek van 25 en 26 Januarie in die Fairtree Atterbury-teater in samewerking met Pretoria FM. Vier produksies – waarvan nog nie een vantevore by dié teater te siene was nie – word aangebied. Dit belowe om ’n mallemeule van passievolle gehaltemusiek te wees waartydens uitstaande professionele musici die verhoog met Jannie deel – al vyf van hulle graduandi van Tukkies se musiekdepartement.  

’n Week later verskuif die toneel na die Drostdyteater op Stellenbosch met drie van Jannie se produksies wat nog nie vantevore in die Eikestad te sien was nie.  

Soos Jannie in sy musiekblyspel van 1985, Gansdans, gesing het: “Man, dit gaan ’n fenomenaalskaalse fees wees!” 

Karlien Meiring het meer oor sy opwindende 2025 gaan uitvind. 

Kunstefees in die kleine het oor die jare ’n spesiale plek in jou loopbaan gevind. Wat inspireer jou om hierdie fees so gereeld aan te bied? 

My passie vir musiek is regtig uitsonderlik groot en ek het deurgaans so ongeveer sewe of agt musiekproduksies wat verhooggereed is. Mense vra gereeld waar hulle byvoorbeeld die Koos Doep- of die Lucas Maree- of ander programme kan sien. Daarom groepeer ek van tyd tot tyd ’n paar programme in ’n klein kunstefees saam en bied dit in ’n teater aan waar daardie spesifieke produksie nog nie vantevore op die verhoog was nie.  

Die lekker ding is dat mense al hoe meer kennis van die Kunstefees in die kleine geneem het en dikwels daaroor navraag doen. Mense van die platteland kan dan vir ’n naweek in Pretoria of Stellenbosch kom kuier en sommer ’n paar produksies sien waarby hulle nie andersins sou kon uitkom nie. Hoewel ek die hoofkunstenaar van elke produksie is, is die verskeidenheid van musiek en aanbiedingswyse groot. 

Hierdie jaar bevat die twee kunstefeeste in Pretoria en Stellenbosch in totaal vyf unieke produksies, elk met ’n eie karakter. Hoe het jy besluit watter stukke om in te sluit?  

Dit was nogal maklik – my benadering was dat dit produksies moes wees wat nog nooit vantevore in die betrokke teater aangebied is nie – dus relatief onlangse produksies. Daarby moes natuurlik ook die splinternuwe een wees: De wals van die liefde.  

Margaretastraat neem ons terug na die vroeë dae van jou loopbaan. Watter herinneringe aan daardie tyd bly jou die meeste by? 

Die onbevange sit en musiek maak saam met vriende – en vreemdelinge wat later ook vriende sou word. Meeste van die tyd sommer op die vloer: Ek het nog ’n foto van Koos du Plessis wat só sit en sing in Margaretastraat. Ervare liedjieskrywers en beginners het ewe veel aandag van die gehoor gekry en almal het oor en weer gedeel, aangemoedig en raad gegee. Daar was ’n wonderlike kameraadskap wat “Liedjieaand-gangers” tot vandag toe nog saambind. 

Jy werk saam met ’n paar uitstaande musikante tydens die fees. Hoe is dit om die verhoog met soveel talent te deel? 

Hulle is almal klassiek opgeleide musici en dis net ek wat sommer net ’n musikant en sanger is!  Elkeen van hulle bring goeie vakmanskap, ervaring, aanvoeling en passie na die verhoog toe. Daar is onder hulle ’n mengsel van deurleefde ervaring en jeugdige sprankel wat elke oomblik op die verhoog vir my en die gehoor verryk. 

2025 begin op ’n hoë noot vir jou. Wat is jou hoop en drome vir die res van die jaar, persoonlik en professioneel? 

In 2025 verwesenlik ek my heel grootste droom ooit: Ek het in 1983 saam met prof Anna Neethling-Pohl ’n musiekblyspel vir ’n Tukkiegroep geskryf. Dit is op Loeloeraai, CJ Langenhoven se wetenskapsfiksie-roman, gegrond. Ek droom nog al die jare daarvan om dié produksie op ’n professionele verhoog aan te bied. Ons beplan om dit in September in die Afriforumteater aan te bied as deel van die vieringe rondom die verkryging van amptelike status vir Afrikaans in 1925. 

In Oktober beplan ek om ’n toer deur Nederland en Vlaandere te onderneem. Benewens Oppiekitaar, my eie eenmanprogram, is ek genooi om saam met die Groningse sanger, Klaas Spekken, twee groot konserte in sy provinsie aan te bied. 

Op ’n persoonlike vlak sien ek daarna uit dat my liewe vroutjie, Therina, soveel as moontlik van die reise en optredes saam met my moet geniet, terwyl ek haar ook ondersteun in haar groot taak as nasionale direkteur van die Nasionale Raad van en vir Persone met Gestremdheid. Tehuise en ander geriewe vir gestremdes het op velerlei wyse die ergste skade as gevolg van Covid-19 gelei. Sy en haar organisasie werk onophoudelik kliphard op die pad na herstel. 

Bespreek jou kaartjie vir een van Jannie se produksies by seatme.co.za. (Fairtree Atterbury-teater) of Oppiekitaar – Jannie du Toit (Drostdyteater)

Lees ook: ‘Die Byl’ groet ná ses seisoene

The post Vyf-vinnige-vrae-Vrydag met musieklegende Jannie du Toit oor sy opwindende jaar wat voorlê appeared first on rooi rose.

Veelsydigheid is Willem se middelnaam, maar musiek bly sy passie. Hierdie enkelsnit is sy eerste
vrystelling sedert sy album, ‘n Liefde Soos Die, wat net voor die Covid inperking uitgereik is waarvan die titelsnit saam met Tarryn Lamb ‘n reuse sukses was.

2010 is ‘n vars, energieke liedjie geskryf deur Willem, Hugo Ludik en Nick Jordaan. Dit is die perfekte sokkie-kuier liedjie wat nostalgies terugkyk na treffers wat teen 2010 groot was. Met treffers soos Hokaai, Stop Die Lorrie, Kaptein, Soen My Nie Meer Nie, Baby Tjoklits en meer, het 2010 ‘n koor wat jou dadelik sal wil laat opstaan en dans.

Die musiekvideo vir 2010 is vervaardig deur die talentvolle Gerduan Kemp en spog met ‘n ensemble van
bekendes insluitend sangeres – Karlien van Jaarsveld, aktrise – Reandi Grey van Diepe Waters-faam, Mej.
Supranational 2021 – Chanique Rabe asook Katja Pieters van Op My Eish. Die video is opgeneem buite Pretoria en beloof om breë glimlagte te ontlok en jou voete behoorlik te laat jeuk om te dans.

Met sy ongelooflike sukses met sy grimeerreeks, Willem Botha Beauty, het Willem die afgelope twee jaar sy fokus daarop gesit, maar nou is die tyd weer daar vir musiek, en sy aanhangers kan nie wag om die nuwe enkelsnit te hoor nie.

2010 is ‘n ligte, partytjie-liedjie en ‘n absolute moet vir enige naweek speellys. Luisteraars kan die
enkelsnit nou op alle gewilde stromingsdienste kry.

KYK: Willem Botha – 2010 (Amptelike Musiekvideo)

Lees ook: Vyf-vinnige-vrae-Vrydag met Nicole en Hennie Bosman oor ‘Wanderlus’ se jongste seisoen

The post Willem Botha se nuwe liedjie kry die partytjie aan die gang appeared first on rooi rose.

Ontmoet Chris Steyn, ‘n aspirantkunstenaar in die Suid-Afrikaanse musiekbedryf en een van die topaanspraakmakers in die treffersangkompetisie, Die Kontrak.

Chris se reis na die kollig het op laerskool in Pretoria begin, waar hy sy passie vir sang in die koor ontdek het. Toe hy hoërskool toe is, het sy droom om by die Affie-koor aan te sluit ’n werklikheid geword, wat die begin was van ’n musikale hoofstuk wat sy hoërskoolloopbaan sou definieer: “Ek het my hele hoërskoolloopbaan koor gesing, maar nooit op my eie regtig by plekke gesing of vertonings gedoen nie,” vertel hy.

Toe hy vanjaar homself op Stellenbosch vestig, het sy woonstelmaat hom oortuig om vir die derde seisoen van Die Kontrak in te skryf. “Ek wou aanvanklik nooit ingeskryf het nie. Ná my woonstelmaat my oortuig het om ’n oudisie-video op te neem, het ek gesê ek sal daaroor slaap. Toe ek die volgende oggend wakker word, het hy die video reeds opgelaai. Ek’s nou baie dankbaar daarvoor!”

Nou is Chris al deel van die talentkompetisie se toptwee deelnemers, wat ’n kans het om later vanjaar voor 75 000 Afrikaans is Groot-ondersteuners op te tree, en homself in die Afrikaanse musiekbedryf te vestig.

Foto: Hendri Viljoen

“Ek probeer om nie te ver in die toekoms in te kyk nie en vat dinge stap vir stap, maar ek sal graag een van die grootse Afrikaanse kunstenaars in die land wil wees. Ek dink dis moontlik as ek my kop daarop sit en regtig hard werk! Ek sien baie uit na die pad wat vir my voorlê,” sê Chris.

Karlien Meiring het meer oor die ‘crowd favourite’ met die goue stem gaan uitvind.

Hoe het Demi-Lee se mentorskap jou sang beïnvloed? Watter van haar lesse of raad, staan vir jou uit?

Demi is ’n wonderlike mentor, ek kon nie vir ’n beter mentor of mens gevra het om saam met my die pad te stap nie. Hoewel Demi my altyd met my liedjiekeuses en sangtegniek gehelp het, het sy nooit my manier van sing of my menswees probeer verander nie. Sy het altyd vir my gesê dat ek nie moet verander om by ander mense in te pas nie, ek moet net myself bly en my verhouding met die Here behou, en die res sal dan op sy eie tyd kom. Ek is baie lief vir haar en Bart!

 

View this post on Instagram

 

A post shared by D E M I • L E E • MOORE (@demilee.moore)

Waarmee is jy besig as jy nie jou sangtalent uitleef nie?

Ek het vir die jaar Stellenbosch toe getrek. In my vrye tyd, bestee ek gehaltetyd aan my pelle. As ek bo in Pretoria is, bestee ek tyd saam met my familie. Ek’s die oudste kind en het vier jonger susters, so my hande is redelik vol met hulle!

Kan jy vir ons vertel van ’n spesifieke optrede op Die kontrak waarop jy die trotsste is?

Elke liewe show was vir my amazing! Elke optrede en liedjie het ’n ander gevoel en bring ’n ander emosie na vore. Ek dink wel die optrede wat my vir ewig sal by bly, was toe ek die voorreg gehad het om die verhoog met Demi te kon deel, dit was regtig die spesiaalste optrede van my tyd op die program!

 

View this post on Instagram

 

A post shared by Chris Steyn. (@chris.steyn_)

Speel jou familie en vriende ’n belangrike rol in jou musiekloopbaan?

My familie ondersteun my in alles wat ek doen, hulle was tydens Die Kontrak altyd bereid om my te help as ek vinnig iets nodig gehad of iets vir ’n optrede vergeet het. Hulle verstaan soms maar min van die tegniese aspekte, maar probeer steeds hul bes om my te help. My vriende is ook vir my baie spesiaal, hulle is deel van my familie.

Saam met wie sal jy die graagste ’n duet wil sing?

Ek wil baie graag eendag saam Zach Bryan ’n duet sing. Ek weet dis ’n baie groot droom, maar as ’n mens nie droom nie, is daar nie iets om voor te werk nie.

‘Die Kontrak’ word op Sondae om 18:00 op eExtra (Openview kanaal 105 & DStv-kanaal 195) uitgesaai. Of kyk saam op die EVOD-app. 

Lees ook: Arnold Vosloo in nuwe Deon Meyer-dramareeks te sien

The post Vyf-vinnige-vrae-Vrydag met Chris Steyn van ‘Die Kontrak’ appeared first on rooi rose.

Oor die jare het Wynand Strydom, die talentvolle sanger en liedjieskrywer, afkomstig van Pretoria, se kenmerkende styl en gevoelvolle musiek vir hom ’n prominente posisie in die Afrikaanse musiekbedryf besorg.

Sy jongste enkelsnit, “Terug Na Jou,” belowe om ’n blywende indruk op luisteraars te maak. Wynand se aangrypende stem en ontroerende musiek neem luisteraars op ’n emosionele reis, terwyl hy sing oor die verlange na die plek waar sy hart werklik tuis is. Hierdie hartroerende liedjie, deurweef met sy unieke styl en stem, skep ’n emosionele band wat dit werklik onvergeetlik maak.

Sy ander onlangse vrystelling van “Duiwel Op Jou Skouer,” gaan oor iemand wat ’n leeftyd van lesse opgedoen het. Die lied beklemtoon dat almal foute maak, maar jy kan juis uit hierdie foute leer en groei. “Duiwel Op Jou Skouer” vertel ’n kragtige storie ervarings gedeel word om ander te inspireer.

Weereens kry Wynand dit reg om met sy musiek, unieke klank en opregtheid gehore se harte aan te raak.

Karlien Meiring het meer oor dié geliefde sanger se nuwe musiek gaan uitvind.

Hoe het jou klank deur die jare ontwikkel?

My klank oor die afgelope jare het maar redelik konstant gebly as gevolg van die genre van musiek wat ek maak. Ek het wel die afgelope paar jaar meer aan verwerkings aandag gegee en om ’n definitiewe verbintenis tussen ballades en meer kommersiële musiek te maak.

Foto: Macayla Smit / CoolerBox Brothers

Wat kan luisteraars van jou nuwe liedjies verwag? Is daar spesifieke musikale invloede of genres wat die liedjies geïnspireer het?

Ek is soos altyd gesteld op die waarde van my lirieke. Die algemene gevoel van die liedjies is dat dit nog meer liriekgedrewe as ooit is, hoewel daar ook ’n meer kommersiële aanslag tot die liedjies is. Ek skryf en sing musiek wat vir my betekenis dra, ongeag of mense daarvan gaan hou of nie.

Kan jy ons deur die kreatiewe proses vir jou nuwe liedjies lei?

Die kreatiewe proses is altyd baie lekker. Van die skryf van die liedjie tot die verwerking en opname. Dit is belangrik dat elke aspek tyd en respek verdien. Die een kan nie sonder die ander een nie. Dit verg deurlopende gesprekke en die deel van idees om uiteindelik ’n produk te kan lewer waarmee ek gelukkig is.

Hoe hoop jy sal jou aanhangers op die nuwe liedjies reageer?

Vir my is dit ’n inspirasie-liedjies. My begeerte is dat almal wat dit luister sal uitgaan en mense se lewe sal raak. Ons word deur ons eie seerkry bemagtig om ’n helpende hand te bied, aangesien baie mense hulp nodig het en ons die vermoë en krag het om hul lewe positief te beïnvloed.

Wie is jou droomkunstenaar om ’n duet mee te sing?

Ek sou graag saam met Koos du Plessis wou sing, maar ek is op my gelukkigste saam met my vrou, Chereé, op die verhoog!

Lees ook: Vyf-vinnige-vrae-Vrydag met Simoné Pretorius oor Hartklop

The post Vyf-vinnige-vrae-Vrydag met Wynand Strydom oor sy jongste enkelsnitte appeared first on rooi rose.

Hulle skep ’n lied wat die harte van Afrikaanse musiekliefhebbers diep sal raak, net soos die ongerepte skoonheid van die woestyn.

Die ontmoeting van Jannie Moolman en Helené Bester se stemme in “Nag in die Namib” is ’n moderne Afrikaanse folk-liedjie. Jannie het in samewerking met Dewald Gouws die lied geskryf wat oor die onbeskryflike skoonheid van die Namib handel, en hoe dit mense van die grootheid van God bewus maak.

“Tydens ’n tyd van afsondering het ons hierdie lied geskryf. Dit is gegrond op ’n klein gediggie wat ek in die jare negentig by oom Arend in Windhoek gekry het,” deel Jannie.

“Ek het dit al die jare by my gehou en myself beloof dat ek eendag ’n lied daaroor sal maak. Nou het ons dit uiteindelik gedoen.”

Volgens die sanger het hierdie lied ’n boodskap van hoop en beklemtoon dit die verbintenis tussen mense en natuur.

“Ons stemme klink harmonieus en die liedjie is positief en inspirerend. Dit is iets nuuts en unieks in Afrikaans,” voeg Helené by.

Die musikante is al ’n geruime tyd bekend met mekaar, maar die geleentheid om saam te sing het eers ontstaan toe Kobie Koen van Vonk Musiek voorstel dat hulle ’n duet moet opneem. “Hy het gesê ons stemme pas goed bymekaar en ek het toe ingestem om hierdie lied — wat vir Jannie na aan die hart lê — saam met hom op te neem,” sê sy.

Die musiekvideo wys die grootheid asook die stilte van die Namib-woestyn saam met Helené en Jannie se passievolle optrede. Met Jannie se opera-agtergrond en Helené se klassieke agtergrond het “Nag in die Namib” ’n ongelooflike balans van vokale talent.

Karlien Meiring het meer oor hierdie geliefde sangers se samewerking gaan uitvind.

Vertel ons meer van die kreatiewe proses agter “Nag in die Namib”? Hoe het julle jul individuele style bymekaar gebring?

Jannie: Ek en Dewald Gouws het al twee in Hartbeespoort gebly. Tydens Covid het ons saam aan ’n paar liedjies begin skryf. Ons het baie oggende saam koffie gedrink en dan het hy sy kitaar saamgebring. So het daar ’n paar liedjies uitgekom wat regtig vir ons ‘n inspirasie gedurende daardie moeilike tyd was. Die lied “Hou aan met glo” was een so ’n lied en was al vir ’n toekenning of twee benoem.

Helené: Ons het min of meer geweet hoe die ander een klink, maar nie geweet hoe die eindproduk van ons stemme saam sou klink nie. Dis eers toe ons in die ateljee saam gesing het, wat ons besef het ons stemme pas mooi saam. Jannie is ’n groot grapjas en ek dink ek het ook ’n lekker humorsin. So, dit werk op die verhoog. Niks is aangeplak nie, net natuurlik. Ek kan steeds nie glo Jannie het ingestem om saam met my te sing nie. Selfs my man sê ek kan baie bevoorreg voel!

Wat was die lonendste aspek daarvan om saam aan hierdie projek te werk?

Helené: Die eindproduk van die drie liedjies wat ons opgeneem het. Dit klink vir ons só mooi! Dis werklik iets waarmee ons onsself kan bemark en op trots kan wees. Natuurlik, ook die feit dat ons regtig lekker saam werk, ons lag baie saam.

Jannie: Ek dink die feit dat ons gemaklik saam kan werk, beteken vir my baie. ’n Mens kan meer kreatief op die verhoog wees as jy gemaklik voel met die persoon wat langs jou staan.

Watter boodskap of emosies hoop julle om deur hierdie lied en musiekvideo aan aanhangers oor te dra?

Helené: Net die mooiheid van die melodie en Afrikaanse lirieke, wat ’n land soos Namibië besing.

Jannie: Ek dink die liedjie moet vir mense ’n oomblik gee om te kan reflekteer. Om stil te word in jouself, en die skoonheid en almag van God se skepping te kan waardeer.

Was daar enige spesifieke invloede of verwysings wat die musiekvideo geïnspireer het?

Jannie: Dat lente wakker geword het. Ek hoop dit weerspieël die liedjie se lirieke; die rustigheid en skoonheid van die natuur in Namibië wanneer die skemer kom.

Hoe dink julle beïnvloed die kombinasie van jul stemme die emosionele impak van die liedjie?

Helené: Die lied maak my hartseer by tye. Ek dra dit op aan ’n vriendin Cecilia Roberts wat laas jaar in ’n motorongeluk oorlede is, net toe ons die lied klaar opgeneem het. Die laaste woorde van “Nag in die Namib” lui: “Dan word die hemel ’n straat vol ligte en die groot stilte word stil en die ewigheid van Sy almag met verlange gevul.” Ek glo ons stemme is warm genoeg om daardie belangrike boodskap oor te dra én vrede te bring.

KYK: Die musiekvideo van Nag In Die Namib

Lees ook: Vyf-vinnige-vrae-Vrydag met Willem Botha — oor sy nuwe rol in Joseph and the Amazing Technicolor Dreamcoat

The post Vyf-vinnige-vrae-Vrydag met Helené Bester en Jannie Moolman – oor hul nuwe duet, “Nag in die Namib” appeared first on rooi rose.

Nuwe insig kom deur waarneming en nie met redenasies nie. Valiant Swart het deur die jare juis só tot ’n nuwe verstaan van die lewe gekom. Met ’n loopbaan wat strek vanaf 1988 en talle kilometers op die pad, het Valiant Swart al die kante van die lewe gesien. Sy nuwe album, Rondry, Fliek en die Buitelewe, is ’n versameling karaktersketse wat met die strewe na vryheid deurspek is.

Die inspirasie vir die album is jare se waarneming van mense en plekke. Hy verduidelik dat dié versameling die lewe van alle kante benader. Party temas raak aan die strewe na vryheid, geluk en vervulling, terwyl ander die moeiliker tye in die lewe ondersoek.

Met Rondry, Fliek en die Buitelewe bly Valiant (wat bekend is vir sy rock-, country- en bluesmusiek) getrou aan sy musiekstyl en voeg hy nuwe liedere tot sy repertoire wat tuis sal wees op die langpad, sowel as om ’n kampvuur.

Valiant, wat deur die jare groot bekendheid verwerf het met liedjies soos “Eyeshadow”, “Kleinmond koebaai”, “Jakarandastrate” en “Liefde by die dam” verduidelik dat sy grootste inspirasie vir musiek van sy pa kom. Sy liefde vir lirieke is te danke aan sy ma wat by hom ’n liefde vir die geskrewe woord gekweek het. Dis egter sy vrou, Lanelle, wat hom daagliks aanspoor om na meer as 30 jaar steeds doen waarvoor hy lief is.

Vroeër in sy lewe, terwyl hy in Sunnyside, Pretoria, gewoon het, het Valiant se paaie met dié van Koos Kombuis gekruis. Hy vertel dat hy in daardie stadium reeds ’n groot aanhanger van Koos se musiek en gedigte was.

Koos het as Valiant se mentor opgetree, hom onder sy vlerk geneem en as sy kitaarspeler aangestel.

Met die verloop van tyd het Valiant sy eie stem begin vind en na afloop van sy diensplig het hy met ’n hele arsenaal nuwe liedjies terug Stellenbosch toe gegaan. Saam met ’n skoolmaat en ’n paar musiekvriende het hulle die Valiant Swart Band gestig. Dit was die begin van ’n loopbaan wat vir Valiant om Suid-Afrika heen sou neem.

Foto: Andree Frates Photography

Karlien Meiring het meer oor sy jongste album gaan uitvind.

Hoe het jou klank sedert jou laaste album ontwikkel?

Die laaste album, Nagrit, is sewe jaar gelede uitgereik. Ek het nie juis veel verander aan die klank nie. Met die voorafgaande 17 albums is daar ’n spesifieke klank gevestig wat vir my styl werk; so ’n blues-country-rock-gevoel.

Die musiek kan vanuit ’n musikale oogpunt as bittersoet beskryf word, maar steeds opgeruimd. Die musiek is vrolik, maar met tye melankolies – eg aan goeie rock-en-roll- musiek.

Wat is die storie agter die album se titel?

Toe ek ’n laitie was, het ons gereeld tydens skoolvakansies by my ouma en oupa op Beaufort-Wes gaan kuier. My tannies (destyds tieners en jong vroue) het altyd daardie fotoverhaalboekies gekoop wat ’n mens in die vroeë jare sewentig gekry het – dit was nog voor televisie – en wanneer ek verveeld was, het ek dan maar die boekies deurgelees. Die laaste klompie bladsye was die opwindendste: die Hoekie vir Eensames (basies die Tinder van destyds). Daar was altyd ’n beehive-aster van iewers op ’n saai plattelandse dorp, uitgehonger vir geselskap, met ’n lysie van kenmerke waaroor ’n geskikte manlike kandidaat sou moes beskik. Dit het my destyds altyd opgeval hoe baie van die vroue hul gunsteling-tydverdryf as “rondry, fliek, en die buitelewe” aangedui het. Die frase het op die een of ander manier in my kop vasgesteek.

Ek wonder of een van my tannies ooit die pen opgeneem het …

Wat is jou gunstelingsnit op die nuwe album?

Sjoe, dis soos om tussen ’n mens se kinders te moet kies. Ek is mal oor elkeen van die liedjies – elkeen het sy plek en funksie op die album. Die afsonderlike musikale elemente en narratiewe vul mekaar aan om ’n geheelbeeld te vorm.

Kan jy ons deur die kreatiewe proses vir hierdie album lei?

Dit begin altyd by ’n idee vir ’n liriek en ’n melodie – en dan begin die foltering! Dit neem soms maande, selfs jare, om onverwags op ’n frase of melodie af te kom wat ’n liedjie laat ontsluit. Wanneer jy die melodie en die “storie” en die “prentjie” het, begin die uitbou van die instrumentasie – die eintlike musikale komponent – totdat jy ’n sintese tussen al die elemente bereik – en voila!

Klink maklik, nè? Wel, dis soms louter hel.

Wie is jou droomkunstenaar om ’n duet mee te sing?

Hmm … wie weet? Miskien wag daar ’n verrassing net om die draai …

Rondry, fliek en die buitelewe is op alle digitale platforms beskikbaar.

Lees ook: Mzansi-jeugkoor maak geskiedenis op America’s Got Talent

The post Vyf-vinnige-vrae-Vrydag met Valiant Swart – oor sy nuwe album appeared first on rooi rose.

Dit is vir Refentse steeds moeilik om te glo dat hy in so ’n kort rukkie soveel sukses bereik het. Terwyl hy in 2015 met sy kitaar langs die straat gesit en “Lisa se klavier” gespeel en gesing het, het Cecilia (Kleintjie) Marchionna hom met ’n selfoon afgeneem. Sy het die video op facebook gedeel en dit is uiteindelik meer as 120 000 keer gekyk. Hy bly nou by Kleintjie, sy tweede “ma”, en sy help hom om al sy verpligtinge na te kom.

Buiten Afrikaanse musiek hou Refentse ook van kwaito en Zoeloe-gospel. En hy wil deur musiek die verskillende Suid-Afrikaanse kulture nader aan mekaar bring.

Is jou huistaal Afrikaans?

Nee, Afrikaans is nie my huistaal nie, maar ek was in ’n Afrikaanse skool.

Jou CD My hart bly in ’n taal bring hulde aan Afrikaanse musiek en die musiek van sterre soos Koos Kombuis en Laurika Rauch. Hoe lank klop jou hart al warm vir Afrikaanse musiek?

As kind het my ouers vir my Afrikaanse musiek gespeel om my te leer Afrikaans praat, en ek het ’n liefde vir die taal en musiek ontwikkel.

“Sonvanger” en “Sally Williams Nougat” pas veral baie lekker by jou stem. Is daar nog ander van die liedjies wat vir jou spesiaal is en waarom?

Ek hou van al die liedjies op die CD omdat ek met dié liedjies grootgeword het, al is hulle nie regtig in my era gespeel nie. Dit is musiek wat my gehelp het om my Afrikaans te verbeter. Al die liedjies het vir my ’n besondere betekenis.

Jy het twee van die liedjies geskryf, “Baby wat eet ons vanaand?” en die satiriese “Oom Faan se plaas” …

“Baby wat eet ons vanaand?” was die eerste liedjie wat ek geskryf het, en toe kort daarna “Oom Faan se plaas”. Ek hou van die skryfproses en leer baie namate ek vorder.

Wanneer het jy vir die eerste keer geweet jy wil in Afrikaans sing?

Toe ek verlede jaar by die KKNK vir die eerste keer op die verhoog klim en die gehoor se reaksie sien. (Refentse het die verhoog met Karen Zoid gedeel.)

Jy het nou reeds platinumstatus bereik, maar wat doen jy nog, behalwe sing?

Alles wat my moontlik besig kan hou. Ek is mal oor die buitelewe en die natuur. (Hy is net beskeie. Hy is op die oomblik besig met ’n regsgraad aan die Noordwes-Universiteit.)

Waar is jy gebore, waar het jy grootgeword en waar bly jy nou?

Ek is in Vereeniging gebore, het daar grootgeword en bly steeds in Vereeniging. Ek is nie van plan om te trek nie. Ek is te geheg aan my mense – my ouers, tannie Kleintjie en al my vriende.

Wat onthou jy as die lekkerste gebeure van jou kinderdae?

Die skoolrevue waarin ek gedans en gesing het. Ek het ’n spook in my groentjiekonsert gespeel en in die laerskool was ek Shaka in ons toneelstuk Shaka Zoeloe.

En die slegste?

Toe ek my ouma in 2013 aan kanker verloor het.

Wat doen jy vir ontspanning?

Lees gedigte, of speel sokker of rugby saam met my pelle. Ek geniet die natuurskoon, veral as ek op my motorfiets is omdat ek dan so naby aan alles voel.

Kyk hier na die musiekvideo van Refentse se liedjie “Vuil Vanderbijl”

The post Refentse se wegholsukses appeared first on rooi rose.

Steve en Janine se sprokie het in 2014 van voor af begin. Ná agt maande saam kon hy eerlik sê hulle pas bymekaar. In ons in-diepte onderhoud met hom in die Februarie 2014-uitgawe van rooi rose het hy aan joernalis Ilse Salzwedel gesê:

“Soos die stukke van ’n ou, geliefde puzzle wat jy weer by jou ouma se huis ontdek het. Al die stukke is nie meer daar nie, en almal het dalk nie meer duidelike prentjies op nie, maar dit pas. Soos ’n storie in ’n sprokiesboek. Die enigste ding wat mense van mekaar weghou, is dikwels die liefde. Ja, die engele het ons nogal gekortwiek.”

Lees die volledige onderhoud hier

Steve en Janine Hofmeyr. Foto: Facebook (Steve Hofmeyr)

Steve het Maandagoggend nadat Romy-Lee skuins na 8:00 gebore is, die nuus op Twitter bevestig:

The post Steve en Janine Hofmeyr se baba gebore appeared first on rooi rose.

*Lees ons volledige onderhoud met Brendan Peyper in die Julie 2017-uitgawe van rooi rose.

Agter die Vrystaatse boerseun

• Brendan is ’n tipiese Suid-Afrikaner as dit by gunstelingkos kom, en sê hy hou van vleis. “Braaivleis is my gunstelingkos, en Cola Tonic en limonade is my gunstelingdrankie.” Hy kook nie, maar vertel dat hy ’n uitstekende ontbyt kan maak. “En goeie kitspoeding!”

• Al het die Mambaonline-webwerf hom in 2015 as Suid-Afrika se sexyste man aangewys, beskou hy hom glad nie as ’n sekssimbool nie. Maar hy is gemaklik met sy lyf en wys gereeld sy gespierde bolyf op foto’s. Oefen het ’n deel van sy daaglikse lewe geword, en wanneer hy reis vir optredes, word ’n stel gewigte agterop sy toerbakkie gelaai. Hy is baie gesondheidsbewus, en probeer gemorskos vermy.”

• Hy wil nie verklap of daar ’n spesiale iemand in sy lewe is nie, maar sy ideale romantiese afspraak pas by sy liefde vir die plaas en die buitelug. “Agterop ’n bakkie, met kussings en komberse, onder die sterre.” Sy idee van die perfekte vakansie is ’n seevakansie by die ATKV Hartenbos. “Of iewers in die Bosveld in ’n woonwa of chalet.”

• Het hy ’n vaste roetine, of vat hy die lewe soos dit kom? “Ek is baie impulsief, so ek lewe soos dit kom.”

• Brendan fliek graag, en is veral dol op komedies. “My gunstelingakteur is Scott Eastwood, en Julianne Hough is ’n puik aktrise.”

• Vra jy hom wie hy bewonder, kom die antwoord sonder aarseling: “Elvis Blue, al sedert sy Idols-dae. Hy is baie talentvol.” Die Amerikaanse musikant Chris Daughtry is sy rolmodel. En een van die verrassendste feite oor Brendan? Dat hy van boeremusiek hou. Die Teelepeltjies en die Klipwerf Boereorkes is sy gunstelinge.

Kyk hier na die musiekvideo van Brendan se Twee is beter as een

The post Rooiwarm man: Brendan Peyper appeared first on rooi rose.

Jo Black (35) is om die minste te sê fassinerend. ’n Mens vergaap jou aan die baie lang, maar baie netjiese (en sysagte!) baard en arms vol tatoeëermerke, maar as hy eers oor sy lewe begin gesels, besef jy gou: dis ’n besondere mens dié. Hy het vroeër vanjaar (2017) sy eerste album bekend gestel wat pas goue status bereik het, maar jongmense landswyd ken hom reeds die afgelope paar jaar as die man agter die BTG-projek. BTG staan vir Be That Guy/Girl, en op besoeke aan skole gesels Jo op sy inspirerende manier met tieners oor geloof, naasteliefde en die uitdagings van die daaglikse lewe. Tussendeur sing hy ’n paar liedjies in sy kenmerkende diep stem.

Hy is passievol oor dié bediening onder tieners. “Ek wil hulle inspireer om mense te wees wat ander soos iemand laat voel.”

Wanneer hy nie met tieners besig is nie, lei hy die lofprysingsgroep by sy kerk, en tussendeur sing hy in restaurante en kuierplekke. Dis juis by een van hierdie optredes dat Johan Vorster van Inhoud Huis (wat onder andere ook van Bok van Blerk en Lianie May sterre gemaak het) hom gehoor en besef het: hier is ’n talent wat Afrikaanse gehore sal betower. En nie net met sy stem nie …

Jou regte van is nie Black nie. Vertel ons meer van jouself?

Jo Black is ’n verhoognaam. Ek is eintlik ’n Engelbrecht wat in Pretoria-Noord grootgeword het. Ek het ná matriek begin werk en toe iets van alles gedoen. Ek was twee jaar lank chauffeur en lyfwag by die Libanese ambassade in Pretoria, en daarna is ek oorsee, waar ek ’n restaurant en later selfs ’n nagklub by ’n Sheraton-hotel in die Midde-Ooste bestuur het. In Bahrein en Katar het ek in die boubedryf gewerk en baie geleer – van die bou van brûe en hospitale tot paaie en huise. Terug in Suid-Afrika het ek my eie konstruksiemaatskappy gehad. Dit was taamlik suksesvol, maar ek het bly dink daar moet meer in die lewe wees as hierdie gejaag na wind, lang dae, en ure in die stadsverkeer. Ek het veels te min van my gesin gesien. Dit was nie ’n volhoubare leefwyse nie. Ek wou nie net werk om rekeninge te betaal nie, en verpes dit om in ’n boksie geplaas te word. My vrou, Debbie, is ’n kunsterapeut, en ons dogtertjies is vyf en agt jaar oud.

Hoe het Be That Guy ontstaan?

My boesemvriend op skool, Vaughan French, is in ons matriekjaar in ’n fratsongeluk by ons huis dood. Hy was ’n inspirasie, my Jonathan. Sy dood het my lewe en geloof tot in die fondamente geskud. Ek was nog altyd baie lief vir mense, maar ná daardie dag glad nie vir myself nie. Ek het op die verkeerde maniere aan die herinneringe probeer ontsnap. Toe, op 25, woon ek ’n mannenaweek by en hoor die storie van die verlore seun. Ek wou daardie seun wees. Meer nog: ek wou ’n Vaughan vir ander mense word. ’n Mens is geskape om sy hart te deel. Jy het nie net ’n Christelike plig teenoor jou naaste nie, maar ook ’n humanitêre een. Ek wou tieners bemagtig om “that guy of girl” vir iemand anders te wees soos wat Vaughan dit vir my was. Ek was al by meer as 170 skole, en skat ek het al met 130 000 kinders gesels.

Waaroor praat jy met julle?

Oor everyday heroes – mense wat elke dag ’n verskil maak. Ek leer hulle om die verskil te wees wat daar in hul wêreld moet kom. As jy nie vriendelikheid om jou sien nie, is dit dalk omdat jy ook nie vriendelik is nie. Ons land het hoop nodig en ons moet die hoop wees. Dit vat net een vonkie om ’n groot veldbrand aan die gang te kry.

Waarom dink jy vereenselwig tieners hulle met jou?

My verlede maak van my die mens wat ek vandag is, en daarom kan ek my vereenselwig met mense wat swaarkry of teen iets in hul lewe stry.

Jy kom uit ’n hegte gesin …

Ja, ek het twee broers en ’n suster. My oupa was ’n wonderlike man en hy het ’n groot rol in ons lewe gespeel. Sy kinders en kleinkinders is die heel belangrikste deel van sy lewe. Ons het almal gedurig daar gekuier. Hy is in Julie 2015 dood. Op 87 …

Daar is ’n storie oor jou oupa en jou baard …

Ek het my baard ná skool begin groei. Die dag toe kanker by Oupa gediagnoseer is, het ek en hy besluit hy moet syne ook laat groei om hom te herinner om teen die siekte te bly veg. Hy is in 2015 dood, die jaar toe ek die ambassadeur was vir Movember, ’n veldtog om mans oor kanker in te lig. Ek kan nie regtig vir jou sê hoekom ek so lief vir my baard is nie. Ek voel net gemaklik daarmee.

Van wanneer af sing jy?

Ek het op vyftien my eerste kitaar gekoop. Teen R126 – ek wonder steeds oor daardie vreemde bedrag … Ek het myself leer speel. Ek sing in kuierplekke en het ook ’n groep van negentien musikante by verskillende gemeentes in lofprysing en aanbiddingsdienste gelei. Maar deesdae doen ek net lofprysing in my eie gemeente, en ek wil nie eens sê in watter kerk nie. Daar is ek net ’n gemeentelid, nie Jo Black die sanger nie. Musiek is my hart, net met ’n melodie by.

Die video van jou liedjie “Skepe” is in die eerste paar dae ná die bekendstelling byna ’n miljoen keer gekyk. Hoe voel jy oor jou nuwe loopbaan?

Ek is nog ’n bietjie verstom oor die geleentheid om ’n album te kon maak! Ek en my vrou het lank nagedink en gebid. Oor wat die doel hiervan is. Want ek glo ’n mens moet ’n doel hê met alles wat jy aanpak. Jy moet jou hart deel en ’n verskil maak. Dit gaan nie vir my oor my eie sukses nie. Jy sal my sukses sien in hoe dit met die mense om my gaan, met my vriende en aanhangers.

Kyk hier na die musiekvideo van “Skepe”:

Al jou tatoeëermerke sorg nogal vir ’n bedrieglike voorkoms …

Ek hou daarvan om stereotipes nek om te draai. Mense verwag nie dat iemand wat so lyk ’n boodskap van hoop en liefde sal bring nie. Maar elkeen van my tatoeëermerke het ’n spesiale betekenis, of herinner my aan iemand spesiaal – die eerste vers van “Amazing Grace”, want ek wil myself herinner aan onverdiende genade; my dogters se name, met ’n prentjie vir elkeen: ’n hibiskus en ’n suikerbekkie. Ek het ook ’n portret van Oupa op my boarm laat aanbring.

Hoeveel het jy?

Baie! Maar ook nie te veel nie. (Hy lag.) Ek wou al van kleins af tatoeëermerke hê, maar het nog altyd gesê dit moet iets wees waarna ’n mens nog kan kyk as jy oud is. Ek sê altyd jou liggaam is die lewe se CV.

Het jy ’n boodskap vir ons lesers?

Wees lief vir jouself. Jy is uniek en dis genoeg. Hou op om jou met ander mense te vergelyk. Niemand sien ooit jou hart nie – tog is dit die enigste ding wat jy ooit werklik met mense deel.

Die man agter die Baard

Jo het ’n besondere mannebediening. Hy braai elke Vrydagoggend vyfuur vleis vir enigiets tussen twintig en veertig manne by ’n winkelsentrum in Montana, Pretoria. “Ek doen die braaiwerk en dan gesels ons sommer net.” Daar geld net twee reëls: niemand mag sê watse werk hy doen nie. “En jy praat nie op die braaier se hand nie,” skerts Jo. Die werkstorie is sy manier om die mans te laat besef dat wie jy is belangriker is as wat jy al bereik het. “Mans is mos vreemde wesens – hulle praat nie oor goed wat pla nie. Maar ’n braaivleisvuur breek die ys. Ons praat oor pa-wees, man-wees, oor daar-wees vir jou gesin, en meer nog, oor die noodsaaklikheid om teenwoordig te wees wanneer jy saam met hulle is.”
•
Hy glo dis belangrik dat mans praat oor hoe hulle hul-self sien, en hoop die gesprekke maak die mans meer bewus van die mense om hulle. “Almal is besig met een of ander stryd in sy lewe – so, wees daardie ou wat help waar jy kan.”
•
Jo glo ’n mens moet die lofbetuigings wat hopelik op jou begrafnis gehoor sal word, nou reeds uitleef. “Mense onthou jou vir respek, integriteit, lojaliteit en eerlikheid.”

The post Jo Black se debuutalbum bereik goue status appeared first on rooi rose.

Die ontslape Petersen is in 2016 tydens ’n stampvol konsert in Kaapstad vereer deur kunstenaars en familie. Dit was ’n roerende herdenking van sy ontydige dood op 16 Desember 2006. In opdrag van kykNET is dié konsert verfilm, met Emo Adams wat vir die eerste keer met groot sukses ook die vervaardigersrol gespeel het. Die program sluit onderhoude in met vriende, familie en kollegas wat baie na aan Taliep was.

Lees ook ons onderhoud met Taliep se dogter, Jawaahier Petersen hier

Volgens Emo was dit die mees emosionele ervaring van sy lewe en ook die uitdagendste, maar daarmee saam een van die grootste hoogtepunte van sy loopbaan: “Dis onmoontlik om na dié program te kyk en nie te besef watter amazing mens Taliep Petersen was nie. If this is the last work I ever do, I will be happy.”

Sedertdien is sowel Adams as kykNET oorval met versoeke om ’n heruitsending.

As jy dié huldeblyk misgeloop het, onthou om op kykNET NOU! (DStv-kanaal 146) in te skakel:

• Vrydag 19 Mei 21:00
• Sondag 21 Mei 19:30

Die huldeblyk is ook beskikbaar op iTunes met ’n spesiale bonus-liedjie.

Gesels saam op Sosisale Media en gebruik die hutsmerk #TaliepTribute

Inligting verskaf deur kykNET

The post Huldeblyk aan Taliep Petersen appeared first on rooi rose.

Die gewilde Afrikaanse sangeres, Karlien van Jaarsveld, het vanoggend (9 Mei 2017) die nuus met haar Instagram-volgelinge gedeel dat ’n baba vir haar en Joe op pad is. Hulle hou tans vakansie in Italië.

Sy het gesê die swangerskap is nog “early days” maar dat sy baie opgewonde is.

Karlien en Joe is in Maart vanjaar stil-stil getroud. Lees meer hier en kyk ook na haar pragtige trourok

Karlien en haar eks-man, Derick Hougaard, het ook saam tweelingseuntjies. Lees meer hier

Op nog ’n Instagram-inskrywing wat Karlien vroeër die week vanuit Capri, Italië gedeel het, haal sy ’n liedjie van Koos Kombuis aan wat haar liefde vir Joe bevestig:

The post Karlien van Jaarsveld is swanger appeared first on rooi rose.

Jou nuwe album, Jy en Ek en Ek en Jy, is jou eerste Afrikaanse album in agt jaar. Vertel ons meer daarvan.

Sedert 2009 was ek druk besig met die aanpassing van ander kunstenaars se werk: die toonsetting en opname van Ingrid Jonker se gedigte, die toonseting en opname van Daniella Deysel se gedigte, die droomland-projek saam met die Drakensbergse Seunskoor en selfs ’n Boo! album wat ek in Europa opgeneem het. Hoewel heelwat van hierdie werk Afrikaans was, was dit nie werk wat ek ook self geskryf het nie. Nou het ek, na 8 jaar, uiteindelik weer daarby uitgekom.

Jy het al die liedjies self geskryf en gekomponeer. Vertel ons van die proses.

Ja. Ek het die tekste in vrye vers geskryf in ’n baie geïnspireerde fase, daardie tye wanneer werk met ’n vloed uit jou uit borrel. Dit was reeds in 2012. Dit sou 5 jaar duur voor ek my hand aan die toonsettings begin waag het. Die toonsetting van vrye vers verg ’n besondere aanpak, omdat die teks nie in gewone ritmiese rympatrone voorkom nie. Die geheim is frasering. Met frasering kan ’n mens enige teks by enige musiek laat pas. Hoe sal ek dit nou aan ’n leek verduidelik? Kom ons stel dit so: jy het ’n klomp vierkante wat jy in sirkelvormige gaatjies moet pas. Dan kry jy ’n masjientjie wat al die vierkantige blokkies in klei laat verander, sodat jy alles behou van wat hulle is, maar hulle kan vervorm om by die gaatjies in te pas. Daardie masjientjie se naam is frasering en ek het as my geboortegeskenk een van die beste modelle gekry!

Hoe beskou jy die liefde?

Vir my is liefde lewe. Om die liefde te hê is om die lewe te hê, om lief te wees is om die lewe te gun.

Jy sê die skryfproses het baie eerlikheid van jou geverg. Hoe so?

Daar is iets uiters ontwapenend aan die blootlegging van jou diepste gevoelens oor iets soos jou liefdesake, en dit boonop vir publieke uiting, soos deur ’n lied of gedig. Want in die liefde is ons maar redelik blootgestel. Die liefde kan nie striemend gedy nie – deur mure, grense en pantser kan die kwade nie na binne nie, maar deur dieselfde versperrings kan die liefde ook nie na buite nie. Die afbreek van hierdie versperrings verg maar ’n bietjie geloof in die hoër beskerming van die liefde self.

Jy praat in die album oor God, jou beminde en jou hartlandskap. Ons wil graag weet hoe jy jou liefde vir elkeen sal beskryf?

Sjoe, dis diep vrae … dankie! My liefde vir God sou ek beskryf in terme van dankbaarheid. My liefde vir my beminde sou ek beskryf in terme van diens. Vir my hartlandskap het ek nie ’n bepaalde liefde nie, dit is my liefde.

Jy het ’n konsertuitvoering van die Indiese kunstenaar Shujaat Husein Khan bygewoon en iets wonderlik ervaar. Vertel ons meer daarvan.

Dit was tradisionele, klassieke Indiese musiek. Die Indiërs gebruik vreeslik baie note (hulle sing selfs note wat nie in ons noteskat bestaan nie) en komplekse ritmes. En natuurlk het die man in Hindi gesing, waarvan ek nie ’n enkele woord kon verstaan nie. Maar ek was meegevoer en diep geïnspireerd. Op pad terug, in die kar, het ek vir my vriendin, ’n Indiër, vertel waaroor ek gedink het die liede gaan. Sy was stom van verbasing want blykbaar was dit presies waaroor dit gegaan het. Dit was vir my nogal ’n onthulling, om die tekste so, deur die musiek en die gevoel, te kan vergestalt. Daarna het ek huis toe gegaan en die tekste vir hierdie album het uit my uitgeval soos ’n vrag waatlemoene agteruit ’n wegtrekkende trok met ’n oop deur.

Dink jy mense vergeet soms hoe om werklik lief te hê?

Nee, ek dink nie so nie. As jy dit eers ken sal jy dit nie verloor nie. Sommige mense het dit ongelukkig nog nie beleef nie, en ken dit dus nie. Daar is baie dinge wat ’n mens uit liefde kan doen, maar uiteindelik dink ek die liefde self is nie ’n daad nie, dis ’n toestand. Ek glo ’n mens doen nie liefde nie, jy wees dit. Maar ek sal myself ook nie aanmatig om vir ander voor te skryf nie, dis maar hoe ek dit sien en ek dink elke mens het maar sy of haar siening hieroor.

Die album is ’n hartsbelydenis. Hoe sal jy hierdie belydenis in een sin opsom?

Die doel van my bestaan is liefde.

Wat is jou gunstelinglied op die album en hoekom?

Die onomskryfbare. Die teks is die naaste wat ek nog ooit aan ’n definisie vir die liefde kon kom.

Wat is die grootste les oor die liefde wat jy al geleer het?

Dat jy dit vir jouself moet regkry voor jy dit vir ander kan regkry.

Het jy ’n gesegde of aanhaling wat jou na aan die hart lê?

Die waardevolste dinge kos nie ’n sent nie.

*Chris se nuwe album is hierdie week (eerste week in Mei) eksklusief op Groot Tunes beskikbaar en dan vanaf 8 Mei 2017 in winkels en op ander digitale platforms. Besoek die webblad chrischameleon.com vir inligting oor optredes.

Kyk ook hier na die musiekvideo van die eerste enkelsnit vanaf die album, getiteld Die Intimiteit van ons Greep:

The post Chris Chameleon: Jy en Ek en Ek en Jy appeared first on rooi rose.