Verskaf deur VIA

Ouerskap kom nie met ’n wenresep nie. Daar bestaan ook geen handleiding vir elke dag se reis wat ouers met hul kinders moet stap nie. Maar daar is wel vrae wat gevra en antwoorde wat gegee kan word wat vir elke ma – en ook hedendaagse pa – ’n liggie in die tonnel kan wees. 

Dis wat Efraine du Toit weer vir ’n tweede seisoen van Wat ’n ma moet weet na die skerm bring. Reeds in die eerste seisoen het dié ervare grimeerkunstenaar gewys sy bied substansiële leiding aan ma’s wat nie die moed het om hul kwelvrae met vriende of familie te bespreek nie. 

Openhartig, eerlik en empaties. Dis hoe sy dit benader. Daar word nie doekies omgedraai nie, daar word net ’n mooi en sagte pad met ma’s gestap. 

Vandag is sy self ’n ma van twee, met Joha wat ná 43 uur van kraam op 24 Februarie 2024 sy opwagting gemaak het, en hul tweede seuntjie, Daniël, wat op 14 Augustus vanjaar gebore is. Ook hy het sy tyd geneem voordat sy ma hom in haar arms kon hou: 39 uur se kraam … 

Haar pad na ouerskap was nie met rose besaai nie, en sy het dit al in die verlede as tegelykertyd die grootste seën, maar ook haar moeilikste reis beskryf. Sy het destyds openlik gesels oor haar stryd met infertiliteit en daaroor gesê: “Dis ’n hoofstuk vol hoop, teleurstelling en ’n ongelooflike hoeveelheid geloof.”  

In Augustus verlede jaar het ’n groot hartseer die gesin getref toe Efraine ’n miskraam gehad het. Dit is egter een van die onderwerpe wat sy baie eerlik met haar gaste en kenners aanpak. Juis daarom hoop sy dat die nuwe reeks – net soos die eerste een – vir ouers leiding, bemoediging en nuwe insigte sal bied. 

Efraine, baie geluk met die geboorte van jul tweede kind! Hoe gaan dit met jou en die nuwe baba? 

Baie dankie. Dit gaan baie goed met ons, ek is steeds in die amazing baba-bubble. Ons is nog in die proses om ons voete te vind, maar ons kan oor niks kla nie. Ek geniet dit só om weer ’n baba te hê.  

Hoe verskil die ervaring om vir die tweede keer ma te word van jou eerste keer? Voel jy rustiger en meer voorbereid, of bring elke baba ’n heeltemal nuwe stel uitdagings? 

Soos met enigiets in die lewe, voel dit beslis ’n bietjie makliker die tweede keer. Ek vertrou myself baie meer en oordink nie meer elke klein dingetjie nie.  

Ek glo egter dat ’n rustige baba teenoor ’n baba wat met refluks of koliek sukkel, ’n groot invloed op ouers se ervaring het. Daniël is nou maar eers twee weke oud, maar tot dusver gaan dit baie goed en is dit baie makliker. 

Ephraine du Toit en Joha. Foto: Verskaf

Die nuwe seisoen begin kort ná hierdie groot gebeurtenis in jou eie lewe. Hoe besonders is dié tydsberekening vir jou, en hoeveel van jou eie ervaring as ma dien as inspirasie vir die program? 

Alles waaroor ek in Wat ’n ma moet weet gesels, kom uit my eie ervaring as mamma. Ek het nog nooit so belanggestel in gesprekke soos dié wat ons in die program voer nie.

Om ’n ma te wees, raak beslis makliker wanneer jy meer kennis het oor die verskillende aspekte van moederskap. Dit help ook om te weet dat jy nie alleen deur die trane en uitdagings gaan nie. Ek is ongelooflik opgewonde oor hierdie seisoen wat verfilm is terwyl ek swanger was met Daniël. Dit maak die tydsberekening vir my ekstra besonders. 

Wat het jy ná die eerste seisoen by kykers gehoor wat jou laat besef het dat daar nog soveel belangrike ouerskapsgesprekke gevoer moet word? 

Met die eerste seisoen van Wat ’n ma moet weet het ons een groot doelwit gehad: om ouers te laat voel dat hulle nie alleen is nie en dat ons almal soms sukkel. Die boodskappe wat ek ná die eerste seisoen ontvang het, was ongelooflik bemoedigend en het my laat besef dat ons bereik het wat ons wou.

Elke episode is kort genoeg vir ’n besige mamma om iewers in die week in te pas, maar steeds propvol waardevolle inligting en gesprekke wat jou laat besef jy is nie alleen nie. 

Die seisoen begin by basiese veiligheid en versorging en kyk ook na leefstyl- en omgewingsfaktore wat kinders se gesondheid beïnvloed. Watter praktiese lesse het jy self eers geleer nadat jy ma geword het? 

Ek het eers nadat ek ’n ma geword het, besef hoeveel dinge ’n mens eenvoudig nie weet voordat jy self in daardie skoene staan nie. Selfs die mees basiese goed, soos slaap, voeding, veiligheid en wat in jou kind se omgewing is, kan ’n groot invloed op hul gesondheid en ontwikkeling hê.  

Elke fase bring weer nuwe vrae en uitdagings. Ek leer steeds elke dag, en dit is presies hoekom die praktiese raad in hierdie episode vir my so waardevol is. Ons as mammas sal nooit genoeg kan leer nie, en ek voel ek leer die meeste uit ander se stories.

Ephraine du Toit en Joha. Foto: Verskaf

Een van die mees persoonlike episodes handel oor die hartseer van ’n miskraam. Waarom was dit vir jou belangrik om hierdie verlies openlik te bespreek, en wat hoop jy neem ouers uit dié gesprek? 

Dit was nie ’n maklike gesprek om te hê nie, en ek verstaan heeltemal hoekom vroue wat daardeur gaan, nie altyd daaroor wil praat nie. Ek het egter gevind dat hoe meer ek daaroor praat, hoe makliker raak dit en hoe minder raak die trane.  

Dit was die alleenste wat ek nog ooit in my lewe gevoel het. Al was my man elke tree saam met my, het daardie eensaamheid en hartseer vir ’n baie lang tyd nie beter geraak nie. 

Op 28 Augustus was dit presies ’n jaar sedert ek in die teater was en ons baba verloor het. Net omdat ek nou weer ’n baba het, beteken dit nie dat ek vergeet wat gebeur het nie.  

Ek wou juis openlik daaroor gesels omdat so baie vroue hierdie pad stap. As jy een van hulle is, hoop ek dat hierdie gesprek jou – al is dit net ’n bietjie – minder alleen sal laat voel. 

Julle plaas ook die kollig op die moderne pa. Hoe het jou eie siening van vaderskap, vennootskap en die verdeling van verantwoordelikhede binne ’n gesin verander sedert jy ma geword het? 

Ek is baie bevoorreg om ’n man te hê wat help kosmaak, wasgoed doen, doeke ruil en in die nag opstaan. Hy help basies met alles in die huis en met ons kinders, terwyl hy ook die broodwinner is.  

Ek weet eerlikwaar nie hoe mammas wat ook werk, dit regkry as hul mans nie met al hierdie dinge help nie. Ek is baie dankbaar dat my seuns in ’n huis grootword waar hulle sien hul pa help net soveel met die huistake én met hulle soos ek. Ouerskap is ’n spansport en dis soveel lekkerder en makliker as elke spanmaat sy kant bring. 

Die reeks ondersoek hoe ouers kinders – en veral dogters – met selfvertroue kan grootmaak, terwyl moeilike onderwerpe soos seks, finansies en egskeiding ook bespreek word. Hoe skep ’n mens ’n verhouding waarin jou kind veilig voel om enigiets met jou te bespreek? 

Sjoe, dit is ’n vraag waarvoor ek baie antwoorde kan hê, maar ek moet ook eerlik wees: ek het nog nie al die antwoorde nie, want ek is maar aan die begin van my reis as mamma. Ek probeer leer waar ek kan om uit te vind hoe om hierdie grootste taak van my lewe so goed moontlik te doen. 

Vir my begin dit by eerlikheid en ’n verhouding waarin jou kind weet hulle kan met enigiets na jou toe kom, sonder vrees vir oordeel.  

Ek glo wel dat ’n mens moeilike onderwerpe op ’n ouderdomsgepaste manier moet bespreek. Kinders kan byvoorbeeld leer hoe om verantwoordelik met geld te werk, maar hulle behoort nie wakker te lê oor die gesin se finansiële druk nie. 

Om my kinders met selfvertroue groot te maak, is vir my ongelooflik belangrik. Wanneer ’n kind in hom- of haarself glo, voel die uitdagings van die lewe soveel meer hanteerbaar. Ek hoop om vir my kinders ’n veilige plek te wees waar hulle altyd geliefd, gehoor en aanvaar voel. 

Ephraine du Toit. Foto: Verskaf

Julle kyk na noodgevalle by die huis én die gevare van die digitale wêreld. Het hierdie gesprekke jou laat besef dat daar dinge is waarop jy jou eie gesin nog beter kan voorberei? 

Beslis. Hierdie gesprekke het my laat besef dat ’n mens nooit op elke moontlike situasie voorbereid kan wees nie, maar dat die regte kennis en ’n goeie plan ’n groot verskil kan maak. Met twee klein kinders voel ek dat basiese noodhulp, wat om te doen wanneer ’n kind verstik en wie om in ’n noodgeval te kontak, iets is wat ons as ouers moet weet. 

Die digitale wêreld waarin ons kinders grootword, maak my nogal op my senuwees. Ek dink nie ons sal ooit hul wêreld heeltemal kan verstaan nie, maar hierdie gesprekke het my laat besef hoe belangrik dit is om moeite te doen om by te bly en te verstaan waarmee hulle daagliks gekonfronteer word.  

Ons sal waarskynlik nie alles kan beheer of hulle teen elke gevaar kan beskerm nie, maar ons kan grense stel, betrokke bly en ’n verhouding skep waarin hulle veilig voel om met ons oor enigiets te praat. 

Die seisoen sluit af met ’n gesprek oor werkende ma’s en mom guilt. Wanneer ervaar jy self dié skuldgevoel die sterkste, en wat help jou om te onthou dat jy nie ’n perfekte ma hoef te wees om ’n goeie ma te wees nie? 

Is daar iets soos die perfekte ma? Dit voel vir my ek leer elke dag saam met my kinders. Ek groei, verander en leer soos hulle groei. Ek doen my absolute bes as mamma omdat ek wíl, en ek moet vertrou dat dit genoeg is vir hulle ook. 

Oef, mom guilt… wat ’n vreemde gevoel. Al sê ek vir myself dat ek nie skuldig hoef te voel nie, voel ek dit steeds. Interessant genoeg ervaar ek dit nie wanneer ek moet werk nie, maar eerder wanneer ek iets sosiaal of net iets vir myself doen. Dan voel dit skielik asof ek eintlik by my kinders moet wees.  

Ek probeer myself herinner dat dit ook belangrik is om steeds tyd vir myself te maak maar ai, ongelukkig help dit nie met die gevoel van mom guilt nie.  

Wat ‘n ma moet weet. Foto: Verskaf

Van alles wat jy hierdie seisoen geleer het, wat is die één ding wat jy glo elke ma – en eintlik elke ouer – moet weet? 

Om ’n ouer te wees, is die grootste voorreg en die mooiste ding wat met ’n mens kan gebeur, maar niemand het gesê dit gaan maklik wees nie.  

Ek dink die een ding wat elke ouer moet weet, is dat jy nie al die antwoorde hoef te hê om ’n goeie ouer te wees nie. Ons almal leer soos ons aangaan, ons maak foute en ons probeer weer. Solank jou kind geliefd en veilig voel, en jy bereid is om saam met hulle te groei.

Wat ’n ma moet weet begin vanaf Donderdag 3 September om 20:00 op VIA (DStv-kanaal 147). Die reeks word aangebied in samewerking met Bestmed Medical Scheme, met dank aan Mustela South Africa en Mustela France.

Efraine is ook een van die beoordelaars van rooi rose se splinternuwe rooiwarmwenners skoonheids- en welstand-kompetisie waarvan die wenners in die Desember-uitgawe bekend gemaak sal word. 

Lees ook: Maak ‘n onderhandelaar groot

The post Wat ’n ma moet weet  appeared first on rooi rose.

Deur Maryke Roberts 

Foto’s Clifford Roberts/Canon R6 

Die Hilton-kunstefees het oor die afgelope drie dekades ontwikkel tot die onbetwiste hoogtepunt van uitvoerende kuns in KwaZulu-Natal. Hierdie kultuurfees, wat jaarliks op die prentjiemooi skoolgrond van die Hilton-kollege in die Natalse Middellande plaasvind, het ’n ryk geskiedenis, wat na 1993 terugstrek.  

Dit is oorspronklik deur Sue Clarence gestig met die doel om die mees uitstaande Suid-Afrikaanse teaterproduksies na ’n plaaslike gehoor te bring. Sy was geïnspireer deur die energie van die Nasionale Kunstefees in Makhanda en die Hilton-kunstefees het die afgelope 30 jaar gegroei tot die belangrikste Engelstalige teaterfees in die land.  

Een van die fees se mees betekenisvolle afdelings is die Jongosi-jeugprogram, waar meer as 2 000 plaaslike leerders die geleentheid kry om saam met professionele kunstenaars te werk. Die naam “Jongosi” is immers deur wyle Johnny Clegg gebruik; ’n speelse, Zoeloe-geïnspireerde vervorming van die Afrikaanse woord “jong os”. 

Die fees se program bied ’n wye spektrum van kuns- en kultuurvorms, maar die hartklop van die fees bly sonder twyfel die ernstige teater-aanbiedings. Die feesprogram word gekenmerk deur ’n kragtige verweefdheid van politieke satire, fisieke teater en diep menslike drama wat sowel Suid-Afrikaanse historiese trauma as moderne sosiale kwessies takel.

Carmen Rodriguez se sangvertoning het die gehoor op hul voete gehad en gou is selfone se flitse aangesit. In ware popster-styl is daar saamgesing en dans. Evan Roberts – een van die fees se organiseerders – het haar op die klawerbord begelei.

Onder die mees prominente tradisionele werke op die verhoog is die klassieke protesteaterstuk Woza Albert!, wat die denkbeeldige koms van Jesus Christus na apartheid-Suid-Afrika verken en steeds ’n skerp spieël voor die samelewing hou. Andrew Buckland se bekende fisieke satire, The Ugly Noo Noo, gebruik weer absurde humor en beweging om die paranoïese verhouding tussen mens en vrees te ontleed. 

Die fees skroom ook nie weg van swaarder, intieme temas nie. Werke soos Girls & Boys bied ’n deurdringende blik op hoe ’n oënskynlik gewone gesinslewe in tragedie kan verval, terwyl Immortal historiese gebeure gebruik om menslike oorlewingsdrang te weeg. Vir diegene wat na die toekoms kyk, bied die distopiese drama Making Wine in Scotland ’n donker maar deernisvolle blik op liefde in ’n wêreld wat deur klimaatsverandering en sosiale verval bedreig word. 

’n Opwindende nuwe mylpaal vir die fees is die bekendstelling van die heel eerste KZN Art Fair, ’n inisiatief wat onder meer deur Angela Shaw gestig is. Hierdie visuele kunsuitstalling vul die tradisionele feesterrein aan deur plaaslike galerye, gevestigde kunstenaars en opkomende ontwerp-talent op die fees byeen te bring. 

Midnight in Parys is ’n aangrypende storie oor ’n man wat in Parys stop en sy hart oopmaak teenoor die restaurant-eienaar, wat self haar eie hartseer verlede het. Dit het Paul Slabolepszy en Bianca Amato in die rolverdeling.

Met uitstallings soos Making Ground, wat deur die Pietermaritzburgse maatskappy, Belgotex, geborg is om jong talent te ontgin en aan te moedig, en die deelname van groot name soos Strauss & Co, vestig die kuns-uitstalling KwaZulu-Natal as ’n volwaardige spilpunt vir kontemporêre visuele kuns, ontwerp-kultuur en kunsgesprekke.  

Daar was lekker gratis rolprentvertonings, en die kosstalletjies en vlooimark buite onder pragtige wit tente het gesorg dat almal iets kon gaan uitsnuffel om huis toe te neem. 

Buite op die skoolgrond was daar verskeie geleenthede vir plaaslike skole om op te tree en feesgangers die kans te gee om gratis vermaak te geniet en die Vrouedag-langnaweek in ’n ware familiefees te omskep. 

Volgende jaar word die fees vir die 35ste jaar gehou. Loer by https://hiltonfestival.co.za vir meer inligting.

Lees ook: ’n Wêreldkosreis bring hom na Suid-Afrika

The post Hilton-kunstefees is KZN se hoogtepunt van uitvoerende kuns appeared first on rooi rose.

Verskaf deur VIA

Bobby van Jaarsveld is net so ’n huishoudelike naam soos Mrs Ball’s se blatjang en rooibostee. Vir jare het hy vanaf die verhoog sy aanhangers bekoor en hy was ewe gemaklik om sy spiere tydens fotosessies te bult as wat hy deesdae is om ’n groot vis in te katrol. Daardie ondeunde glimlag en blou oë het ook seker gemaak dat harte vinniger bons … 

Nou het VIA vir Bobby op ’n andersoortige avontuur in Dorpie-doenlys ingespan. En die selferkende avontuurlustige was slaggereed om ook hierdie uitdaging met groot entoesiasme aan te pak. Dis ’n reisprogram, maar een met sy eie unieke aanslag.  

Bobby het die leisels oorgeneem by Sean van Noordwyk en nou gaan hy by dorpies – sommige bekend, ander minder bekend – inloer en kykers op ’n eiesoortige ontdekkingstog neem na daardie verborge juweeltjies waarvan min mense tot nou toe geweet het. Partykeer is dit geskiedkundig van aard, ander kere is dit weer verstommende avonture. Saamgeklits met hope lekker langpadkuiers! 

Gordel vas, dis tyd om saam met Bobby deur Suid-Afrika te toer en met nuwe oë na daardie dorpies op sy lys te begin kyk.

Kyk wat Bobby sê oor die reeks

Bobby, kykers ken jou veral as sanger en akteur. Wat het jou opgewonde gemaak om nou as aanbieder van Dorpie-doenlys die land te verken? 

Dis my eerste keer dat ek ’n TV-reeks doen waar daar teks of ’n draaiboek is, so dis meer professioneel. Ek is nie daaraan gewoond om ’n aanbieder te wees nie, al was ek die aanbieder van ’n regstreekse TV-uitsending. Maar nee, ek het nog nie onderhoude met mense vir TV gevoer nie. Dit het my beslis baie opgewonde gemaak om Dorpie-doenlys te doen, want ek is altyd oop vir iets nuut. 

Die reeks neem jou van Gansbaai en Stanford tot St. Lucia, Clarens, Hoedspruit en die Limpopo-Bosveld. Watter bestemming het jou die meeste verras? En hoekom? 

Ek sal sê St. Lucia en Clarens. 

Ek ken St. Lucia goed, maar nie so goed nie. Dit was ongelooflik om die seekoeie te sien, die visvang en die see. Ek gaan altyd die see kies. Dan is die dorp klein, maar daar is so baie aktiwiteite wat aangebied word. En die manier waarop die gemeenskap met mekaar saamwerk en mekaar ondersteun, het my baie verras.  

Clarens is vir my net so mooi, alhoewel ek net altyd daar deurgery en nog nooit gestop en oorgebly het nie. Ek was net baie verbaas oor hoe mooi dit werklik daar is. Die plek waar ons geslaap het, Il Castello Boutique Hotel, het my laat voel of ek myself in Italië bevind het al was ek was nog nooit in Italië nie. Ek was aangenaam verras.

Jy het alles aangepak van diepseehengel en walvis kyk tot ’n pottebakkersklas en ontmoetings met seekoeie en krokodille. Watter ervaring het jou die verste uit jou gemaksone geneem? 

Dis ’n moeilike een, want ek kan nie dink dat daar iets was wat my werklik uit my gemaksone geneem het nie. Ek is rêrig game vir alles, ek sal enigiets probeer of doen en dit sluit enigiets avontuurlustig in.   

O, ja. Die pottebakkersklas was beslis buite my gemaksone, want die vorm wat daar uitgekom het, was allesbehalwe ’n pot … 

Dorpie-doenlys gaan nie net oor plekke nie, maar ook oor die mense en stories wat elke dorp besonders maak. Watter ontmoeting of mense het jou die meeste geraak? 

Die Abraham Kriel-kinderhuis in Nylstroom (Modimolle), want dis die een wat ek die beste ken en was vir baie jare ’n beskermheer vir hulle gewees. Ek was al so baie by daardie kinderhuis en ek ken die perseel en baie van die mense daar. Maar dis asof jou hart nooit gewoond sal raak daaraan nie omdat die omstandighede waarom die kinders daar beland het, nooit rég voel nie.  

Ek dink enige persoon sal uit sy ware hart vir hulle ’n beter lewe wil gee. So, as jy daar kom, voel jy dat jy net iets meer kan doen. Dit is vir my so besonders om hulle te besoek. Ek het die dag nadat ons daar was vir Dorpie-doenlys, teruggegaan en my kinders ook soontoe geneem vir die basaar wat hulle daar gehou het. 

Die ander besonderse ontmoeting was een met ’n rooikat (caracal) by die Sondela Nature Reserve in Bela-Bela.

In Gansbaai besoek julle onder meer ’n pikkewynrehabilitasiesentrum en leer julle meer oor natuurbewaring. Het die reeks jou anders laat dink oor Suid-Afrika se natuurlewe en ons verantwoordelikheid om dit te beskerm? 

Ja, ek is definitief iemand wat nog altyd pro-bewaring is. Ek dink enigiemand, veral in Suid-Afrika, is. Volgens my het ons die beste en die grootste verskeidenheid (natuurlewe) daar buite en dis ons verantwoordelikheid om dit te beskerm.  

Ek sal altyd in enigiets belangstel wat diere kan beskerm, veral ook die seelewe omdat ek so lief is vir die see, veral diepseeduik. Ek wil ook eendag my kinders se kinders vat vir duiklesse in Suid-Afrikaanse waters.

Wat ontdek ’n mens van Suid-Afrika wanneer jy van die hoofpaaie afdwaal en tyd in kleiner dorpe en gemeenskappe deurbring? 

Ek is al so gewoond om deur Suid-Afrika te reis vandat ek 17 jaar oud is, maar daar is tog plekke wat ek die afgelope 22 jaar misgery en half misgekyk het. Dis ongelooflik watter versteekte juwele jy vind as jy so deur die land toer.

Dan kom jy agter jy was nog nie daar nie en jy begin besef wat so spesiaal is aan hierdie plekke. Dit wat eintlik die plekke die spesiaalste maak, is die mense.

Dis die gemeenskappe wat mekaar so ondersteun omdat hulle op klein dorpies woon waar hulle besef hulle het mekaar nodig. Dis regtig wonderlik om te sien hoe mooi die mense mekaar hanteer en hoe hulle ook plaaslike besighede ondersteun.

As jy self ’n Dorpie-doenlys vir ’n naweek moes saamstel, watter drie dinge moet daarop wees – en na watter dorp sou jy eerste terugkeer? 

Op my lysie sal jy diepseeduik, diepseevisvang en rus vind. Die gunstelingdorpies waarnatoe ek eerste sou wou terugkeer, is St. Lucia, Gansbaai en Clarens.

Jy het reeds soveel hoogtepunte in musiek, televisie en toneelspel behaal. Wat daag jou op hierdie stadium van jou loopbaan steeds kreatief uit? 

Wel, om nuwe dinge te probeer. Net as ek dink ek het al alles gedoen in die bedryf, dan gebeur daar nog iets en nog ietsie kom by. Ek hou daarvan om myself uit te daag met nuwe challenges en geleenthede.  

Ek is nie ’n ou wat kan stilsit en niks doen nie. Die oomblik as ek verveeld raak of ’n oop dag het, dan irriteer dit my bietjie. Alhoewel ek ook wil rus, klink ’n vakansie op die strand baie lekker, maar ek sal nie kan ontspan nie. Ek sal altyd iets soek om te doen. Nuwe uitdagings, nuwe dinge . . . ’n mens is nooit te oud om te leer nie.

Voel jy dat Bobby die aanbieder ’n ander kant van jou persoonlikheid wys as Bobby die sanger of akteur? 

Ek sal nie sê die persoonlikhede is verwyder van mekaar nie, dis steeds dieselfde persoon. Die formaat van ’n TV-program laat jou beslis meer professioneel oorkom. Ek is professioneel, maar ek dink dis meer die tipe onderhoud-styl wat wys jy kan jou riglyne volg. Dit is nogal vir my belangrik om te leer – iets wat ek altyd doen. En ek is ook bereid om te luister en die sisteem wat in plek is, te vertrou.

Met soveel bekende liedjies en loopbaanhoogtepunte op jou kerfstok, waarna streef jy nog – persoonlik én professioneel? 

Persoonlik dalk net ’n bietjie rus in hierdie stadium. Reis, beslis. Ja, ek voel net om te reis, te gaan duik en tyd met my kinders deur te bring. 

Professioneel gesproke sal ek regtig daarvan hou om weer in ’n groot fliek te speel, iets wat ek lanklaas gedoen het. En ek is ook baie lief vir TV-werk en hoop om dit ook weer eendag te kan doen.   

Wat hoop jy mense onthou eendag van jou, buiten die treffers, rolle en ander glans-oomblikke? 

Ek hoop die mense wat my leer ken het, onthou dat ek ’n ou is wat nie alles te ernstig opvat nie en dat hulle my sal onthou as ’n real mens. Ja, ek hoop hulle onthou die rêrige ek.

Die reeks van 13 episodes begin op 10 September en word Donderdae om 20:30 uitgesaai.

Lees ook: Semi-Soet is gesinsvermaak wat soet op die sak sal val

The post Bobby vat die pad – en neem kykers saam op reis appeared first on rooi rose.

Deur Maryke Roberts

Foto’s: Verskaf

Toe Jason McKinney vier jaar oud was, het sy oupa ’n papierhanddoek op sy kop gesit as ’n sjefshoed en hom “Sjef Jason” genoem. Hulle het pannekoek gebak, en al het Jason die eerste een verbrand, het sy oupa dit steeds geëet en gesê dit is perfek.

Daardie eenvoudige oomblik van liefde en aanmoediging, het die grondslag gelê vir ’n loopbaan wat deur passie, akkuraatheid en verfynde vakmanskap gevorm sou word.

Op 18-jarige ouderdom het Jason homself beloof dat hy nie net ’n suksesvolle sjef sou word nie, maar ook sy eie restaurant sou open wat hy na sy ma, Elizabeth, sou noem. Jason kom uit ’n gebroke huis en wou sy ma bedank vir haar toewyding, maar ook aan homself bewys dat hy tot groot hoogtes in staat is.

Om dié droom te verwesenlik, het hy ’n doelgerigte pad gestap. Hy het ’n vierjarige vakleerlingskap by Sea Island Resort voltooi en later vir vyf jaar in die kombuis van die befaamde restaurant The French Laundry (met drie Michelin-sterre) onder leiding van sjef Thomas Keller gewerk.

Hier het hy die Core Award ontvang en die geleentheid gekry om by Maison Pic en Frenchie in Frankryk ervaring op te doen. Nadat hy medestigter van die suksesvolle spyseniersmaatskappy Truffle Shuffle was (wat op Shark Tank verskyn het), het Jason besluit om terug te keer na die kern van sy passie: die kookkuns self. Hy het ’n wêreldwye reis aangepak om te kook, te leer en met plaaslike produsente en gemeenskappe skouers te skuur.

Sy reis, wat strek oor plekke soos Thailand, Indië, Indonesië, Japan, Meksiko en Suid-Afrika (onder meer in die Soutpansberg by Few & Far Luvhondo), vorm die laaste hoofstuk van voorbereiding voordat hy in 2027 sy eie intieme restaurant, Elizabeth, in New York open.

As deel van sy Suid-Afrikaanse reis kook hy ook by die bekroonde Creation Wines in die Hemel-en-Aarde-vallei op Saterdag 29 Augustus en Saterdag 5 September. Hier bied hy twee eksklusiewe, intieme kookaande aan, waar hy hande neem met Creation se bekroonde sjefspan – ook geen vreemdelinge vir erkenning en pryse nie – om die fyn kuns van kos-en-wyn-pasmaats te verfyn ter voorbereiding vir sy nuwe New Yorkse spyskaart. Daar is nog enkele plekke oor as jy deel van dié kulinêre lekkerte wil wees: https://sites.creationwines.com/chef-jason

Vir Jason gaan dit nie net oor ’n fynproewersete nie, maar om lank genoeg op ’n plek te vertoef om die storie van die bestanddele, die wyn en die landskap op ’n bord te vertel.

Vrae vir Sjef Jason McKinney:

Jou kookreis het op vierjarige ouderdom saam met jou oupa en ’n papierhanddoek-sjefshoed begin. Watter basiese lesse uit daardie dae dra jy vandag nog saam met jou in Michelin-kombuise?

Daardie herinnering neem my terug na iets wat sjef Keller ons by The French Laundry geleer het. Hy het vir ons ’n beeld gewys van ’n kind wat sy aandete geniet, en ons daaraan herinner dat ’n sjef se werk in wese daarop neerkom om vir mense te sorg.

Wanneer jy ’n kind is, kan alles wonderlik voel. Pannekoek is wonderlik. ’n Piesang is wonderlik. Koekies is wonderlik. Namate ons ouer word, word dit moeiliker om dieselfde gevoel van verwondering te skep.

As sjef probeer ek daardie vroeë oomblikke van vreugde onthou en maniere vind om dit vir ons gaste te herskep. Presisie en tegniek is belangrik, maar uiteindelik dien dit die doel om iemand te laat voel dat daar vir hulle omgegee word.

Jy is op ’n indrukwekkende wêreldreis van 18 maande waar jy in verskeie lande kook en leer. Wat het jou geïnspireer om jou suksesvolle onderneming agter te laat en die wêreld in te vaar met niks meer as jou messe en ’n dors vir nuwe geure nie? 

Hierdie reis was nie ’n impulsiewe besluit nie. Dit was ’n plan waaraan ek begin werk het toe ek 18 was.

Ek wou my vakleerlingskap voltooi, by The French Laundry werk, genoeg finansiële vryheid opbou om te reis, en uiteindelik my eie restaurant open. Nadat ek Truffle Shuffle opgebou en verkoop het, het ek op ’n punt gekom wat dit tyd was om na die kombuis terug te keer.

Ek het gedink die beste voorbereiding vir Elizabeth sou wees om betekenisvolle tyd saam met sjefs, boere, produsente en gesinne regoor die wêreld deur te bring. Ek wou leer hoe hulle kook, etes aanbied wat mense aan Elizabeth bekendstel, en met ’n veel dieper begrip van kos huis toe keer.

Ek voel ongelooflik bevoorreg om dit te kan doen.

Tydens jou Suid-Afrikaanse besoek kook jy onder meer by Few & Far Luvhondo en ook Creation Wines in die Hemel-en-Aarde–rif. Wat hoop jy het hierdie spesifieke ervaring en die fokus op kos-en-wyn-pasmaats van Suid-Afrika jou geleer wat jy saam met jou New York toe gaan neem?

Ek het Suid-Afrika sowat twee jaar gelede vir die eerste keer besoek en tyd in Franschhoek en Stellenbosch deurgebring. Die gehalte van die wyn, kos, landskap en gasvryheid het my dadelik bygebly.

Wat my opgewonde maak, is hoe duidelik ’n mens die streek in die geure kan proe. Die terroir hier kan meeding met dié van groot wynstreke in die Middellandse See-gebied of Sonoma, maar Suid-Afrika behou steeds sy eie identiteit en beskik oor enorme potensiaal.

Few & Far Luvhondo het my die geleentheid gebied om meer in harmonie met die land, die vuur en plaaslike bestanddele te kook. By Creation dien die wyn as vertrekpunt vir die ontwikkeling van die kos. Ek wil daardie benadering na New York terugneem: om eers die landskap te verstaan ​​en dan ’n spyskaart saam te stel wat die verhaal daarvan vertel.

Wat van Creation Wines maak jou opgewonde?

Die mede-eienaar, Carolyn Martin, se passie is aansteeklik. Sy gee opreg om vir die wyne, die landgoed, die mense en die ervaring wat hulle vir elke gas skep. Daardie energie vloei deur die hele span.

Creation beskou die kombinasie van kos en wyn ook as ’n kernaspek van die ervaring, nie as ’n nagedagte nie. Ek sien daarna uit om saam met hul kulinêre span te werk en geregte te skep, wat die uitstekende wyne wat hulle produseer, komplementeer.

Jou restaurant wat in 2027 in New York open, Elizabeth, is na jou ma genoem. Watter rol speel familie, nostalgie en die globale tegnieke wat jy op jou reis geleer het in die spyskaart wat jy vir hierdie intieme eetervaring beplan? 

Dit sal byna alles beïnvloed.

Elizabeth is na my ma vernoem, en ek wil hê die restaurant moet my help om ’n suksesvolle gesinslewe te bou, nie daarmee meeding nie. Ek bewonder dit wat Massimo Bottura en Lara Gilmore tot stand gebring het, waar hul restaurant, huwelik en gesin almal met mekaar verweef is.

Ek wil ook hê elke gereg moet ’n element van nostalgie bevat. Dit kan byvoorbeeld ’n roomys-toebroodjie, ’n koekie of ’n speelse gereg wees wat geïnspireer is deur Cheez-Its – ’n happie waarvan ek as kind baie gehou het.

Die tegnieke wat ek tydens my reise aangeleer het, sal bepaal hoe daardie herinneringe uitgedruk word. Ek het in Japan geleer van inlê en preservering, in Lima van ceviche en Nikkei-kookkuns, in Indië van kerrie, en by ’n gesin buite Meksikostad van barbacoa. Daardie ervarings sal nie bloot as verwysings op die spyskaart verskyn nie. Dit het my begrip van bestanddele verander, sowel as die manier waarop ek stories deur middel van kos wil vertel.

rooi rose-lesers is lief vir inspirerende kosverhale. Watter raad het jy vir huiskokke wat meer kreatiwiteit, waagmoed en selfvertroue in hul eie kombuise wil bring?

Onthou dat een van die beste dinge van kook is dat jy jou mislukkings kan opeet.

Dit is maklik om deur Instagram te blaai, honderde resepte te hou, en nooit werklik iets onder die knie te kry nie. Wat my gehelp het, was om ’n goeie kookboek te kies en my daartoe te verbind om die resepte daarin te kook. Herhaling bou selfvertroue.

Begin met een resep, leer waarom dit werk en maak dit weer. Jy hoef nie perfek te wees nie. Jy moet net aanhou kook.

Ek het ook ’n kookklub waar mense saam met my kan leer en kook: jointhecookingclub.com.

Wat was jou hoogtepunt van jou 18 maande kosreis om die wêreld en wat het jy die meeste van jou eie huis gemis?

Die absolute hoogtepunt was om met Polina in Meksiko te trou.

Wat kulinêre ervarings betref, is dit moeilik om net een oomblik uit te sonder. Ek het by Maido in Lima geëet en later die geleentheid gehad om daar praktiese ervaring op te doen. Maido is in 2025 as die wêreld se beste restaurant aangewys van The World’s 50 Best Restaurants.

In Japan het ek op ’n oesterplaas in die middel van die water gestaan, ’n oester oopgemaak en dit daar en dan geëet. Ek onthou dat ek gedink het: “Hoe sou enige restaurant dit ooit kon herskep?” Nog ’n onvergeetlike ervaring was om barbacoa saam met ’n gesin buite Meksikostad voor te berei.

Dit wat ek die meeste mis, is my gesin. Ek mis ook die kortpaaie in Amerikaanse gesprekke: die verwysings, humor en stories wat dit maklik maak om vinnig ’n band met iemand te vorm.

Lees ook: Groot name word dié lente by VIA verwelkom

The post ’n Wêreldkosreis bring hom na Suid-Afrika appeared first on rooi rose.

Verskaf deur VIA

Bobby van Jaarsveld, Kabous Meiring, François Jacobs, Efraine du Toit en Herman Lensing is van die groot name wat in September nuwe stories na VIA (DStv-kanaal 147) bring.

· Vier splinternuwe reekse – Ons gesels gesondheid, Tafel-toere, Keyter vir almal en Padel in die bloed – begin dié maand.

· Moederskap, huisprojekte, gesondheid, gemeenskapswerk, erfeniskos, inklusiewe stories en ’n landwye padel-avontuur maak VIA jou móét-kyk vermaakbesteming in September.

Groot name kom dié lente na VIA: Bobby van Jaarsveld pak die land se dorpe aan, Kabous Meiring plaas gesondheid onder die vergrootglas, François Jacobs sit hand by met gemeenskapsprojekte en Herman Lensing dek ’n erfenistafel vol onthoukos.

Saam met Efraine du Toit, Leon Gropp, JP Keyter, Sumarie Jordaan en VIA se nuwe Landbouweekliks-aanbieder, Theodore Jantjies, bring hulle ’n September-skedule wat van die kombuis en wildtuin tot klein dorpe, gesinshuise en padelbane strek.

‘Wat ’n ma moet weet’

Die grimeerkunstenaar en Op my eish!-deelnemer (2021) Efraine du Toit het pas weer ma geword. Sy keer terug vir ’n tweede seisoen van Wat ’n ma moet weet, ’n geselsprogram waarin bekende ma’s oop en eerlik oor die uitdagings, verrassings en werklikheid van moederskap praat.

Die reeks skep ruimte vir gesprekke sonder ’n perfekte-ma-filter en herinner kykers dat elke ma se ervaring anders lyk.

· Die reeks van 10 episodes, met BestMed as hoofborg, begin op 3 September en word Donderdae om 20:00 uitgesaai.

‘Huis SOS’

Die liedjieskrywer en kitaarspeler Leon Gropp rol weer sy moue op vir ’n tweede seisoen van Huis SOS, die huis-en-tuinreeks waarin hy bekende Suid-Afrikaners met ’n selfdoen-uitdaging in hul eie huis bystaan.

Van Leon se gaste sluit in Jan Blohm, Angelique Gerber, Francois Jacobs, Hannelie Warren, Pieter Smith en sy gesin, Marno van der Merwe, en Bismarck du Plessis en sy gesin.

Elke projek bring praktiese idees, probleemoplossing en die bevrediging van ’n taak wat behoorlik aangepak en afgehandel word.

· Die reeks van 13 episodes, met INGCO Tools as hoofborg, begin op 4 September en word Vrydae om 18:00 uitgesaai.

‘Ons gesels gesondheid’

Dié maand in Ons gesels gesondheid deel vier mense hul inspirerende verhale van diagnose, behandeling en herstel. Kabous Meiring gesels met pasiënte en kundiges van Morton & Partners oor fibrome, retinoblastoom, nierkanker en voorkomende gesondheidstoetse.

Die sjef Yolani Abrahams sluit elke episode af met ’n heerlike Pink Lady-appelgereg en gesonde leefstylwenke. Dis ’n hoopvolle reeks oor moderne medisyne, ingeligte keuses en die pad na beter gesondheid.

· Die reeks van vier episodes, met Morton & Partners as hoofborg en Pink Lady®-appels as medeborg, begin op 10 September en word Donderdae om 18:00 uitgesaai.

‘Dorpie-doenlys’

Bobby van Jaarsveld neem die voortou in Dorpie-doenlys en nooi kykers saam op ’n onvergeetlike reis deur Suid-Afrika se mooiste dorpe en versteekte juwele.

Van walvisse, pikkewyne en fynbos in Gansbaai tot seekoeie in St. Lucia, Clarens se berge, die natuurlewe van Hoedspruit en Phalaborwa, Stanford se plaaslike geure en die avonture van Cullinan, Pretoria en die Limpopo-Bosveld – Bobby se kenmerkende sjarme, humor en spontane persoonlikheid maak elke bestemming ekstra besonders.

Beleef plaaslike stories, egte gasvryheid en groot avonture saam met een van Suid-Afrika se grootste sterre.

· Die reeks van 13 episodes begin op 10 September en word Donderdae om 20:30 uitgesaai.

‘Tafel-toere’

In die nuwe reeks Tafel-toere reis François Jacobs saam met Round Table Southern Africa na verskillende dorpe en gemeenskappe om hul mooi én hul uitdagings te leer ken.

Elke episode begin by dit wat ’n plek besonders maak en beweeg dan nader aan ’n plaaslike behoefte en die mense wat reeds werk om ’n verskil te maak. François kyk nie bloot van die kantlyn af nie: hy spring in, help met die projek en ontmoet die gemeenskapslede wie se lewens daardeur geraak word.

· Die reeks van vyf episodes, wat deur Round Table en SANBS moontlik gemaak word, begin op 16 September en word Woensdae om 18:00 uitgesaai.

‘Herman se erfenistafel’

As ekstra bederf kry kykers ’n spesiale bonusepisode van die baie gewilde Herman se halfuur. Herman Lensing vier Erfenismaand met Herman se erfenistafel – ’n tafel vol bekende geure,

onthoukos en vars kinkels. Op die spyskaart is onder meer komkommerstolslaai, aartappels met bier, gebraaide preie met roomsous, vark-en-pekaneutterrien, Toeka se tasselvleis en ’n plat lamsboud van die vuur af.

· Dié spesiale episode word op 19 September om 19:00 uitgesaai en dit word deur Food Lover’s Market moontlik gemaak. Met heruitsendings op 20 September om 21:00, 23 September om 20:00 en 24 September om 21:00.

‘Keyter vir almal’

Die wildtuin word ’n geselskamer in Keyter vir almal, ’n nuwe reeks waarin die nuus-en-sportaanbieder JP Keyter 13 gaste vir openhartige gesprekke in die natuur verwelkom.

Die reeks het ’n sterk Oos-Kaapse hart en bring verhale uit sport, sake, opvoeding, bewaring, gesondheid en gemeenskapswerk bymekaar. Onder die gaste tel die voormalige Bok-afrigter Peter de Villiers, renosterbewaringsaktiviste Johan en Susan Lottering, dr. Yolanda van der Merwe, die rapkunstenaar Stylo Windvogel en natuurbewaarder Justin Terblanche.

· Die reeks van 13 episodes, met Value Added Life as hoofborg, begin op 22 September en word Dinsdae om 19:00 uitgesaai.

‘Verander jou siening’

Die motiveringspreker en voormalige Mej. Dowe SA-finalis Sumarie Jordaan keer terug met ’n tweede seisoen van Verander jou siening, die menslike doku-realiteitsreeks wat bekendes nooi om iemand wat ánders bekwaam (differently abled) is, se wêreld van binne te ervaar.

Sumarie bring dié seisoen bekendes soos Liam Bosman, Francois van Coke, Cintaine Schutte en Elandré Schwartz na Suid-Afrikaners met gestremdhede, onder wie ’n Paralimpiese swemmer, mondskilder, komediant, wynkenner en onderwyseres.

Die bekende gas is nie bloot ’n toeskouer nie, maar neem aktief aan die persoon se dag deel. Só ontstaan eerlike gesprekke, humor, soms ongemak en uiteindelik groter begrip.

Sumarie se eie lewenservaring en haar besondere band met haar tweelingsuster, Elanza, gee die reeks ’n diep persoonlike hart en ’n sterk boodskap oor menswaardigheid en vermoë.

· Die reeks van 10 episodes, met Fairtree as hoofborg, begin op 25 September en word Vrydae om 20:00 uitgesaai.

‘Padel in die bloed’

Twee geslagte, een passie. In die nuwe reeks Padel in die bloed toer pa en seun Corné en Morné Liebenberg deur Suid-Afrika om ander pa-en-seun-pare op ikoniese padelbane uit te daag.

Vir Corné gaan die reis oor kosbare tyd en lewenslesse saam met sy seun; vir Morné is dit ’n toets op pad na sy groot sportdrome. Benewens die wedstryde volg kykers hul oefening, dieet, kopwerk en pa-en-seun-dinamika, terwyl elke dorp sy eie mense en padelkultuur onthul.

Die roete strek oor 13 bane, van Dullstroom en Hoedspruit tot Jeffreysbaai, met ’n Kampioen-van-Kampioene-eindronde by Zorgvliet in die Wes-Kaap.

· Die reeks van 13 episodes, met Laeveld Agrochem as hoofborg, begin op 27 September en word Sondae om 20:00 uitgesaai.

Nog soveel meer om na uit te sien op VIA

Op VIA se Vrydagaandspyskaart word die vasvraprogram Slim vang sy baas: Musiek om 17:00 en die boeiende maatsoekreeks Hart op soek om 20:30 uitgesaai.

Die braaivure bly ook brand wanneer Kom ons braai:Familie en vriende op 19 September met ’n 22ste seisoen terugkeer. Die reeks van 13 episodes, met Chimney Champs as hoofborg, word Saterdae om 20:00 uitgesaai.

En vanaf 28 September is Wie weet wat? se sesde seisoen Maandae tot Donderdae om 17:00 te sien.

Al die programme is op VIA, DStv-kanaal 147, te sien, met heruitsendings deur die week. Besoek www.viatv.co.za vir die volledige uitsaaiskedule.

Lees ook: Herman deel kos-inspirasie vir Paasfees op VIA

The post Groot name word dié lente by VIA verwelkom appeared first on rooi rose.

Verskaf deur The Marketing Zoo

Met die ekonomie wat knyp, is vermaak die eerste plek waar baie mense sny aan hul beplande uitgawes, veral as mens rondom ’n hele gesin moet beplan. Daarom is dit welkome nuus dat Semi-Soet – die musiekblyspel weer in September 2026 op die planke gaan wees ná ’n baie suksesvolle en uitverkoopte 2025-seisoen, hierdie keer op een van Suid-Afrika se grootste verhoë: die Teatro by Montecasino. 

Te dankie aan AfriForum en Inhoud Huis Musiek, met die ondersteuning van RSG en kykNET, kan Afrikaanse teatergangers uitsien na ’n bekostigbare vermaakopsie wat iets vir almal bied – ’n goeie skoot humor, oorspronklike musiek, pragtige romanse en aansteeklike energie!  

Boonop vertolk Bobby van Jaarsveld en Anel Alexander weer hul rolle as JP en Jaci, twee mense wat voorgee om die perfekte paartjie te wees, net om te ontdek dat liefde soms op die mees onverwagse plekke wag. Die storie is natuurlik gebaseer op die 2012 romantiese rolprenttreffer met dieselfde naam, maar vir die verhoog is treffende musiek deur Johan Vorster en Jacomien de Wet by die storie gevoeg om dit die eerste oorspronklike Afrikaanse musiekblyspel van sy soort in bykans ’n dekade te maak.  

Van die land se bekendste teater- en musiekname, choreograwe en ’n bekroonde produksiespan sal gestalte gaan gee aan Semi-Soet – die musiekblyspel en die nuwe speelvak is ook spesiaal vir die Teatro se verhoog aangepas om sodoende vele nuwe kreatiewe elemente en groter visuele beelde te inkorporeer.  

Semi-Soet – die musiekblyspel beloof om die Afrikaanse kultuurgeleentheid van die jaar te wees, ’n teaterervaring wat byval sal vind by mense van alle ouderdomme en iets wat kinders, ouers, gesinne en vriende saam kan geniet.

Kaartjies is reeds beskikbaar by www.semisoetmusiekblyspel.co.za vanaf so laag as R250 per kaartjie. Teen daardie prys, kan jy jouself maar gereed maak vir wonderlike herinneringe wat ’n leeftyd sal hou.

WEN dubbelkaartjies vir Semi-Soet – die musiekblyspel

10 gelukkige lesers kan elk dubbelkaartjies vir die Semi-Soet – die musiekblyspel-vertonings 18:00 op Sa. 5 September óf So. 6 September by die Teatro Montecasino, Johannesburg, Gauteng wen.

Om in te skryf, voltooi die onderstaande vorm:

*Slegs een inskrywing per persoon

Sluitingsdatum: 27 Augustus 2026

Die wenners sal 28 Augustus bekendgemaak word.

Lees ook: Spesiaal vir Vrouemaand + WEN een van Herman Lensing se resepteboeke

The post Semi-Soet is gesinsvermaak wat soet op die sak sal val + WEN dubbelkaartjies appeared first on rooi rose.

Verskaf deur kykNET

Die soektog na kykNET se Stylikoon-veldtog van 2026 het afgeskop – en vanjaar skyn die kollig op mans ook. 

Revlon en kykNET se glans- en tydskrifprogram Bravo!  het verlede jaar vir groot opwinding gesorg toe hulle dié titel die eerste keer toegeken het. Die model en TV-aanbieder Katryn Kruger, wat reeds as tiener ’n internasionale modelloopbaan begin het, is as die Revlon Bravo!-stylikoon aangewys. 

Vanjaar word die loopplank langer gemaak met ’n nuwe kategorie vir mans.  

Die rede is dat persoonlike styl nie tot vrouemode beperk is nie: Suid-Afrikaanse mans maak toenemend hul merk op rooi tapyte, by premières en ander glansgeleenthede. 

’n Paneel van mode-, media- en handelsmerkkenners het drie finaliste in elke kategorie aangewys. 

“Daar word na iemand gesoek wat styl op alle gebiede versinnebeeld,” som Bravo!-aanbieder Ewan Strydom die veldtog op. 

Die paneel  

• Heather Goate – bemarkingsdirekteur van Revlon 

• Desireé Tan – kykNET se opdraggewende vervaardiger van Bravo! 

• Paul Venter – vervaardiger van Bravo! 

• Jackie Burger – mode-ikoon en voormalige Elle-redakteur 

• Franie Cronjé – SARIE-stylredakteur en modekenner 

• Abraham van Zyl – bemarkingsbestuurder van kykNET   

• Elana Afrika-Bredenkamp – TV- en radio-aanbieder, aktrise en ‘momtrepreneur’ 

• Katryn Kruger – SA Styl-ikoon 2025, model en TV-aanbieder 

Ontmoet die finaliste

Vroue 

1. Rolanda Marais – film- en TV-aktrise 

Rolanda is ’n bekroonde Suid-Afrikaanse aktrise wat oor twee dekades groot lof vir haar werk in teater, film en TV ingeoes het.  

Sy is veral bekend is vir haar rolle in televisiereekse soos Binnelanders, Fynskrif en Die nuusmakers, sowel as talle teaterproduksies. 

2. Mari Biderman-Pam (Conradie)  – grimeerkunstenaar en stilis 

Marí is ’n bekende stilis, grimeerkunstenaar en modekenner wat reeds diep spore agter die skerms van die plaaslike vermaak- en filmbedryf getrap het. 

Mooistemooi is haar inisiatief en daarmee saam het talle bekendes, waaronder Minki van der Westhuizen en sangeres Leah van Niekerk al onder haar vaardige hande en kennis deurgeloop.  

3. Gloria Arendz-Theiler – besigheidsvrou en skrywer 

Gloria is ’n wêreldbekende Suid-Afrikaanse sakepersoon, voormalige model en skoonheidspesialis. Danksy haar tydlose styl is sy in die tagtigs al as bes geklede vrou in die land aangewys.  

Sy is ook die suster van die befaamde modeontwerper Errol Arendz, wat steeds baie van haar uitrustings ontwerp. 

SA Styl-ikoon 2025, Katryn Kruger en Ewan Strydom. Foto: Gys Loubser

Mans 

1. Gert van de Merwe – modeontwerper en inhoudskepper

Gert van de Merwe is ’n gerekende Suid-Afrikaanse modeontwerper wie se loopbaan gekenmerk word deur gesofistikeerde, vroulike en tydlose mode. Hy het verskeie ateljees gehad, plaaslik in Kaapstad en Pretoria, en ook in Londen, Engeland.  

Hy is onder meer vir die gesogte Catherine-toekenning by die Fairlady South African Fashion Awards genomineer en was ook al die wenner van die J&B Rare-ontwerperstoekenning. 

Die afgelope paar jaar bevind Gert hom in Barrydale waar hy Die Langhuis Gastehuis en fynproewerskafee bestuur.  

2. Willus Bosch – binnenshuisversierder en opknapper

Willus Bosch, ’n interieur-ontwerper en opknappingspesialis wat in die Wes-Kaap woon, kombineer argitektuur, interieur, restourasie en kontemporêre leefruimtes.  

Kykers sal hom veral onthou vir sy fyn sin vir humor en vernuftige opknapwerk in die In die Sop: Gastehuisrevolusie-reeks wat onlangs op kykNET verskyn het. Sy gunsteling-spreekwoord is “Where there’s a Willus, there’s a way-us”. 

3. Roberto Kyle – akteur 

Roberto, ’n Suid-Afrikaanse akteur en opkomende regisseur asook filmmaker, het sy graad aan die Universiteit van Kaapstad se Theatre and Performance-program verwerf.  

Sy loopbaan sluit teaterproduksies, internasionale film- en televisieprojekte en gewilde Suid-Afrikaanse produksies in. Roberto het veral bekend geword onder Suid-Afrikaanse televisiegehore as Lee-Roy Foster in Arendsvlei, terwyl internasionale skermkrediete onder meer Homeland en Gavin Hood se Eye in the Sky insluit. 

• Oor die volgende paar weke, vanaf Donderdag 20 Augustus om 21:00 op kykNET (DStv-kanaal 144), sal die finaliste elk op Bravo! voorgestel word en oor hul styl en leefstyl gesels. 

• Die twee wenners sal in Oktober aangewys word.  

Lees ook: Sue Diepeveen – meer as net ’n aktrise en teater-eienaar

The post ’n Vars voorkoms vir kykNET se stylikoon-veldtog appeared first on rooi rose.

Deur Maryke Roberts 

Veelsydigheid is vandag die wagwoord in die Suid-Afrikaanse teaterlandskap. Akteurs vervaardig,  regisseer en open selfs hul eie teaters omdat die staatskrane lankal vir die kunste toegedraai is. 

Een van die mense wat die teaterwêreld onselfsugtig dien, is die akteur, vervaardiger en entrepreneur, Sue Diepeveen. As eienaar van The Drama Factory in die Strand, het sy in 2017 ’n onontbeerlike platform vir kunstenaars geskep.  

Sy het pas haar eerste speelvak by die Vrystaat-kunstefees met ’n nuwe solovertoning, Ms. B-haved, agter die rug en staan nou reg as gasvrou van die eerste Teater op Toer, ’n reisende teater wat van 12 tot 23 Augustus eers in die Strand en dan op Paternoster te sien sal wees. 

Johan van der Merwe en Sue Diepeveen by die opening van die eerste Teater op Toer by The Drama Factory. Foto: Verskaf

Die produksie, met Natasha Sutherland in haar debuutrol as regisseur, sny tot op die been van onderwys se uitdagings. Sue speel mev Sally Burkett, ’n geliefde veteraan-onderwyseres met 30 jaar se ondervinding, wat skielik geskors word. Dis ’n skreeusnaakse maar menslike kykie na die chaos van nuwe-era-ouers, veranderende skoolbeleide en die hel van Zoom-lesse. 

Hierdie rol is die perfekte uitvloeisel van Sue se eie waarnemings uit haar vroeëre onderwysdae. Sy het haar dramastudies in die laat jare tagtig begin by die Performing Arts Workshop (PAW) – die land se eerste nasionale nie-rassige teaterskool – waarna sy haar tegniek in Engeland aan die London Academy of Performing Arts en Trinity College of London gaan verfyn het. 

Met haar terugkeer na Suid-Afrika het sy haar passie vir die bedryf uitgeleef deur ’n reuse- dramastudio met honderde skoliere te bestuur en jong talent vir nasionale eisteddfods af te rig. Hierdie jare lange intieme verbintenis met die onderwyswêreld as kurrikulum-onderwyseres sou later as ’n ryk bron van inspirasie vir haar eie kreatiewe werk dien. 

Op 40 het sy besluit om voltyds toneel te speel en lesers sal haar in onder meer Skoonheid (2011), Honey 3: Dare to Dance (2016) en Projek Dina (2020) gesien het. Sue is ook ’n gesogte stemkunstenaar. 

Sue Diepeveen. Foto: Verskaf

Sy het nege jaar gelede The Drama Factory gestig, en wat aanvanklik net ’n droom was van ’n bekostigbare, intieme en professionele teaterruimte in die Helderberg, is vandag een van die gewildste onafhanklike teaters in die streek. Dit bied verskeie opleidingsgeleenthede, waaronder ’n teater-beligtingsprogram. Haar verbintenis met organisasies soos die Anna Foundation en Masikhule, help skep geleenthede vir jong teatergangers en sy skep ook produksies soos What Did The Fox Say? wat deur die departement van sport, kuns en kultuur geborg is.

Haar werk agter die skerms het reeds hoë lof en amptelike erkenning ingepalm. Sy het die Standard Bank Ovation-toekenning twee maal ontvang as regisseur van die produksie Your Perfect Life (vervaardig deur F Creations) – die eerste vir die lewendige debuut in 2019 en die tweede vir die aanlyn aanbieding in 2021. Haar gewilde kinderproduksie, Die keiser se nuwe klere, wat sy self geskryf, geregisseer en vervaardig het, is ná ’n uitverkoopte speelvak in 2024 vir ’n gesogte Woordtrofee by die Stellenbosch-woordfees benoem.

As teater-eienaar en vervaardiger sonder sy ’n hoogtepunt in Junie 2021 – te midde van die streng Covid-inperkingsregulasies – uit, toe sy haar teater as tuiste aangebied het vir die wêreldpremière van The Unlikely Secret Agent – The Eleanor Kasrils Story. Die stuk is op Ronnie Kasrils se gelyknamige boek gegrond en vir die verhoog deur Paul du Toit aangepas.  Dit het agt Fleur du Cap-benoemings ontvang.  

Die afgelope jaar is sy te sien in die bekroonde stuk Prooi/Prey wat op mensehandel fokus. Sy speel die rol van Imelda, die sindikaatbaas. Dit het ’n Naledi-toekenning saam met Leftfoot Productions gewen. 

Prooi/Prey se plakkaat. Foto: Verskaf

In Grenslig wat ook by die Vrystaat-kunstefees gedebuteer het, speel sy die rol van die ma wat haar hele gesin verloor het. Een is dood, die res is onbekend. 

Teater op Toer is nou haar fokus. Prooi/Prey sal opgevoer word, maar sy is veral opgewonde oor nog ’n Naledi-bekroonde stuk, Trans/Vaal, wat op die program is. Sy bied Teater op Toer in ’n kruisprovinsiale samewerking tussen Left Foot Productions van Gauteng (onder leiding van Johan van der Merwe, Ignatius van Heerden, Lihan Pretorius en prof Marié-Heleen Coetzee) aan. 

Vrae aan Sue:

In ’n bedryf waar staatsondersteuning skaars is, is jy naas akteur ook teater-eienaar en vervaardiger en medestigter van Teater op Toer. Wat beteken dit vir jou as vrou in dié teaterlandskap om self die stuurstang vas te hou en ruimtes vir ander te skep? 

Toe ek The Drama Factory begin het, souek nooit droom dat dit so ’n spesiale plek word nie. Ek wou bloot ’n plek hê om die soort werk waarvan ek hou aan te bied. Stel jou dus my verbasing voor toe dit ’n veilige hawe vir kunstenaars geword het! Ons is ​​bekend daarvoor dat ons werk van hoë gehalte aanbied van sowel gevestigde kunstenaars en dié wat nog hul loopbane bou. Ons personeelkorps bestaan ​​ook hoofsaaklik uit vroue, en ek is baie trots daarop. Ek het inspirasie geput by ander vroulike kreatiewe denkers. Baie teaters en feeste word deur vroue bestuur, en mense soos Daphne Kuhn (Sandton On The Square), Margit Rödenbeck-Meyer (Die Boer), Hayley Evan (PopArt) en Cornelia Faasen (Nati) was só vrygewig met hul tyd, raad en ondersteuning, dat ek nooit eens getwyfel het of dit moontlik sou wees nie. 

Sue Diepeveen in Prooi/Prey. Foto: Verskaf

As iemand wat onselfsugtig veg vir die kunste, hoe sien jy die huidige stand en toekoms van onafhanklike teater in Suid-Afrika? 

Ek dink ons ​​teaterlandskap is só ryk en veelsydig in aanbiedings dat dit ’n ideale omgewing skep waarin almal kan deelneem. Hoewel produksies met groot begrotings vanselfsprekend ’n voorsprong het, sien ons baie vertonings met beperkte begrotings wat tog suksesvol is. Dis belangrik om werk te skep wat vir jou persoonlik betekenisvol is, eerder as om bloot te maak waarvoor die publiek bereid is om te betaal.  

As daardie twee doelwitte saamval, het jy die ideale situasie. Suid-Afrikaners was nog altyd mense van aksie, en die teaterwêreld is geen uitsondering nie. Dit is ontmoedigend om te sien dat fondse – wat talle mense in die kunste kon ondersteun – eerder vir die bywoning van sokkerwedstryde aangewend word. Hoewel daar wel befondsing beskikbaar is, is dit dikwels onvoorspelbaar; soms word dit eers agterna toegeken, wat groot onsekerheid laat: Sal die geld wel betaal word, of het die kunstenaar moed opgegee en nie aan die fees deelgeneem nie?  

Die aansoekproses vir befondsing verg baie tyd, en ek sien dikwels hoe kunstenaars alternatiewe maniere vind om hul werk te finansier: ’n Proses wat tegelykertyd bemoedigend én frustrerend is. Ek hoop dat kunstenaars voortaan meer uitgesproke oor hul regte sal wees, en ek loof organisasies soos die South African Guild of Actors, wat daagliks vir ons belange veg. Elke kunstenaar behoort deel te wees van ’n organisasie, wat in die parlement vir hulle in die bres sal tree.

Sue Diepeveen in So You Want to Be A Trophy Wife. Foto: Verskaf

Jou nuwe solovertoning Ms. B-haved put inspirasie uit jou eie vroeëre onderwysdae. Hoe het jou eie ervaring in die klaskamer hierdie rol gevorm, en wat maak hierdie verhoogstuk vir jou so spesiaal? 

Ek sou ’n hele reeks kon skryf oor my eie ervarings ná soveel jare in die tuig, maar ek het ook met onderwysers gesels wat steeds in die klaskamer staan. Ek het besef dat daar baie mense is wat desperaat probeer byhou by nuwe neigings en praktyke, in die klaskamer en tuis. Covid was ook ’n ware openbaring; ek het gesien hoe onderwysers wêreldwyd ’n onmiddellike transformasie ondergaan om die kinders deur die pandemie te kry – en steeds hul verstand te behou!  

Ons is ons onderwysers baie verskuldig en dit het my laat dink: Wat as jy nie tegnologies vaardig is nie, en daar 30 kinders én 60 ouers is wat wag dat jy Zoom bemeester en jou skerm deel met ’n les wat jy op wonderbaarlike wyse op Canva aanmekaargeslaan het? Ek beskou onderwysers as superhelde, en hierdie produksie is ’n huldeblyk aan hulle. Ek en my wonderlike regisseur, Natasha Sutherland, hoop dat diegene wat tans in die “loopgrawe” van ouerskap met jong kinders verkeer, dit sal geniet. Dit verg immers ’n gemeenskap om kinders groot te maak.

Sue Diepeveen in Ms. B-haved. Foto: Verskaf

Jy het op 40 die brawe besluit geneem om voltyds te begin toneelspeel en sedertdien ’n indrukwekkende lys rolle opgebou. Watter raad het jy vir vroue oor die waagmoed om op enige ouderdom ’n nuwe hoofstuk aan te pak? 

Vroue volg dikwels ’n pad wat deur ander bepaal word. As deel van die “toebroodjiegenerasie” – vasgevang tussen kinders en bejaarde ouers – bly daar min tyd oor vir selfsorg. Ek het my kinders jonk gehad, maar danksy baie energie en ’n hardwerkende ingesteldheid, het ek my passie gevolg toe hulle ouer geword het. Dit het onverwagse sukses behaal. 

Hier is my raad: 

• Neem klein treetjies: Toets eers die water in die onbekende sodat die uitdaging minder oorweldigend voel. 
• Rus jouself toe en kry ondersteuning: Leer nuwe vaardighede aan en kry jou familie se ondersteuning. Ek het self beligting aangeleer en skroom nie om selfs toilette skoon te maak nie. Dis goed om elke aspek van jou onderneming te verstaan. 
• Glo in jouself: Skryf jou doelwitte in ’n joernaal neer en gun jouself genade. ’n Mislukking in een gedeelte maak jou nie ’n totale mislukking nie. 
• Bou ’n finansiële veiligheidsnet: Hou ’n bietjie kontant eenkant vir finansiële onafhanklikheid sodat dit makliker is om die groot sprong te neem. 

Sue Diepeveen in Grenslig by Vrystaat Kunste Fees 2026. Foto: Verskaf

Met Teater op Toer wat nou in die Strand onderweg is en dan na Paternoster reis, met ‘n ryk verskeidenheid produksies op die program, waaroor in die lewe en in jou loopbaan is jy tans die mees opgewonde?

Beslis die toneelspel. Dis tegelykertyd angswekkend én opwindend, maar baie bevredigend om die uitwerking op ’n gehoor te sien. Ek beskou dit as ’n gawe wat ek kan deel, en ek is dankbaar dat ek deel van hierdie beroep kan wees. Ek is ook baie lief vir regie en hoop om ’n projek aan te pak waarin ek dit meer kan verken. Hoewel ek die afgelope tyd wel ’n bietjie geskryf het, dink ek voortdurend nuwe projekte uit en moet ek net tyd vind om dit neer te pen.

• Bespreek jou kaartjies vir Teater op Toer in die Strand en Paternoster by The Drama Factory – www.dramafactory.co.za en Die Koelkamers – www.diekoelkamers.com
• Bespreek kaartjies vir Ms. B-haved by Sandton On The Square 15-19 September
  https://www.webtickets.co.za/v2/event.aspx?itemid=1596710096 en die Toyota Stellenbosch Woordfees 4, 5 & 6 Oktober by https://www.quicket.co.za/events/380026-ms-b-haved/#/

The post Sue Diepeveen – meer as net ’n aktrise en teater-eienaar appeared first on rooi rose.

Verskaf deur kykNET

Die Brink-familie en hul vriende maak foute, raak verlief, verloor koers en help mekaar om weer te probeer in die tweede seisoen van Reënboogrant wat vanaf Vrydag 28 Augustus om 18:30 op kykNET (DStv-kanaal 144) uitgesaai word.  

“Ek sal die tweede seisoen beskryf as ’n gejaag na sukses, liefde, identiteit en ’n stryd om gehoor te word,” sê André Velts, die regisseur en kreatiewe vervaardiger van die reeks. 

Reënboogrant hervat tydens die Desembervakansie, in die tragiese nadraai van Moniqué se ongeluk by die springgat. Terwyl haar vriende probeer sin maak van wat presies gebeur het, gaan die alledaagse voort: Rapporte word uitgedeel, nuwe studies en werksgeleenthede wink en ou verhoudings raak ingewikkeld.  

“Ons is opgewonde oor die reeks se terugkeer na kykNET en raai kykers aan om hul sitplekgordels styf vas te maak, want die avonture en uitdagings vir die Brink-familie in hierdie seisoen raak dieper en erger,” sê Soné Combrinck, medevervaardiger by Sonvelt Media, wat vir die reeks verantwoordelik is. 

Vir Shani Brink (Minke Marais) word die jaar ’n warboel van romantiese uitdagings. Sy is steeds verlief op die branderplankryer Dave Watkeys (Minke Marais), terwyl Johan Viljoen (Righard van Jaarsveld) nie gereed is om hul verhouding te laat gaan nie. Wanneer Jacques Bronkhorst (Vian Singleton) weer sy verskyning maak, raak Shani se hart én haar vriendskappe nog meer ingewikkeld. Haar ambisie om haarself te bewys plaas haar gereeld in situasies waar sy duur lesse moet leer.  

Haar broer, Dolf Brink (Paul Strydom), probeer intussen die emosionele nagevolge van die springgat-tragedie verwerk. Tussen universiteit, werk en sy geliefde Volla probeer hy vorentoe beweeg, maar wanneer Rachelle Labuschagne (Marelee Ferreira) terugkeer na Reënboogrant met geheime uit haar verlede, word sy lewe weer omvergewerp.  

Vir Sunette Brink (Mila de Villiers) bring die nuwe jaar atletiek, akademiese geleenthede en meer as een potensiële nuwe liefde. Die talentvolle musiekwonderkind Jaco (Louis Auret) gee haar nuwe perspektief, terwyl die jong onderwyser en atletiekafrigter Leon Tredoux (Liam Bosman) haar hart onverwags vinniger laat klop. Sunette se wêreld groei, en sy word genoop om belangrike besluite oor haar toekoms te neem.  

Maar dit is nie net die Brinks wat uitdagings in die gesig staar nie. Johan se obsessiewe strewe na atletieksukses begin gevaarlike gevolge hê. Japie Coetzee (Danté Elliot) en Hardus Bronkhorst (Jacques Gombault) se plan om vinnig geld te maak, bring hulle al dieper in die moeilikheid. Intussen word Marius Naudé (Wilco Meyer), Lizane Jacobs (Deidré Barnard), Bongi Buthelezi (Johnny Potsanyane) en die res van die vriendekring ook gekonfronteer met nuwe verhoudings, moeilike waarhede en persoonlike uitdagings.  

Reënboogrant S2 begin Vrydag 28 Augustus om 18:30 op kykNET (DStv-kanaal 144). Die reeks sal ook op Catch Up en DStv Stream beskikbaar wees.   

Lees ook: Elton Landrew oor hoe hy vaderskap vertolk in ‘Beter as gister’

The post Reënboogrant keer terug met liefde en nuwe moeilikheid appeared first on rooi rose.

“Na ’n dag vol hoop, teleurstelling en opwinding waag ons boere en hul gekose vyf die volgende tree op pad na liefde,” het Reandi Grey die vyfde episode van kykNET se gewilde maatsoekreeks ingelei. En uit die gekose vyf moes die boere weer hul harte op die spel plaas en net drie potensiële pasmaats kies om verder deel van die reeks te wees.  

Dit was natuurlik ook die vroue se beurt om die boere met vrae te peper. Willie was baie gemaklik daarmee want hy het gesê hulle kan hom enigiets vra wat hulle wil want “ek is wie ek is”.  

Op sy beurt het Jack dit as ’n baie groot uitdaging gesien, want hy het sommer vroeg reeds besef hy is eintlik reeds aangetrokke tot elkeen in sy top-5. 

Francois het dit duidelik gemaak dat hy na iemand soek saam met wie hy net 100% kan wees wie hy is.  

En wie gaan daarin slaag om vir Arno nuuskierig genoeg te maak sodat hy daardie persoon van naderby wil leer ken? 

“Ek is baie ernstig,” het JD oor sy deelname aan die reeks gesê en sy hoop was daarop gevestig dat daar werklik iets positief hieruit sou voortspruit. 

Smee die yster terwyl dit warm is 

Elke boer en sy gekose vyf het die geleentheid gekry om by Kashief Booley, Prins Albert se ystermit, se werkswinkel touwys gemaak te word oor wat hierdie oeroue vakmanskap behels. 

“Proper boer in ’n boer-pakkie,” is hoe Willie beskryf is toe hy en sy span hul hand aan die smee van yster gewaag het.  

Ook JD se vermoë met die hamer en warm staal het lof ingeoes. Terwyl die algemene gevoel was dat hy ’n bietjie skaam kan wees, het die vyftal geglo hy sal weldra ’n bietjie meer “uit sy boks” klim …

Maar Arno het besef hy is in die sop, want terwyl die hamer op die aambeeld weerklink het hy ook potensiaal in elkeen van sy gekose vyf raakgesien. Vir hom was selfvertroue die sleutel tot die toekoms. 

Vir Jack het dit meer gegaan oor persoonlikheid, maar die persoonlikheid wat meisies die meeste beïndruk het, was die gespierde voor- en bo-armspiere wat hulle kon sien terwyl hy die (swaar) hamer met gemak hanteer het. 

O, aarde! 

Reandi het saam met Francois en sy gekose vyf byeengekom en sommer dadelik met die deur in die huis geval vir Alicia die geleentheid gebied om ’n aankondiging te maak. Ongelukkig gaan sy nie vir die kuierweek op die plaas beskikbaar wees nie, selfs al wou sy hom nog beter leer ken. 

Reandi wou by haar weet hoekom sy voortgegaan het met die proses omdat almal wat deel van die reeks is, reeds geruime tyd die skedule tot hul beskikking gehad het. Alicia het net genoem dat sy gedink het sy sou dinge kon bewimpel sodat die plaasweek moontlik was, maar dit het nie so vir haar uitgewerk nie.  

Tot haar teleurstelling, maar op grond van haar besluit, kon Alicia nie deel van die dag se verrigtinge saam met die res deurbring nie. Sommige van die oorblywende vier was nie baie beïndruk met Alicia se besluit nie en hulle het gevoel dat deelname aan die program toewyding daartoe verg – soos plaas toe gaan omdat jy daar wíl wees. 

Francois het erken, selfs al was dit een van die ander meisies, sou hy steeds teleurgesteld gewees het. Hy sou graag aan die einde van die dag drie wou kies wat hy geglo het die regte drie is. 

Besluite, besluite, besluite  

Nadat die boere en hul gekose groep by verskillende restaurante in Prins Albert etes geniet het, was daar geleentheid vir een-tot-een-gesprekke – en dit het die naderende keuse van hul top-3 nóg moeiliker gemaak. 

Die groot vraag op almal se lippe was net om te weet wie gekies gaan word om op die plaas te kuier. 

Plaaskuier-keuses 

Arno (28), bosbouboer, Tzaneen (Limpopo) 

1. Joanè
2. Mariska
3. Rosanne

Francois (34), natuurbewaarder, Hoedspruit (Mpumalanga) 

1. Beniska
2. Danelle 
3. Sonel K

Jack (30), appel- en peerboer, Hermanus (Wes-Kaap)  

1. Anri
2. Hanli
3. Lené

JD (28), gemengde boerdery, Reitz (Vrystaat) 

1. Janke
2. Lara
3. Leoné

Willie (37), bees- en mielieboer, Harrismith (Vrystaat) 

1. Lezelle
2. Madelé
3. Tayla

En nóg ’n skok 

“Vir sommige mense raak die druk net te veel … die lees van situasies te moeilik, en die selfvertroue om te glo, dalk iets wat ontbreek,” het Reandi die situasie opgesom toe nog een van die gekose dames na afloop van die dag se verfilming besluit het om van die reeks te onttrek. 

Francois was ontredderd want Alicia het reeds vroegdag aangekondig dat sy haar van die reeks gaan onttrek. En nou was dit weer een van sy gekose top-5 wat nie kans gesien het om voort te gaan nie. 

Hy sou graag vir Danelle op die plaas wou gehad het en hy het genoem dat hy wel mense vooraf die geleentheid gegee het om voort te gaan met die proses of dan nie. 

Danelle het erken dat sy ’n konneksie met Francois gevoel het na die blitsafsprake … en toe voel sy net daar was nie meer ’n konneksie nie. Sy het haarself as ’n “all or nothing”-mens beskryf en genoem dat sy ook nie gedink het daar was ’n konneksie van Francois se kant met haar nie. 

’n Teleurgestelde Francois het aan haar genoem dat hy haar nie sou gekies het as hy nie haar beter wou leer ken nie.

Inskrywings vir seisoen 19 is oop 

Die vervaardigers van Boer soek ’n vrou is reeds op soek na boere vir die 19de seisoen van die reeks. 

Manlike en vroulike boere van alle ouderdomme mag inskryf, mits hulle ongetroud en ouer as 21 jaar is. 

Boere kan op die volgende maniere inskryf: 

• Besoek www.kyknet.tv om aanlyn in te skryf of ’n inskrywingsvorm af te laai. 
• Bel 079 614 2229. 
• Stuur ’n e-pos na: boer@wolflightsa.com 

Inskrywings sluit om middernag op 9 September 2026. 

• Die reeks word oudergewoonte op Donderdae om 20:00 op kykNET (DStv-kanaal 144) uitgesaai. 

Lees ook: Breyton Paulse se ‘Boerbokke’-rugbyreeks is reg vir afskop

The post ‘Boer soek ’n vrou’: Vyf word drie – met ‘n paar skokkende besluite appeared first on rooi rose.

Gobabis

Eastern Superstore CC t/a Foodzone
Shoprite Gobabis
Zest Investment 102 t/a Gobabis Spar

Grootfontein

Shoprite Grootfontein

Hentiesbaai

Henties Bay Spar
The 3R Bookshop

Kamanjab

Kamanjab Service Station & General Dealer

Karibib

OK Grocer Karibib

Keetmanshoop

Keetmanshoop Super Spar

Klein Windhoek

Klein Windhoek Supermarket

Okahandja

Shoprite Okahandja

Otjiwarongo

Jakarada Service Station
Midway Convenience Store CC
Otjiwarongo Service Station CC
Shoprite Otjiwarongo
Theo’s Spar

Outjo

Eben Retail Solutions CC

Rehoboth

Shoprite Rehoboth
Volkswinkel Trading Enterprises CC

Swakopmund

Checkers Swakopmund Waterfront
Ocean View Shell Service Station Swakopmund
Ocean View Spar
Shoprite Swakopmund
Swakopmund Spar

Tsumeb

OK Foods Tsumeb
Shoprite Tsumeb

Usakos

Hallie Investment 246 CC t/a Oasis Service Centre

Walvis Bay / Walvisbaai

Checkers Walvis Bay Dunes Mall
Karee Investments t/a Protea Spar
OK Portuguese Walvis Bay
Shoprite Walvis Bay

Windhoek

Checkers Klein Windhoek
Checkers Academia
Checkers Gustav Voigts
Checkers Maerua
Checkers The Grove
Checkers Wernhill
East End Express CC
Fountain OK Foods
Hochland Super Spar
Metro Supermarket Eros
OK Grocer Khomasrand
Rocky Crest Supermarket
The Grove Superspar
Wecke & Voigts Maerua Super Spar
Westlane Spar

 10 redes waarom jy rooi rose se Augustus-uitgawe móét lees!

The post rooi rose is terug op Namibië se rakke! appeared first on rooi rose.

Verskaf deur VIA

Die borrelende Sherlin Barends die een wat KFM-luisteraars soggens laat glimlag, selfs al sit hulle buffer teen buffer in die mees geknoopte van verkeersknope. En dit wil gedoen wees! Maar nou het die lieflike 36-jarige ma van ’n tweeling weer ’n nuwe uitdaging aanvaar – as die nuwe aanbieder van die derde seisoen van Ons gesels balans op VIA. 

Sy is darem nie ’n groentjie wat TV-werk behels nie. Kykers het reeds in 2012 met haar kennis gemaak toe sy deel was van Top Billing se soektog na nuwe aanbieders.  

Vandeesmaand neem sy die teuels van Ons gesels balans oor by Katryn Kruger en daar gaan gefokus word op die vind van balans tussen skoonheid, velsorg, gesonde dieet en oefening. 

Hoe sien Sherlin hierdie nuwe pad vorentoe vir haar uitspeel? 

Hoekom moet mense na Ons gesels balans kyk? 

Die lewe kan so maklik oorweldigend besig raak. Ons gesels balans is nie net ’n mooi herinnering daaraan om balans in jou lewe ’n prioriteit te maak nie – dit bied ons ook die geleentheid om elke week saam met ons gaste en kykers meer oor die proses te leer. Kykers kan uitsien na persoonlike verhale, praktiese demonstrasies en eerlike gesprekke waarin egtheid veel belangriker as perfeksie is. 

Dit is boonop my eerste TV-projek sedert ek ma geword het en dit dra by daartoe dat hierdie reeks vir my besonder spesiaal is. Die tydsberekening is perfek; dit voel asof alles net mooi in plek geval het. 

Jy is self iemand wat baie balle tegelyk in die lug hou. Wat is jou geheim om balans te vind én te handhaaf? 

Ek kan net so ’n vol lewe lei en soveel verskillende dinge aanpak omdat ek hulp het. Ek doen nie alles self nie, en ek wil ook nie. Ek is ongelooflik dankbaar vir my ondersteuningsnetwerk – my village – wat dit vir my moontlik maak.

Wat is vir jou die gevaartekens dat iemand tred verloor het met sy of haar eie gevoel van balans? 

Ek weet presies hoe dit vir my lyk en voel wanneer ek my eie balans begin verloor. Dit gebeur gewoonlik nie oornag nie, en daarom sal die pad terug na jou beste self ook nie noodwendig vinnig plaasvind nie. 

My ma vra gereeld: “Hoe eet ’n mens ’n olifant?” Die antwoord is eenvoudig: stukkie vir stukkie. Dieselfde geld wanneer jy weer balans wil vind of jou lewe wil verbeter. Wees geduldig met jouself.  

Vat dit een dag en een tree op ’n slag, en luister werklik na jou liggaam en vra jouself af: wat het dit nou nodig?

Jy glo dat ’n mens nooit moet ophou groei en leer nie. Waarop fokus jy tans in jou eie groeiproses? 

Asemwerk. Ek het my studie deur Breathwork Africa vir eers uitgestel, maar beplan om dit volgende jaar voort te sit. Intussen beoefen ek steeds bewustelike asemhaling. Iets besonders gebeur wanneer ons ons aandag doelbewus na ons asem bring. Kykers gaan dit ook in een van die komende episodes ontdek.

My tweeling is tans besig met potty training, en glo my, dit verg baie geduld én diep asemteue! Ek het ook geleer dat dit vir my kleuters makliker is om hul emosies te reguleer wanneer ek sélf kalm en gereguleer is. Soms – eintlik gereeld – begin balans bloot by die manier waarop jy asemhaal. 

Sherlin Barends is die nuwe aanbieder van ‘Ons gesels balans’ op VIA. Foto: Verskaf

Wie is vandag jou grootste inspirasie? 

My ouers inspireer my elke dag. Hulle is albei afgetree, maar hulle leef steeds sulke vol en betekenisvolle lewens. 

 Ek put ook inspirasie uit my jonger self. Daarom hou ek altyd ’n foto van myself as vyfjarige dogtertjie byderhand. Dit is vir my belangrik dat daardie dogtertjie trots op my sal wees; dat sy die dinge sal nastreef waarna sy verlang én omdat sy dit waardig is. Ek wil vir ons die lewe skep waarvan sy nog altyd gedroom het. 

As jy enigiemand ter wêreld as gas op Ons gesels balans kon nooi, wie sou dit wees en waarom? 

Die Amerikaanse aktrise Tracee Ellis Ross (Girlfriends, Black-ish). Sy inspireer my omdat sy ’n gebalanseerde lewe lei wat sy op haar éie voorwaardes gedefinieer het. 

Daar is ’n aanhaling van haar wat ek graag onthou: “Ek leer elke dag om toe te laat dat die ruimte tussen waar ek nou is en waar ek wil wees, my inspireer – eerder as om my bang te maak.” 

Ek is opreg dankbaar vir waar ek my tans bevind, maar terselfdertyd ook baie opgewonde oor alles wat nog voorlê. 

Ons gesels balans word Donderdagaande om 18:00 op VIA (DStv-kanaal 147) uitgesaai. Hierdie seisoen word deur Vitaderm Professional Skincare geborg.

Lees ook: Breyton Paulse se ‘Boerbokke’-rugbyreeks is reg vir afskop

The post Sherlin Barends bied eersdaags ‘Ons gesels balans’ aan appeared first on rooi rose.

Verskaf deur kykNET

Die skryfproses en die impak van ’n dramatiese verhaal op die skrywer word ondersoek in die kortfilm Verwerking, wat einde Augustus by die kykNET Silwerskermfees in Kaapstad debuteer.

’n Draaiboekskrywer, Jason (Jaques De Silva), stoei met ’n toneel oor geslagsgebaseerde geweld. Terwyl hy koorsig by sy lessenaar sit en tik, begin die woorde die werklikheid om hom vervorm. Die woord “Ma” (Bianca Flanders) op die bladsy laat ’n vrou in die vertrek verskyn; die woord “Pa” (Stian Bam) ’n man om haar te slaan. Tyd en ruimte word vervleg en skielik staar die skrywer hom vas in ’n gruwelike oomblik wat al jare by hom spook.

Verwerking is Peter-John Titus, ’n musikant-liedjieskrywer, se kortprent-debuut as filmmaker.

Vrae vir Peter-John Titus, skrywer en regisseur

Hoekom ’n verhaal spesifiek met geslagsgebaseerde geweld (GBV) as tema?

Ek sou nie sê GBV is die sentrale tema nie. Ek wou met hierdie kortfilm ondersoek instel na die kreatiewe proses van kunstenaars, spesifiek draaiboekskrywers. Wat gebeur in hulle koppe? Wat sien of hoor hulle as hulle stories skryf? Hoeveel van dit wat hulle skryf kom uit herinneringe? GBV is sentraal tot ons hoofkarakter se verborge verlede. Alhoewel die tema van die film die kreatiewe proses is, is GBV die storiemasjien wat die storie ontknoop.

Jy fokus ook op die kompleksiteit van gewelddadige verhoudings. Wei asb. uit hieroor.

Mense is kompleks, nie een persoon se denkraamwerk is dieselfde nie. Die redes hoekom die geweld ontstaan, is soms voor die hand liggend en soms nie. Dit beteken nie ek verskoon die fisieke of psigologiese geweld nie, al wat ons kan doen is om ’n spieël op te hou wat die waarheid van die wêreld wys. My poging is dus om ’n karakter se storie met geloofwaardigheid en deernis te vertel.

Watter rol kan so film speel in bewusmaking? En wie mag hierdie stories vertel?

Verwerking – soos die film Sewe (oor ’n vrou wat keer op keer probeer om haar gewelddadige man te verlaat) wat laasjaar by die Silwerskermfees gedebuteer het – het die mag om gesprekke uit te lok, ’n nuwe perspektief te skep, en hopelik introspeksie te bevorder.

Ek dink almal mag die hierdie stories vertel, met sensitiwiteit in gedagte. Die feit dat GBV uit ’n man se perspektief belig word, skep ruimte vir mans om hulle stories te vertel, nie net as kwaaddoeners nie maar ook as slagoffers.

Jy span verskillende genres en style in. Vertel meer, ook oor die motivering daarvoor.

Ek span beslis verskillende genres in deur Jason se verbeelding wat manifesteer in sy huis terwyl hy skryf. Tydens die voorproduksie het ek ’n bietjie navorsing gedoen oor die ooreenkomste tussen kunstenaars en neurodiversiteit en het so op die karaktereienskappe van hiperfantasie afgekom. Dit het my opgewonde gemaak om met die verskillende genres te speel, want dit kom natuurlik vir my hoofkarakter. Ek kon ook eksperimenteer met verskillende sosio-ekonomiese klasse, taalpolisiëring en dialekte om te wys hoe Jason se verbeelding nie net sy innerlike wêreld ontbloot nie, maar ook die sosiale werklikhede, magsverhoudinge en herinneringe wat sy trauma gevorm het.

Wat is die gedagte agter die titel? Is dit waar die hoop lê?

Die titel is dubbelsinnig, ’n woordspeling as jy wil. Jason verwerk sy psigologiese trauma, terwyl hy daardie selfde trauma in ’n draaiboek in verwerk.

Ek glo daar is seer sekerlik hoop. Ek dink as ons mans bou op wat die vroue van Suid-Afrika reeds vermag het deur GBVF as ’n nasionale ramp te laat verklaar, gaan ons as ’n nasie groter hoogtes bereik.

*Die 14de kykNET Silwerskermfees word van 19 tot 22 Augustus in Kampsbaai, Kaapstad, aangebied. Kaartjies vir die films, asook die prestigeryke toekenningsgeleentheid op Saterdag 22 Augustus, is beskikbaar by Quicket.

Vir die volledige program, besoek www.silwerskermfees.co.za.

Lees ook: ‘Pappa Kitsch’ ondersoek egtheid van Tretchikoff-skildery

The post Kortfilm ‘Verwerking’: ondersoek geweld en skryfproses appeared first on rooi rose.

Verskaf deur kykNET

Eg of nie eg nie. ’n Storie is dit beslis. Dit is presies hoekom Stefanus Nel uit die staanspoor sy ondersoek gedokumenteer het om die egtheid van ’n Tretchikoff-skildery vas te stel wat hy aanlyn gekoop het. 

Die kort dokumentêre film Pappa Kitsch, wat einde Augustus by die kykNET Silwerskermfees in Kaapstad vertoon word, vertel die verhaal van Nel se aankoop van ’n olieverfskildery van Vladimir Tretchikoff, destyds bekend as die vader van kitsch, maar wie se werk nou vir miljoene rand verkoop

Deel van sy aankoop was ’n plakboek van die vroeëre tydperk van Tretchikoff se loopbaan. Nel, eertydse joernalis en inhoudskepper, se nuuskierigheid was geprikkel. En tesame met sy angstige worshond, Rocky, het hy ’n lang reis aangepak en onder andere by kenners aangeklop om die egtheid van die skildery te ondersoek. In die proses wys hy ook vir die kyker dat die konsep van iets se waarde veel wyer strek as blote rand en sent.

Vrae vir Stefanus Nel, mede-regisseur (en hoofkarakter)

Vertel hoe die idee posgevat het. 

Ek het van dag een af geweet daar is ’n storie agter die boek en skildery. Hoe meer navorsing ek gedoen het, hoe meer vrae het ontstaan. Ek het baie aande wakker gelê en gewonder hoe die legkaart in mekaar pas. Ek het in ’n stadium vir Adam Heyns (Kaapstadse filmmaker en mede-regisseur) daarvan vertel, en hy was net so opgewonde om agter die kap van die byl te kom. Ons het gereeld bymekaargekom en die projek bespreek. Ek het alles gaan oplees oor Tretchikoff en sy storie het my net meer nuuskierig gemaak. 

Is jy ietwat van ’n opgaarder? Want jou motorhuis lyk bietjie vol…

Ek het ’n Bidorbuy-probleem gehad en het allerhande goed gekoop wat ek nie regtig wou hê of nodig gehad het nie. Gelukkig was die skildery en boek deel daarvan. Ek het goed gekoop wat ek geglo het daar skuil ’n storie daar agter – soos ’n interessante medalje, foto’s, ag, enigiets wat op ’n stadium vir iemand iets beteken het. Ek het ’n sterk verbeelding so ek kan byvoorbeeld maklik dink hoe die jong langafstandatleet gevoel het toe hy sy silwer medalje ontvang het in 1935. 

Dit is ook die eerste keer dat jy wêreld van dokumentêre film betree. Vertel meer van jou agtergrond en waar jou nuuskierige aard vandaan kom.

Ek is ’n joernalis wat oorgeskuif het na die reklamebedryf. Ek het nog altyd van stories en idees gehou. Ek is ook lief vir kuns en was nog altyd gefassineer deur Tretchikoff se lewe. Hy was ook ’n advertensieman en sy werk was nie net mooi nie – daar was altyd ’n konsep ingeweef. 

Dit is nogal ’n waagstuk om ’n ware “ondersoek” as ’n film aan te pak, want mens weet nie hoe dit gaan ontvou nie. Hoe werk die beplanning? Wat was die grootste uitdaging?

Ons het geen idee gehad hoe die storie gaan ontvou nie. Die enigste beplanning wat ons kon doen, was om onderhoude met mense op te stel en te hoop dat hulle instem daartoe. Ons was gelukkig  dat alles net in plek geval het. Die grootste uitdaging was oor wat ons gaan doen as sleutelfigure nie instem om deel van die dokkie te wees nie. 

Tretchikoff en Suid-Afrika (en Suid-Afrikaners) het nogal ’n geskiedenis. Wei uit daaroor. 

Tretchikoff is nie met ope arms deur die kunswêreld ontvang nie. Inteendeel hulle het dit vir hom moeilik gemaak om selfs net sy kuns uit te stal. Die ironie is, hy het van ’n plek gekom – Singapoer – waar hy beroemd was en gereeld in die koerante verskyn het. Sy werk is wyd geloof. Hy moes eintlik van voor af begin in Suid-Afrika. Die kunswêreld en die publiek se mening oor Tretchikoff het hemelsbreed verskil. Die kunskenners het sy werk gekritiseer en afgebreek terwyl die publiek tou gestaan het om ’n Tretchikoff-afdruk te bekom.

Vertel van die ervaring oor die samewerking met die mense van die kunswêreld. Is dit maklik vir sommer enigiemand om die waarde van ’n skildery/erfstuk vas te stel wat iewers staan en stof vergaar.

Kunskenners was baie huiwerig om ’n besluit te neem oor of die skildery eg is of nie. Dit is verstaanbaar, want dis hul reputasie wat op die spel is – indien ’n skildery verkoop word en dit kom later uit dit is nie eg nie kan dit in ’n helse storie ontaard. Dit het al gebeur, so ek dink hulle bly maar versigtig. 

Voer jy enigiets anders in die mou?

Ek is besig om te skaaf aan ’n idee vir ’n dokumentêr wat ek hopelik volgende jaar sal kan inskryf vir die Silwerskermfees. 

*Die 14de kykNET Silwerskermfees word van 19 tot 22 Augustus in Kampsbaai, Kaapstad, aangebied. Kaartjies vir die films, asook die prestigeryke toekenningsgeleentheid op Saterdag 22 Augustus, is beskikbaar by Quicket.

Vir die volledige program, besoek www.silwerskermfees.co.za.

Lees ook: Liefde gedy in stilistiese komiese kortprent ‘Twee persent’

The post ‘Pappa Kitsch’ ondersoek egtheid van Tretchikoff-skildery appeared first on rooi rose.