Bewonder & Bewaar met Bonné de Bod keer op 19 April 2026 om 20:00 terug na kykNET met ’n splinternuwe seisoen wat kykers op ’n asemrowende reis deur van die wêreld se mees ikoniese en afgeleë wildernisgebiede neem. Van Suid-Afrika se nasionale parke tot Namibië se kuslyn, die sneeubedekte berge van Noord-Amerika en die kristalhelder waters van die Karibiese See – hierdie seisoen bied 13 kragtige verhale oor die natuur, menslike toewyding en ontdekking.

Bewonder & Bewaar word aangebied deur die bekroonde aanbieder en filmmaker Bonné de Bod, wat kykers tot diep in die hart van inspirerende bewaringswerk begelei. Elke episode bied ’n unieke venster op die mense en diere wat ons planeet vorm en beskerm.

Hier is vyf redes om te kyk:

Goedvoel-TV vir die hele gesin

Elke episode neem kykers saam met Bonné na wildernisgebiede dwarsoor die wêreld, waar sy saam met navorsers, veeartse en wetenskaplikes tyd deurbring in hul natuurlike werkomgewing.

Die reeks fokus op eg menslike stories van passie en toewyding – 13 bewaringsbewustes wat elkeen hul lewe daaraan wy om die planeet te beskerm. Bonné se warm, intieme vertelstyl vang die emosie en verwondering van hierdie ervarings vas en skep ’n gevoel van verbondenheid wat kykers bybly.

Die helde agter die diere

Hoewel die diere en natuur sentraal staan, is die mense agter die bewaringswerk die hartklop van die reeks. 

Onder hulle is Cristina Zenato, wêreldbekend vir haar buitengewone band met rifhaaie; dr. Peter Buss, ’n legende in wildveeartsenykunde in die Krugerwildtuin, en Wendy Baxter, een van ’n klein groepie mense wêreldwyd wat reuse-sequoias klim om hul ekologie te bestudeer. Ook Naude Dreyer se robreddingswerk in Namibië, Samuel Madalane se K9-eenheid in die Krugerwildtuin, en Santosh Bachoo se nagnavorsing van seeskilpaaie word van nader bekyk.

Groot én klein wonderwerke van die natuur

Van die grootste roofdiere op aarde tot die kleinste en mees ontwykende spesies – hierdie seisoen vier die volle spektrum van die natuur.

Kykers sien hoe Bonné saam met haaie duik en snags leeus in die Krugerwildtuin monitor, maar ook hoe sy die delikate Knysna-seeperdjie en die geheimsinnige klaasneusmuis (sengi) bestudeer. In die woestyn word die merkwaardige toktokkie en ander klein spesies ondersoek wat perfek aangepas is vir hul barre omgewing.

’n Intieme, eerstehandse belewenis

Bewonder & Bewaar met Bonné de Bod plaas kykers in die middel van die aksie – of dit nou in ’n helikopter is wat die skade van die 2026-vloede in die Krugerwildtuin dokumenteer, of ’n nag-operasie saam met veeartse in die veld, of onder water in die Karibiese See tussen rifhaaie.

Die episode oor die vloede word op besonder persoonlike wyse vertel deur die mense wat self deel van die rampverligtingspogings was. Van bo in ’n helikopter sien kykers die vernietiging by, onder meer, Letaba-brug en Shimuwini-kamp, wat die impak veel treffender as nuusbeeldmateriaal wys.

Die visuele storievertelling is wêreldklas

Agter die kamera is die bekroonde regisseur Susan Scott, ’n Safta-wenner en internasionaal ervare natuurfilmmaker. Scott bring meer as twee dekades se ervaring na die reeks en werk met ’n indrukwekkende verskeidenheid tegnieke en lense – van 600 mm-telefoto-opnames tot makrolense. Daar is ook indrukwekkende onderwater-kinematografie, termiese nagvisie en landskappe wat met 8K-tydsverloopvideografie vasgevang is.

Die reeks is verfilm in agt nasionale parke en vyf natuurreservate oor vier lande heen, insluitend die Krugerwildtuin, NamibRand, Dorob Nasionale Park, die |Ai-|Ais/Richtersveld-oorgrenspark, die Sierra Nevada en Bahamas. Die kamerawerk laat kykers elke keer voel asof hulle self daar is.

Bewonder & Bewaar met Bonné de Bod begin op 19 April om 20:00 op kykNET (DStv-kanaal 144) en sal ook op DStv Stream en Catch Up beskikbaar wees. Die reeks het Engelse onderskrifte.

Lees ook: Lekker & goed se pienk partytjie & resepte vir saamgooi-kos!

The post Vyf redes waarom jy dié seisoen van ‘Bewonder & Bewaar met Bonné de Bod’ wil ervaar appeared first on rooi rose.

Dit loop soos kaaskoek-stroop in Lekker & goed op kykNET met die gesoute resepteboekskrywer en huishoudelike naam, Carmen Niehaus, wat kykers touwys maak met die allerlekkerste kos- en drinkdinge wat met rooibostee aanmekaar gesit kan word.

En deurentyd word daar natuurlik heerlik saamgekuier aan die Weskus met bekendes, geliefdes en soms selfs onverwagte gaste.

Soos altyd, sorg Carmen dat daar iets spesiaal voorgesit word wat elke gas nog meer welkom laat voel.

In die tweede episode van die tweede seisoen het Carmen heel gepas twee gaste – en altwee van hulle lê haar baie na aan die hart: Lize du Preez, haar susterskind, en Ilze Bruwer. Lize is die bemarkingsdirekteur van Carmién Tea en Ilze is die voedseltegnoloog by die groep.

Ilze se kennismaking met rooibos kom reeds van kleintyd af se kuier op haar oupa se plaas by Nieuwoudtville en sy onthou van die rooibostee wat altyd so sterk op die Aga-koolstoof gebrou het.

Lize het natuurlik met rooibostee grootgeword en sy onthou hoe sy ook as kind reeds deur ma Mientjie, Carmen se tweelingsuster, geraadpleeg is oor verpakking. Geen wonder sy het as die bemarkingsdirekteur ontpop nie!

So tussen die bak en brou deur word daar kopstukke gesels – en die gesprekke wentel oor ingewandsgesondheid, omgewingsvriendelike verpakking en die geurprofiele van elkeen se voorkeur.

RESEPTE: SAAMGOOI-KOS/DEELKOS

Pienk Pons

Genoeg vir 2 liter

Ysbak

• 2 liter water
• Kruie van jou keuse
• Vars blomme

Pons

• 1 liter water
• 200 g (250 ml) suiker
• 500 g sak bevrore, gemengde bessies
• 6 sakkies Carmién Cranberry Hibiscus Cold Brew
• 1 kg gebreekte ys
• 2 liter limonade

METODE

Ysbak

1. Kook 2 liter water en laat dit afkoel. Kook weer en laat afkoel tot koud – dit maak die ys deursigtig.
2. Vul ’n groot, ronde, vriesbestande bak halfpad met die koue water.
3. Plaas ’n tweede kleiner ronde bak in die water en plaas iets swaar soos blikkieskos binne-in wat die gewig van die bak afdruk en die water in die onderste bak tot by die rand van die groot bak laat styg. (Maak seker dat die kleiner bak nie op die bodem van die onderste bak druk nie.)
4. Plak twee repe maskeerband oorkruis bo-oor albei bakke sodat dit stewig sit.
5. Druk kruie en vars blomme in die water en vries oornag.

Pons

1. Plaas 1 liter water, suiker en bessies in ’n middelslagpot en bring tot kookpunt.
2. Laat kook 5-8 minute of tot vloeistof met die helfte verminder het.
3. Verwyder van hitte en voeg teesakkies by. Laat trek 5-8 minute of langer indien jy dit sterker verkies.
4. Verwyder teesakkies en laat die stroop afkoel tot heeltemal koud. Verwerk metstaafmenger tot puree.
5. Haal bakke uit vrieskas, doop dit vinnig in kookwater en haal die ysbak uit.
6. Plaas op ’n mooi bord, gooi ys en koue stroop in ysbak.
7. Gooi limonade by en meng liggies deur.
8. Sit voor met ekstra vars bessies, indien verkies.

Saadlavash met beethoemoes en gerookte tamatiepiekels 

Saadlavash

Maak 10 groot stukke

• 375 ml (1½ k) hawermout
• 125 ml (½ k) saadmengsel (sonneblom, pampoen, lynsaad)
• 30 ml (2 e) chia-sade
• 15 ml (1 e) phylliumvesel
• 15 ml (1 e) paprika
• 5 ml (1 t) sout
• 80 ml (⅓k) olyfolie
• 500 ml (2 k) Carmién groen rooibostee, afgekoel

Vir afronding

• Olie
• Taco-speserymengsel
• Swart sesamsade

METODE

Voorverhit die oond tot 230°C. Voer ’n bakplaat met bakpapier uit en spuit goed met kossproei.

1. Meng al die droë bestanddele, voeg ook die paprika en sout by.
2. Meng die olie met helfte van die rooibostee en voeg by die droë bestanddele.
3. Meng goed en voeg dan net genoeg rooibostee by om ’n smeerbare deeg te maak.
4. Smeer die deeg so dun as moontlik op ’n bakplaat met ’n deegskraper.
5. Verf met olie en gebruik jou vingerpunte om die deeg egalig plat te druk.

Afronding

1. Sprinkel bietjie taco-speserymengsel oor, asook sesamsaad.
2. Bak 15 minute tot gaar en effe bros rondom die kante. (Verf halfpad deur die bakproses weer met olie).
3. Draai om, verf die onderkant ook met olie en bak ’n verdere 7-10 minute tot bros.
4. Laat dit afkoel en breek in stukke.
5. Bêre in ’n lugdigte houer.

Wenk: Maak weer lekker bros deur die stukke lavash in ’n lugbraaier te bak vir sowat 5 minute.

Beethoemoes

Sesamsaadolie

• 60 ml (¼ k) olyfolie
• 45 ml (3 e) sesamsaad

Hoemoes

• 500 ml (2 k) gaar beet
• 1 blik (400 g) kekerertjies – dreineer, behou vloeistof
• 3 knoffelhuisies, fyngedruk met 3 ml sout
• 2 groot suurlemoene se sap en fyngerasperde skil
• 3 ml (ruim ½ t) elk, fyn komyn en paprika
• Carmién groen rooibostee na smaak

METODE

Sesamsaadolie

1. Verhit die olie in ’n pan en braai die saad tot goudbruin, maar nie te donker nie.
2. Koel af.

Hoemoes

1. Plaas al die bestanddele in die voedselverwerker en verwerk tot glad, voeg die sesamsaadolie en net genoeg groen rooibostee by om ’n fluweelgladde mengsel te maak.
2. Skep in ’n bakkie en sit voor met die piekels en lavash.

Gerookte tamatiepiekels

Maak 1 bottel (750 ml) piekel per groente soos hieronder aangedui

Bereiding: 20 min

Gaarmaak: 6 min

Beroking

• 30 ml (1 e) los rooibosteeblare
• 30 ml (2 e) rys

Groente

• 1 kg baba-tamaties
• 2 gekapte uie
• 5 gerasperde knoffelhuisies
• Sout, bietjie suiker en olyfolie

Piekelsous

• 500 ml (2 k) appelasyn
• 500 ml (2 k) water
• 15 ml (1 e) sout
• 125 ml (1/2 k) suiker
• 1 sakkie Carmién Gut-rooibostee

Speserymengsel

• 7,5 ml (1½ t) heel koljandersaad
• 5 ml (1 t) heel vinkelsaad
• 5 ml (1 t) mosterdsaad

METODE

Was en steriliseer glasflesse en deksels.

1. Plaas teeblare en rys op ’n groot vel tinfoelie en vou toe. Prik die bokant vol gate.
2. Plaas ’n vel tinfoelie in ’n swaarboomkastrol en plaas die pakkie tee bo-op.
3. Pak die tamaties rondom. Maak toe met deksel.
4. Verhit plaat op hoog tot rook begin vorm en by die deksel uitsypel. Verlaag hitte en rook 3-5 minute.
5. Pak die tamaties, uie en knoffel op ’n bakplaat, geur met sout en bietjie suiker en sprinkel bietjie olyfolie oor. Oondbraai sowat 20 min tot die skilletjies net begin bars. Skep in die gesteriliseerde flesse.
6. Giet die bestanddele vir die piekelsous in ’n kastrol en voeg die speserymengsel by.
7. Bring tot kookpunt en kook 5 minute. Verwyder die teesakkie.
8. Giet die piekelmengsel oor die tamaties, maak seker dat die groente heeltemal bedek is.
9. Maak flesse toe en seël. Keer onderstebo en laat afkoel.
10. Laat staan sowat 3 dae voor jy dit voorsit.

Mentolywe

Maak sowat 500 ml

Bereiding: 20 min

Piekelmengsel

• 4 knoffelhuisies, fyngerasper
• 45 ml (3 e) kappertjiesade
• 15 ml (1 e) komynsaad
• 15-30 ml (1-2 e) paprika
• 7,5 ml (1½ t) sout
• 125 ml (½ k) sultanas, afgespoel in kookwater
• 250 ml appelasyn
• 250 ml water, met 1 sakkie Carmién Revive-rooibostee

Olywe

• 150 g elk swart en groen olywe
• 80 ml (⅓ k) ment, goed afgespoel en fyngekap
• Olyfolie om te bedek

METODE

1. Meng al die bestanddele vir die piekelmengsel en bring tot kookpunt.
2. Pak die olywe saam met die ment in ’n skoon fles en giet die piekelmengsel oor.
3. Vul aan met olyfolie tot net bedek.
4. Verseël.

Oosterse poke-garnaalslaai 

Slaaisous

Maak sowat 180 ml

• 60 ml (¼ k) rysasyn
• 15 ml (1 e) sjoesji-asyn
• 60 ml (¼ k) vars lemmetjiesap en skil van 4 lemmetjies
• 125 ml (½ k) sterk Carmién Citrus Camomile-groen rooibostee (3 sakkies)
• 125 ml (½ k) sterk Carmién Revive-groen rooibostee met gemmer en brandrissie (2-3 sakkies)
• 60 ml (4 e) sojasous
• 15 ml (1 e) sesamolie
• 15-30 ml (1-2 e) suiker of heuning
• 2 knoffelhuisies, fyngerasper
• 45 ml (3 e) koljanderblare, gekap
• 45 ml (3 e) Poke-geurmengsel

Proteïene

• 500 g gaar gestoomde garnaalvleis (giet van die slaaisous oor)

Bolaag: Sowat 125 ml elk

Groente: Kool-en-wortel, baba-spinasieblare, edamame-bone, mini-komkommerstukkies en avokado-stukkies

Vrugte: Stokkies nektarien of pruime

Afronding: Sesamsade en piekelgemmer en poke-speserye

METODE

Sous: Plaas al die bestanddele in ’n kastrolletjie en bring tot kookpunt. Koel af en giet in ’n botteltjie.

Poke-bakkies

1. Giet bietjie van die sous oor die gaar garnale en laat staan terwyl jy die res van die slaai bymekaarsit.
2. Pak die groente en garnale in hopies op ’n bord of groot slaaibak.
3. Giet die sous in ’n klein bekertjie en plaas daarnaas.
4. Sprinkel paar stukkies piekelgemmer asook van die poke-speserye mildelik oor en sit voor (die eter kan nog van die sous oorgiet).

Kaaskoek met boegoevrugte

Maak 1 medium kaaskoek

Kors

• 80 ml (⅓ k) bruinsuiker
• 250 ml (1 k) hawermout
• 50 g gekapte neute of pampoensade
• 60 ml (¼ k) klappermeel
• Knippie bakpoeier en sout
• 80 g botter, gesmelt
• 1 eierwit

Vulsel

• 2 x 230 g gladde, geroomde maaskaas (creamed cottage cheese)
• 250 ml (1 k) volroom, natuurlike jogurt
• 25 ml (5 t) mielieblom
• Sap en gerasperde skil van 1 suurlemoen
• 4 eiers
• 125-180 ml (½ -¾ k) bruinsuiker
• Knippie sout

Bolaag

• 3-4 nektariens, perskes of pruime in skyfies gesny
• 30 ml (2 e) bruinsuiker
• 125 ml (½ k) Carmién Pure rooibostee (1 sakkie) en Carmién Buchu-en-rooibos (1 sakkie)
• Vars vrugte vir afronding

METODE

Voorverhit die oond tot 120˚C

Kors

1. Plaas die bruinsuiker, hawermout, neute, klappermeel, bakpoeier en sout in die voedselverwerker en kap goed fyn.
2. Voeg die botter deur die tuit by en meng goed .
3. Voeg die eierwit by en meng tot ’n deeg.
4. Skep uit en druk vas in ’n 23 cm losboompan – teen die boom sowel as die kant.

Vulsel

1. Klits al die bestanddele saam tot net gemeng, nie skuimerig nie.
2. Giet in die kors.
3. Bak 1-1½ uur of tot die vulsel stewig, maar steeds nog effe drillerig is.
4. Skakel die oond af en koel af in oond as jy tyd het.

Bolaag

1. Kook die vrugteskyfies saam met die suiker en rooibostee tot effe stroperig.
2. Koel af en meng vars vrugteskyfies by.
3. Skep oor die afgekoelde kaaskoek.

Voorsit

Skep van die salsa in elke koppie en geniet.

Lekker & goed word Donderdagaande op kykNET (DStv-kanaal 144) om 17:30 uitgesaai of stroom op DStv Stream.

Lees ook: Lekker & goed-resepte: Tennis en tee met Hannes van Wyk

The post ‘Lekker & goed’ se pienk partytjie & resepte vir saamgooi-kos! appeared first on rooi rose.

Deur Maryke Roberts. Foto’s: Showtime Management

Die 1990-rolprent Pretty Woman, met Julia Roberts en Richard Gere in die hoofrolle, is seker een van die laaste paar dekades se bekendste en mees geliefde flieks. Met musiek deur Bryan Adams, Jim Vallance en natuurlik Roy Orbison se 1964-liedjie, “Oh, Pretty Woman”  waarop almal weer van vooraf verlief geraak het, is dit dié moderne sprokie.

Vivian Ward (Julia Roberts) is ’n Hollywood-prostituut en toe Edward Lewis (Richard Gere) een aand by haar stop om aanwysings te vra, verander haar lewe onherroeplik.

Wat as ’n eenvoudige transaksie begin het (ses dae as sy metgesel vir belangrike sake) ontwikkel in iets meer. In die weelderige suite van die Beverly Wilshire-hotel leer Edward vir Vivian van etiket en die krag van rykdom. Vivian het hom egter iets veel belangriker geleer: hoe om weer regtig na mense te kyk, en Vivian raak verlief.

Maar die sprokie moes ’n einde kry en toe dit voel asof Edward haar liefde wil koop, kies sy die hasepad.

Edward kom tot sy sinne en red nie net vir Vivian uit haar siellose bestaan nie; dit was Vivian wat hom uit die kloue van sy eie siellose jaag na sukses gehaal het. Hulle het mekaar gevind en besef dat liefde die enigste geldeenheid is wat werklik tel.

Die trefferfliek is in ’n musiekblyspel, Pretty Woman: The Musical, omskep en het in 2018 op Broadway geopen, en uitverkoopte vertonings in die Londense Weseinde en toere in Noord-Amerika en Europa gehad. Dit speel tans in Suid-Afrika – by die Kunstekaap en daarna vanaf 24 April by Montecasino’s Teatro– met ’n Suid-Afrikaanse rolverdeling.

Die Suid-Afrikaanse geselskap bestaan uit meer as 50 lede wat 24 akteurs en ’n sesstukorkes insluit.

Vivian Ward word vertolk deur Leah Mari, wat haar professionele debuut as Maria in The Sound Of Music in  2023/24 gemaak het en die Fleur du Cap-teatertoekenning vir “Beste Prestasie deur ’n Hoofaktrise in ’n Musiekblyspel” gewen het vir haar rol as Eliza Doolittle in My Fair Lady in 2024/25. Meer onlangs het Leah die rol van Kitty in Chicago The Musical gespeel.

Pretty Woman: The Musical word vervaardig deur Showtime Management in samewerking met Crossroads Live North America. Geen o/12’s, en ouerbegeleiding word aangeraai.

Bespreek by www.ticketmaster.co.za

Vrae aan Leah Mari wat die rol van Vivian in die musiekblyspel vertolk:

Jy het onlangs ’n Fleur du Cap vir jou vertolking van Eliza Doolittle gewen, en dis nog ’n karakter wat ’n ingrypende transformasie ondergaan. Wat trek jou na hierdie tipe rolle aan waar vroue hul eie stem en plek in die wêreld moet vind?

Dit is altyd so opwindend as aktrise om met komplekse en gelaagde karakters te werk. Dit voel die menslikste wanneer ’n karakter ’n baie duidelike begeerte en missieverklaring het. Ek is daarom mal oor Vivian. Die waarheid is dat hierdie soort karakters my inspireer. Hierdie vroue sien meer vir hulself en wanneer die wêreld vir hulle sê dat hulle bestem is om een ​​ding te wees, trotseer hulle letterlik dit wat teen hulle opgestapel is. Dit is so ’n voorreg om daardie narratief te dra en ander te inspireer met die boodskap wat sê moenie moed met ’n droom verloor nie.

Het jy die fliek geken voor jy die rol gekry het en wat was jou indruk daarvan?

Ja! Ek het dit een of twee keer gekyk en was mal daaroor! Dis ’n klassieke romantiese komedie met ’n edgy en egte toon. Ek is mal oor die regisseur Garry Marshall. Daar was dus iets bekends aan die toon en gevoel toe ek aan hierdie materiaal begin werk het en die fliek bestudeer het. Ek wou dit nie te veel kyk nie, want ek wou Vivian my eie maak. Maar daar is soveel nostalgie verbonde aan die fliek en ek wou graag só hulde daaraan bring in my interpretasie van hierdie karakter. Dit sal altyd ’n ikoniese fliek wees, en só ook Julia Roberts.

Die musiek van Bryan Adams en Jim Vallance bring ’n vars “rock-energie” na die verhoog. Hoe verskil die stemtegniese uitdagings van Pretty Woman van die klassieke operetstyl van The Sound of Music of die tradisionele musiekteater van My Fair Lady?

Dis ’n goeie vraag. Hulle is heeltemal verskillende sangstyle, elk met hul eie uitdagings en eienskappe. Pretty Woman vereis ’n baie kontemporêre en “big-belt”-styl. So my opleiding wat tot hierdie rol gelei het, was om baie kontemporêre musiek te sing en my vokale fiksheid op te skerp. Ook letterlik om my keel en stembande te oefen om gewoond te raak aan die plasing van hierdie liedjies. Eliza en Maria, aan die ander kant, het ’n meer legato en “gladde” “liriese” vokale behandeling benodig. In die teater noem ons dit “legitieme” sang. Die opleiding daarvoor is baie asemwerk en die strek van die stem. Dit is nie onmoontlik om ’n kunstenaar te wees wat hierdie style kan bereik nie. Trouens, dit word aangemoedig. Dit vereis egter baie opleiding. Soos ’n hardloper anders sou oefen vir naellope teenoor langafstand, kan dieselfde vir sang gesê word. Jou plasing van die stem, jou toon, jou ratsheid en jou frasering moet aanpasbaar wees sodat jy in verskeie style kan sing.

Vivian Ward is ’n rol wat deur Julia Roberts verewig is. Hoe balanseer jy die gehoor se verwagtinge van daardie ikoniese vertolking met jou eie, unieke Suid-Afrikaanse interpretasie van die karakter?

Julia is ikonies. Sy het soveel na die fliek gebring waarvan mense hou. My werk was nie om myself te vra: “Hoe kan ek soos Julia wees nie”, maar eerder om myself te vra: “Wat is dit wat mense van haar in die fliek gehou het? Wat het regisseur Garry Marshall in haar na vore gebring?” Nadat ek die fliek gekyk het, was dit duidelik dat dit haar lag, haar glimlag, haar opregtheid en haar deursettingsvermoë was. Sy is so ongelooflik opreg in die rolprent. Jy kan nie anders as om haar lief te hê en te wil hê sy moet slaag nie. Sy is dapper en sterk en pragtig en opgewonde om te lewe. My werk begin dan wanneer ek myself afvra: “Hoe lyk dit op Leah?” Dit gaan alles daaroor om dit te eerbiedig wat Julia gebring het sonder om te probeer kopieer. Ek moes die lag, die dapperheid, die moed en die opregtheid vanuit ’n eerlike en ware plek as Leah vind.

Jy speel teenoor Christopher Jaftha as Edward. Hoe het julle saamgewerk om die broeiende spanning en uiteindelike emosionele verbintenis tussen hierdie twee geesgenote geloofwaardig te maak?

Dis wonderlik om saam met Chris te werk. Hy was vanaf die eerste dag af vrygewig en warm. Wanneer jy so nou saam met ’n akteur werk, moet jy vertroue hê. Ons werk as akteurs steun so swaar op ons vermoë om empaties en weerloos voor mekaar te wees. Ek en Chris het ’n pragtige ruimte geskep om presies dit te doen. Ons het saam met ’n ongelooflike intimiteitskoördineerder, Èmil Haarhoff van Safe Sets, gewerk. Hy het ons gehelp om die intieme tonele veilig en pragtig te skep. Die repetisie-herverwerking is ook so waardevol. Om met Chris op die verhoog en af van die verhoog ’n verbintenis te bou, is só noodsaaklik om daardie vertroue te bou.

As jy terugkyk na jou dae as Dalro-beurshouer in 2019, wat sou jy vir daardie Leah sê oor die pad wat voorlê?

Ek sou sê “wow meisie, maak jou gordel vas!” Daardie klein Leah het sulke groot drome gehad, en ek dink ek wil haar bedank dat sy nooit moed opgegee het nie; en dat sy dapper genoeg was om haar hart te laat praat en haar instinkte te volg. Ek sou haar bedank dat sy haarself in die proses liefhet en wys genoeg was om te groei en te werk aan die aspekte van haarself wat sy geweet het leiding en verfyning nodig het. Ek is so trots op haar.

Vivian se uiterlike verandering (van die bekende stewels na die rooi rok) is visueel treffend, maar wat is vir jou die belangrikste innerlike skuif wat sy maak wat die gehoor moet bybly?

“I have regrets, but I can’t change the past. I want the real thing. Is that too much to ask? For the first time in my life, it gets to be my choice. I feel I’ve found myself. I’ve found my voice. I can’t go back.” Hierdie is uit: “I Can’t Go Back” een van my gunstelingliedjies in die program. Gehore onthou hierdie storie as ’n liefdesverhaal tussen Edward en Vivian, maar dit is ook ’n storie oor selfliefde. Hierdie lirieke skilder ’n belangrike prentjie van selfliefde: wees lief genoeg vir jouself om te gaan na dit waarna jou hart smag; om vir jouself op te staan; om te weet dat jy liefde van ander verdien; dat jou drome en begeertes binne bereik is! Vivian gaan deur ’n drastiese reis van selfliefde binne haar en Edward se groter liefdesverhaal. My wens vir enigiemand wat hierdie program kyk, is om die verlossende krag van die liefde te besef en te verwelkom.

Lees ook: Vyf redes hoekom jy In die sop: Gastehuisrevolusie moet kyk

The post ‘Pretty Woman: The Musical’-toer deur Suid-Afrika appeared first on rooi rose.

Die gewilde kykNET-reeks In die sop kry ’n vars nuwe aanslag met Gastehuisrevolusie – en dié keer is dit nie restaurante wat gered moet word nie, maar wel sukkelende gastehuise regoor Suid-Afrika.

Van klein dorpies tot bekende bestemmings bring dié reeks hoop, inspirasie en praktiese raad aan eienaars wat werklik “in die sop” is.

Hier is vyf redes waarom dié seisoen kykers vasgenael voor die kassie gaan hou:

1. ’n Nuwe fokus: Van restaurante na gastehuise

   Waar vorige seisoene op restaurante gefokus het, skuif die kollig nou na gastehuise – en dit bring ’n hele nuwe stel uitdagings daarmee saam. Anders as restaurante bied gastehuise hul besoekers ’n volledige ervaring: van ontvangsareas tot slaapkamers waar die gaste moet ontspan. Hierdie kompleksiteit maak elke projek meer persoonlik en emosioneel, en dit vereis slim oplossings binne ’n beperkte tyd met ewe beperkte begrotings.

2. ’n Ervare span met flair

   Aan die stuur van die reeks is Janie du Plessis, ’n geliefde TV-persoonlikheid wat terugkeer na die skerm. Sy word bygestaan deur ’n sterk span ontwerpkenners, insluitend Misi Overturf – ’n bekende gunsteling uit In die sop: Restaurantrevolusie– wat weer haar kreatiewe stempel afdruk. Saam met Misi bring Griki Lubbe en Willus Bosch hul unieke styl en praktiese benadering na elke projek, terwyl ander spesialiste saam inspring met besigheids- en bemarkingsadvies.

3. Regte stories, regte uitdagings

   Die reeks neem kykers na plekke soos Melkbosstrand, Worcester, Bethulie, Bloemfontein, Piketberg en Saldanha – waar elke gastehuis sy eie unieke storie en struikelblokke het – van finansiële druk en lae besettingsyfers tot persoonlike tragedies en beperkte hulpbronne. Hierdie eienaars veg nie net vir hul besighede nie, maar ook vir hul toekoms.

4. Meer as net ’n “makeover”

   Hoewel die visuele transformasies van elk van hierdie gastehuise indrukwekkend is, gaan dit oor veel meer as net nuwe dekor. Die span fokus ook op bemarking, kliënte-ervaring en strategiese posisionering. Baie eienaars het min ervaring met digitale platforms of effektiewe bemarking, en dit is juis hier waar die grootste verskil gemaak word – om hulle toe te rus met vaardighede wat lank ná die kameras weg is, steeds waarde tot hul besigheid voeg.

5. Hoop en menslikheid staan sentraal

   Wat hierdie reeks werklik onderskei, is die emosionele impak daarvan. Binne net ’n paar dae sien kykers hoe mense se lewens verander, nie net hul besighede nie. Die proses bring nuwe energie, hoop en selfvertroue terug na eienaars wat moed verloor het. Dit is ’n herinnering dat, met die regte ondersteuning en leiding, selfs die moeilikste situasies na iets positief omgedraai kan word.

In die sop: Gastehuisrevolusie begin op 23 April om 20:00 op kykNET en beloof om nie net inspirerend te wees nie, maar ook ’n viering van deursettingsvermoë, kreatiwiteit en die krag van gemeenskap.

Lees ook: Geliefde aanbieder Johnny Davids sterf skielik

The post Vyf redes hoekom jy ‘In die sop: Gastehuisrevolusie’ moet kyk appeared first on rooi rose.

Die Suid-Afrikaanse en Namibiese vermaakbedryf is in rou gedompel ná die skielike afsterwe van die gewilde televisie-aanbieder, radio-omroeper en sportkommentator Johnny Davids.

Die 49-jarige is in die vroeë oggendure van Donderdag 16 April in ’n gastehuis in Pretoria oorlede. Hoewel ’n hartaanval vermoed word, kon die presiese oorsaak van sy dood nog nie amptelik bevestig word nie.

Die nuus is deur die Afrikaanse televisiekanaal VIA (DStv-kanaal 147) in ’n persverklaring bevestig. Davids was een van die geliefde veldaanbieders van die kanaal se landbouprogram Landbouweekliks.

Davids is in Narraville, ’n woonbuurt in Walvisbaai, gebore.

Sy loopbaan het oor verskeie velde gestrek. Hy was nie net ’n TV-aanbieder nie, maar ook ’n radio-omroeper, sportkommentator, sanger, skrywer en motiveringspreker. Hy het ook as veldaanbieder op programme soos Kwêla bekendheid verwerf.

Benewens sy werk op televisie en radio, het Davids ook sy lewensverhaal gedeeltelik vasgevang in sy boek, Boytjie, waarin hy terugkyk op sy grootwordjare.

Davids laat sy vrou, Liezel, en hul drie seuns agter.

Lees ook: KKNK huppel en dans met 30ste fees

The post Geliefde aanbieder Johnny Davids sterf skielik appeared first on rooi rose.

Die sanger en liedjieskrywer Rudi Claase is al 25 jaar in die musiekbedryf, maar is deesdae veral in die nuus weens sy gesondheidsprobleme. Daar was talle ander storms ook in sy lewe, maar tog lyk Rudi gelukkig. Hy was vandeesweek Rian van Heerden se gas op Laataand by Rian.

Rudi het eerlik gepraat oor hoe dit werklik met hom gaan en erken dat sy gesondheid ’n groot faktor in sy daaglikse lewensgehalte is. Ten spyte daarvan bly sy ingesteldheid positief en fokus hy daarop om vorentoe te beweeg.

Volgens Rudi was hy nooit werklik voorbereid op die werklikhede en uitdagings van roem nie. Mettertyd het hy egter besef dat openbare aandag onafwendbaar is as jy kies om in die kollig te leef. Hy glo ’n mens moet die goeie én die slegte van bekendheid aanvaar as deel van die pakket.

Die gesprek het ’n ongewone kant van sy persoonlikheid onthul toe hy vertel het van sy vroeë belangstelling in begraafplase – plekke wat hy as stil en sonder die geraas van die wêreld beskryf het.

Rian en Rudi het gesels oor sy suksesvolle sangloopbaan saam met Corlea Botha, en Rian wou weet hoekom hulle paaie geskei het. Rudi het geantwoord: “Ek het geen idee nie. Jy sal vir haar moet vra. Ek het 16 jaar laas met haar gepraat.” Hy het erken dat hy dinge probeer regmaak het, maar ook verklap dat hulle nie in die openbaar van mekaar mag praat nie, aangesien daar ’n ooreenkoms in plek is.

Die gesprek het daarna gedraai na Rudi se gesondheid. Rian het gevra hoekom hy soveel private goed met die publiek gedeel het. “Ek het nog nooit die mense gelos nie. Selfs toe ek in die verlede in my loopbaan op plekke gelos is, het ek nie die mense gelos nie. Jy raak ook baie geheg aan die band wat jy met die vermaaklikheidsindustrie het. En die oomblik as dit weggeraap word, is daar ’n stilte. En as jy nie jouself keer nie, maak jy daai stiltes vol snert. Ek dink oversharing is ’n ding, maar nou kan ek terugkyk en dink: ‘Weet jy wat, al was jy nog net semi-gereed, hier lê jy ten minste met ’n pyp in jou neus in die hospitaal en bid vir mense.’ ”

Rudi het gesê hy is al ongeveer die afgelope tien jaar siek. Vyf van daardie jare was hy in en uit by die hospitaal gewees, en die afgelope drie jaar is hy ernstig siek.

Rian wou weet wat werklik fout is, en Rudi het verduidelik: “Ek is gebore met ’n blindederm wat gebars het toe ek tien dae oud was. Ek was ’n baie sieklike kind. Tydens Covid het ek ’n breuk opgedoen. Ek is geopereer en ’n jaar later het dit geskeur. Iemand het weer ’n operasie gedoen en daarna het ek by ’n chirurg geëindig wat 14 operasies in 90 dae gedoen het.” 

Toe Rudi ná die laaste operasie wakker word, was hy verlam en net sy oë kon beweeg. Hy moes weer leer loop en praat en het eers onlangs weer begin oefen om te sing. Rudi is ook ’n maand gelede gediagnoseer met Cushing-sindroom – ’n gewas op die brein.

Rian het gevra oor die oomblik toe hy vir ongeveer 30 sekondes klinies dood was. Rudi het verduidelik dat sy hart gaan staan het nadat hy medikasie gekry het waarvoor hy allergies is. “Wat ek vir jou kan sê van daai ervaring, is dat ek nog nooit in my lewe vir iets so dankbaar was soos vir daai halwe minuut wat my hart gestop het nie. Want as dit nie gebeur het nie, sou ek nie die ewige lewe kon gehad het in die Here wat ek nou vandag het nie. Die Here moes my fisies doodmaak om my te laat lewe.”

Rian en Rudi het ook oor sy vrou, Suzette, gepraat en oor hoe sy hom deur alles ondersteun het. Hulle is al tien jaar getroud.

Een van die grootste treffers wat Rudi geskryf het, is “Sewe oseane”, wat Andriëtte Norman bekend gemaak het, en dit was toe Andriëtte wat as sy verrassingsgas ingestap het. Hulle het lekker oor die liedjie gesels, en sy het vertel hoe dankbaar sy is dat Rudi haar daarmee vertrou het.

Die volledige episode is op DStv Stream en Catch Up beskikbaar. Laataand by Rian word elke Dinsdagaand om 21:00 op kykNET (DStv-kanaal 144) uitgesaai.

Lees ook: Groot name en groter geheime in kykNET se nuwe misdaaddramareeks

The post Rudi Claase op ‘Laataand by Rian’: ‘Die Here moes my fisies doodmaak om my te laat lewe’ appeared first on rooi rose.

Skuif reg vir kykNET se nuwe dramareeks, Die oord, wat jou tot aan die einde aan die raai gaan hou. Hier is vyf redes hoekom jy dit nie durf misloop nie.

• Die oord, ’n misdaaddramareeks van tien episodes, het ’n sterbelaaide rolverdeling wat groot name soos Jana Kruger (Een keer om die son, Afgrond), Erica Wessels (Niggies, Donkerbos), Melissa de Vries (Skemergrond, Arendsvlei), Dawid Minnaar (Hartklop, Legacy), Jacques Bessenger (Dwaalster, Een keer om die son), Nicole Holm (Nêrens, Noord-Kaap 2, Donkerbos), Zane Meas (7de Laan, Reënboogrant), Antoinette Kellermann (Mooiweer en warm, Binnelanders), Laudo Liebenberg (Spoorloos, Spooksoeker), Liam Bosman (Een keer om die son, Diepe waters), Clayton Evertson (Juffrou X, Koek) en Amalia Uys (Die Byl, Tuiskoms) insluit.

• ’n Vakansiedorp aan die kus. Families wat al vir geslagte by dieselfde karavaanpark uitspan. Kinders wat op die strand speel. Braaivleis onder die bome. Alles is idillies – tot daar ’n lyk op die strand uitspoel … Die reeks is in en om die Kaapse Skiereiland, van Kommetjie tot Melkbosstrand, asook in die noordelike voorstede van Kaapstad, verfilm.

• Twee vroue, Martie Pretorius (Jana Kruger) en Brandi Jacobs (Melissa de Vries), staan midde die drama. Brandi van die plaaslike polisie dink dit is die bendes van die Kaap wat hulle kloue in die klein gemeenskap begin inslaan, maar Martie het ’n ander teorie. Die wonde. Die plastieksak. Die Bybelvers. Sy het dit al gesien. Vyftien jaar gelede. ’n Reeksmoordenaar wat Prediker heet.

• Die span wat vir Die oord verantwoordelik is, is die regisseur Eva du Preez en Wolflight Films, onder leiding van Roelof Storm, wat ook die Safta-benoemde dramareeks Niggies op hulle kerfstok het.

• ’n Groep jong spelers gaan beslis verder hulle merk met Die oord. Minke Marais (Reënboogrant, Wyfie) is te sien as Mia du Preez, Luandri Reynders (Binnelanders) is Marioli Groenewald, Angelo Johnson (Arendsvlei) is Joshua Groenewald en Heinrich Wentzel (Een keer om die son, Die nuusmakers) is Stefan Cilliers. Damian de Villiers (Wyfie, Trompoppies) en Christie van Niekerk is die sibbe JP en Jacomien Louw.

KYK | Episode een van Die Oord se voorskou

Die oord begin op vanaand 14 April om 20: 00 op kykNET (DStv-kanaal 144) en sal ook op DStv Stream en Catch Up beskikbaar wees.

Lees ook: KKNK huppel en dans met 30ste fees

The post Groot name en groter geheime in kykNET se nuwe misdaaddramareeks appeared first on rooi rose.

Op my eish! se laaste episode het almal onkant gevang en het die land aan die praat. In ’n eerste vir die reeks het die vrygesel, Ruan Smith, op die ou einde niemand gekies nie, en drie vroue én talle kykers met rou emosies agtergelaat.

Die episode het afgeskop met ’n intieme besoek waar Charlene, Cindy-Lee en Bejanke hul harte oopgemaak het teenoor Ruan en JP. Die spanning het verder opgelaai toe hul naastes aangesluit het. Cindy-Lee het haar niggie Alta Argyle genooi. Bejanke het haar vriendin Sanet Geere saamgebring, en Charlene is deur Chantelle de Villiers ondersteun. 

Ruan en JP se beste vriend, Andries Coetzee, het ook aangesluit en vir die dames die geleentheid gegee om hom uit te vra oor Ruan, terwyl hy eerlike raad gedeel het. Ruan het op sy beurt tyd saam met die dames se geliefdes spandeer, wat hom beter leer ken het – en oorwegend beïndruk was met hom.

Later het ’n gesellige braai almal saamgebring. Die dames het hier die eerste keer Ruan se familie ontmoet, insluitend sy sussies en pa. In dié warm atmosfeer het onsekerheid egter begin insluip, veral vir Cindy-Lee, wat gevoel het sy het te min aandag van Ruan gekry.

Met die aanbreek van die finale dag het dit duidelik geraak dat Ruan innerlik worstel met sy besluit. Voor die groot oomblik het die dames hulself gereed gemaak in pragtige Anel Botha-ontwerpersrokke.

Daarna het drie emosioneel gelaaide afskeidsgesprekke gevolg. 

Ruan het vir Cindy-Lee gesê dat die ervaring vir hom lewensveranderend was en dat hulle op ’n ander vlak verbind is, maar dat hy haar nie gaan kies nie. Sy het sy besluit met hartseer en grasie aanvaar.

Met Bejanke het die oomblik nog meer intens geraak. Hy het sy liefde vir haar beken, maar gesê hy kan nie ’n besluit maak nie en dat hy eers aan homself moet werk. Sy het emosioneel gereageer, maar hom steeds alles van die beste toegewens.

Teenoor Charlene was hy net so eerlik. Hy het gesê sy tiek elke boksie vir hom, maar hy het uiteindelik besluit om niemand te kies nie. Charlene het deur trane erken dat dit seermaak, maar dat sy sy eerlikheid respekteer.

In die laaste toneel het Ruan en die drie vroue saam ’n saal vol familie en vriende binnegestap. Die verwagting was tasbaar, en die emosies het hoog geloop – selfs JP was ’n oomblik gegooi toe die werklikheid van die situasie hom tref.

“My finale besluit was nie maklik nie. Ek het op die laaste minuut besluit wat ek wil doen en wat die beste vir my is,” het Ruan later erken. “Ek het gevoel ek het die regte besluit gemaak onder baie emosionele omstandighede.”

Volgens hom het die beperkte alleentyd wat hy met elke vrou gehad het, swaar geweeg. “Ek het uitgewerk hoeveel tyd ek saam met elke dame spandeer het op ons eie, en dit het ’n groot impak op my besluit gehad. Ek het gevoel dit sou oneerlik wees om iemand te kies as ek vir twee dames gevoelens gehad het. Teen die einde moet jy weet wie jy gaan kies, maar ek was nie oortuig nie.”

Ten spyte van die gebroke harte wat dit tot gevolg gehad het, bly Ruan by sy besluit – een wat hy glo nie net reg is vir homself nie, maar ook vir die vroue.

Die ervaring het hom gedwing om na homself te kyk op maniere wat hy nie verwag het nie. “Ek het geleer dat ek baie tekortkominge het in baie aspekte van ’n verhouding. Ek het my gevoelens vir baie jare onderdruk, en emosies het begin uitkom wat ek nie eers geweet het ek het nie.”

Hy sê die reis het sy perspektief op liefde verander. “Verhoudings is daaglikse werk, en jy moet opofferings maak. Net omdat iets in die oomblik reg voel, beteken dit nie julle lewens gaan bymekaar pas nie.”

Hy wil sy benadering vorentoe verander en is van plan “om rêrig in mense te belê en hulle te leer ken vir wie hulle is – nie net die uiterlike nie, maar ook wie hulle binne is.”

Die reünie-episode word volgende Donderdag om 21:00 op kykNET (DStv-kanaal) uitgesaai word en sal ook op DStv Stream en Catch Up beskikbaar wees.

Lees ook: Lekker & goed-resepte: Tennis en tee met Hannes van Wyk

The post ‘Ek het die regte besluit gemaak’: ‘Op my eish!’-finaal skok toe Ruan niemand kies appeared first on rooi rose.

Carmen Niehaus is terug op kykNET met die tweede seisoen van Lekker & Goed en in die eerste episode bederf sy Hannes van Wyk met ’n Campari-teedrankie, filo-beetsouttert, pitabroodjie en panna cotta.

Na afloop van ’n suksesvolle eerste seisoen van Lekker & goed op kykNET het die gesoute resepteboekskrywer, kos- en kuiermens Carmen Niehaus met innoverende resepte wat nie net lekker is nie, maar ook goed vir jou is, vir vernuwende denke rondom rooibostee gesorg.

En nou word daar weer net so lekker aan die Weskus saamgekuier vir ’n tweede seisoen met bekendes op ’n vlak van geselligheid waar ook die kykers voel of hulle deel van die ervaring is – sonder die opruim na die tyd, natuurlik.

Hannes van Wyk, haar eerste gas, is lank reeds ’n gewilde en welkome deel van kykNET-kykers se vermaaklandskap. Maar, het Carmen bygevoeg, dié beskeie man was op sy dag ’n Suid-Afrikaanse tennisspeler! En hy moes kies tussen tennis en drama . . .

Terwyl die twee lustig besig was om te klets, het Carmen ook vir Hannes die oorsprong van Carmién Tea verduidelik: ’n Kombinasie van haar en tweelingsus Mien, oftewel Mientjie Mouton, se name. En die blommereeks wat op Carmién-produkte is, is almal deur Mien se skoonsus “met die hand geteken”.

Carmen het seker gemaak dat die disse van die dag boonop inpas by Hannes se geliefde disse – soos ’n vetkoek, maar met ’n Turkse kinkel, en ietsie spesiaal vir die man met ’n soettand wat vir niks skrik nie!

RESEPTE

Drankie: Tennispons

Genoeg vir 1 liter

• 250 ml (of na smaak) Campari
• 125 ml (½ k) vars lemoensap
• 1 lemoen, in stukke gesny
• 4-5 aarbeie, in stukke gesny
• halwe komkommer, in dun skyfies of klein blokkies gesny
• klein bossie vars kruisement (opsioneel)
• 2-4 blikkies Carmién Tangerine Grapefruit Sparkling Ice Tea
• Sowat 600 ml gemmerlim of na smaak
• baie ys

METODE

1. Vul ’n groot beker met ys. Gooi die Campari en lemoensap by. Voeg die vrugte, komkommer en kruisement, indien gebruik, by.
2. Vul met Carmién-vonkelystee en gemmerlim en roer liggies.

Filo-beetsouttert 

Genoeg vir 4-6 mense

Kors

• 4 velle filodeeg
• Gesmelte botter

Vulsel

• Olie
• 2 knoffelhuisies, fyn gerasper
• 1 rooi ui, in skyfies gesny
• handvol jong spinasieblare of beetblare
• 230 g geroomde maaskaas
• 4 eiers
• 5 ml (1 t) aangemaakte matige mosterd
• sout en peper na smaak
• 50 g geroomde peperkaasrol
• 2 bete, geskil en in papierdun skyfies gesny
• ’n Paar vars tiemietakkies

METODE

Voorverhit die oond tot 190 °C. Spuit ’n losboom-koekpan goed met kossproei.

1. Kors: Verf elke filodeeg-vel met gesmelte botter en plaas op mekaar in die voorbereide pan. Knip die oorloop stukkies deeg wat oor die kante hang af indien verkies.
2. Vulsel: Verhit die olie en braai die knoffel en ui tot sag. Skep in die voorbereide kors en pak baba-spinasie (of beetblare) bo-op.
3. Klits die maaskaas, eiers en mosterd saam, geur met sout en peper en giet in die pan.
4. Pak die beetskyfies en kaas bo-op (drukke effe in), sit ’n paar tiemietakkies bo-op
5. Bak sowat 25-30 minute of tot die eiermengsel gestol is. Rond af met nog vars tiemietakkies indien verkies.

Panpita’s met sardientjie-sous en gekapte slaai

Panpita’s

• 600 g witbroodmeel
• 10 ml (2 t) sout
• 10 ml (2 t) suiker
• 45 ml (3 e) olyfolie
• 1 pakkie (10 g) kitsgis
• 400-500 ml louwarm flou Carmién-groentee (gebruik 1 sakkie)

METODE

1. Meng al die droë bestanddele saam in ’n groot mengbak, voeg die louwarm tee by en meng deur.
2. Knie tot glad en elasties, minstens 10 min lank. Bedek en laat rys tot dubbel die volume.
3. Rol sowat 1 cm dik uit en druk groot sirkels, 15 cm in deursnee, uit.
4. Sny diagonale snytjies kruis en dwars oor die deeg. Laat weer 10 min rys tot mooi uitgepof.
5. Verhit ’n swaarboompan tot lekker warm, moenie olie byvoeg nie. Braai tot alkant mooi bruin (draai ook op die kante) tot gaar van binne.

Tzatziki

• 250 ml (1 k) dubbelroomjogurt
• 2 knoffelhuisies, fyngerasper
• 4 mini-komkommers, in klein blokkies gesny
• Handvol kruisement, gekap
• Sout en peper
• Meng al die bestanddele saam

Sardientjiesous

• 60 ml (¼ k) olie (mengsel van olyf- en saadolies)
• 4 knoffelhuisies, fyngerasper
• 1 rooi brandrissie, heel of gekap
• 2-3 (120 g elk) blikke Lucky Star-sardientjies in olie
• Driekwart van ’n blik (410 g) fyngekapte tamaties
• 125 ml (½ k) swart ontpitte olywe
• 60 ml (¼ k) kappertjiesade
• Sout en peper na smaak
• Sowat 7,5 ml (11/2 t) fyngekapte origanum of tiemie, pieterselie en selfs basiliekruid
• Sowat 5 ml (1 t) bruinsuiker

METODE

1. Verhit die olie oor medium hitte.
2. Voeg die knoffel en brandrissie by en soteer vir ’n minuut of twee
3. Verhoog die hitte en voeg nou die sardientjies, tamaties, olywe (indien gebruik), en kappertjiesade by.
4. Bring tot kookpunt. Verlaag die hitte en laat prut tot geurig, sowat 20 minute lank

Fyngekapte mengelslaai 

• ’n Fyngesnyde Iceberg-slaaikop
• 1 mini-komkommer, in klein blokkies gekap
• 1 Roma-tamatie, in klein blokkies gesny
• ’n Halwe groen soetrissie, in klein blokkies gesny
• 1 radys, in dun skyfies gesny
• 1 selderystingel, in dun skyfies gesny (opsioneel)
• 80 ml (1/3 k) fyngekapte pietersielie

Sous

• 1 sakkie Carmién Revive-rooibostee
• 80 ml (⅓ k) vars-uitgedrukte suurlemoensap
• 45 ml (3 e) olyfolie
• Sout en peper na smaak

METODE

1. Slaai: Meng al die bestanddele saam.
2. Slaaisous: Plaas die teesakkie in ’n maatbeker en voeg die suurlemoensap by. Laat dit trek vor so 45 sekondes en verwyder die teesakkie. Voeg die olie by asook die sout en peper en klits goed. Giet oor die slaai.
3. Voorsit: Sny die panpita’s halfpad deur. Skep ’n klein bietjie van die slaai in, gevolg deur die sardientjiesous en rond af met ’n skeppie jogurtsous.

Jogurt-panna cotta met aarbei-salsa 

Jogurt maak die panna cottas minder ryk maar steeds heerlik romerig.

Panna cotta

• 2 sakkies Carmién Cranberry Hibiscus ColdBrew
• 625 ml (1½ k) volroommelk
• 375 ml (11/2 k) dubbelroom natuurlike jogurt
• 80-100 ml heuning
• 25 ml (5 t) gelatien
• 60 ml (¼ k) water

Salsa

• 125 g aarbeie, in blokkies gesny
• ’n Paar takkies roosmaryn
• Bietjie suiker
• swartpeper

METODE

1. Spuit 6-8 teekoppies goed met kossproei.
2. Laat trek die teesakkies in die koue melk tot geurig. Verwyder die teesakkies.
3. Meng die melk, jogurt en heuning goed saam.
4. Spons die gelatien in die water en smelt oor kookwater of in die mikrogolfoond.
5. Meng ’n klein bietjie van die jogurtmengsel eers by die gelatien in en meng dit dan alles met die orige jogurtmengsel.
6. Giet in koppies en laat stol.
7. Salsa: Meng al die bestanddele saam en laat staan tot geurig en ’n effense stropie gevorm het.
8. Voorsit: Skep van die salsa in elke koppie en geniet.

Lekker & goed word vanaf Donderdag 9 April op kykNET (DStv-kanaal 144) om 17:30 uitgesaai of stroom op DStv Stream.

Lees ook: Margaret uit Hollywood: Michelle Pfeiffer skitter in The Madison

The post ‘Lekker & goed’-resepte: Tennis en tee met Hannes van Wyk appeared first on rooi rose.

Die Toring, ’n Showmax Original, is ’n verwikkelde verhaal wat afspeel in die haaitenk van beleggingsbankwese wat Maandag 13 April om 21:00 op kykNET (DStv-kanaal 144) begin. In ’n elite-firma in Kaapstad moet ’n groep ambisieuse junior ontleders mag, begeerte en gevaarlike ambisie navigeer terwyl hulle meeding om sukses en stoei vir selfbehoud.

By Meyer Peterson Investments (MPI) hang oorlewing af van hoe vinnig jy kan aanpas, manipuleer en die leer kan klim. Die Toring trek kykers in hierdie stylvolle maar genadelose hoëdrukwêreld in, waar see-uitsigte, ’n eksklusiewe naglewe en blink sukses die slapelose nagte en stil ineenstortings verbloem. 

Vier junior ontleders bevind hulle in ’n moordende wedloop om die topposisie. Ambisieus, briljant en erg wanfunksioneel, ontdek hulle gou dat sukses in hierdie arena veel meer as net intelligensie vereis.

Stella Fredericks (Franka Kirby: Mince jou hare, Diepe waters) is pragmaties en het haar voete stewig op die aarde. Sy is vasbeslote om ’n toekoms vir haarself te bou wat verder strek as haar beskeie grootwordjare in Caledon. Met die toenemende druk om te presteer, word sy egter al hoe dieper ingetrek in ’n wêreld waar ambisie haar waarneming van die werklikheid begin verdraai en haar morele kompas laat wankel.

Franka Kirby as Stella Fredericks

Haar mede-ontleders, Theo Burger (Jan Combrink: Summertide, Juffrou X), Cassandra Fouché (Nichola Viviers: My f*k, Marelize) en Ezra Grootboom (Cantona James: Arendsvlei, Spinners, Breekpunt), is net so gedetermineerd om hulself te bewys in ’n bedryf wat ambisie beloon maar kwesbaarheid straf.

Die nuwe generasie word gelei – en dikwels gemanipuleer – deur senior bestuurders, Gabriella Mulder (Marguerite van Eeden-Harris: Wyfie, Plan B, Afgrond, Fynskrif) en Ryan Petersen (Adrian Steyn: Getroud met rugby, Wyfie, Binnelanders, 7de Laan), terwyl die formidabele uitvoerende hoof, Argos Meyer (Deon Lotz: Reyka, Binnelanders, Skemergrond, Trackers), met ’n ystervuis regeer en geld as beheermiddel inspan.

Saam met hulle op die korporatiewe slagveld is komplekse karakters soos die uitvoerende- finansiële hoof, Yolanda Strauss (Jolene Martin: Getroud met Rugby, Arendsvlei), Argos se lojale persoonlike assistent, Chantal du Preez (Nicola Hanekom: Hans steek die Rubicon oor, Binnelanders, Die Byl, Sara se geheim), en sy seun, Du Toit Meyer (David Viviers: Binnelanders, Troukoors, Desert Rose, Tali’s Baby Diary), wie se soeke na sy pa se goedkeuring hom duur te staan kom.

“Hierdie is ’n wêreld wat Suid-Afrikaanse televisie nog nie voorheen gesien het nie,” sê die kreatiewe vervaardiger, Andréa Frankson-Titus. “Die reeks speel af in die hoëdruk-arena van beleggingsbankwese en is vinnig, sexy en skaamteloos vermaaklik. Ons is ongelooflik opgewonde om kykers in hierdie wêreld in te neem met gevestigde akteurs sowel as ’n nuwe generasie vars talent.”

Die hoofregisseur, Catharine Cooke (Summertide, Reyka, Legacy, The River), sê: “Die Toring is ’n simbool van mag, geld en genadelose ambisie, en soos wat ons vier jong beleggingsbankiers sukses nastreef, word hulle al hoe dieper ingetrek in die gevaarlike geheime en morele kompromieë van die bedryf se elite – en ontdek hulle dat oorlewing in hierdie klimtog hulle alles kan kos.”

Die regisseur en medevervaardiger Mandilakhe Yengo beskryf die reeks as “ ’n verkenning van daardie eerste jaar in ’n korporatiewe omgewing deur die oë van ambisieuse blinkoog-ontleders – gevul met skandale, drama en samesmeltings in die raadsaal én in die slaapkamer. Dit was pret om te maak en sal net so lekker wees om te kyk.”

Die medeskeppers en skrywers van die telenovela, Igna Botha en Meesha Aboo, voeg by: “Ons het inspirasie geput uit die meedoënlose kultuur van beleggingsbankwese – ’n wêreld waar mense vinnig moet dink en ewe hard moet werk as partytjie. Dit het gevoel soos die perfekte arena vir plofbare liefdesverhale en gewaagde dramatiese wendings.” 

Die Toring verken temas soos ambisie, identiteit, wraak, verlossing en die gevaarlike aantrekkingskrag tussen ware liefde en geheime verhoudings. Dit vra wat gebeur wanneer sukses ’n obsessie word – en wanneer oorlewing in die stelsel jou siel kan kos.

Die Toring word vervaardig deur Paw Paw Films, Penguin Films se sustermaatskappy, bekend vir produksies soos Diepe waters, Sara se geheim, Wounds, Isikizi, Ingoma en Saints and Sinners.

KYK | Amptelike Lokprent: Die Toring 

Die Toring begin 13 April om 21:00 op kykNET (DStv-kanaal 144). Die Toring is ’n Showmax Original en sal beskikbaar wees in die Showmax-afdeling van die DStv Stream-app, asook op kykNET. Namate Showmax aan die einde van April 2026 tot ’n einde kom, kry Showmax Originals ’n nuwe tuiste op die DStv Stream-app.

Lees ook: Margaret uit Hollywood: Michelle Pfeiffer skitter in The Madison

The post NUWE AFRIKAANSE TELENOVELA | Mag, ambisie en gevaarlike geheime bots in ‘Die Toring’ appeared first on rooi rose.

Deur Margaret Gardiner.

In Taylor Sheridan se nuwe TV-reeks, The Madison, op Paramount+, word Michelle Pfeiffer se karakter skielik ’n weduwee wanneer haar man se vliegtuig neerstort terwyl hy sy gunsteling-wegbreekplek besoek. Sy bly in New York en het nooit die uitnodiging aanvaar om by hom op sy besoeke aan Montana aan te sluit nie. Sy en haar gesin vlieg uiteindelik na die plek waarheen hy dikwels ontsnap het. Hulle ontdek nie net die skoonheid van wye oop lug en groothartige mense nie, maar ook ’n manier om haar gebroke gesin te genees.

Michelle Pfeiffer (67) by die première van ‘The Madison’ in New York. (Foto: Jamie McCarthy/Getty Images)

Michelle Pfeiffer is een van ons groot skoonhede wat geveg het om gesien te word vir haar talent eerder as haar voorkoms. Sy is nou 67 jaar oud, en het ’n onuitwisbare impak gemaak in flieks, soos Scarface en die Oscar-benoemde flieks, Dangerous Liaisons, The Fabulous Baker Boys en Love Field. Sy lewer in The Madison die rol van ’n komplekse matriarg wat met rou gekonfronteer word en ’n gesin bymekaar moet hou ná haar man se ontydige dood. Die gesin verlaat hul bevoorregte lewens in New York en verhuis na Montana waar hulle rou verken en weer met hulself en mekaar verbind.

“Ons moet onthou dat ons Stacy deur die eerste ses dae van hierdie onuitspreeklike, skokkende tragedie sien. En dan is daar hierdie ontdekking dat die liefde van haar lewe, die enigste man wat sy ooit liefgehad het, ’n hele kant aan hom gehad het waarvan sy nie geweet het nie, wat hy gesmeek het om met haar en hul kinders te deel,” verduidelik Michelle. Sy is geklee in ’n swart top wat haar slanke arms wys. “Ek dink daar is ’n geweldige hoeveelheid spyt wat aan haar knaag, en ’n onversadigbare nuuskierigheid om hierdie kant van hom te ontdek wat sy nooit geken het nie. Sy probeer aan hom vashou.” Daar is ook “gesprekke” met Kurt Russell, wat haar man, Preston, speel, en in terugflitse uitgebeeld word wat ons raak op hul liefde laat verlief raak. “Hul band is ongelooflik roerend; hul liefdesverhouding is een wat ons almal hoop om te vind. Dis ’n sprokie.” Sy glimlag en streel oor haar platinumblonde hare.

(Foto: Paramount+)

Michelle erken dat sy diep bewoë tydens die verfilming gevoel het, en hoewel die uitsigte asemrowend is, het die rolverdeling ook met lewende stelle te doen gehad en was hulle aan die elemente blootgestel.

“Die wind was 60 myl per uur. Die vlae en ligte het omgekantel. Bemanningslede moes op die hoofligte lê. Jou hare het woes rond gewaai. Die arme haarkapper het probeer om ’n mate van beheer daaroor uit te voer. Dit alles raak net so afleidend, en ook regtig stresvol vir almal rondom wat net hul werk probeer doen.”

Vir die vrou wat sedert 1993 getroud is met een van die legendes van televisie, David E. Kelly (Big Little Lies, The Practice, Ally McBeal), was dit ’n maklike besluit om na televisie terug te keer. The First Lady, The Wizard of Lies en Fantasy Island is van haar vorige hoogtepunte in dié medium.

“Taylor Sheridan het ’n ongelooflike rekord,” sê sy, terwyl sy haar skouers optrek. “Ek het geteken sonder om een ​​woord van die draaiboek te lees en op aanbeveling van Helen Mirren wat saam met Sheridan aan 1923 gewerk het. Ek was mal oor die manier waarop hy oor hierdie karakter gepraat het. Die liefdesverhaalelement en die gesinsdinamika. Sommige van my snobistiesste vriende het my gebel en vir my gesê hoe hulle die program geniet, en ek is soos: ‘Huil jy?’” Michelle giggel.

“Wat werklik verbasend is, is hoeveel dit mans raak,” vertel die ma van twee kinders, Claudia Rose (hul aangenome dogter) en John Henry.

“Mans vind werklik aanklank by die reeks. Dit spreek van rou op ’n manier wat hulle ervaar het, maar nie regtig kon uitdruk nie. Miskien verras dit hulle. Dan is daar allerhande maniere en dinge om oor te treur. Mense het hul huise in ’n brand verloor. Mense het werk verloor waarin hulle verwag het om af te tree.”

Aanhangers van die TV-program, Suits, sal ook Patrick J. Adams as Michelle se skoonseun herken.

KYK | Margaret gesels met Michelle Pfeiffer

Volg Margaret op Youtube, Facebook, Twitter en Instagram!

Lees ook: Margaret uit Hollywood: Project Hail Mary is die een fliek wat jy vanjaar móét kyk

The post Margaret uit Hollywood: Michelle Pfeiffer skitter in ‘The Madison’ appeared first on rooi rose.

Dis die klassieke storie uit die jare negentig (wie kan die bekende fliek met Julia Roberts en Richard Gere vergeet), wat in 2018 as ’n verhoogmusiekblyspel op Broadway begin het en ook bekroonde draaie in die Weseinde en toere regoor Noord-Amerika en Europa geniet het. Nou is dit Suid-Afrika se beurt, en gehore is mal daaroor.

Pretty Woman: The Musical se merkwaardige, volledig Suid-Afrikaanse rolverdeling sluit onlangs aangekondigde wenners by die Naledi-teatertoekennings in. Twee van die hoofrolle in die program wat toekennings vir hul werk in ander produksies ontvang het, is Leah Mari, wat die lewenslustige Vivian Ward speel, en die toekenning vir Beste Hoofprestasie in ’n Musiekblyspelproduksie: Vroulike kategorie vir haar rol in My Fair Lady gewen het; en Daniel Conradie, wat die laakbare Philip Stuckey in Pretty Woman speel, en die toekenning vir Beste Deurbraakprestasie in ’n Musiekblyspelproduksie vir sy rol in Joseph and the Amazing Technicolor Dreamcoat gewen het.

Pretty Woman: The Musical is die verhaal van Vivian en Edward se onwaarskynlike romanse. Dit is opbouend en vol vreugde, en kombineer liefde, lag, nostalgie en aangrypende liedjies om elke opvoering ’n prettige ervaring terug in tyd te maak.

Die vertoning se musiek, insluitend kragtige solo’s soos “Freedom” en “I Can’t Go Back” en asemrowende ensemble-stukke soos “Welcome to Hollywood” en “Together Forever”, geskryf deur die superster Bryan Adams en sy jare lange liedjieskryfvennoot Jim Vallance, lewer dinamiese, emosioneel gelaaide musiek wat die romanse, glans en energie van die storie perfek vasvang.

Timeout Magazine beskryf die vertoning as ’n “Aspoestertjie-styl-boog wat dit so aangenaam maak en iets waarin mense hulself sal kan herken”, terwyl The Cape Robyn Pretty Woman: The Musical “’n vrolike en prettige vertoning, met ’n uiters talentvolle rolverdeling” noem. 2 Oceans Vibe sê die produksie “lewer presies wat dit belowe: ’n vreugdevolle ontsnapping na nostalgie.” BizCommunity sê Pretty Woman is “vermaaklik, snaaks, goed afgerond en gevul met sterk uitvoerings, en Theatre Scene Cape Town is entoesiasties oor die vertoning se “wonderlike sang, warmte en humor”.

Onthou die spesiale afslagkaartjie-aanbiedinge. Daar is die gewone “Fantastiese Dinsdag”-aanbod (nie geldig met enige ander afslagaanbod nie), waar kaartjies R400, R300, R250en R200kos. Groepbesprekings geld ook. Bring jou familie, jou kollegas, jou sportspan, die mense van jou Pilates-klas – wie ook al! Daar is ook die “Bring jou Beste Vriend”-aanbod, slegs beskikbaar Woensdae en Donderdae: bespreek vier tot ses kaartjies vir R250 elk, ongereserveerd. ’n 20%-blokbesprekingsafslag word aangebied vir groepe van 20+ op geselekteerde vertonings vir spesifieke pryskategorieë. Kontak sales@showtime.co.za. Bepalings en voorwaardes geld.

Pretty Woman: The Musical word vervaardig deur die toonaangewende plaaslike vervaardiger en bemarker, Showtime Management, in samewerking met Crossroads Live North America. As gevolg van sterk volwasse temas, het hierdie produksie ’n PG-gradering van 12+. Ouerleiding word aanbeveel.

Johannesburg-aanhangers, wees op die uitkyk na vertonings vanaf 24 April by Montecasino se Teatro. Dit sal ’n groot fout wees om Pretty Woman: The Musical mis te loop.

Kaartjies verkoop vinnig, so moenie wag nie. Bespreek vandag via showtime.co.za of  www.ticketmaster.co.za

VERTONINGINLIGTING

• KAAPSTAD: Kunstekaap-operahuis

Woensdag 18 Maart tot Sondag 19 April 2026

• JOHANNESBURG: Montecasino se Teatro

Vrydag 24 April tot Sondag 31 Mei 2026

Lees ook: Margaret uit Hollywood: Project Hail Mary is die een fliek wat jy vanjaar móét kyk

The post ‘Pretty Woman: The Musical’ nóú op die planke! appeared first on rooi rose.

Deur Margaret Gardiner.

Die fliek Project Hail Mary het in sy openingsweek wêreldwyd $141 miljoen ingebring. Niemand wat dié Ryan Gosling-rolprent gesien het, is verras deur dié syfer nie. Die fliek is gegrond op ’n boek deur Andy Weir, wat ook The Martian geskryf het, wat ’n groot treffer by resensente en die loket was. In ’n wêreld waar kunsmatige intelligensie dreig om ons werk oor te neem, die Midde-Ooste in vlamme is, en petrolpryse alledaagse artikels soos luukshede laat voel, is Project Hail Mary gevul met hoop, humor en skouspel.

Ryland Grace (Ryan Gosling) is ’n wetenskaponderwyser wat ingetrek word om die wêreld te red, gegrond op ’n obskure artikel wat hy in sy jeug geskryf het. Sy idee kan moontlik ons sterwende son red, en die Duitse aktrise Sandra Hüller (Zone of Interest) speel die hoof van die geheimsinnige departement wat aangewys is om ’n oplossing te vind om die son se ondergang te voorkom. Sy sien Grace (Gosling) se potensiaal toe hy dit self nie sien nie.

Phil Lord, Sandra Hüller, Ryan Gosling en Chris Miller (Foto: Dimitrios Kambouris/Getty Images)

Grace is opgewonde oor die wetenskaplike uitdaging, maar is lugtig om werklik saam met die ruimtevaarders ruimte toe te gaan om sy oplossings toe te pas. Hy word egter op die ruimtetuig wakker sonder ’n idee hoe hy daar gekom het. Die sending lyk gedoem totdat hy ’n vreemdeling genaamd Rocky teëkom. Rocky is nie jou tipiese ruimtewese nie. Die humor, die band en die magiese verhouding, wat tussen Grace en Rocky ontwikkel, terwyl hulle saamwerk om hul onderskeie wêrelde te red, is inspirerend. Hulle moet ’n band vorm en oplossings vind terwyl hulle niks in gemeen het nie. Hul reis deur die ruimte én die raaisel is die geheime bestanddeel wat Project Hail Mary ’n onmiddellike klassieke treffer maak. Voeg daarby die spanning, opwinding en struikelblokke van ruimtereise, sowel as die visuele skouspel wat so wonderlik op die wye doek lyk, en jy kry ’n mengsel van E.T. the Extra-Terrestrial en The Martian. As ek meer sê, gaan ek die rolprent bederf en as daar een fliek is, wat jy vanjaar moet kyk, is dit Project Hail Mary. Jy sal daar uitstap en nie net gelukkiger voel nie, maar ook optimisties dat alles in die wêreld reg sal uitwerk.

Ek het met Ryan Gosling in Beverly Hills oor die rolprent gesels. Die skrywer het hom genader nog voordat die boek gepubliseer is, terwyl Covid in 2020 die wêreld geteister het, Ryan het as vervaardiger en akteur aangesluit. “Die boek is gevul met wetenskap, komedie en menslikheid en vier mense wat verskillend is, wat bymekaar met verbeelding en goeie bedoelings kom.”

’n Groot deel van die sukses moet toegeskryf word aan “Rocky”, die ruimtewese, wat deur ses poppespelers beheer word in plaas van die gerekenariseerde verskynsels van onlangse ruimteflieks. Dit is ’n uitstekende keuse. Ek het Rocky eksklusief by die Four Seasons Hotel Beverly Hills ontmoet. Ek moes ’n donker vertrek binnegaan en die eerste ding wat ek gesien het, was iets wat soos ’n rotsspinnekop lyk, maar glad nie vreesaanjaend was nie. Dit het my onmiddellik laat glimlag. Ons het met die vuis gegroet, en saam geposeer, terwyl ses mense in swart Rocky se bewegings beheer het.

 

View this post on Instagram

 

A post shared by Margaret Gardiner (@margaret_gardiner)

Ryan het gedeel dat die poppespeler aanvanklik net daar was om die ruimtewese te animeer, maar dit het ontwikkel tot die poppespeler werklik Rocky se dialoog gesê het, en selfs besluite oor aksie en dialoog verdedig het, deur te sê: “Rocky sou dit nooit doen nie!”

Ek het vir Ryan gevra of hy ’n persoonlike “Hail Mary” het. Die begrip verwys na ’n poging met die skraalste kans op sukses. Hy het “ja” geantwoord en vertel dat hy Kanadees is en op skool gedans het. Al die meisies in sy klas het vir The Mickey Mouse Club-oudisies gegaan en hom genooi om saam te gaan. Hy het gevoel hy het geen kans nie, maar hy niks gehad om te verloor deur saam te gaan nie. Hy was toe die enigste Kanadees wat vir die Amerikaanse program gekies is. Sy medespelers was mense soos Justin Timberlake, Britney Spears, Christina Aguilera en Keri Russell om maar ’n paar te noem! Dit het sy lewe verander.

In ‘Project Hail Mary’ is Ryan Gosling ’n wetenskaponderwyser wat ingetrek word om die wêreld te red, gegrond op ’n obskure artikel wat hy in sy jeug geskryf het. (Foto: Jason Mendez/Getty Images for Amazon MGM Studios)

Daardie towerkrag wat sy lewe verander het, loop deur die hele rolprent. Uitgedaag deur alleen op die stel van die ruimtetuig te werk, het hy die regisseurs vir hulp gevra. Een van hulle het ’n geïmproviseerde mop gemaak wat ’n snaakse en innemende segment voortgebring het waar hy letterlik met die mop praat en dans. Hulle het die mop “Moppy Ringwald” gedoop. Sy bereidwilligheid om buigsaam te wees en kanse te vat, het hom as vervaardiger bevoordeel. Een voorbeeld wat toe hy sy medester, Sandra Hüller, naby hom in haar kleedkamer hoor sing het. Hy het haar daarna gesmeek om in die fliek te sing. Sandra se dogter moes net eers oukei sê dat haar ma in die openbaar mag sing, maar hulle het toe spesiaal ’n toneel geskryf waarin Sandra Harry Styles se “Sign of the Times” sing. Ryan noem dit die emosionele hartklop van die fliek.

Hoewel daardie toneel en vele ander jou laat lag en baie gevoelens ervaar, is dit die verhouding tussen Rocky en Grace wat die fliek dra. Jy juig vir hulle, vrees namens hulle, en lag saam met hulle. Eenvoudig gestel: Jy ervaar iets, wat rolprente ons lanklaas laat ervaar het.

KYK | Margaret vra vir Ryan Gosling of hy ’n persoonlike “Hail Mary” het

@margaretgardineruniverse #ryangosling #projecthailmary The day Ryan Gosling felt he couldn’t go on . . #movie #actor #space ♬ Cycle Syncing Frequency – Still Haven

Volg Margaret op Youtube, Facebook, Twitter en Instagram!

Lees ook: Margaret uit Hollywood: Miley Cyrus vier 20 jaar van Hannah Montana

The post Margaret uit Hollywood: ‘Project Hail Mary’ is die een fliek wat jy vanjaar móét kyk appeared first on rooi rose.

Episode 12 van Op my eish! het kykers op ’n reeks intieme afsprake tussen Ruan en sy topvier geneem, maar dit was ’n onverwagse afskeid wat uiteindelik die grootste impak gemaak het.

Elkeen van die oorblywende dames het die geleentheid vir ’n spesiale een-tot-een-afspraak gekry. Charlene se dag het begin met ’n soort speletjie. Leidrade en ’n tweerigtingradio het haar diep die bos in gelei – tot sy uiteindelik vir Ruan gevind en hulle hul eerste soen gedeel het. Daar was vonke, en Ruan het later erken dat hy ná die dag saam met haar onseker oor sy eie emosies gevoel het.

Cindy-Lee se afspraak het ’n meer intieme wending geneem in ’n ondergrondse kelder, waar sy haar kwesbare kant gewys en erken het dat sy besig is om vir Ruan te val. Haar eerlikheid het ’n indruk gemaak, en Ruan het dit waardeer dat sy begin het om haar mure af te breek.

Bejanke se tyd saam met Ruan het in ’n rustige tuin afgespeel, waar hul gesprekke op die toekoms en selfs haar kinders gefokus het. Sy het erken dat hy haar vlinders in haar maag gee en dat sy haarself saam met hom kan sien.

Minette se afspraak was ewe spesiaal. Sy het te perd opgedaag en ’n romantiese aandete onder liggies geniet. Hul gesprekke was diep en gefokus op die pad vorentoe. Niks het ’n mens laat raai dat dinge kort daarna dramaties sou verander nie.

Nadat Minette na die groep teruggekeer het, het Ruan onverwags opgedaag en aangekondig dat hy iemand huis toe gaan stuur. Tot almal se skok was dit Minette.

’n Gespanne gesprek het tussen die twee gevolg, waarin Ruan erken het dat hy die afgelope paar dae verskillende kante van haar gesien het. Minette het haarself probeer verduidelik, maar die situasie het vinnig intens geraak, en Ruan het uiteindelik weggestap – ’n oomblik wat haar in trane gehad het.

By terugskoue het Minette deelname aan die program as ’n “baie brawe ding om te doen” beskryf. Sy meen kykers sien nie altyd al die komplekse dinamika wat agter die skerms afspeel nie. “Noudat daar afstand is, kan ek objektief na alles kyk,” het sy gesê.

Hoewel die uitslag nie was waarop sy gehoop het nie, het sy die moontlikheid van seerkry van die begin af verstaan. “Dit bly ’n realiteitsprogram.”

Wat haar deur die moeilike besluit gedra het, was haar sterk geloof en selfkennis. Sy beskryf haarself as iemand wat gegrond is. “Ek weet wie ek is – ek is ’n dogter van die Koning. Dit anker my.”

Ten spyte daarvan dat dinge nie uitgewerk het nie, onthou sy haar tyd saam met Ruan as opreg en betekenisvol. “Elke laggie uit die maag, gesteelde kykies… maar ook elke genuine, diep gesprek. Ek koester dit alles.”

Sy glo ook dat daar meer diepte in Ruan is as wat mense noodwendig sien en dat hy ’n sterk begeerte het om te groei en ’n beter man te wees. Die ervaring het nie net haar perspektief op verhoudings verstel nie, maar haar ook herinner aan haar eie groei. “Ek is nog steeds elke dag ’n work in progress, maar hierdie ervaring het my gewys hoe ver ek al gekom het.”

Wanneer sy terugkyk, kies sy om die goeie saam met haar te dra. “Elke ervaring in die lewe slyp jou as persoon. Behou die goeie, laat die res van jou afspoel en beweeg aan.”

Vir Minette bly dit belangrik om getrou aan haarself te wees, ongeag die omstandighede. “Integriteit is ALLES. Ek stap trots hier weg met die wete dat ek altyd getrou gebly het aan die vrou wat ek elke dag probeer wees.”

Sy neem ook waardevolle lesse saam vorentoe – om haar eie waarde te ken en nie te settle nie, en om steeds oop te bly vir liefde. “It is never rejection – it is either protection or redirection.”

Hoewel haar Op my eish!-reis tot ’n einde gekom het, bly sy hoopvol oor wat voorlê. Sy glo dat daar vir elkeen ’n pasmaat is en sien met verwagting uit na haar eie liefdesverhaal. “Ek is hoopvol dat my trouman iewers daar buite ook besig is om homself voor te berei vir ons liefdesverhaal.”

Op my eish! word Donderdae om 20:00 op kykNET (DStv-kanaal 144) uitgesaai en is ook op DStv Stream en Catch Up beskikbaar.

Lees ook: Twee geliefde karakters groet Suidooster ná vyf jaar

The post ‘Op my eish!’ se grootste kinkel nóg: Ruan se onverwagse keuse laat Minette in trane appeared first on rooi rose.