Verskaf deur kykNET

Wat jy alles moet weet oor die volgende seisoen van ‘Boer soek ’n Vrou’ 

1. Die agtiende seisoen van Boer soek ’n Vrou begin Donderdag 23 Julie 2026 op kykNET en sal oudergewoonte in die 20:00-tydgleuf uitsaai. Die werklikheidsreeks wat eers voor dit nog moet uisaai, is In die sop: Gastehuisrevolusie.  
2. In Boer soek ’n Vrou se eerste episode ontmoet Reandi vir die eerste keer al die boere op hul plase, terwyl sy in die daaropvolgende episode hul briewe aflewer. Kykers sal dus op Donderdag 30 Junie uitvind watter vyf boere se liefdesreis hulle gaan volg.  
3. Die episode wat op 23 Julie uitgesaai word, tel eintlik as die reeks se tweede episode aangesien die episode, waar kykNET die boere in November bekendgestel het, die afskop van die seisoen was. 
4. Die reünie-episode, waar kykers uitvind hoe die topvyfboere se soektog nog liefde uitgedraai het en hoe dit ook met die ander vyf boere gaan, saai op Donderdag 22 Oktober uit.  
5. Vanjaar se tien boere se ouderdomme wissel tussen 26 en 43. 
6. Die boere verteenwoordig ses provinsies met die Vrystaat wat die voortou met vier enkellopendes neem, terwyl die Noordwes deur ’n vroue boer verteenwoordig word.

Reandi Grey. Foto: Verskaf

Die boere vir die 18de seisoen is: 

 1.  Arno (28)  

• Tzaneen, Limpopo 

• Bosbouboer  

• Vroulike pasmaat 

2.  David (43) 

• Vierfontein, Vrystaat 

• Gemengde boerdery 

• Vroulike pasmaat 

3.  Francois (34) 

• Hoedspruit, Mpumalanga  

• Natuurbewaarder 

• Vroulike pasmaat 

4.  Jack (30)  

• Hermanus, Wes-Kaap 

• Appel- en peerboer 

• Vroulike pasmaat 

5.  Jacques (32)  

• Nelspruit, Mpumalanga 

• Makadamianeutboer 

• Vroulike pasmaat 

6.  JD (28)  

• Reitz, Vrystaat 

• Gemengde boerdery 

• Vroulike pasmaat 

7.  Junior (35) 

• Bethlehem, Vrystaat 

• Gemengde boerdery 

• Vroulike pasmaat 

8.  Leandi (36) 

• Ventersdorp, Noordwes 

• Beesboer 

• Manlike pasmaat

9.  Luan (26) 

• Strydenburg, Noord-Kaap 

• Skaapboer 

• Vroulike pasmaat 

10. Willie (37) 

• Harrismith, Vrystaat 

• Bees- en mielieboer 

• Vroulike pasmaat 

Lees ook: Erns deurkruis Viëtnam in nuwe Elders

The post Dit is amper tyd vir die 18de seisoen van ‘Boer soek ’n Vrou’ appeared first on rooi rose.

Verskaf deur kykNET

Hulle gee lewe aan uiteenlopende stories wat kykers laat lag en ontroer, gee raad oor alles en nog wat, sleur jou mee en hou ons op hoogte van aktuele en nuussake. Maak nie saak in watter hoedanigheid nie, hierdie wye verskeidenheid kunstenaars en aanbieders op die kassie word soos familie in talle huise.

Die aap is nou uit die mou met die bekendmaking van die televisie-benoemings in 16 kategorieë vir die Silwerskermtoekennings vir Film en Televisie, wat vanjaar ’n nuwe kategorie vir beste aanbieder in ’n dokumentêre program insluit.

Die wenners word op Saterdag 22 Augustus by die glansryke afsluiting van die Silwerskermfees in die Kaapstadse Internasionale Konferensiesentrum aangekondig. Die wenners van die beste speelfilm en beste filmakteurs wat by die fees gedebuteer het, word ook by dié geleentheid aangekondig.

“Vanjaar se benoemings is ’n vertoonvenster vir die briljante werk in hierdie klein, wêreldklas-bedryf. kykNET gee met beskeidenheid en groot respek erkenning aan die verbeeldingryke wêrelde wat opgetower is deur dromers, harde werkers, en skeppers wat nie net iets het om te sê nie, maar ook weet hoe om ’n storie te vertel. Hierdie stories is kultuur-spesifiek en nooit generies nie. Dit voeg werklik soveel beekenis tot kykers se lewens by,” sê Waldimar Pelser, direkteur vir Premium-kanale by MultiChoice, ’n Canal+-maatskappy.

Die toekenningsgeleentheid word Sondag 23 Augustus om 19:00 op kykNET uitgesaai. Die name van die aanbieders en spesiale kunstenaars wat gaan optree, sal later bekend gemaak word.

Die TV-benoemings vir die 2026 Silwerskermtoekennings vir Film en Televisie is:

Beste hoofspeler in ’n komedie

Albert Pretorius (Flip) – Kantoor (S1)

Desiré Gardner (Magda Louw) – Magda Louw (S3)

Hannes van Wyk (Erhard) – Magda Louw (S3)

Beste byspeler in ’n komedie

Daniah de Villiers (Emma) – Kantoor (S1)

Gert du Plessis (Joubert) – Kantoor (S1)

Ilse Oppelt (Joanne) – Kantoor (S1)

Schalk Bezuidenhout (Tjaart) – Kantoor (S1)

Shimmy Isaacs (Lynette) – Magda Louw (S3)

Beste byspeler in ’n telenovela of sepie

Arno Greeff (Tristan) – Suidooster

Denver Vraagom (ds. Wayne) – Skemergrond

Gretchen Ramsden (Patty Paulsen) – Skemergrond

Gustav Gerdener (Johan) – Binnelanders

Kay Smith (Shandy/Laylla) – Suidooster

Mila Guy (Liné) – Suidooster

Beste nuweling in ’n telenovela of sepie

Ayden October (Junior Louw) – Skemergrond

Cole Wessels (Tino) – Suidooster

Izette Blignaut (Petro) – Binnelanders

Judi Hattingh (Jenna) – Suidooster

Xander Venter (Marco Viljoen) – Diepe waters

Beste akteur in ’n telenovela of sepie

Charlton George (JP Louw) – Skemergrond

Dann-Jaques Mouton (Ruan Smit) – Skemergrond

Dean Smith (Wade Daniels) – Suidooster

Germandt Geldenhuys (Louis) – Binnelanders

Irvine van der Merwe (Nazeem Jacobs) – Suidooster

Justin Strydom (Gys Swarts) – Diepe waters

Beste aktrise in ’n telenovela of sepie

Devonecia Swartz (Christine van As) – Skemergrond

Jawaahier Petersen (Kaashifa Mansour) – Suidooster

Je-ani Swiegelaar (Naomi) – Binnelanders

Marlee van der Merwe (Ella) – Binnelanders

Sandi Schultz (Zelda Joubert) – Diepe waters

Shimmy Isaacs (Erika Pienaar) – Skemergrond

Beste akteur in ’n drama

Albert Pretorius (Gustaff Fouché) – Niggies (S1)

Beer Adriaanse (André Fourie) – Niggies (S1)

Brendon Daniels (Johan Diederiks) – Die nuusmakers

Carel Nel (At van Wyk) – Niggies (S1)

Jacques Bessenger (Ruan van Wyk) – Een keer om die son (S2)

Neels Clasen (Willem de Villiers) – Spoorloos: Losprys (S5)

Beste aktrise in ’n drama

Diaan Lawrenson (Lisa) – Appels en tee (S1)

Erica Wessels (Ousus Nel) – Niggies (S1)

Lorcia Cooper-Khumalo (Rozlynne Joshua) – Breekpunt (S1)

Rolanda Marais (Adri Joubert) – Die nuusmakers

Tinarie van Wyk Loots (Henriette) – Appels en tee (S1)

Beste manlike byspeler in ’n drama

Danny Ross (Brad Samson) – Breekpunt (S1)

Heinrich Wentzel (Elijah Smith) – Een keer om die son (S2)

Ian Roberts (Jakkals) – Appels en tee (S1)

Jacques Bessenger (Dries Fourie) – Niggies (S1)

Janru Steenkamp (die jong André Fourie) – Niggies (S1)

Neels Clasen (Henning Nel) – Niggies (S1)

Beste vroulike byspeler in ’n drama

Bianca Langedyk (Annie) – Appels en tee (S1)

Cintaine Schutte (Henda Nel) – Niggies (S1)

Daneel van der Walt (Francia Theron) – Niggies (S1)

Jana Kruger (Santjie Schoeman) – Niggies (S1)

Kim Cloete (Mandy Baker) – Breekpunt (S1)

Roeline Daneel (Maks Fouché) – Niggies (S1)

Beste aanbieder in ’n leefstylprogram

Marco Botha – Santam Megaboere (S7)

Natie Ferreira – Fanaties (S1)

Leah – Lottoland Help ’n dorp (S4)

Lundi Khoisan – Fiësta (S27)

Hannes van Wyk – Kwêla (S27)

Johan en Zanelle Dorfling – Bou of breek (S1)

Jan Scannell – Jan Braai vir Erfenis (S15)

Joalette de Villiers – Op pad met my potjie (S2)

Beste aanbieder in ’n vermaaklikheidsprogram

Rian van Heerden – Wie word ’n miljoenêr (S5)

Elwira Standili – Koortjies met Elwira Standili (S6)

Aden Thomas – Sê jou sê (S5)

Brendan Peyper en Bobby van Jaarsveld – Ander dam se eende (S1)

Beste aanbieder in ’n realiteitsprogram

Herman Lensing en Yolani Abrahams – Kokkedoor: Son & see

Reandi Grey – Boer soek ’n vrou (S17)

Ruan Smith en JP Smith – Op my eish!

Cameron Saaiman – Moer ’n boer

Beste aanbieder in ’n gesels- of aktualiteitsprogram

Hannes van Wyk – Hannes aan huis (S12)

Lee-Ann van Rooi – Waar daar ’n wil is (S2)

Lourensa Eckard – In Gesprek (S10)

Rian van Heerden – Laataand by Rian (S4)

Wicus Pretorius – Wie’s Nuus? (S6)

Lyntjie Jaars en Pietman Geldenhuys – Oppiestoep (S10)

Beste aanbieder in ’n dokumentêre program

Govan Whittles – Govan ontbloot

Frank Opperman en Frankie Opperman – Frank

Dr. Rudi van Vuuren en Marlice van Vuuren – Groen Namibië

Rian van Heerden – Schuster

Rian van Heerden – Brakpan Chronicles

Beste ensemble-aanbiederspan

Hamilton Wessels, Rika Calitz, Breyton Paulse, Bakkies Botha, Jonathan Mokuena, Jannie du Plessis, Rikus de Beer, Tommy Dickson (Chef Vaatjie), Jean de Villiers – Toks en Tjops

Dawie Roodt, Leon Gropp, Corli Prinsloo, Charlene Lackay – Ontbytsake

Pierre Breytenbach, Jennifer Myburgh, Su-an Müller-Marais – Die Groot Ontbyt

Die legendes vir lewensbydraes in die televisiebedryf word einde Julie aangekondig.

Die wenners van die kykNET Silwerskermfees se ander kategorieë sal ook op Saterdag 22 Augustus tydens ’n oggend-toekenningsgeleentheid by The Bay-hotel aangekondig word.

Kaartjies vir die Silwerskermfees is by Quicket beskikbaar.

Die kykNET Silwerskermfees word deur Stad Kaapstad, Vuma, die Dagbreek Trust, Village ’n Life en die Nasionale Rolprent- en Videostigting (NFVF) geborg.

The post Benoemings vir vanjaar se Silwerskermtoekennings vir Film en TV bekend appeared first on rooi rose.

Verskaf deur kykNET

Kykers van kykNET se gewilde sepie Suidooster is al maande lank verdeeld oor een van die reeks se mees emosioneel gelaaide storielyne: die ingewikkelde liefdesdriehoek tussen Angie (Char Carrie), Wade (Dean Smith) en Zoë (Lauren Joseph). 

Zoë het onlangs weer haar verhouding met Wade beëindig, ’n stap wat die toekoms van hul romanse onseker laat. Tussendeur is hy onvermydelik verbonde aan Angie wat hul kind verwag.  Die swangerskap is juis die oorsaak van baie spanning. Hulle moet jaloesie, onsekerheid en die werklikheid probeer verwerk dat Angie altyd ’n belangrike deel van Wade se lewe sal wees. 

Angie en Wade. Foto: Verskaf

Carrie sê haar karakter se gevoelens vir Wade kan nie sommer net in die niet verdwyn omdat hul romantiese verhouding tot ’n einde gekom het nie. 

“Ek dink Angie sal altyd baie lief wees vir Wade. Hulle het soveel saam deurgemaak en hy was ’n belangrike deel van haar lewe,” sê sy. “In hierdie stadium begin sy egter aanvaar dat Wade se geluk dalk nie by haar lê nie. Sy weet hoe sterk hy oor Zoë voel en sy besef ook dat sy hom nie kan dwing om haar lief te hê soos wat sy graag sou wou hê nie.” Hierdie aanvaarding is veral pynlik vir Angie, veral omdat sy Wade se kind verwag. Terwyl die meeste mense ná ’n verhouding afstand van ’n eks kan skep, sal Angie en Wade deur hul ouerskap aan mekaar verbind bly. 

Char glo nie Angie het reeds heeltemal aanbeweeg nie. “Sy probeer, maar genesing gebeur nie oornag nie. Sy verwerk steeds die mislukking van hul verhouding, die verwerping en alles wat sedertdien gebeur het.” Die swangerskap beteken ook dat Angie ook nie eenvoudig vir Wade uit haar lewe kan verwyder of vermy nie. Dan moet sy boonop ook sy gevoelens vir Zoë in die oë kyk. “Hy sal deel van haar lewe bly omdat hulle saam ’n kind gaan grootmaak. Dit maak dit vir haar baie moeiliker om haar emosioneel te distansieer en aan te beweeg.” 

Char glo Angie se bereidwilligheid om Wade se gevoelens vir Zoë te erken, wys hoeveel haar karakter gegroei het. “Die feit dat sy Wade aangemoedig het om vir Zoë te veg, wys geweldige groei. Sy wil hê haar kind moet ’n gelukkige pa hê en sy verstaan dat Zoë hom gelukkig maak. “Dit beteken nie noodwendig Angie is nie meer lief vir hom nie. Dit beteken bloot sy probeer sy geluk en hul kind se welstand bo haar eie gevoelens stel.” 

Angie en Zoe. Foto: Verskaf

’n Storielyn met talle emosionele lae 

Vir Char maak die kompleksiteit van die storielyn dit besonder bevredigend om te vertolk. 

Angie worstel met hartseer, swangerskap, jaloesie en die vooruitsig om ’n kind groot te maak saam met ’n man wie se hart by iemand anders lê. Soms kom sy sterk en onafhanklik voor, terwyl haar kwesbaarheid op ander tye duidelik na vore kom. “Ek geniet dit dat daar soveel verskillende emosionele lae is om te verken,” sê Char. 

“Dit is wonderlik om as akteur materiaal te kry wat jou uitdaag en jou die geleentheid bied om so ’n wye emosionele spektrum te verken.” 

Angie neem nie altyd besluite wat kykers sal verstaan of ondersteun nie, maar Char glo dit is belangrik dat sy elke toneel vanuit haar karakter se oogpunt moet benader. “Kykers stem dalk nie altyd met haar gedrag saam nie, maar dit is my verantwoordelikheid om te verstaan waarom sy optree soos wat sy doen. “Selfs wanneer haar optrede onredelik voorkom, spruit dit gewoonlik uit seerkry, vrees of ’n begeerte om haarself en haar baba te beskerm.” 

Kykers is sterk verdeeld 

Die Angie-Wade-Zoë-storielyn het baie sterk reaksie onder Suidooster-aanhangers ontlok.  

“Mense vra my dikwels of Angie en Wade weer bymekaar gaan uitkom, of hulle sê baie beslis vir my saam met wie hulle dink Wade behoort te wees,” sê sy. “Sommige kykers is heeltemal aan Angie se kant, terwyl ander weer vir Wade en Zoë ondersteun. Ek geniet dit om al die verskillende menings te hoor, want dit wys hoe betrokke mense by die karakters en die storielyn is. Hulle voel asof hulle die karakters persoonlik ken.” 

Char bly tjoepstil oor die moontlikheid dat Angie en Wade se verhouding dalk eendag weer vlam kan vat. “Ek sou sê kykers sal maar moet aanhou kyk. Ek kan natuurlik nie verklap wat gaan gebeur nie, en in ’n sepie kan dinge baie vinnig verander.” 

Wat wel seker is, is dat Angie en Wade se gedeelde geskiedenis – en hul kind – sal toesien dat hulle tot in die verre toekoms aan mekaar verbind gaan bly. “Of daardie verbintenis weer romanties gaan raak, is natuurlik ’n ope vraag,” sê sy. “Persoonlik wil ek hê Angie moet geluk vind. Die maak nie saak of sy daardie geluk by Wade of iemand anders gaan vind nie, ek wil net graag sien dat sy ’n punt bereik waar sy veilig, geliefd en gekose voel.” 

Waarom die driehoek by kykers aanklank vind 

Char glo die storielyn het so ’n sterk indruk gemaak omdat kykers die verhoudings tussen Angie, Wade en Zoë oor ’n lang tydperk sien ontwikkel het. 

Daar is ook nie ’n duidelike skurk in die verhaal of ’n maklike oplossing vir die situasie nie. “Elkeen van die karakters het seergekry, elkeen het foute gemaak en hulle almal glo hulle veg vir iets wat belangrik is. Daar is nie ’n eenvoudige uitkoms waarin almal gelukkig daarvan gaan afkom nie.” 

Char is oortuig dat dit juis hierdie emosionele kompleksiteit is wat die storielyn so herkenbaar maak. “Liefde kan ingewikkeld wees. Mense kan gevoelens vir meer as een persoon hê en dit is nie altyd so maklik om aan te beweeg as wat dit van buite lyk nie. “Dit is waarskynlik hierdie emosionele deurmekaarspul wat die storielyn so eg laat voel – en wat kykers aan die praat hou.” 

Lees ook: Komplekse verhouding van twee vroue belig in Kortfilm ‘As ek kon kies’

The post Char Carrie oor die ABC van Suidooster se AWZ-liefdesdriehoek appeared first on rooi rose.

Verskaf deur WM Media

Veral die ouer garde sal onthou dat daar destyds in talle huise ’n boodskap was, hetsy geborduur met fyn kruissteek of in een van daai swart glasrame met die bloedrooi rose en die blink foelie daaragter, wat die woorde uitgespel het: “Wat is ’n huis sonder ’n moeder?”

Deesdae word hierdie boodskappe heel waarskynlik as vergete aandenkings in liefdadigheidswinkels aangetref. Maar wat allesbehalwe vergete bly, is daardie wonderlike disse wat nét ’n ma vir haar kind kan voorberei – waar die liefde en sorg wat daarin gaan, dit net nog lekkerder laat smaak!

“Kos en familie is albei deel van VIA se DNS, en Moeder bring hierdie twee elemente op die hartroerendste manier saam,” sê Robert Kaden, hoof van inhoud en bemarking by VIA.

“Elke episode onthul die unieke band tussen ma en kind, ’n band wat met elke kyker se hart sal praat. Ons is opgewonde om hierdie spesiale stories saam met Rian van Heerden en die talentvolle span by Provoco aan VIA-kykers te bring.”

En wie is dan nou beter as die veelbesproke Rian van Heerden om die reeks aan te bied. Dié man kan jou laat skree van die lag of jou absoluut briesend laat, maar die een ding wat Rian so merkwaardig maak, is sy liefde vir sy ma, Rona van der Merwe (89), wat hy deurentyd so openlik en eerlik op sosiale media gedeel het.

Tot die verpletterende nuus op Saterdag 12 Julie 2025, toe hy haar verloor het. “Daar is niks erger nie,” erken hy.

In Moeder neem Rian die leiding sodat suksesvolle Suid-Afrikaners weer op hul beurt die geleentheid gebied word om vir hul ma’s dankie te sê, sommer vir alles. Wat hierdie reeks ook nog lekkerder maak, is dat die resepte van die reeks op VIA se webtuiste beskikbaar sal wees.

Die reeks val weg met Mnr. Suid-Afrika 2023, wat ook ’n suksesvolle oogkundige met ’n paar trefferliedjies op sy kerfstok is: Tiaan Massyn. Dan is dié veelsydige man boonop gek oor motors, en dis juis hoe hy sy vrou, Zelné Minnaar – wat self ook motor-betotteld is – gekies het.

Vind uit wat hy en sy ma, Sonia van der Watt, saam in die kombuis gaan aanmekaarslaan. Ook wie die spesiale gas vir hierdie wonderlike geleentheid gaan wees!

‘Moeder’. Foto: Verskaf

Rian gesels oor Moeder

Hoe sal jy Moeder as ’n reeks beskryf?

Moeder is ’n persoonlike reeks oor die baie spesiale band tussen ma’s en hul kinders. Dit wys ook die enorme invloed wat ons ma’s in ons lewens het en hoe hierdie liefde dan ook na ander mense oorgedra word.

Jou eie ma, Rona, is ongeveer ’n jaar gelede oorlede. Hoe het dié ervaring van verlies die manier beïnvloed waarop jy die reeks benader en na ander mense se verhale oor hul ma’s luister?

Dit is juis die verlies van my ma wat die inspirasie vir hierdie reeks was. Ek het spyt gevoel dat ek nie ons hegte verhouding ooit behoorlik sou kon dokumenteer om weer en weer daarna te kyk nie. Ek hoop om met hierdie reeks nie net verhoudings tussen ma en kind te dokumenteer nie, maar dat dit ook die kykers sal inspireer om met nuwe oë na hul eie ma’s te kyk.

Die reeks bring mense uit uiteenlopende wêrelde bymekaar – van entrepreneurs en kunstenaars tot ’n professionele stoeier en ’n internasionale ambassadeur vir mense met downsindroom. Wat het jou verras oor die ooreenkomste tussen hierdie verskillende ma-en-kind-verhoudings?

Dit maak werklik nie saak wie jy is en wat jy in die lewe bereik het nie. Vir ’n ma sal jy altyd net haar kind bly, daardie wese vir wie sy liewer is as vir haarself. En ja, as ma praat, dan luister jy, selfs al is jy die CEO van ’n massiewe besigheid!

Kos dra dikwels herinneringe, tradisies en familiegeskiedenis oor. Hoe word kos in Moeder gebruik om gesprekke moontlik te maak wat die gaste andersins dalk moeilik sou vind om te hê?

Kos bring inderdaad heelwat herinneringe terug. Maar ek het agtergekom dat dit juis die proses van die kook van ’n gunstelingdis is wat altyd daarin slaag om gevoelens en herinneringe wakker te maak. En veral wanneer jy die geleentheid kry om met daardie gunstelingdis vir jou ma te kan sê wat sy in jou lewe vir jou beteken het, is dit ongelooflik spesiaal.

Bekendes se beeld wat hulle na buite voorhou, word gewoonlik deur hul prestasies en openbare doen en late gedikteer. Wat gebeur wanneer hulle nou saam met hul ma’s voor die kamera moet sit en bloot net iemand se seun of dogter moet wees?

Die reaksie is universeel: Hulle word weer kinders. En natuurlik bly ma se woord wet!

Het die maak van Moeder jou laat nadink oor dinge wat ons vir ons ma’s behoort te vra of sê terwyl ons nog die geleentheid het – en wat hoop jy sal kykers ná elke episode anders doen?

Ongetwyfeld. Dit is werklik so belangrik dat jy sonder om enige tyd te verspil, vir jou ma vertel watter belangrike rol sy in jou lewe gespeel het en nog steeds speel. Wat ook nie agterweë gelaat moet word nie, is dat sy moet weet: die lesse wat jy by haar geleer het, sal in jou eie lewe en dié van jou nageslag voortleef.

Moeder word vanaf Vrydag 24 Julie om 18:00 op VIA (DStv-kanaal 147) uitgesaai.

Lees ook: Komplekse verhouding van twee vroue belig in Kortfilm ‘As ek kon kies’

The post In ‘Moeder’ huldig bekendes hul ma’s appeared first on rooi rose.

Verskaf deur kykNET

Dit is maklik om te sê ’n mens het ’n keuse, maar in werklikheid is dit nie so eenvoudig nie. Buiten dat die lewe en samelewing ’n rol speel, kan jy nie altyd die omvang van die gevolge van jou keuse volkome voorspel nie.  

Gedurende ’n kerkdiens word ’n jong vrou, Kyleigh (Beáta Bena), se verlowing aan ’n jong man, Jayden, gevier. Met dié openbare gebaar bevestig Kyleigh die lewe wat sy vir haarself kies ­– een van geloof, gemeenskap en familie.  

Lara (Anoecha Kruger), ’n vorige partner, is ’n toeskouer by die geleentheid. Wat op die oog af ’n vrolike geleentheid moet wees, is in werklikheid vir die twee vroue die amptelike bevestiging dat hul diepgaande verhouding finaal verdoesel word. Hulle wil bitter graag na mekaar uitreik en sê wat nie gesê mag word nie, maar elkeen moet haar pyn alleen verwerk, die swye handhaaf.   

Die skrywerregisseursduo Kanya Viljoen en Emilie Badenhorst staan bekend as Unusual Bones. Hul eerste kortprent, ekstasis (2021), het pryse gewen by die Cannes Young Directors Awards en die Joburg Film Festival (2021) en die Silwerskermfees in 2022. Dit is ook by verskeie ander rolprentfeeste oor die wêreld heen vertoon. Hul kortfilm ’n Doop om stilte (2023) het by die Silwerskermfees gedebuteer, waar die duo die prys vir beste regisseur en beste kortprent gewen het.  

Vrae aan Kanya Viljoen en Emilie Badenhorst, regisseurs en medeskrywers 

Is daar ’n onderverteenwoordiging van stories wat fokus op intieme verhoudings tussen vroue binne die Afrikaanse milieu? Hoekom is dit so? 

Ja, ons glo definitief dat intieme verhoudings tussen vroue nie binne films of stories gesien word nie. Nie net in Afrikaans nie, maar in baie tale en kulture oor die wêreld heen. Nietemin, ons weet dat die Afrikaanse kultuur hoofsaaklik baie konserwatief is, dat daar ’n geskiedenis van “ordentlikheid” en “aanvaarbaarheid” daarmee saamkom. Wat dit soveel meer kompleks maak, is die feit dat baie van die Afrikaanse kultuur binne ’n Christelike geloof gebou is, en dat daar binne geloof dikwels op die verhoudings neergekyk word. Dit beteken nie dat dit nie bestaan nie, maar dat mense bang is vir stories wat nie soos hulle eie stories lyk nie. Veral omdat die tipe stories jou kan laat bevraagteken wat jy vir jouself glo en wat as waardig beskou word. 

As ek kon kies raak heelwat temas aan. Dit begin immers in ’n kerk. Wei uit asseblief. 

Een van die belangrikste elemente binne die film was om eerlik te wees oor hoe baie kontras daar in die lewe is. Hoe ’n mens kan “behoort” in beide jou geloof en binne jou eie seksualiteit. Hoe ’n oomblik van jou grootste vreugde ook ’n oomblik van jou grootste hartseer kan bevat. Hoe ’n mens kan vrede hê met jou keuses, en tog daaroor kan treur. Dis iets wat ons almal so intiem ken – dat die lewe uit keuses bestaan, maar dat dit nie altyd daardie keuses maklik maak nie.  

Dit is ’n interessante titel, want mense kan kies, of dikteer die samelewing steeds, en hoe? Is daar ’n boodskap wat julle wil oordra. 

Vir ons is dit minder oor jou eie keuses en wat die samelewing vir jou kies – alhoewel dit altyd tot ’n mate sal bestaan – maar meer oor hoe ’n mens self nie altyd seker is oor die keuses wat jy maak nie. Die titel dien as ’n uitnodiging om te vra of ’n mens werklik altyd “kan kies”? Of glo jy dat jy nie kan kies nie? Sou ’n mens anders kies as jy weer die kans kry? En is ’n mens se keuses altyd eenvoudig, of dra dit komplekse nagevolge saam? 

Vertel meer van julle kollektief, Unusual Bones, en julle etos. Hoe kies julle projekte waarby julle betrokke raak? 

Unusual Bones het ontstaan uit ’n wete dat ons dinge ’n bietjie “anders” wou doen. Nie een van ons het formele onderrig in film nie, maar ons het geweet dat ons glo in stories en hoe dit ’n mens kan uitnooi om dinge anders te sien, anders te ervaar, maar so ook dat die metode van skep anders kan lyk. Wat vir ons belangrik is as ’n kollektief, is dat projekte iets binne ons aanraak, dat dit met ’n eerlikheid aangepak word en dat ’n veelsydigheid van stemme betrek word. 

Volgens julle webwerf werk julle tans aan julle eerste vollengte-speelfilm. Vertel meer. 

Inderdaad! Ons het in 2023 die kortfilm ’n Doop om stilte vir die Silwerskermfees geskep.  Die kortfilm se tema en styl het as die oorsprong van ons speelfilm gedien. Die film speel in ’n klein myndorpie af waar ’n jong meisie, Isabel (15), haar broer, Joshua (13), stadig maar seker aan volwassenheid en die samelewing se verwagtinge moet afstaan.  

Die film kom al ’n lang pad en ons is so dankbaar dat ons die laaste twee jaar aktief die film met internasionale vervaardigers, markte en agentskappe kon deel, wat stadig maar seker help om fondse in te samel vir die speelfilm. As alles op dreef bly, sal ons dit volgende jaar verfilm en kan gehore dit later in teaters sien.  

Die 14de kykNET Silwerskermfees word van 19 tot 22 Augustus in Kampsbaai, Kaapstad, aangebied. Kaartjies vir die films, asook die prestigeryke toekenningsgeleentheid op Saterdag 22 Augustus, is beskikbaar by Quicket. 

Vir die volledige program, besoek www.silwerskermfees.co.za

Lees ook: Nuwe Afrikaanse riller ‘ONTWAAK’ ondersoek die gevare van die behoefte om te behoort

The post Komplekse verhouding van twee vroue belig in Kortfilm ‘As ek kon kies’ appeared first on rooi rose.

Verskaf deur DStv

Hoeveel van jouself sal jy prysgee om te behoort?

Dit is die vraag aan die hart van ONTWAAK, Sonvelt Media se nuwe Afrikaanse psigologiese riller-reeks wat vanaf 14 Julie eksklusief op DStv Stream beskikbaar is. Dié reeks van agt episodes, geskryf deur Wessel Pretorius en met André Velts in die regisseurstoel, ondersoek die fyn lyn tussen invloed, geloof en manipulasie – en wat gebeur wanneer die behoefte om aanvaar te word gevaarlik raak.

Die hoofkarakter is Melissa Human (Cindy Swanepoel), ’n psigiater wat ná jare oorsee terugkeer na Suid-Afrika om by Noordlig, ’n tronk vir krimineel versteurdes, te begin werk. Haar nuwe lewe neem ’n onverwagte wending wanneer sy weer gekonfronteer word met mense en gebeure uit haar verlede.

Die ondersoek na ’n reeks ritualistiese moorde lei na Horisonne – ’n afgesonderde gemeenskap wat kwesbare mense lok met die belofte van identiteit, veiligheid en ’n plek waar hulle uiteindelik kan behoort. Maar agter dié belofte skuil ’n donker werklikheid. Wanneer Melissa dieper delf, ontbloot sy ’n wêreld waarin trauma, manipulasie en geloof gevaarlik met mekaar verweef is.

Chris Chameleon in ‘ONTWAAK’. Foto: Verskaf

Vir Wessel het die reeks ontstaan uit ’n belangstelling in die manier waarop mense hulself binne groepe en gemeenskappe definieer.

“Ek is gefassineer deur kuddementaliteit,” sê hy. “Die vraag waaruit ONTWAAK ontstaan het, was: Hoeveel van jouself sal jy prysgee om te behoort?”

Volgens Wessel is die reeks nie bloot ’n verhaal oor kultusse nie – dit gaan oor ’n universele menslike behoefte.

“Meeste mense smag daarna om deel te wees van ’n groep of ’n beweging. Ons wil nie agtergelaat of uitgesluit word nie. Selfs al resoneer die stam se etos nie noodwendig met ons nie, sal ons soms persoonlike etiek prysgee om aanvaar te word.”

Vir André was dit belangrik dat die wêreld van ONTWAAK onheilspellend voel sonder om ongeloofwaardig te raak.

“Die ruimtes dra gewig en geskiedenis,” sê hy. “Die stel word amper ’n karakter op sy eie. Van die beligting en kameralense tot kostuums en klank het elke element bygedra om die sielkundige spanning van die verhaal te ondersteun.”

Cindy Swanepoel in ‘ONTWAAK’. Foto: Verskaf

Die reeks spog met ’n ensemble-rolverdeling wat, onder andere, Cindy Swanepoel, Chris Chameleon, Minke Marais, Carel Nel, Sean-Marco Vorster, Deon Lotz, Rikus Strauss, Kenley Swart, Louis Auret, Maude Sandham, Fezile Mpela, Christopher van der Westhuizen en Ray Buso insluit.

ONTWAAK het al die spanning en tergende raaisels van ’n misdaadriller, maar vra ook groter vrae oor identiteit, invloed en die behoefte om êrens te behoort. Wessel hoop die reeks sal gesprekke oor hierdie kwessies ontlok en dat kykers hulself ná afloop van die laaste episode sal afvra: Dink ek vir myself, of volg ek maar net die kudde?

ONTWAAK word vervaardig deur Sonvelt Media wat ook verantwoordelik was vir programme soos Reënboogrant, Pronk Primêr en Ek, hy en jy. 

ONTWAAK begin 14 Julie eksklusief op DStv Stream wanneer die eerste twee episodes beskikbaar gemaak sal word. Daarna volg ’n nuwe episode weekliks.

Lees ook: Silwerskermfees bied voorsmaak van opwindende nuwe TV-reekse

The post Nuwe Afrikaanse riller ‘ONTWAAK’ ondersoek die gevare van die behoefte om te behoort appeared first on rooi rose.

Verskaf deur kykNET

Die loodsepisodes van ’n opwindende dramareeks gebaseer op Deon Meyer se Blood Safari, in samewerking met MultiChoice, ’n Canal+-maatskappy en ITV Studios, en die eksklusiewe wêreldpremière van die tweede seisoen van Spinners, ’n ko-produksie van MultiChoice in samewerking met StudioCanal, asook drie Afrikaanse dokumentêre reekse bied ’n blik op die uiteenlopende TV-inhoud waarna DStv-intekenare kan uitsien.  

M-Net se Invisible, met Jozua Malherbe as regisseur, beloof spanning soos min met ’n verhaal gebaseer op Deon Meyer se Blood Safari, met ’n sterbelaaide rolverdeling gelei deur die Australiese aktrise Abbie Cornish (Limitless, Three Billboards Outside Ebbing, Missouri) en die Skotse akteur Dougray Scott (The Hack, The Crow Girl), asook plaaslike akteurs soos Tim Theron (Trackers, Heart of the Hunter), Tumisho Masha (Isibaya, Silverton Siege), Frank Rautenbach (Summertide, Beter as Gister), Kim Engelbrecht (Reyka, Dominion), Chi Mhende (Generations: The Legacy, Queen Sono) en Siv Ngesi (The Woman King, Unseen). 

Die bekroonde Suid-Afrikaanse reeks Spinners sal ook sy tweede seisoen by die fees bekendstel. Die reeks, ’n ko-produksie van StudioCanal en MultiChoice, is geskep en bestuur deur Benjamin Hoffman, geregisseer deur Jaco Bouwer en geskryf deur Matthew Jankes en Sean Steinberg. Die vervaardigers is Joachim Landau (vir Federation Middle East, Africa and Caribbean) en Ramadan Suleman (vir Natives at Large). 

Die Underdogs het intussen groot sterre in die spinning-wêreld geword en geniet ’n nuwe lewe in Johannesburg. Ethan (Cantona James) besef egter gou dat hy nie van sy verlede kan wegkom nie. Wanneer Hercules hom vir een laaste taak nodig het, word hy weer ingetrek. Terselfdertyd bots hy met die grootste misdaadfamilie in Soweto wanneer hul moeilike seun, Sayi, sy grootste teenstander op die spinning-baan word.  

Vir kykNET word drie baie uiteenlopende onderwerpe getakel wat belangrike gesprekke gaan aanwakker. Die Bom lig die sluier op Suid-Afrika se destydse kernwapenprogram; vroue se stryd met menopouse kom onder die loep in Meer as warm gloede; en Tweespalt stel ondersoek in na die verdeelde rugbygehore – die ondersteuners van die Springbokke versus die All Blacks.

Invisible

‘Invisible’ se promosie-foto. Foto: Verskaf

Wanneer die Londense skakelwese-konsultant Emma le Roux ’n desperate oproep ontvang van haar broer wat dekades tevore verdwyn het, keer sy terug na Suid-Afrika. Sy word ingetrek in ’n dodelike sameswering rondom wildstropery, politieke korrupsie en die geheimsinnige dood van ’n Mosambiekse presidentskandidaat. Met die hulp van haar lyfwag, Martin Dekker, en polisiespeurder kol. Jack Phatudi begin Emma ’n netwerk van mag, geweld en geheime in die Laeveld ontbloot – geheime wat al meer as twintig jaar begrawe lê.

Dit is geskoei op die spanningsriller Blood Safari van Deon Meyer, ’n meesterstorieverteller wat ook bekend is vir die fyn inkleding van sy karakters. 

Regie: Jozua Malherbe  

Draaiboek: Deon Meyer, William Schneider, Amy Jephta 

Met onder andere: Abbie Cornish, Tim Theron, Tumisho Masha, Dougray Scott, Kim Engelbrecht, Frank Rautenbach, Chi Mhende, Siv Ngesi 

Die loodsepisode van Invisible word op Woensdag 19 Augustus by die Silwerskermfees vertoon, en die reeks sal vanaf 14 Oktober op M-Net (DStv-kanaal 101) uitgesaai word. 

Spinners S2

‘Spinners S2’ se promosie-foto. Foto: Verskaf

Die Underdogs het intussen groot sterre in die spinning-wêreld geword en geniet ’n nuwe lewe in Johannesburg. Ethan (Cantona James) besef egter gou dat hy nie van sy verlede kan wegkom nie. Wanneer Hercules hom vir een laaste taak nodig het, word hy weer ingetrek. Terselfdertyd bots hy met die grootste misdaadfamilie in Soweto wanneer hul moeilike seun, Sayi, sy grootste teenstander op die spinning-baan word.  

Regie: Jaco Bouwer 

Met, onder andere: Cantona James, Braedon Buys, Dillon Windvogel, Nahum Hughes, Chelsea Thomas, Clementine Mosimane, Aphiwe Mkefe, Luyanda Zwane en Mondli Makhoba  

Die loodsepisode van Spinners S2 word Vrydag 21 Augustus by die Silwerskermfees vertoon, en die reeks sal vanaf 25 Oktober op Mzansi Magic (DStv-kanaal 161) uitgesaai word.  

Die Bom 

‘Die Bom’ se promosie-foto. Foto: Verskaf

Die wêreld was nog nooit só naby aan ’n kernoorlog soos nou nie. Die sogenaamde “Doomsday Clock” staan op 85 sekondes voor middernag. Suid-Afrika is die enigste land in die wêreld wat sy eie kernbomme gebou en toe vrywillig afgetakel het. Die verhaal is een van uiterste geheimhouding, spioenasie, terreur en politieke intrige. Daar word ook gekyk na die land se kernenergie-program die rol van die Koeberg-kernkragsentrale.  

Pieter Steyn, ’n joernalis en dokumentêre filmmaker met meer as 20 jaar se ervaring, ondersoek verskeie kwessies in dié reeks. Soos bekommernisse oor Namakwaland, waar Suid-Afrika se kernafval gestort word; vrae rondom radioaktiwiteit wat in Australiese skape opgemerk is en wat van die hoogs verrykte uraan geword het wat in die land se bomme was.  

Regie: Pieter Steyn 

Met, onder andere: Prof. Jo-Ansie van Wyk, prof. André Buys, prof. Anna-Mart van Wyk, Rodney Wilkinson, Barend du Plessis, Abdul Minty, Mike Kantey, Lydia von Wielligh-Steyn en Riaan Cruywagen 

Die loodsepisode van Die Bom word Donderdag 20 Augustus by die Silwerskermfees vertoon, en die reeks sal vanaf Woensdag 23 September om 20:00 op kykNET (DStv-kanaal 144) uitgesaai word.  

Meer as warm gloede 

‘Meer as warm gloede’ se promosie-foto. Foto: Verskaf

In die reeks Meer as warm gloede word die stilswye en mites rondom menopouse gebreek. Met Antoinette Louw se persoonlike reis, ontmoet ons Suid-Afrikaanse vroue wat openhartig en eerlik praat oor al die veranderinge: slaappatrone en emosies tot breinfunksie, identiteit, verhoudings en intimiteit. Kenners belig die fisiologiese aspekte van menopouse, en hoewel daar nie een enkele benadering tot of behandeling vir menopouse is nie, bied dit ’n insiggewende blik op die rol van hormone. Daar is raad oor leefstylaanpassings, en met hoop en humor word vroue aangemoedig om hulself te aanvaar. 

Regie: Hanneke Schutte 

Met, onder andere: Antoinette Louw, Marianne Thamm, Melanie Verwoerd, Elsabé Brits, Lucinda Bosch, Zelda la Grange, dr. Renscha van den Berg, dr. Liana Roodt 

Die loodsepisode van Meer as warm gloede word Vrydag 21 Augustus by die Silwerskermfees vertoon, en die reeks sal vanaf Woensdag 9 Desember op kykNET (DStv-kanaal 144) uitgesaai word.   

Tweespalt

Tweespalt promosie-foto. Foto: Verskaf

Tweespalt ondersoek een van rugby se grootste wedywerings deur ’n unieke Suid-Afrikaanse lens. Dis ’n verhaal oor die ondersteuners van die Springbokke en die All Blacks, saam op dieselfde bodem, maar nie verenig deur sport nie. Die reeks delf diep in identiteit, lojaliteit, geskiedenis en verdeeldheid. Hoekom ondersteun soveel Suid-Afrikaners die All Blacks met soveel passie? Deur onderhoude met oudspelers, joernaliste en ondersteuners, ontbloot die reeks dekades van spanning gevorm deur apartheid, politiek en persoonlike oortuigings. Deur ikoniese wedstryde en rou persoonlike stories wys dié dokumentêr ’n wedywering wat baie verder strek as wat die telbord weerspieël. 

Die reeks is vervaardig deur IdeaCandy. 

Regie: Janina Oberholzer 

Met, onder andere: Wynand Claassen, Benna October, Breyton Paulse, Victor Matfield, Marco Botha, Heindrich Wyngaard 

Die loodsepisode van Tweespalt word Vrydag 21 Augustus by die Silwerskermfees vertoon, en die reeks sal vanaf Woensdag 9 September op kykNET uitgesaai word.  

Die 14de kykNET Silwerskermfees word van 19 tot 22 Augustus in Kampsbaai, Kaapstad, aangebied. Kaartjies vir filmpremières, TV-loodsepisodes, asook die prestigeryke toekenningsgeleentheid op Saterdag 22 Augustus, is beskikbaar by Quicket.  

Vir die volledige program, besoek www.silwerskermfees.co.za. 

Lees ook: 4 lesse wat ons uit ‘Beter as Gister’ se eerste episode geleer het

The post Silwerskermfees bied voorsmaak van opwindende nuwe TV-reekse appeared first on rooi rose.

Lees ook: Bennie Fourie en sy broers terug met Die Broer Toer 

The post ‘Klippe kou’: ’n Dokkie-realiteitsreeks oor die Bull Run-ervaring appeared first on rooi rose.

Verskaf deur kykNET

Hy was definitief ’n klein bietjie op sy senuwees toe hy ná ’n jaar vir die eerste keer weer op die stel van Diepe Waters stap. 

Maar toe akteur Righard van Jaarsveld eers ’n hele paar bekende gesigte sien en in sy geliefde karakter Tommie se skoene klim, was dit asof hy nooit weg was nie. 

“Daar is ’n vorm van gemak as jy iemand op stel kry saam met wie jy lank gewerk het,” vertel Righard. “Daar was ’n kinderlike opgewondenheid om almal weer te sien.” 

Boonop is daar ’n paar nuwe akteurs wat ook nou deel van die gewilde telenovela is, wat die stel interessant en genotvol maak. 

“Toe ek aanvanklik die rol in 2022 gekry het, was dit een van my eerste groot projekte. Dit het heeltyd ietwat onwerklik gevoel, waar ek elke dag werk toe kon gaan en doen waarvoor ek lief is,” verduidelik Righard. 

“Nou voel dit of ek Tommie kan gebruik om van my werklike lewe te ontsnap. Ek kan Tommie wéés en dit is een van die lekkerste karakters om te speel, want hy is so naïewe mens wat dikwels so min probleme het.” 

In die tyd wat Righard weg was, het hy onder andere in groot produksies soos die Showmax-reeks Reënboogrant en fliek Som van twee gespeel. Hy moes ook grootword, soos “enigiemand moet doen wat net deur die lewe gaan.” 

Dus klim hy nou in Tommie se wêreld en kan hy al die persoonlike dinge van sy regte lewe weg van die kameras los. 

“Tommie sien die mooi in die wêreld en mense sien nie altyd die mooi nie, want die lewe is mos maar ’n bietjie deurmekaar.” 

Diepe Waters-kykers kon uitsien dat Tommie en Tshepo (Johnny Potsanyane) nie te lank ná mekaar weer in Boskruin opdaag nie. 

Het dié boesemvriende dit so beplan? 

“Nee, ons het dit definitief nie bespreek nie,” lag Righard. “Maar ons het gelag. Ons het saam Diepe Waters gekry, is toe saam uit, speel toe saam in Reënboogrant, en nou is ons weer saam in Diepe Waters.” 

Deesdae is Righard ook hard besig om aan ’n konstruksiemaatskappy saam met sy pa te werk. 

“Ek het grootgeword in ’n huis van konstruksie: My pa is ’n boukontrakteur en my broer is ’n argitek,” verduidelik Righard. Vakansies sou hy uithelp, maar dit is eers ná Reënboogrant verlede jaar klaargemaak het, waar hy sy opsies werklik begin oorweeg het. 

“Ek het agtergekom ek wil iets doen wat my ’n bietjie meer aan die gang hou, iets wat vir my skoonheid bring weg van my bedryf af.” 

Sodoende het hy Januarie vanjaar saam met sy pa in besigheid gegaan en is dit waar hy werskaf as hy nie voor die kameras is nie. 

“My pa gun my die wêreld. Die dae wat ek skiet, gun hy my die af dae, en as ek vroeg klaarmaak, dan trek ek my gumboots of steel tips aan en gaan na ’n perseel toe,” vertel hy. 

Voor die kamera bou en beitel Righard nou weer aan Tommie se lewe; een vol interessante storielyne wat kykers sal vermaak. 

“As ek hom speel, vergeet ek van al my persoonlike goed en kan ek net asemhaal. Tommie bly Tommie en ek dink nie ons moet hom verander nie,” verduidelik Righard met ’n glimlag. 

Alhoewel Tommie bekend is as die komiese verligting van die reeks, gaan sy terugkeer hierdie keer met groot innerlike konflik gepaard. Hy daag onverwags op in Boskruin en bied dadelik aan om Juvan uit te help by die nuut-oorgedoende kroeg, Bianca’s. Hy hou vol hy is bloot op ’n welverdiende vakansie van sy mediese studies af, maar kykers sal vinnig agterkom dat die skyn bedrieg. Enige samesprekings oor sy blink toekoms as ’n “ryk dokter” laat hom sigbaar senuweeagtig. 

Die chaos verdiep wanneer Tommie agter Bianca’s se toonbank begin werskaf. Dit is gou duidelik dat mediese handboeke hom nie voorberei het op die kuns van kroegwerk nie. Hy skryf vreemde beskrywings in plaas van tafelnommers op bestellings en gee kliënte selfs ongevraagde (en ietwat ongemaklike) mediese advies.  

Met die koms van sy streng pa, Henno, wat dink kroegwerk is ver benede sy slim seun, begin die spanning breekpunt bereik. Die groot vraag is hoe lank Tommie sy geheim kan bewaar, veral wanneer ’n skielike mediese noodgeval in die kroeg almal na “Dokter Tommie” laat kyk vir hulp. Kykers sal maar moet inskakel om te sien hoe Tommie homself uit hierdie diep waters gaan probeer uitstoei. 

Kyk Diepe Waters Maandae tot Donderdae om 18:30 op kykNET (DStv-kanaal 144, ook aanlyn op DStv Stream). Diepe Waters is ook op Catch Up beskikbaar. 

Lees ook: 4 lesse wat ons uit ‘Beter as Gister’ se eerste episode geleer het

The post Righard is ná ‘n jaar weer ‘Diepe Waters’ se geliefde Tommie appeared first on rooi rose.

Deur kykNET verskaf

In die eerste episode van Beter as Gister word vier vaders, elk met hul eie uitdagings en bagasie, in die kollig geplaas. Almal staan voor keuses wat nie net hul eie toekoms nie, maar ook dié van hul gesinne kan bepaal.

Ons kyk na vier belangrike lesse uit die eerste episode en bespiegel oor wat moontlik verder in hierdie boeiende dramareeks kan ontvou.

1. Die verlede het ‘n manier om jou weer in te haal

Tariq (Elton Landrew) se lewe neem ‘n dramatiese wending wanneer hy hoor dat sy vervreemde dogter in ‘n tragiese motorongeluk gesterf het. Sy laat haar sewejarige dogter, Katinka (Alexis Newman), agter. Wat begin as verpletterende nuus, skep ook ‘n onverwagte geleentheid vir versoening. Skielik kry Tariq die kans om weer ‘n band te bou met familie wat hy geglo het vir altyd verlore was.

2. Vaderskap vra dikwels opofferings wat niemand raaksien nie

Marco (Neels van Jaarsveld) het sy loopbaan vir ‘n dekade op die agtergrond geplaas om sy kinders groot te maak, terwyl sy vrou, Cecile (Rolanda Marais), haar politieke loopbaan uitgebou het. Noudat die kinders ouer is, probeer hy sy plek in die arbeidsmark herwin, maar die pad terug na professionele sukses is nie sonder uitdagings nie.

3. Vertroue bly die hoeksteen van elke gesin

Eben (Edwin van der Walt) het hard gewerk om vir sy dogter ‘n veilige en stabiele lewe te skep. Sy wêreld word egter omvergewerp wanneer haar biologiese ma na Suid-Afrika terugkeer en weer deel van haar lewe wil wees. Hoewel die moontlikheid van twee betrokke ouers voordelig kan wees, maak ou wonde en onafgehandelde emosies die besluit uiters kompleks.

4. Onopgeloste konflik kan verreikende gevolge hê

Bernard (Frank Rautenbach) lyk asof hy alles het waarvoor ‘n mens kan wens, behalwe vrede by die huis. Sy verhouding met sy tienerseun, Reynard (Sebastian van Niekerk), versleg al hoe meer totdat emosies oorkook. ‘n Gespanne konfrontasie oor Bernard se beweerde verhouding met ‘n kollega lei tot gebeurtenisse wat hul lewens onherroeplik verander. Die episode eindig met ‘n skokkende motorongeluk wat die verloop van hul familie se toekoms kan bepaal.

Wat wag in Episode 2?

Die tweede episode fokus op die emosionele nagevolge van die verwoestende ongeluk. Tariq begin die eerste treë gee om ‘n verhouding met Katinka te bou terwyl Eben worstel met die vraag of hy sy dogter se ma weer in hul lewens moet verwelkom. Marco bly vasberade om sy loopbaan te herbou ondanks teenstand op die tuisfront. Intussen moet Bernard en Reynard die gevolge van hul optrede in die gesig staar.

Kyk Beter as Gister vanaand om 20:00 op kykNET (DStv-kanaal 144). Episodes is beskikbaar op Catch Up en DStv Stream.

Lees ook: Stormagtige tye wag op ‘Suidooster’-kykers

The post 4 lesse wat ons uit ‘Beter as Gister’ se eerste episode geleer het appeared first on rooi rose.

Volgens Robyn word Cheryl deur twee dinge gedryf: haar liefde vir haar dogter en haar onvermoë om haar verlede in die oë te kyk. 

“Sy’s ’n ma. Sy leef vir haar dogter. Sy probeer hard om vir haar ’n goeie lewe te gee. Maar sy hardloop ook gereeld weg. Sy face nie dinge nie – sy hardloop elke keer weg.” 

Cheryl se aankoms in Gemoedsdrif plaas ook Ruan en Lily se verhouding onder druk en laat Lily al hoe meer twyfel. 

“Lily ken nie Cheryl en Ruan se geskiedenis nie, so dit is maklik vir haar om suspicious te raak. Cheryl se teenwoordigheid toets of Ruan en Lily mekaar rêrig vertrou. Die goed waarmee hulle nie deal nie, kom nou aan die lig.” 

Vir Robyn was die verhouding tussen Cheryl en haar dogter, Josie, die hart van die storie. 

“Ek het al voorheen ’n paar keer ’n ma gespeel, maar hierdie keer was dit anders. Dalk omdat ek ouer is. Ek voel ek het meer van myself om te gee. Saam met Lamiyah Barnard, wat Josie speel, het daar ’n nurturingkant van my uitgekom. Sy het die hele ervaring besonders gemaak.” 

 

Hoe Cheryl gestalte aangeneem het

In Robyn se vertolking van Cheryl het die grimeerkamer ’n sleutelrol gespeel. 

“Waldi [van Rensbrug], Skemergrond se hoof van grimering en hare, het my op my eerste dag gevra hoe ék wil lyk. Ek was so geskok, want amper niemand vra dit nie. Ek het gesê ek wil geen grimering hê nie, en my hare moet natuurlik bly. Die kostuums was ook baie eenvoudig. Om so ‘kaal’ voor die kamera te wees, het my gehelp om Cheryl se kwesbaarheid te vind.” 

Nie al die uitdagendste oomblikke het egter voor die kamera afgespeel nie. 

“Ek was so in my kop. Ons moes ’n paar tonele doen waar Cheryl net wil weghardloop, en ek het ge-panic dat ek nie die intensiteit van die emosies sou regkry nie. Hildegardt Whites het my tussen takes net vasgehou. Elke keer wanneer hulle ‘Action!’ gesê het, kon ek sterker teruggaan. Ek was ongelooflik dankbaar vir haar.” 

Behalwe die emosioneel moeilike dae was daar ook oomblikke wat haar kreatief uitgedaag het. Een daarvan was om saam met die regisseur Bobby Stuurman te werk.  

“Ons doen eers die toneel soos dit geskryf is, en dan gee Bobby vir jou ’n heeltemal ander nota wat alles verander. Dit hou jou op jou tone en laat jou nuwe dinge oor jou karakter én jouself ontdek.” 

Vir Robyn is Cheryl se aankoms besonder interessant omdat dit kykers uiteindelik iets van Ruan se verlede wys.

Hoewel sy nie veel oor Cheryl se reis wil verklap nie, hoop sy kykers sien die karakter se menslikheid raak. 

“Ek hoop hulle dink sy is ’n goeie ma. Sy probeer regtig haar ou patrone breek. Sy mag dalk stubborn en bang wees, maar sy kom elke keer terug en probeer weer.” 

Vir Robyn het haar Skemergrond-debuut uiteindelik veel meer beteken as net nog ’n rol.

“Dit het full circle gevoel. Ons het weer by Atlantic Studios verfilm, waar ek amper sewe jaar gelede met Arendsvlei begin het. Ek kon daardie 21-jarige Robyn weer sien wat destyds deur dieselfde gebou geloop het. Nou staan ek hier as ’n 28-jarige aktrise met baie meer ervaring en baie meer diepte. Ek het besef hoe ver ek gekom het. Ek het dit nodig gehad.” 

 

Skemergrond word Maandae tot Donderdae om 19:30 op kykNET&kie (DStv-kanaal 145) uitgesaai en is ook op DStv Stream en Catch Up beskikbaar.

Lees ook: Bennie Fourie en sy broers terug met Die Broer Toer

The post Robyn Rossouw sluit by ‘Skemergrond’ aan: ‘Cheryl het so baie lae’ appeared first on rooi rose.

Deur Margaret Gardiner

Ek het al baie voorstelle gekry om eerder stil in ’n hoekie te gaan sit en wag om dood te gaan, as om by die wêreld betrokke te raak soos wat ek doen – ten spyte van my ouderdom. Ek luister graag na mense, maar gelukkig kies ek my eie pad na gelang van my behoeftes. Ek noem dit omdat ek, as ek besluit het om my werk as vermaaklikheidsverslaggewer prys te gee, een van die opwindendste ervarings van my lewe sou misgeloop het. 

Taylor Swift is gewilder as ooit. Dit gaan nie net daaroor dat sy talentvol is en aan die fisieke ideaal van skoonheid voldoen nie; dit gaan ook oor hoe grasieus sy met roem omgegaan het. Dit is nie ’n maklike taak nie – ek het ’n boek geskryf oor die slaggate en skade wat in die kollig kan ontstaan: Damaged Beauty Joey Superstar. In plaas daarvan om onder druk en boelies te swig, het Taylor haar oor belangrike kwessies uitgespreek, vir vroue gepleit en gaan sy voort om mense oor verskeie platforms heen te inspireer. 

 

View this post on Instagram

 

A post shared by Margaret Gardiner (@margaret_gardiner)

Ek was gelukkig genoeg om die première van Toy Story 5 by te woon, ’n franchise wat begin het toe ek die eerste rolprent 31 jaar gelede met my seun op my skoot gekyk het. Die beroemde Hollywood Blvd was afgesluit en met rooi tapyt bedek. Stalletjies was opgestel vir kos, drankies en Porsche-motors wat in Toy Story-temas geverf was. Daar was klimmure, en geborduurde serpe, plus weggee-geleenthede van alle soorte. Kinders het met groot oë gehardloop om manifestasies van die hoofkarakters te ontmoet. Dit het die asem weggeslaan. 

Ten spyte van al die glans, het die rolprent iets bereik wat ons almal vandag nodig het. Dit het mense se gemoed gelig en hulle laat glimlag wanneer hulle na mekaar kyk. Dit is dalk die beste Toy Story tot dusver. Dit ondersoek die invloed van tegnologie op hoe kinders speel: hoe nuwe elektroniese speelgoed vriende kan help om oor afstande heen kontak te maak, en hoe tegnologie wel kan onderrig, maar kinders ook uitgesluit kan laat voel. Tom Hanks is terug as Woody, en Tim Allen is weer Buzz Lightyear. Joan Cusack vertolk die rol van Jessie – die hoofkarakter wat werklik omgee oor haar “kind” en wil verseker dat “speel” nie deur elektroniese toestelle uitgewis word nie. Die rolprent is deernisvol, vol aksie en sal jou laat lag. 

 

View this post on Instagram

 

A post shared by Margaret Gardiner (@margaret_gardiner)

Die rolprent is in die beroemde Chinese Theater vertoon, waar sterre se hand- en voetafdrukke in sement verewig is. Dit is ’n enorme teater, en dit was stampvol toe die name oor die skerm begin rol het. Die atmosfeer was so positief danksy die temas van die rolprent dat baie mense in hul stoele bly sit het om na die span se name te kyk; toe lig die verhooggordyn en Taylor Swift stap na vore in ’n songeel rok wat met sierstene versier was. Haar kenmerkende “kat-oog”-ooggrimering en rooi lippe het die sprokiesagtige voorkoms afgerond. Toe maak sy haar mond oop en sing “I Knew It, I Knew You”. Dit sal beslis volgende jaar ’n aanspraakmaker op ’n Oscar wees. Dit het reguit na die nommereenposisie op die Billboard 100-trefferlys geskiet. Die gehoor was opgewonde en meegevoer. Sy is bygestaan ​​deur Randy Newman, wat die klassieke liedjie “You’ve Got A Friend in Me” geskryf en gesing het. Die twee het ’n duet van dié liedjie gesing, en die teater was gevul met emosie en nostalgie. Toy Story 5 het reeds wêreldwyd $312 miljoen verdien; dit sal daardie syfer beslis oortref en in 2026 onder die topverdieners bly. Net soos Taylor Swift. 

Buzz Lightyear (vertolk deur Tim Allen) en Woody (vertolk deur Tom Hanks) in Disney en Pixar se ‘Toy Story 5’. Foto: Disney/Pixar. © 2025

Ten slotte, onthou jy kan enige oomblik betower kan word. Die lewe is vol verrassings, en geleentheid is ’n geskenk wat niemand die reg het om jou te belet om te benut nie. Neem terugvoering in ag, maar leef volgens jou eie behoeftes. O, en vind ’n kind wat jy kan “leen” as ’n verskoning om jou te laat meevoer deur verwondering terwyl jy na Toy Story 5 kyk – en as jy nie ’n kind, kleinkind of ’n vriend se kind kan saamneem nie, gaan alleen. Jy sal bly wees dat jy dit gedoen het.

Volg Margaret op Youtube, Facebook, Twitter en Instagram!

Lees ook: Margaret uit Hollywood: ‘Supergirl’ – ’n Moderne superheld

The post Margaret uit Hollywood: Wanneer Taylor Swift jou verras! appeared first on rooi rose.

Deur kykNET verskaf

Drie broers, klassieke motors en die kuns om jouself in die moeilikheid in te bestuur: kykers kan uitsien na Die Broer Toer Dakaroo vanaf Saterdag 4 Julie om 18:30 op kykNET (DStv-kanaal 144). 

Wat gebeur wanneer drie broers, ’n paar klassieke motors en meer selfvertroue as gesonde verstand bymekaar kom? Jy kry die splinternuwe seisoen van Die Broer Toer. Die Fourie-broers, Bennie, Reynold en Wilbrie, is vasbeslote om die Karoo plat te ry, maar hierdie keer verruil hulle hul motorfietse vir die soort ou motors wat Suid-Afrikaanse kinders van die 70’s en 80’s laat droom het – en wat hul pa’s waarskynlik vandag nog weier om te verkoop. 

Oor die loop van 10 opwindende episodes word kykers meegesleur op ’n reis vol onvoorspelbare kinkels, meedoënlose kompetisie en egte Karoo-gasvryheid. Die nuwe roete neem die broers na asemrowende plekke, uitdagende bergpasse en oorstroomde riviere, met die uiteindelike eindbestemming in die magiese Tankwa-Karoo.

Met elke kilometer wag daar nuwe uitdagings, onverwagte karprobleme, twyfelagtige navigasie-besluite en die soort broerlike kompetisie wat gewoonlik eindig met iemand wat sê: ‘Ek het mos vir jou gesê.’  Want ten spyte van al die reise, weet hulle steeds nie wie die beste broer is nie. 

Hierdie reis skop af met die broers wat hul klassieke motors op die enigste manier wat hulle ken kies – deur harde kompetisie. Die pad roep, maar onverwagte reën bring gou groot moeilikheid in die gewoonlik droë Karoo. Ná die vloede is die broers gelukkig weer op die pad, waar hulle terugkyk op alles wat sedert die laaste toer gebeur het. Maar nostalgie moet wag wanneer die eerste strawwe van die seisoen uitgedeel word.

Soos die reis dieper die binneland in beweeg, pak die broers een van hul grootste uitdagings nóg aan wanneer hulle met hul klassieke voertuie die Baviaanskloof invaar. Bennie se motor gee egter reeds voor die pas moeilikheid, wat die reis in ’n uiterste kragmeting verander. Ná die Baviaanskloof sit hulle hul reis deur die Oos-Kaap voort, waar nuwe uitdagings opduik soos die kilometers verbyrol, en die kompetisie tussen die broers al hoe meer intens raak. 

In Cradock verruil die broers tydelik hul klassieke motors vir perde en trek die veld in vir ’n jagtog om hul vaardighede behoorlik op die proef te stel. Tussen die uitgestrekte landskappe en nuwe uitdagings word hul uithouvermoë behoorlik getoets. Die toer gaan daarna voort na Graaff-Reinet vir ’n unieke Markdag-uitdaging. Met trots en spogregte op die spel, raak die broerlike wedywering gou al hoe warmer. 

Die pad lei die broers verder na Elandsrus en die uitgestrekte Fraserburg-vliegveld, waar taai uitdagings hul deursettingsvermoë toets. Op pad na Sutherland begin die einde van die toer uiteindelik in sig kom; herinneringe word gedeel, ou geskille word uitgeklaar en die stryd om die uiteindelike spogregte raak strawwer as ooit. Die laaste deel van die reis neem die broers eindelik die Tankwa in. Omring deur asemrowende landskappe kyk hulle terug op ’n onvergeetlike avontuur. 

Tussen asemrowende landskappe, onvergeetlike tonele en baie lag ontdek die broers dat die beste stories nie by die bestemming wag nie – dit gebeur langs die pad. Die Broer Toer is ’n viering van avontuur, komedie, nostalgie en die pure kuns om jouself in die moeilikheid in te bestuur! 

Die Broer Toer begin Saterdag 4 Julie 18:30 op kykNET (DStv-kanaal 144). Dit sal ook op DStv Stream en Catch Up beskikbaar wees.

Lees ook: Koek S2: Frank Opperman, De Klerk Oelofse en Leandie du Randt vertel meer oor hul karakters wat monde laat oophang

The post Bennie Fourie en sy broers terug met Die Broer Toer appeared first on rooi rose.

Deur kykNET verskaf

Deernis, doenmense en groot dinge wat in klein gemeenskappe gebeur – dis die resep wat van Lottoland help ’n dorp so ’n gewilde werklikheidsreeks op kykNET maak. Met die vyfde seisoen wat eersdaags afskop, gaan die minlike aanbieder, Leah van Niekerk, kykers weer op ’n heerlike avontuur na plekke neem waarvan talle dalk nog nooit gehoor het nie. 

Maak Google Maps oop of trek jou mooi ou, verweerde staatmaker-padkaart nader om te kyk waar daardie betowerende groen vlag eersdaags jolig gaan wapper. Dié keer gaan toegewyde plaaslike projekspanne inspring in plekke soos Luckhoff, Concordia, Middelburg, Reitz, Uniondale en Wakkerstroom om betekenisvolle veranderinge in hul onderskeie gemeenskappe teweeg te bring.  

Natuurlik is daar ook altyd uitdagings, maar oor die afgelope vier seisoene het dit duidelik geword dat gemeenskappe wat saamstaan en glo in wat hulle doen, vir geen enkele van daardie uitdagings stuit nie.  

Leah van Niekerk Foto: Verskaf

Wat het die reeks jou geleer oor die dryfkrag en uithouvermoë van klein dorpies in Suid-Afrika? 

“Suid-Afrikaners is beslis baie veerkragtig, en hulle bons gou terug ná uitdagings. Ons mense maak ’n plan. Dis rêrig waar as daar gesê word ’n boer maak ’n plan!” 

Sy is ook vol lof vir die mense in die gemeenskap wat betrokke is by die projekte – daardie mense wat sonder huiwering hul hand opsteek om te help. 

“Daai deursettingsvermoë – dis ongelooflik.” 

Watter impak het Help ’n dorp op jou as mens gehad?  

“Dit maak nie saak hoe goed of sleg dit met jou dorp gaan nie en of dit selfs oorstroom het nie. Die son gaan altyd weer opkom. Dis hoe ek nou letterlik die lewe begin sien. “Ek het ook geleer dat ons tot baie meer in staat is as waarvoor ons onsself krediet gee. ’n Mens moet wel eerste voor jou eie deur begin vee en nie net staan en kla nie. Staan op vir jou gemeenskap en vir jou mense. 

“Dis nie altyd iemand anders se verantwoordelikheid om verandering teweeg te bring nie. Ons moet ook self verantwoordelikheid daarvoor aanvaar.  “As jy jouself met die regte span omring, kan jy werklik berge versit.” 

Lottoland help ’n dorp bring nie net sigbare verbeterings aan nie – dit gaan ook oor om trots in gemeenskappe aan te wakker. Hoekom dink jy is dit belangrik om hierdie stories te vertel? 

“Met elke seisoen besef ek net al hoe meer hoe mooi ons land is. Partykeer voel dit of jy op die maan is. Ander dele is mooi gemaak deur die mense self. Ja, daar is baie negatiwiteit en mense wat sê die land val uitmekaar uit, maar ons moet ons dorpies en ons mense mooi oppas en koester. 

“Hou op om te baklei en begin saamstaan – dan kan ons baie meer uitrig. “Jy sien regtig die verbeteringe in die gemeenskappe, die mooimaak, die mense wat floreer. As ek hierdie dorpies binnegaan, voel ek die samehorigheid en die onderlinge respek. Dit is so mooi. 

“Elke keer wanneer ek uit ’n dorpie ry nadat Lottoland help ’n dorp daar afgehandel is, sê ek dat dit nie die einde van die storie is nie, maar die nuwe begin vir daardie dorpie vir vele dinge wat nog in die toekoms gaan gebeur. Ons verteenwoordig maar net die vlammetjie van hoop wat aangesteek word, en dit versprei deur die land. 

“Dis ook baie lekker as ek ’n dorpie binnery wat nie eers deel van Lottoland help ’n dorp was nie, maar waar daar ook verbeteringe aangebring is. Die program het hulle gemotiveer om ook self projekte in hul dorp aan te pak. 

“Befondsing is oor die algemeen maar skraps, maar gee van jou tyd. Motiveer mense. Lottoland help ’n dorp is werklik ’n sielsverrykende program, en ek hoop wanneer mense daarna kyk, hulle dit ook voel. “Selfs ek, wanneer ek weer na die programme kyk, tjank lekker laaaang trane oor wat ons alles in die dorpies ervaar het.” 

Lottoland help ’n dorp word Dinsdae vanaf 7 Julie om 21:30 op kykNET (DStv-kanaal 144) uitgesaai. Die reeks is ook op DStv Stream en Catch Up beskikbaar.

Lees ook: Rian van Heerden verras kykers deur self in die gasstoel te sit op ‘Laataand by Rian’

The post Lottoland help ’n dorp: Leah gesels oor veerkragtigheid, trane en die vlammetjie van hoop appeared first on rooi rose.