Verskaf deur VIA

Ouerskap kom nie met ’n wenresep nie. Daar bestaan ook geen handleiding vir elke dag se reis wat ouers met hul kinders moet stap nie. Maar daar is wel vrae wat gevra en antwoorde wat gegee kan word wat vir elke ma – en ook hedendaagse pa – ’n liggie in die tonnel kan wees. 

Dis wat Efraine du Toit weer vir ’n tweede seisoen van Wat ’n ma moet weet na die skerm bring. Reeds in die eerste seisoen het dié ervare grimeerkunstenaar gewys sy bied substansiële leiding aan ma’s wat nie die moed het om hul kwelvrae met vriende of familie te bespreek nie. 

Openhartig, eerlik en empaties. Dis hoe sy dit benader. Daar word nie doekies omgedraai nie, daar word net ’n mooi en sagte pad met ma’s gestap. 

Vandag is sy self ’n ma van twee, met Joha wat ná 43 uur van kraam op 24 Februarie 2024 sy opwagting gemaak het, en hul tweede seuntjie, Daniël, wat op 14 Augustus vanjaar gebore is. Ook hy het sy tyd geneem voordat sy ma hom in haar arms kon hou: 39 uur se kraam … 

Haar pad na ouerskap was nie met rose besaai nie, en sy het dit al in die verlede as tegelykertyd die grootste seën, maar ook haar moeilikste reis beskryf. Sy het destyds openlik gesels oor haar stryd met infertiliteit en daaroor gesê: “Dis ’n hoofstuk vol hoop, teleurstelling en ’n ongelooflike hoeveelheid geloof.”  

In Augustus verlede jaar het ’n groot hartseer die gesin getref toe Efraine ’n miskraam gehad het. Dit is egter een van die onderwerpe wat sy baie eerlik met haar gaste en kenners aanpak. Juis daarom hoop sy dat die nuwe reeks – net soos die eerste een – vir ouers leiding, bemoediging en nuwe insigte sal bied. 

Efraine, baie geluk met die geboorte van jul tweede kind! Hoe gaan dit met jou en die nuwe baba? 

Baie dankie. Dit gaan baie goed met ons, ek is steeds in die amazing baba-bubble. Ons is nog in die proses om ons voete te vind, maar ons kan oor niks kla nie. Ek geniet dit só om weer ’n baba te hê.  

Hoe verskil die ervaring om vir die tweede keer ma te word van jou eerste keer? Voel jy rustiger en meer voorbereid, of bring elke baba ’n heeltemal nuwe stel uitdagings? 

Soos met enigiets in die lewe, voel dit beslis ’n bietjie makliker die tweede keer. Ek vertrou myself baie meer en oordink nie meer elke klein dingetjie nie.  

Ek glo egter dat ’n rustige baba teenoor ’n baba wat met refluks of koliek sukkel, ’n groot invloed op ouers se ervaring het. Daniël is nou maar eers twee weke oud, maar tot dusver gaan dit baie goed en is dit baie makliker. 

Ephraine du Toit en Joha. Foto: Verskaf

Die nuwe seisoen begin kort ná hierdie groot gebeurtenis in jou eie lewe. Hoe besonders is dié tydsberekening vir jou, en hoeveel van jou eie ervaring as ma dien as inspirasie vir die program? 

Alles waaroor ek in Wat ’n ma moet weet gesels, kom uit my eie ervaring as mamma. Ek het nog nooit so belanggestel in gesprekke soos dié wat ons in die program voer nie.

Om ’n ma te wees, raak beslis makliker wanneer jy meer kennis het oor die verskillende aspekte van moederskap. Dit help ook om te weet dat jy nie alleen deur die trane en uitdagings gaan nie. Ek is ongelooflik opgewonde oor hierdie seisoen wat verfilm is terwyl ek swanger was met Daniël. Dit maak die tydsberekening vir my ekstra besonders. 

Wat het jy ná die eerste seisoen by kykers gehoor wat jou laat besef het dat daar nog soveel belangrike ouerskapsgesprekke gevoer moet word? 

Met die eerste seisoen van Wat ’n ma moet weet het ons een groot doelwit gehad: om ouers te laat voel dat hulle nie alleen is nie en dat ons almal soms sukkel. Die boodskappe wat ek ná die eerste seisoen ontvang het, was ongelooflik bemoedigend en het my laat besef dat ons bereik het wat ons wou.

Elke episode is kort genoeg vir ’n besige mamma om iewers in die week in te pas, maar steeds propvol waardevolle inligting en gesprekke wat jou laat besef jy is nie alleen nie. 

Die seisoen begin by basiese veiligheid en versorging en kyk ook na leefstyl- en omgewingsfaktore wat kinders se gesondheid beïnvloed. Watter praktiese lesse het jy self eers geleer nadat jy ma geword het? 

Ek het eers nadat ek ’n ma geword het, besef hoeveel dinge ’n mens eenvoudig nie weet voordat jy self in daardie skoene staan nie. Selfs die mees basiese goed, soos slaap, voeding, veiligheid en wat in jou kind se omgewing is, kan ’n groot invloed op hul gesondheid en ontwikkeling hê.  

Elke fase bring weer nuwe vrae en uitdagings. Ek leer steeds elke dag, en dit is presies hoekom die praktiese raad in hierdie episode vir my so waardevol is. Ons as mammas sal nooit genoeg kan leer nie, en ek voel ek leer die meeste uit ander se stories.

Ephraine du Toit en Joha. Foto: Verskaf

Een van die mees persoonlike episodes handel oor die hartseer van ’n miskraam. Waarom was dit vir jou belangrik om hierdie verlies openlik te bespreek, en wat hoop jy neem ouers uit dié gesprek? 

Dit was nie ’n maklike gesprek om te hê nie, en ek verstaan heeltemal hoekom vroue wat daardeur gaan, nie altyd daaroor wil praat nie. Ek het egter gevind dat hoe meer ek daaroor praat, hoe makliker raak dit en hoe minder raak die trane.  

Dit was die alleenste wat ek nog ooit in my lewe gevoel het. Al was my man elke tree saam met my, het daardie eensaamheid en hartseer vir ’n baie lang tyd nie beter geraak nie. 

Op 28 Augustus was dit presies ’n jaar sedert ek in die teater was en ons baba verloor het. Net omdat ek nou weer ’n baba het, beteken dit nie dat ek vergeet wat gebeur het nie.  

Ek wou juis openlik daaroor gesels omdat so baie vroue hierdie pad stap. As jy een van hulle is, hoop ek dat hierdie gesprek jou – al is dit net ’n bietjie – minder alleen sal laat voel. 

Julle plaas ook die kollig op die moderne pa. Hoe het jou eie siening van vaderskap, vennootskap en die verdeling van verantwoordelikhede binne ’n gesin verander sedert jy ma geword het? 

Ek is baie bevoorreg om ’n man te hê wat help kosmaak, wasgoed doen, doeke ruil en in die nag opstaan. Hy help basies met alles in die huis en met ons kinders, terwyl hy ook die broodwinner is.  

Ek weet eerlikwaar nie hoe mammas wat ook werk, dit regkry as hul mans nie met al hierdie dinge help nie. Ek is baie dankbaar dat my seuns in ’n huis grootword waar hulle sien hul pa help net soveel met die huistake én met hulle soos ek. Ouerskap is ’n spansport en dis soveel lekkerder en makliker as elke spanmaat sy kant bring. 

Die reeks ondersoek hoe ouers kinders – en veral dogters – met selfvertroue kan grootmaak, terwyl moeilike onderwerpe soos seks, finansies en egskeiding ook bespreek word. Hoe skep ’n mens ’n verhouding waarin jou kind veilig voel om enigiets met jou te bespreek? 

Sjoe, dit is ’n vraag waarvoor ek baie antwoorde kan hê, maar ek moet ook eerlik wees: ek het nog nie al die antwoorde nie, want ek is maar aan die begin van my reis as mamma. Ek probeer leer waar ek kan om uit te vind hoe om hierdie grootste taak van my lewe so goed moontlik te doen. 

Vir my begin dit by eerlikheid en ’n verhouding waarin jou kind weet hulle kan met enigiets na jou toe kom, sonder vrees vir oordeel.  

Ek glo wel dat ’n mens moeilike onderwerpe op ’n ouderdomsgepaste manier moet bespreek. Kinders kan byvoorbeeld leer hoe om verantwoordelik met geld te werk, maar hulle behoort nie wakker te lê oor die gesin se finansiële druk nie. 

Om my kinders met selfvertroue groot te maak, is vir my ongelooflik belangrik. Wanneer ’n kind in hom- of haarself glo, voel die uitdagings van die lewe soveel meer hanteerbaar. Ek hoop om vir my kinders ’n veilige plek te wees waar hulle altyd geliefd, gehoor en aanvaar voel. 

Ephraine du Toit. Foto: Verskaf

Julle kyk na noodgevalle by die huis én die gevare van die digitale wêreld. Het hierdie gesprekke jou laat besef dat daar dinge is waarop jy jou eie gesin nog beter kan voorberei? 

Beslis. Hierdie gesprekke het my laat besef dat ’n mens nooit op elke moontlike situasie voorbereid kan wees nie, maar dat die regte kennis en ’n goeie plan ’n groot verskil kan maak. Met twee klein kinders voel ek dat basiese noodhulp, wat om te doen wanneer ’n kind verstik en wie om in ’n noodgeval te kontak, iets is wat ons as ouers moet weet. 

Die digitale wêreld waarin ons kinders grootword, maak my nogal op my senuwees. Ek dink nie ons sal ooit hul wêreld heeltemal kan verstaan nie, maar hierdie gesprekke het my laat besef hoe belangrik dit is om moeite te doen om by te bly en te verstaan waarmee hulle daagliks gekonfronteer word.  

Ons sal waarskynlik nie alles kan beheer of hulle teen elke gevaar kan beskerm nie, maar ons kan grense stel, betrokke bly en ’n verhouding skep waarin hulle veilig voel om met ons oor enigiets te praat. 

Die seisoen sluit af met ’n gesprek oor werkende ma’s en mom guilt. Wanneer ervaar jy self dié skuldgevoel die sterkste, en wat help jou om te onthou dat jy nie ’n perfekte ma hoef te wees om ’n goeie ma te wees nie? 

Is daar iets soos die perfekte ma? Dit voel vir my ek leer elke dag saam met my kinders. Ek groei, verander en leer soos hulle groei. Ek doen my absolute bes as mamma omdat ek wíl, en ek moet vertrou dat dit genoeg is vir hulle ook. 

Oef, mom guilt… wat ’n vreemde gevoel. Al sê ek vir myself dat ek nie skuldig hoef te voel nie, voel ek dit steeds. Interessant genoeg ervaar ek dit nie wanneer ek moet werk nie, maar eerder wanneer ek iets sosiaal of net iets vir myself doen. Dan voel dit skielik asof ek eintlik by my kinders moet wees.  

Ek probeer myself herinner dat dit ook belangrik is om steeds tyd vir myself te maak maar ai, ongelukkig help dit nie met die gevoel van mom guilt nie.  

Wat ‘n ma moet weet. Foto: Verskaf

Van alles wat jy hierdie seisoen geleer het, wat is die één ding wat jy glo elke ma – en eintlik elke ouer – moet weet? 

Om ’n ouer te wees, is die grootste voorreg en die mooiste ding wat met ’n mens kan gebeur, maar niemand het gesê dit gaan maklik wees nie.  

Ek dink die een ding wat elke ouer moet weet, is dat jy nie al die antwoorde hoef te hê om ’n goeie ouer te wees nie. Ons almal leer soos ons aangaan, ons maak foute en ons probeer weer. Solank jou kind geliefd en veilig voel, en jy bereid is om saam met hulle te groei.

Wat ’n ma moet weet begin vanaf Donderdag 3 September om 20:00 op VIA (DStv-kanaal 147). Die reeks word aangebied in samewerking met Bestmed Medical Scheme, met dank aan Mustela South Africa en Mustela France.

Efraine is ook een van die beoordelaars van rooi rose se splinternuwe rooiwarmwenners skoonheids- en welstand-kompetisie waarvan die wenners in die Desember-uitgawe bekend gemaak sal word. 

Lees ook: Maak ‘n onderhandelaar groot

The post Wat ’n ma moet weet  appeared first on rooi rose.

Lees ook: In September bots liefde, lojaliteit en ego’s in Skemergrond

The post Morné Visser bring ’n nuwe karakter – en ’n paar geheime – na ‘Skemergrond’ appeared first on rooi rose.

Verskaf deur kykNET

“Dis heerlike lente, die winter’s verby,” lui die bekende volksliedjie – en selfs die berge en klowe roep glo na jou en my. Maar voordat die inwoners van Ruiterbosch, die fiktiewe Kaapse woonbuurt waar die kykNET-sepie Suidooster afspeel, ’n vrolike “hol-la-dri-o” kan uitbasuin, wag daar ’n paar vals note wat kykers se ore gaan laat tuit. 

Die groot nuus is die koms van Elzette Potgieter, ’n belangrike nuwe karakter wat deur die bekende aktrise Nina Swart vertolk word. Nina het ’n volksliefling geword toe sy twee dekades terug as die ikoniese sepiekarakter Wilmien in 7de Laan te sien was.  

Haar toetreding is ’n noemenswaardige byvoeging tot die Suidooster-rolverdeling en bring ’n nuwe familiedinamiek na Ruiterbosch.  

Elzette daag onverwags op wanneer haar seun, Justin (Eden Classens), haar ondersteuning die nodigste het – maar ou teleurstellings beteken dat hul hereniging allesbehalwe eenvoudig gaan wees. 

Haar aankoms is egter net een van verskeie verwikkelinge wat September ’n emosiebelaaide maand gaan maak. Trouplanne begin wankel, huweliksgeheime dreig om aan die lig te kom, susters kies kant en vrae oor bloedbande skud ’n gesin tot in sy fondamente.  

Liefde, lojaliteit en die vraag of bloed werklik dikker as water is, word telkens op die proef gestel. 

Hier is ses groot Suidooster-storielyne wat jy in September moet dophou. 

1. Trouklokke, of ’n noodalarm?

Frankie (Mienke Ehlers) en Justin (Eden Classens) is op ’n missie om hul droomtroue te reël. Daar is ’n rok, ’n datum en ’n hele trougeselskap wat gekies moet word – met Zoë (Lauren Joseph) en Angie (Char Carrie) wat natuurlik hul eie idees het oor hoe dinge gedoen behoort te word. 

Riaan (Daniel Coetzee) se vermoë om Frankie beter as byna enigiemand anders te verstaan, plaas ekstra druk op die bruidspaar. 

Hoe nader die groot dag kom, hoe moeiliker raak dit om ongemaklike gevoelens weg te lag. 

Is dit genoeg om iemand lief te hê, of moet ’n mens ook volkome seker van daardie persoon wees?

Frankie (Mienke Ehlers) en Justin (Eden Classens) is op ’n missie om hul droomtroue te reël. Foto: Verskaf

2. Wat steek Pieter vir Emily weg?

Vir buitestanders lyk Pieter (Dean Olivier) en Emily (Clarissa Thereon) soos ’n liefdevolle egpaar, maar Emily voel al hoe sterker dat haar man van haar wegdryf. Wanneer sy begin vermoed dat ’n ander vrou dalk die rede vir die afstand tussen hulle is, word Zoë (Lauren Joseph) onverwags by hul huweliksprobleme ingetrek. 

Amanda (Lindie Strydom) probeer die egpaar deur berading help, maar Pieter ontduik die vrae wat werklik saak maak. Dit word gou duidelik dat hy iets wegsteek – iets wat veel groter is as Emily se aanvanklike vermoedens. 

Hoe harder Pieter probeer om alles normaal te laat lyk, hoe groter raak die emosionele kloof. Amanda bevind haar in ’n moeilike posisie: Hoe help jy iemand om eerlik te wees wanneer daardie persoon glo die waarheid kan sy hele lewe vernietig?

Wat steek Pieter vir Emily weg? Foto: Verskaf

3. Bridgette en Lee-Ann knor vir mekaar

’n Ou huis wat aan ’n geliefde en bekende skrywer behoort het, word die middelpunt van ’n vurige stryd tussen die Jacobs-susters. 

Bridgette (Denise Newman) wil die eiendom as deel van ’n nuwe ontwikkeling gebruik, terwyl Lee-Ann (Portia Joel) glo die huis moet vir die gemeenskap bewaar word. Sy droom van ’n kinderbiblioteek en museum wat Davids se nalatenskap sal vereer.  

Vir Bridgette gaan dit oor vooruitgang en die groter prentjie; vir Lee-Ann gaan dit oor geskiedenis, identiteit en wie die reg het om te besluit oor dit wat bewaar moet word. 

Die konflik word persoonlik wanneer die gemeenskap kant begin kies en JPD se belange op die spel kom.  

Nazeem (Irvine van der Merwe) sien natuurlik ’n geleentheid om homself by die saak in te wurm, maar soos kykers teen dié tyd weet, kom sy hulp selde sonder ’n prys. Die susters sal moet besluit hoe ver hulle bereid is om te gaan – en hoeveel hulle bereid is om vir hul onderskeie oorwinnings op te offer.

4. Familie of vreemdeling? Kate soek steeds na die waarheid

Kate (Annelisa Weiland) se soeke na haar biologiese seun het reeds diep emosionele wonde veroorsaak. Riaan (Daniel Coetzee) probeer sy plek in haar lewe beskerm, terwyl Lendré (Luan Jacobs) se ware motiewe al hoe meer na vore kom …  

Net wanneer dit lyk of Kate en Riaan weer vaste grond onder hul voete kry, laat ’n ou brief nuwe vrae ontstaan. Die verlede blyk veel ingewikkelder te wees as wat hulle gedink het, en nóg antwoorde moet gesoek word.

Vir Riaan gaan dit nie net oor biologie nie, maar oor die vrees dat hy sy ma kan verloor. Kate moet intussen probeer onderskei tussen skuldgevoelens, hoop en die waarheid.

Hierdie storielyn herinner ’n mens dat familie nie altyd bloot deur DNS bepaal word nie – maar dat bloedbande steeds die mag het om ’n gesin tot in sy fondamente te skud.

Riaan probeer sy plek in Kate se lewe beskerm. Foto: Verskaf

5. Nuwe planne plaas Mike en Frankie se brose band onder druk

Mike (Anrich Herbst) se nuwe hardewarewinkel gee hom en Frankie (Mienke Ehlers) ’n onverwagse kans om hul verhouding te herstel.  

Frankie se kreatiewe bemarkingsidees beïndruk wel, maar sy is huiwerig om amptelik by die onderneming betrokke te raak. Sy weet uit ondervinding hoe maklik ’n werksverskil tussen haar en haar pa persoonlik kan raak. 

Wanneer Mike haar ’n aanbod maak, moet Frankie besluit of sy gereed is om hom weer te vertrou. Gary (Craig Adriaanse) probeer intussen die vrede bewaar en die winkel se bemarking op dreef kry – selfs wanneer hy Frankie se hulp op kreatiewe maniere moet bekom. 

Die winkel se opknapping bring nuwe energie, maar ook onverwagte emosionele oomblikke. Met trouplanne wat reeds onder druk is, kan selfs ’n onskuldige gebaar skielik baie meer beteken as wat enigiemand wil erken.

Mike se nuwe hardewarewinkel gee hom en Frankie ’n onverwagse kans om hul verhouding te herstel.  Foto: Verskaf

6. ’n Tweede kans vir ma en seun

Elzette Potgieter (Nina Swart) daag onverwags in Ruiterbosch op juis wanneer haar seun Justin (Eden Classens) haar ondersteuning die nodigste het. Hulle verhouding is egter broos, en haar pogings om weer ’n plek in sy lewe te vind, bring ou teleurstellings na die oppervlak. 

Terwyl ma en seun versigtig na mekaar probeer uitreik, begin Elzette ook haar kundigheid en indrukwekkende kontakte vir ’n ambisieuse liefdadigheidsprojek inspan.  

Haar planne skep nuwe energie in die gemeenskap en bied aan Siya (Gantane Kusch), Bianca (Simone Biscombe) en die ander Ruiterboschers verskillende maniere om ’n betekenisvolle verskil te maak.

Justin se ma verskyn wanneer hy haar ondersteuning die nodigste het. Foto: Verskaf

Suidooster word weeksdae om 18:00 op kykNET en om 18:30 op kykNET & Kie uitgesaai. Dit is ook op DStv Stream beskikbaar.

Lees ook: Kykers se geliefde Wilmien ná twee dekades terug op die kassie – in ‘Suidooster’ 

The post ‘Suidooster’ in September: Skokke, geheime en verraad vier hooggety appeared first on rooi rose.

Verskaf deur IndiHub Music

Juanita du Plessis, Franja du Plessis en Ruan Josh span kragte saam vir hul nuwe enkelsnit, Boots & All – ’n energieke, lekkerluister-liedjie oor die lewe met alles aanpak wat jy het.

Die titel sê eintlik alles: as jy iets doen, doen jy dit boots and all. Geen ge-halfpad nie. Geen terughou nie. Jy spring kop eerste in, gooi jou hele hart daarin en as dinge skeefloop, staan jy op en probeer weer.

Met ’n aansteeklike ritme, sterk country-invloede en ’n koor wat sommer vinnig in jou kop kom sit, bring Boots & All Juanita, Franja en Ruan se drie unieke stemme op ’n vars en speelse manier bymekaar.

Die liedjie se boodskap word vasgevang in die woorde “Alles of niks, ek gooi my hele hart in” – ’n eenvoudige lewensuitkyk waarmee al drie kunstenaars sterk identifiseer.

Maar die liedjie probeer beslis nie te ernstig wees nie. Die liedjie is gemaak om hard gespeel, saamgesing en op gedans te word. Van voete wat stamp op die beat van die drom tot ’n behoorlike yeehaw, het die snit ’n lekker loslit-energie wat hom ideaal maak vir die dansvloer, ’n langpad-playlist of enige plek waar daar gekuier word.

Die gesinsamespel gee die enkelsnit ook ’n besondere karakter. Juanita, Franja en Ruan het oor die jare elkeen hul eie plek in die Afrikaanse musiekbedryf gevestig, maar wanneer dié drie stemme saamkom, is daar ’n natuurlike gemak en energie wat moeilik nageboots kan word.

Boots & All is uiteindelik ’n liedjie oor voluit leef – saam met jou mense. Om nie bang te wees om te val nie, want jy weet julle sal weer saam opstaan.

Met sy positiewe boodskap, onweerstaanbare ritme en lekker saamsing-koor beloof dit om gehore vinnig op hulle voete te kry. Want soms is daar net een manier om die lewe aan te pak: Alles of niks. Boots & All.

Boots & All deur Juanita du Plessis, Franja du Plessis en Ruan Josh is 28 Augustus beskikbaar op alle digitale musiekplatforms. Die musiekvideo sal 4 September op alle digitale platforms beskikbaar wees.

Lees ook: Semi-Soet is gesinsvermaak wat soet op die sak sal val + WEN dubbelkaartjies

The post Juanita, Franja & Ruan gaan ‘Boots & all’ met nuwe enkelsnit appeared first on rooi rose.

Verskaf deur Tarryn Josephs

Lees ook: Kykers se geliefde Wilmien ná twee dekades terug op die kassie – in ‘Suidooster’

The post In September bots liefde, lojaliteit en ego’s in ‘Skemergrond’ appeared first on rooi rose.

Anna-Mart is waar sy wil wees

Die veel bekroonde en gewilde aktrise Anna-Mart van der Merwe, wat erken dat sy elke asemteug waardeer, se grootste passie is om die lewe sonder enige vooropgestelde idees in te drink.

Dit moet werk

Op 70 bring dr Pieter Groenewald meer as die gewone hoeveelheid ervaring na die tafel. Hy vertel oor middagete wat hy dink die drie basiese beginsels is om suksesvol in besigheid te wees, hoe hy dit toepas as die minister van korrektiewe dienste en die hoë eise wat ‘n loopbaan in die politiek aan jou stel.

Minister Pieter Groenewald en joernalis Tanya de Vente-Bijker. Foto: Henri Viljoen

Lieflike lente

Blomme vir dié lente is sag, vrolik en vroulik. Laat jou romantiese kant blom met hierdie uitrustings vir die nuwe seisoen.

Skolesport: gesond of nie?

Daar word gereeld gesê dat skole in Suid-Afrika sportmal is ten koste van kinders. Maar is ons skole se sportbeleide regtig so ongesond?

So pas my legkaart inmekaar

In ‘n wêreld vol kitsdiete bring Angelique Daubermann, beter bekend as The Lean Girl, ‘n holistiese benadering tot reg eet en gesondheid. Sy moes self leer hoe om haar gewig op koers te hou, en nou bemagtig sy ander met haar kennis en ervaring.

Vuur & vlam

Ons vier nie net ons erfenis en lente in September nie, maar ook braaidag.

‘Ek kies Suid-Afrika’

Wanneer ouers emigreer, is dit dikwels om ‘n beter toekoms vir hul kinders te verseker. Maar hoe gemaak wanneer die kinders besluit hulle wil terugkom Suid-Afrika toe?

Op die spore van ‘n meester

Carié Maas het die fout gemaak om Karel Schoeman se Titaan te lees — toe moet sy terug na Italië om nog van Michelangelo se beelde onder oë te kry.

‘n Leeftyd se mooi vel

Jou eenvoudige gids tot wat jou vel nodig het en wanneer.

Sy leef in volkleur

Dertig jaar gelede het ‘n koeël Shelley Barry se jong liggaam in dié van ‘n parapleeg verander. Dit was lewensveranderend, maar dit het haar net tydelik ontspoor. Shelley — vandag ‘n internasionaal bekroonde rolprentmaker — vertel hoe sy haar droom om rolprente te maak, verwesenlik het.

Lees ook: Scheepers se speelfilm ‘Landmyn’ belig oorgeërfde drama binne familieverband

The post 10 redes waarom jy rooi rose se September-uitgawe móét lees! appeared first on rooi rose.

Verskaf deur kykNET

Kykers van die kykNET-telenovela Diepe Waters is op Woensdag 26 Augustus op die punt van hul stoele gelaat toe ’n gewelddadige konfrontasie by Skinvestment op ‘n angswekkende wyse geëindig het.  

Pam, gespeel deur Tracey-Lee Oliver, het haar in die kruisvuur van ’n gevaarlike tweegeveg tussen Frans, Zelda en die genadelose Cloete bevind. Wat ’n spanningvolle oomblik moes wees, het in ’n nagmerrie verander toe ’n enkelskoot afgegaan het. In Donderdag 27 Augustus se episode is kykers geskok en in rou gelaat, toe Pam in haar ma se arms gesterf het. 

Ná die skietvoorval het Frans die situasie probeer beredder deur ‘n leuen vir speurder Jenna op te maak—dat ‘n gemaskerde inbreker Pam geskiet en weggehardloop het. Terwyl die leuen gehandhaaf word om Zelda te beskerm, is Siseko, Gys en die hele Boskruin-gemeenskap in diep rou gedompel terwyl hulle probeer sin maak van ’n wêreld sonder Pam.  

Cloete konfronteer Zelda. Foto: Verskaf

Pam se skokkende en onverwagte dood laat ’n diep leemte in die harte van Diepe Waters-kykers. Kykers het haar reeds in episode 1 van die telenovela leer ken en oor die jare het sy diep in kykers se harte ingekruip.  

Haar reis het begin as Zelda se lui, “loskop” dogter wat meer belanggestel het in haar naels en skinderpraatjies as om kliënte by Skinvestment te bedien. Toe sy besluit om haar eie pad te baan, uit die salon bedank en by Tannie Bybie en Gys gaan bly het, het kykers vir die eerste keer gesien uit watter staal sy regtig gemaak is. 

Pam word geskiet. Foto: Verskaf

Daarvandaan het Pam se pad kykers op ‘n emosionele wipwarit geneem. Sy het deur Zelda se planne gesien toe sy vir Pam met ‘n huurakteur probeer fop het oor haar biologiese pa. Haar skerp instinkte het uiteindelik tot die skokkende onthulling by Gys se hospitaalbed gelei dat sy wél ‘n Swarts is. Daarmee saam het sy ook haar eie suksesvolle maatskappy, Motion Management, begin om jong swemmers te bestuur. 

Kykers was saam met haar verheug toe sy uiteindelik ware geluk gevind het en met die man van haar drome, die Xhosa-prins Siseko, getrou het. Uiteindelik het sy haar ridder op ’n wit perd gevind. Pam se happily ever after het wel nie gebeur nie, en kykers sal nog lank oor haar skielike afsterwe treur.

Pam sterf in haar ma Zelda se arms. Foto: Verskaf

Tracey-Lee is dankbaar vir die tyd wat sy saam met Diepe Waters gehad het: “Dankie aan elkeen wat deel van hierdie lewensveranderende reis was,” vertel sy. “Pam het my baie geleer – sy het op die regte tyd in my lewe gekom.” 

• Diepe Waters word Maandae tot Donderdae 18:30 op kykNET (DStv-kanaal 144) uitgesaai. 

The post Diepe Waters-kykers groet Pam ná tragiese skietvoorval appeared first on rooi rose.

Verskaf deur kykNET

Die winde van verandering waai soms verwoed saam met die Kaapse Dokter deur Ruiterbosch, die fiktiewe voorstad naby Kaapstad waar die gewilde Suidooster-reeks afspeel. Saam met die verandering kom ook interessante verwikkelinge – soos nou met die gesoute en geliefde aktrise Nina Swart wat haar intrek in die buurt kom neem het. 

Nina kom as Elzette Potgieter Ruiterbosch toe waar haar seun, Justin (Eden Classens), hom by ’n groot kruispad bevind: sy naderende troue met Frankie (Mienke Ehlers).

Nina vertel hoe haar pad van Wilmien tot by dié van Elzette geloop het.

1. Elzette Potgieter is jou eerste sepiekarakter sedert jy Wilmien de Lange in 7de Laan gespeel het. Wat was dit aan Suidooster – en spesifiek aan Elzette – wat jou laat besluit het om weer jou sepieskoene aan te trek?

Ek het vroeër vanjaar besef dat ek ’n gaping tussen (regie-)projekte het in die tweede helfte van die winter. Die gaping is geskep deur onverwagse veranderinge in die TV-landskap.  

Ek het begin dink aan alles wat ek kan doen behalwe regie, maar dit wat my tans interesseer, vereis ’n mate van bekendheid en ’n “naam”. Ek stel belang in mense op ’n sosiaal-sielkundige vlak. Ek is nie bang om voor mense te verskyn nie, en ek wil graag met groepe werk om doelwitte te bereik. Dis baie soos om ’n regisseur te wees, maar met die klem op selfontdekking en -ontwikkeling.  

Ek was so lank gelede in die kollig dat mense waarskynlik nie meer weet wie ek is nie. Wel, dalk net ’n klein persentasie ouer 7de Laan-kykers. Ten einde my naam in die hoed te gooi om op ’n groter skaal met mense te kan werk, het ek nie ’n ander opsie gehad as om weer voor die kameras in te skuif nie. 

Ek het vir Colin Howard wat die kreatiewe vervaardiger by Suidooster is, gebel. Ons ken mekaar al vir 25 jaar. Hy was baie gaaf en het vir my die rol van Elzette aangebied. 

Nina Swart. Foto: Gys Loubser

2. Hoe sal jy jou karakter Elzette beskryf? Wat kom maak sy in Ruiterbosch en watter onverwagse lae het jy van haar ontdek?

Elzette is ’n gedrewe vrou wat in haar loopbaan veg vir mense wat hulp nodig het. Haar werk is om groot korporatiewe maatskappye te verbind met NGO’s en fondse te verkry. Sy is ’n doener – en wanneer sy ’n probleem sien, wil sy dit oplos. Dit is daardie gedrewendheid wat haar op internasionale vlak suksesvol gemaak het. 

Sy het die eerste deel van haar lewe aan haar familie gewy, maar op ’n stadium het sy besluit om haar eie passie te volg. Dis dalk oor die tipe mens wat sy is, maar dalk ook as gevolg van ’n tikkie skuldgevoel dat sy die afgelope jare absoluut toegewyd aan haar werk was en soort van ’n workaholic geword het. 

3. Wilmien is een van die mees ikoniese sepiekarakters in Suid-Afrika. Was jy enigsins huiwerig om na ’n sepie terug te keer met die wete dat kykers Elzette moontlik met Wilmien sal vergelyk?

Die Wilmien-karakter wat destyds deur Danie Odendaal geskep is, is een van die beste sepiekarakters wat ek al ooit gesien het. Sy is ’n perfekte vermenging van die regte argetipes. Dit is vir my geen wonder dat sy so ikonies was nie, want haar essensie is gebalanseerd en haar uiterstes en teenstellings was met deernis bymekaargehou in die skryfkamer. 

Enigiemand kon Wilmien gespeel het en suksesvol wees as gevolg van bogenoemde. Die feit dat ek toevallig vir die rol gekies is, was wonderlik en lekker, maar ek is terdeë bewus daarvan dat ek die geleentheid gehad het om ’n ikoniese, reeds geskepte karakter te kan embody. Ek het nie tóé, of sedertdien, ooit gedink dat dit ék was wat die karakter so goed gespeel het nie. 

Maar mense besef nie altyd hoe magtig karakterisering in ’n sepie is nie. Ook nie hoe belangrik tydsberekening is nie.  

Die eerste paar jaar van 7de Laan het uitgesaai op ’n kritiese tyd in ons land se sosiologiese ontwikkeling en was nie net ’n voorbeeld van hoe die land se burgers saam kon woon en werk nie, maar het ook afgespeel in die tyd voor sosiale media en slimfone aan die orde van die dag was. Die Afrikaanse media was baie sterk en het die verskillende 7de Laan-persoonlikhede baie slim en ook baie gereeld gebruik om verkope te versterk. Almal het gewen. 

Dit is as gevolg van al bogenoemde faktore dat ek nie net huiwerig was om terug te keer na ’n sepie toe nie, maar werklik beangs was. Ek het vermoed mense gaan dalk die ikoniese karakter van Wilmien met Nina, die werklike aktrise, verwar en bepaalde verwagtinge koester. Dis verwagtinge wat ek nooit sal kan vervul nie, ongeag wie ek speel of hoe goed of sleg ek dit doen. 

4. Jy was in 7de Laan in die vroeë 2000’s en keer nou, twee dekades later, na die sepiegenre terug. Wat het die meeste verander – op stel, in die manier waarop stories vertel word en in kykers se verhouding met die karakters?

Ek kan met alle eerlikheid sê dat bitter min verander het. Die kameras is dalk beter (ons saai immers deesdae in hoë definisie uit), en die na-produksieproses is uiteraard meer digitaal, maar verder is dit presies dieselfde.  

Dalk lê die grootste verandering in die feit dat die storielyne anders lyk as 25 jaar gelede. Karakters en storielyne wat destyds as gewaagd beskou sou word, is vandag alledaags. Dit maak my gelukkig om te sien hoe ver ons kykers in daardie opsig gegroei en verander het. 

5. Wat onderskei die sepiegenre vir jou van ander dramareekse? En waarom dink jy bly kykers so lojaal aan die karakters en gemeenskappe wat hulle elke dag op die skerm sien?

My gevoel is dat kykers weet ’n dramareeks of film is eenmalig. Dis ’n entiteit wat ’n einde het en wat klaarmaak. Jy word genooi om te kyk en te reageer daarop.  

Met ’n sepie is daar geen einde nie, en die uitnodiging is om saam te beleef en saam te leef. Die interaksie tussen kyker en sepie is dus meer intiem as die interaksie tussen kyker en drama of film. 

6. ’n Sepie se vinnige produksietempo en voortdurend ontwikkelende storielyne stel unieke eise aan ’n akteur. Hoe het jy weer by dié ritme aangepas?

 Ha-ha! Ek dink nie ek het aangepas nie! Om woorde te leer en voorbereiding is daagliks deel van jou werk.  

As regisseur is ek intensief betrokke by, en verantwoordelik vir alle aspekte van ’n produksie. As akteur is ’n mens net verantwoordelik vir jou deel.  

Ek het aanhoudend gesukkel om nét te fokus op my eie deeltjie en my eie werk – my kop was gereeld by oplossings soek vir beligtingsprobleme of vrae oor storielyne of idees rondom sistemiese verbeteringe. Ek moes myself heeltyd herinner dat dit nie my werk is nie. 

Maar gelukkig hou ek, net soos Elzette, van harde werk, so ek het nie te veel gesukkel met die feit dat ek elke dag 100% moes gee nie. 

7. As ’n regisseur probeer jy soveel moontlik van elke afdeling op stel verstaan. Help daardie tegniese kennis jou as aktrise, of moet jy dit soms doelbewus afskakel en bloot binne die toneel leef?

Soos ek by die vorige vraag gesê het: Dit was maar moeilik om af te skakel. Gelukkig is die tegniese  en produksiespanne by Suidooster so sterk en ervare dat ek eintlik niks gehad het om my aandag af te lei nie. My mede-akteurs se werksetiek het my ook geïnspireer om beter te doen om hulle te ondersteun. 

8. Jy het al gesê dat jy as regisseur vir akteurs vertroue en vryheid probeer gee, maar ook duidelike grense stel. Hoe was dit om hierdie keer beheer prys te gee en jouself aan die Suidooster-regisseurs en -vervaardigers se visie oor te laat?

Destyds, op my eerste dag as regisseur by 7de Laan, was een van die eerste tonele wat ek behartig het ’n toneel met al die “groot” akteurs: Anna-Mart van der Merwe, Wilna Snyman, Waldi Schultz, Francois Rautenbach en Elma Postma.  

Ek was doodbang. Ek kon byna nie ’n woord uitkry nie, maar toe trek Wilna my eenkant toe en sê: “Onthou net: the professionalism of the actor is measured by how well they listen to their director – irrespective of who the director is.”  

Dit was haar manier om vir my te sê dat daardie groep akteurs sal doen wat ek vra en dat ek nie bang hoef te wees of moet probeer om hulle te oortuig om my regie te aanvaar nie. Die onus is op die akteur om professioneel te wees. 

En dit is met daardie mindset waarmee ek na Suidooster toe gekom het. Ek respekteer die posisie van die regisseur. Gelukkig was ek ook so bang en senuweeagtig dat dit maklik was om my oor te gee aan elkeen se leiding en terugvoer. 

9. Jy het die afgelope jare onder meer aan Fynskrif, Fraksie, Kelders van geheime en Tuiskoms gewerk. Het jou terugkeer na toneelspel jou opnuut bewus gemaak van wat akteurs van ’n regisseur nodig het, en sal dit jou toekomstige benadering tot regie beïnvloed?

Ek het nog altyd probeer om akteurs net genoeg vryheid en net genoeg leiding te gee. Ek probeer deurentyd bewus wees van wat hulle nodig het. Ná hierdie ervaring besef ek opnuut hoe belangrik individuele, gefokuste en opbouende terugvoer vir akteurs is. Dis nie ’n nuwe les nie, maar wonderlik om dit weer te onthou. 

10. Jy het agter die skerms aan groot werklikheidsreekse soos Boer soek ’n vrou, Plaasjapie en Survivor South Africa gewerk. Wat geniet jy van die werklikheids-TV-genre, en wat het dié reekse jou oor mense geleer?

O, so baie! As mense vir my vra wat ek doen, wil ek eintlik altyd antwoord: “Ek voer onderhoude met mense.”  

Dis my kern-identiteit. Vir meer as 20 jaar het ek onderhoude gedoen vir werklikheidsreekse. Al was ek ook die tegniese regisseur, het ek dit altyd iewers in die skedule ingewerk dat ek ook met die deelnemers op kamera gesit en gepraat het. 

Mense wil raakgesien word. Hulle wil gehoor word. Nie op ’n afwysende manier nie, maar met die hoop op begrip. Vir my is dit die grootste voorreg om oorkant iemand te kan sit en om te probeer om werklik te hoor wat hulle probeer sê, en dit werklik te probeer uitpluis wat hulle bedoel en nodig het. 

Suidooster word weeksdae om 18:00 op kykNET (DStv-kanaal 144) en om 18:30 op kykNET&kie (DStv-kanaal 145) uitgesaai. Die reeks is ook beskikbaar op DStv Stream. 

Lees ook: ‘Suidooster’ in Augustus: Geheime en skandes ruk Ruiterbosch

The post Kykers se geliefde Wilmien ná twee dekades terug op die kassie – in ‘Suidooster’  appeared first on rooi rose.

Deur Maryke Roberts

Foto’s Clifford Roberts

Die 14de kykNET Silwerskermfees wat die afgelope week in die Moederstad gehou is, het opnuut bewys waarom dit die kroonjuweel van die Suid-Afrikaanse rolprentbedryf is. Die fees, wat oor vier dae by The Bay Hotel en Theatre on the Bay in Kampsbaai plaasgevind het, het plaaslike talent, storievertelling en tegniese meesterskap gevier.   

Voor die eerste kortfliek, Aasvoëls, vertoon is, het Tina Kruger, die programbestuurder van die kykNET Silwerskermfees aan gaste in die gehoor gesê: “Hierdie is die fees waar geen rolprentmaker onwelkom is en waar geen onderwerp taboe is nie.” 

Daar is altesaam 22 rolprente by die 2026 kykNET Silwerskermfees vertoon: 17 kortflieks wat vyf kort dokumentêre rolprente en projekte deur opkomende- en gevestigde rolprentmakers en vyf vollengte flieks wat vier speelfilms en een vollengte dokumentêre rolprent ingesluit het. 

Die flieks in kompetisie is elk ingelui met ’n glorieryke blou tapyt waar die sterre vir die kameras kon poseer en onderhoude kon toestaan voor die vertoning.

Die wenners in 20 kategorieë is Saterdagoggend by die hotel aangekondig. 

Die mees meesleurende drama van die fees, Landmyn, het as die groot wenner uit die stryd getree. Nico Scheepers se meesterlike regie en draaiboek vir Landmyn het nie net die gesogte prys vir Beste Speelfliek ingepalm nie, maar ook toekennings vir Regie en Draaiboek ingeoes. Die rolprent se meesleurende toneelspel is bekroon met Beste Akteur vir Ben Albertyn, Beste Aktrise vir Anna-Mart van der Merwe, en Beste Vroulike Byspeler vir Nicole Holm. rooi rose was die naamborg vir die première in die Rotunda by The Bay Hotel Donderdagaand. Gaste het elkeen ’n tydskrif en drasak ontvang. 

Landmyn, Nico Scheepers (middel) se jongste speelfliek, het met die meeste toekennings weggestap, waaronder beste redigering, beste draaiboek, beste regie en beste speelfilm. Hier staan hy met die spelers, van links, Ben Albertyn (beste akteur), Carla Smith, Juan-Christoff Smith, Anna-Mart van der Merwe (beste aktrise), Dhania Kara Schultz en Nicole Holm (beste vroulike byspeler).

Tussendeur fliekvertonings was daar kuiers oor glase wyn, terwyl die son oor die see ondergaan, en vele selfies in blink tabberds saam met die bekendes. 

Werkswinkels, gesprekreekse en ander mentor-geleenthede is ook aan voornemende rolprentmakers aangebied. 

Die fees het Saterdagaand op ’n hoogtepunt afgesluit met die jaarlikse Silwerskermtoekennings vir Film en TV, waar nie net die week se wenners gevier is nie, maar ook die beste televisieproduksies, -akteurs en -kinematograwe vereer is. 

Die akteur Ivan Abrahams en die komedie-genie Willie Esterhuizen is ook vereer vir hul lewensbydraes tot die vermaaklikheidsbedryf. Die legendariese rolprentmaker Koos Roets het Saterdagoggend sy eerbewys vir sy lewensbydrae tot die vermaaklikheidsbedryf by The Bay Hotel ontvang. 

Op die komediefront het Die Kantoor sowel as die fantastiese produksie Silas en die Ysbeer op Tafelberg met groot lof weggestap, met uitsonderlike prestasies in die visuele en tegniese kategorieë.

Die speelfliek, Silas en die Ysbeer op Tafelberg, het met verskeie pryse weggestap waaronder vir beste kinematografie, beste kostuums, beste grimering en haarstilering en beste oorspronklike klankbaan. Hier is van die akteurs op die blou tapyt voor die première by The Bay Hotel. Voor is Neels Junior Clasen as Silas en Luna Coetzer as Willemien saam met De Klerk Oelofse as Nagvakie. Agter is Antoinette Kellermann as Ouma, Daneel van der Walt as Ma, Beer Adriaanse as Brommel en Neil Sandilands as Van Hunks.

In die kortfliekkategorieë het opkomende sowel as gevestigde rolprentmakers die gehoor beïndruk. Twee persent het skoonskip gemaak onder die opkomende klompie, met Michelle le Roux en Heinrich Laubscher wat pryse vir sowel draaiboek, regie as redigering huis toe geneem het. Die bekroonde drama Wag ’n bietjie het die prys vir beste kortfliek deur ’n gevestigde rolprentmaker losgeslaan.   

Op die kassie het die veteraan-TV-persoonlikheid Rian van Heerden ’n skitteraand beleef deur drie afsonderlike toekennings te verower vir sy uiteenlopende werk as aanbieder. Prestasies in gewilde dramas soos Niggies en Appels en tee het ook wye erkenning geniet.   

Die Silwerskermfees gaan nie net oor die glans en die bekende blou tapyt nie; dit bly ’n noodsaaklike dryfkrag vir die plaaslike rolprentbedryf se groei, mentorskap en die ontdekking van nuwe stemme.  

Die afgelope fees het weer bewys dat die Suid-Afrikaanse rolprentbedryf floreer en stories lewer, wat plaaslik resoneer en internasionaal kan meeding én wen. 

Lees ook: Die groot wenners by die Silwerskermtoekennings

The post Die sterre skitter by die 14de kykNET Silwerskermfees appeared first on rooi rose.

Verskaf deur kykNET

Ons is nog nie eens halfpad deur die 18de seisoen van die kykNET-maatsoekreeks Boer soek ’n vrou nie, maar die liefdespaaie het reeds ‘n onverwagte paar skerp draaie gemaak en potensiële pasmaats het die ander pad gevat, nie die plaaspad nie. 

Van ‘n boer wat buite die reeks liefde vind tot drie onverwagte onttrekkings – hier is die grootste kinkels tot dusver. 

1. David vind liefde voordat sy TV-reis begin

Toe Reandi Grey met die briewe en pakkies op David se plaas aankom, het hy ’n onverwagte onthulling gemaak, naamlik dat hy intussen reeds iemand ontmoet het wat sy hart vinniger laat klop. 

Die boer van Vierfontein was gevolglik verlig dat hy nie onder die top-5 geëindig het nie. Sy Boer soek ‘n vrou-reis was skaars aan die gang, maar dit blyk toe hy het in elk geval reeds die liefde gevind het waarna hy op soek was.

David & Reandi. Foto: Verskaf

2. Alicia onttrek voordat Francois kan kies

Francois se groepafspraak het met ’n terugslag begin toe Alicia sommer met die intrapslag op die plaas aankondig dat sy nie verder vir die plaaskuier beskikbaar sou wees nie. 

Hoewel die deelnemers die skedule vooraf ontvang het, het Alicia gehoop sy sou haar verpligtinge kon bewimpel sodat sy wél vir Francois beter kon leer ken. Dit het egter nie so uitgewerk nie. Sommige van die ander pasmaats was krities oor haar besluit en het gevoel dat deelname aan die reeks werklike toewyding verg. 

Vir Francois was dit ’n groot teleurstelling: Hy wou self die drie vroue kies wat hy beter wou leer ken, maar die geleentheid om daardie keuse te maak, is reeds aan die begin van die dag uit sy hande geneem.

Alicia en Francois. Foto: Verskaf

3. Danelle laat val ’n tweede bom

Net toe Francois gedink het die grootste skok is agter die rug, volg ’n tweede onttrekking. 

Danelle, wat ná die blitsafsprake ‘n konneksie met hom gevoel het, het teen die einde van die groepafspraak besluit dat daardie vonk intussen verdwyn het. Sy het ook geglo dat Francois nie juis dieselfde belangstelling in haar toon nie. 

Die ironie was dat Francois juis vir háár vir die plaaskuier gekies het. Hy het dit duidelik gemaak dat hy haar nie sou gekies het as hy haar nie beter wou leer ken nie. Danelle se vertrek was Francois se tweede terugslag op dieselfde dag en dit het hom nogal hard getref. 

Danelle. Foto: Verskaf

4. Janke se goeie nuus bring ’n terugslag vir JD

Skaars het die stof ná Francois se dubbele skok gaan lê, of nóg ’n pasmaat het die reeks gegroet. 

Janke het saam met Lara en Leoné plaas toe gereis om JD persoonlik te vertel dat sy vir ’n kursus in onkologie gekeur is en daarom nie verder kan deelneem nie. Dit was ’n loopbaankeuse wat sy moes maak. Boonop het voedselvergiftiging haar dieselfde oggend in die hospitaal laat beland. 

JD was teleurgesteld omdat hy reeds ’n konneksie met haar gevoel het, maar hy het besef dat hy nie in die pad van só ’n belangrike geleentheid in haar loopbaan kon staan nie. 

Die boere het dus nie alleen die laaste sê nie – hul pasmaats kan die liefdesreis net so vinnig kortknip of in ’n nuwe rigting stuur. En as dít alles gebeur het nog voordat die seisoen sy halfpadmerk bereik het, bly daar net een vraag oor: Watter verrassings gaan nog onverhoeds opduik?

Janke. Foto: Verskaf

Inskrywings vir seisoen 19 is oop 

Die vervaardigers van Boer soek ’n vrou is reeds op soek na boere vir die 19de seisoen van die reeks.

Manlike en vroulike boere van alle ouderdomme mag inskryf, mits hulle ongetroud en ouer as 21 jaar is.

Boere kan op die volgende maniere inskryf: 

Besoek www.kyknet.tv om aanlyn in te skryf of ’n inskrywingsvorm af te laai. 

Bel 079 614 2229. 

Stuur ’n e-pos na: boer@wolflightsa.com 

Inskrywings sluit om middernag op 9 September 2026. 

Boer soek ’n vrou word op Donderdae om 20:00 op kykNET (DStv-kanaal 144) uitgesaai.

Lees ook: Boer soek ’n vrou: Onverwagte nuus vir JD

The post ’n Liefdespad vol duwweltjies appeared first on rooi rose.

Verskaf deur kykNET

Die televisie-aanbieder Rian van Heerden is Saterdagaand 22 Augustus drie keer na die verhoog geroep om ’n Silwerskermbeeldjie te ontvang, terwyl die speelfilm Landmyn skoonskip gemaak het in die vier gesogte kategorieë waarin dit met twee ander speelfilms meegeding het. 

Die glansryke kykNET Silwerskermtoekennings vir Film en TV in die Kaapstadse Internasionale Konferensiesentrum was ’n ware viering van die talent van akteurs, TV-aanbieders en filmmakers in die Afrikaanse film- en televisiebedryf. Die akteur Ivan Abrahams en die komedie-genie Willie Esterhuizen is ook vereer vir hul lewensbydraes tot die vermaaklikheidsbedryf. Die legendariese filmmaker Koos Roets het Saterdagoggend sy eerbewys by The Bay Hotel ontvang. 

Waldimar Pelser, direkteur vir Premium-kanale by MultiChoice, ’n Canal+-maatskappy, sê dit is nou belangriker as ooit om erkenning te gee aan die uitblinkers in ’n bedryf wat daagliks kykers se lewens verryk, hulle uitdaag, hulle in kontak hou met die wêreld om hulle en hulle bowenal vermaak. “Ek staan jaarliks verstom oor die kollektiewe kreatiewe krag wat in die Afrikaanse bedryf bestaan en die uiteenlopende maniere waarop dit tot uiting kom.” 

Volgens Pelser sal kykNET op die kleinskerm voortgaan om gehalte-programme te bied – van aktualiteit- en realiteitsprogramme tot sepies, drama en komedie. “Waar Nico Scheepers verlede jaar uitgeblink het met sy gruwelprent Hen gaan Landmyn op ’n gans ander manier ’n opskudding veroorsaak. Dit is ’n verhoudingsdrama waarin hy en die uitmuntende spelers bewys hoe onthutsend ’n klein gebaar kan wees.” 

WENNERS IN DIE TELEVISIE-KATEGORIEË: 

Beste hoofspeler in ’n komedie

Albert Pretorius (Flip) – Die kantoor  

Beste byspeler in ’n komedie

Schalk Bezuidenhout (Tjaart) – Die kantoor   

Beste byspeler in ’n telenovela of sepie

Gretchen Ramsden (Patty Paulsen) – Skemergrond 

Beste nuweling in ’n telenovela of sepie

Izette Blignaut (Petro) – Binnelanders 

Beste akteur in ’n telenovela of sepie

Germandt Geldenhuys (Louis) – Binnelanders

Beste aktrise in ’n telenovela of sepie

Sandi Schultz (Zelda Joubert) – Diepe waters

Beste akteur in ’n drama

Albert Pretorius (Gustaff Fouché) – Niggies  

Beste aktrise in ’n drama

Rolanda Marais (Adri Joubert) – Die nuusmakers

Beste manlike byspeler in ’n drama  

Ian Roberts (Jakkals) – Appels en tee

Beste vroulike byspeler in ’n drama

Roeline Daneel (Maks Fouché) – Niggies

Beste aanbieder in ’n leefstylprogram  

Hannes van Wyk – Kwêla  

Beste aanbieder in ’n vermaaklikheidsprogram

Rian van Heerden – Wie word ’n miljoenêr  

Beste aanbieder in ’n realiteitsprogram

Reandi Grey – Boer soek ’n vrou  

Beste aanbieder in ’n gesels- of aktualiteitsprogram

Rian van Heerden – Laataand by Rian  

Beste aanbieder in ’n dokumentêre program  

Rian van Heerden – Schuster 

Beste ensemble-aanbiederspan

Hamilton Wessels, Rika Calitz, Breyton Paulse, Bakkies Botha, Jonathan Mokuena, Jannie du Plessis, Rikus de Beer, Tommy Dickson (Chef Vaatjie) – Toks en Tjops 

WENNERS IN VAN DIE KATEGORIEË VIR SPEELFILMS: 

Beste vroulike byspeler  

Nicole Holm – Landmyn  

Beste akteur  

Ben Albertyn – Landmyn  

Beste aktrise  

Anna-Mart van der Merwe – Landmyn  

Beste speelfilm 

Landmyn 

Foto: Rachel Jonker

Lees ook: Scheepers se speelfilm ‘Landmyn’ belig oorgeërfde drama binne familieverband

The post Die groot wenners by die Silwerskermtoekennings appeared first on rooi rose.

Deur Tanya de Vente-Bijker
Foto’s Willem Botha

Willem Botha se kamera neem hom deesdae om die wêreld heen. As jy weer sien, is hy op ‘n vliegtuig op pad iewers heen. Die vroegoggendvlug Kaapstad toe om ‘n rooi rose-voorblad te gaan skiet. Of op pad Robertson, Nelspruit of Upington toe vir een van Willem Botha Beauty se meesterklasse.

Maar sy nederige menswees spreek vanself in die uitkies van die foto’s vir hierdie artikel … Elke foto het ‘n spesiale storie oor sy loopbaan. Dis foto’s van mense en oomblikke wat hom na aan die hart lê.

Willem het al op laerskool sy eerste mik-en-druk-kamera in sy hand vasgehou, en nooit weer teruggekyk nie. “Een van daai wat jy nog so moet opwen,” vertel hy. In graad 10, toe hy 16 was, het sy ouers vir hom sy eerste Canon-kamera gekoop. Hy het alles afgeneem, of dit nou diere of sy vriendinne was. In graad 11 het hy Die Burger se Plusster-kompetisie gewen. “En omdat dit ‘n koerant was, het hulle foto’s van my gesoek. Ek het toe begin om my eie foto’s te neem.”

In 2006 het hy tweede in Idols gekom en in daardie jare het die platemaatskappye net vir een fotosessie betaal. “Ek het rêrig nie geld gehad om self fotograwe te bekostig nie so ek moes toe maar weer my eie foto’s neem.”

Die sanger Jay was saam met Willem by CO Productions geteken en hy het Jay se foto’s begin neem. Eers as ‘n guns, en later vir R200 vir ‘n shoot.

“Tot Jay vir my gesê het hy gaan my nooit weer boek as ek nie begin regte geld vra nie, want niemand in die bedryf gaan my ernstig opneem as ek R200 vra nie. Só het ek rêrig begin foto’s neem.”

Lees in die Augustus 2026-uitgawe van rooi rose hoekom elkeen van hierdie foto’s vir Willem in sy loopbaan uitgestaan het.

Lees ook: 10 redes waarom jy rooi rose se Augustus-uitgawe móét lees!

The post Willem maak ‘magic’ appeared first on rooi rose.

Verskaf deur kykNET

Nico Scheepers volg verlede jaar se bekroonde riller Hen op met Landmyn, ’n intieme drama oor oorgeërfde trauma, verpligting en die onmoontlike daad van opgee. Dit het by die Silwerskermfees in Kaapstad gedebuteer.

Vir die eerste keer in ’n dekade herenig twee susters en ’n broer vir ’n wintervakansie aan die Suid-Afrikaanse kus. Elkeen het elders ’n lewe opgebou in ’n poging om die onstabiliteit van hul kinderdae en die lang skadu van hul ma, Annatjie, te ontsnap. Die samesyn ontspoor wanneer die suster op besoek uit die buiteland erken dat sy hul ma genooi het om by hulle aan te sluit. 

Annatjie arriveer soos ’n storm en trek die familie terug in ou patrone van wrewel, oorlewing en onafgehandelde geskiedenis. Soos die dae verloop, begin haar teenwoordigheid die afstand afbreek wat hulle tussen hulself en hul verlede probeer bou het. Nie eens Annatjie se pragmatiese suster kan volhou om te probeer brûe bou nie. Die kinders word gedwing om uit te werk hoeveel van hul lewens steeds om haar swaartekrag ineen vou, en of daardie houvas ooit werklik verbreek kan word. 

Scheepers, oorspronklik veral bekend as teaterskepper, se eerste speelfilm, Hen, het in 2025 agt Silwerskerm-pryse gewen, terwyl sy televisiereeks Donkerbos eweneens etlike pryse ingepalm het, waaronder die Safta-prys vir beste regisseur. Landmyn is sy tweede speelfilm, waaraan 16 intense dae van verfilming afgestaan is.

Vrae aan Nico Scheepers, skrywer-regisseur

Jy trap nie suutjies met die begin van Landmyn nie, dit begin sommer met ’n dawerende “hy haat sy ma”. Wei uit oor jou keuse vir die dramatiese begin.

As dit kom by ware families en mense wat mekaar moet verdra, mag mens nie suutjies trap nie. Ek glo dit is ons verantwoordelikheid as storievertellers om mense te beweeg, nie net te vermaak nie. Om hulle te laat dink, en voel, en wonder. En skaamkry. Wat ’n wonderlike, ongemaklike ervaring om in die donker teater te kan skaamkry tussen vreemdelinge.

Jy het in 2025 jou speelfilmdebuut by die Silwerskermfees gemaak met die riller Hen. Is dit makliker om ’n verhoudingsdrama te verfilm? Wat is die voordele en nadele van die twee genres?

Ek dink in baie aspekte was Landmyn selfs moeiliker as Hen. Gee my eerder 45-grade hitte in die middel van nêrens as al hierdie fynbesnaarde emosies saam vasgevang in ’n huis. Daarom moes ons dit maak! Die eenvoud van die storie, en ons benadering (een familie, een huis, een lens) was die boks van beperkings wat ons doelbewus gebou het om in te kan speel.

In terme van genre hoop ek om nog in elke liewe een te werk. Die breedheid en moontlikhede van stories lê oop voor ons. Ek kyk álles. So ek wil álles maak. Volgende, hopelik sci-fi, of fantasy. Of ’n fantasie-riller. Wie weet? Ek is net dankbaar vir die geleentheid om al hierdie verskillende storiewêrelde en karakters te kan verken, en hopelik vir mense elke keer iets meer eerlik en eg te kan bied.

Nico Scheepers volg verlede jaar se bekroonde riller Hen op met Landmyn, ’n intieme drama oor oorgeërfde trauma, verpligting en die onmoontlike daad van opgee. Foto: Verskaf

Jy verwys na die film as “kamermusiek”. Interessante woordkeuse, want hierdie is nie ’n strelende, sussende tema nie. En daar is ’n toneel of twee wat mens selfs koue rillings gee! Hoe interpreteer jy jou benadering?

Eerlikheid. Landmyn gaan nie oor hoe ons wil wees nie, maar hoe ons is. Mense is komplekse, deurmekaar gedaantes wat net soveel seermaak as wat ons genees. Veral met onsself, en met die wat naaste aan ons moet wees: ons familie.

Ek wil nie stories vertel wat kykers streel en sus en laat beter voel oor die dele van hulself wat hulle wil wegsteek nie. Kom sit in die donker en wees eerlik met jouself. Families is moeilik. Nie alle huise is goeie huise nie. En om saam te oorleef ten spyte van verdien ook ’n storie.

Jy is ’n bekroonde dramaturg en teaterregisseur. Hoe het hierdie agtergrond jou gehelp met die skryf en verfilming van Landmyn. En wei ook uit oor die keuse van akteurs en die proses.

Terwyl ek aan die film geskryf het, was ek met Anna-Mart (van der Merwe), Carla (Smith) en Ben (Albertyn) in ’n teaterproses vir die produksie Speelgoed van glas. Dit was ’n wonderlike geleentheid, want ek kon lank voor die verfilming reeds met hulle gesels, en daar was ’n goeie verhouding en werksetiek. Met Nicole Holm sal ek berge uitklim en Dhania (Schultz) en Juan-Christoff (Smith, Carla se boetie) het soos gladde visse in ons waterpoel kom swem. Dit was ’n wonderlike proses. Ook moeilik, maar niks wat die moeite werd is is maklik nie. Die akteurs is die hart van die film. Hulle toewyding en vreesloosheid is verbysterend. Anna-Mart is een van die gaafste mense wat ek ken, en sy het Annatjie op ’n baie donker plek gaan uitgrou.

En wat gebeur op die front van televisie en teater?

Ek skryf tans my eerste boek, werk aan ’n nuwe Afrikaanse dramareeks en my nuwe teaterstuk, Leefbaar, het by die Vrystaat Kunstefees gedebuteer. 

*Die 14de kykNET Silwerskermfees word van 19 tot 22 Augustus in Kampsbaai, Kaapstad, aangebied. Kaartjies vir die films, asook die prestigeryke toekenningsgeleentheid op Saterdag 22 Augustus, is beskikbaar by Quicket.

Vir die volledige program, besoek www.silwerskermfees.co.za.

Lees ook: Semi-Soet is gesinsvermaak wat soet op die sak sal val + WEN dubbelkaartjies

The post Scheepers se speelfilm ‘Landmyn’ belig oorgeërfde drama binne familieverband appeared first on rooi rose.

Skaars het die stof gaan lê ná verlede week se dubbele skok in Boer soek ’n Vrou tydens Francois se blitsafsprake, of nóg ’n pasmaat het onverwags die reeks gegroet. Dié keer was dit JD wat op sy plaas naby Reitz die nuus moes aanhoor: Janke kan nie verder deelneem nie. 

Sy het saam met Lara en Leonè plaas toe gereis om hom persoonlik te vertel dat sy keuring vir ’n kursus in onkologie gekry het. Voedselvergiftiging het haar boonop vroeër die oggend in die hospitaal laat beland, en sy kon nie die dag saam met JD deurbring nie. 

Ná Alicia en Danelle se onttrekkings by Francois, en nou Janke se nuus, is dit reeds duidelik: In die soeke na liefde verloop min dinge volgens plan … 

Jack (30), appel- en peerboer, Hermanus (Wes-Kaap) 

Hanli, Anri en Lené kom op die plaas aan. Foto: Verskaf 

Hy’s ’n man wat weet wat hy in die lewe wil hê, was Reandi se opinie van dié boer. Met Reandi se aankoms op die plaas, het Hanli gesê sy voel sommer super-kalm in vergelyking met die vorige dag. Dit lyk boonop of al drie die meisies reeds goeie vriendskapsbande met mekaar gesmee het. Maar gaan dit dalk verander hoe verder die stryd om Jack se hart gaan vorder? 

Terwyl Jack vir Reandi sy gaste se kamers gaan wys, het sy hom vinnig daarop gewys dat die gang baie kort is – en hy moenie kom “trippe trappe trone” in die aand nie … 

“Ek is soet, ek doen nie sulke goeters nie,” het dit blosend van die jong boer gekom. 

Kort voor lank het hy vir Anri, Hanli en Lené in die werk gesteek om pere te oes. Tussendeur het Jack natuurlik ook fyner gekyk na sy drie groentjie-‘handlangers’ en hy was besonder beïndruk met Hanli se nederigheid en rustigheid. Vir Anri het hy as braaf beskou wat haarself uitdaag en moeilike take aanpak en Lené was vir hom ’n vrolike, gelukkige mens wat deurentyd nuuskierig is oor alles wat aan die gang is. En sy vra goeie vrae, het hy bygevoeg. 

Francois (34), natuurbewaarder, Hoedspruit (Mpumalanga) 

Beniska en Sonel K groet Francois. Foto: Verskaf

Hy het erken hy was ’n bietjie senuweeagtig oor die kuier wat voorgelê het, maar eintlik was die opgewondenheid oorheersend. Op pad na hul tuiste vir die volgende week, kon Beniska en Sonel K ook nie hul opgewondenheid beteuel nie. En alhoewel hulle hope kameelperde op die roete gewaar het, het die olifante hulle bly ontwyk. Min het hulle geweet wat op hulle sou wag. 

Die twee is gou deur Francois aan die bedrywighede bekend gestel waarby hy betrokke is, soos die monitering van die troppe wildehonde wat met elektroniese halsbande toegerus is. Die twee meisies was meer as gewillig om hierdie “plat-op-die-aarde, avontuurlike mens wat ’n lekker ‘fragrance’ afgee” van naderby te leer ken. 

Op sy beurt het Francois gevoel dat hy weet waar hy met Beniska staan en dit was iets waarvoor hy waardering gehad het. En hy het ook gehou van haar nuuskierige brein. 

Wat hom van Sonel beïndruk het, was die feit dat sy deurentyd bewus was van die mense rondom haar en seker wou wees almal is oukei. Maar nie een van die twee het geweet hulle sou weldra ’n dooie olifant se tande uit die kopbeen moet “trek” nie. Dié tande moes Francois veilig maak en dan op die ivoor-databasis registreer. 

Willie (37), bees- en mielieboer, Harrismith (Vrystaat) 

Tayla, Lezelle en Madelé help Willie sy bonsmara-bulletjies klassifiseer. Foto: Verskaf

Geduld en harde werk, het Reandi vertel, is Willie se resep vir sukses. Gaan daar een van sy drie gaste wees wat hom van meet af aan op daardie vlak ontmoet?  

’n Lieflike reënbui met Reandi se aankoms op die plaas het sommer reeds ’n goeie begin beteken. Watter boer kan dan nou nee sê vir dié seëning? 

Dit was van meet af duidelik dat Lezelle, Madelé en Tayla hierdie week vanuit drie uiteenlopende oogpunte gaan takel – van terugsit en meer waarneem tot ernstige en insiggewende vrae. 

Lezelle het met die intrapslag tuis gevoel omdat sy in ’n soortgelyke omgewing grootgeword het. Op haar beurt het Tayla reeds ’n gaping gesien waar sy haar stempel in die gewaardeerde ou plaashuis kan afdruk. 

“Man-alleen … kort maar ’n vrou se hand hierbinne,” het sy opgemerk terwyl Madelé op haar beurt daarna uitgesien het om vir Willie in sy element te ervaar. 

Gestewel en gespoor, eintlik meer ’n geval van “gumboots” en papier in die hand, het Willie die drietal gou na die Bonsmara-bulletjies se kamp geneem om hulle te klassifiseer. Terwyl almal geesdriftig die proses gevolg het, was dit Madelé se versugting vir nóg pen en papier vir die week wat voorlê sodat hulle Willie ook kon klassifiseer … 

JD (28), gemengde boerdery, Reitz (Vrystaat) 

Lara en Leonè help JD om draad te span. Foto: Verskaf

Danksy JD se ondeunde streep bly dinge altyd lig, het Reandi die Vrystaatse boer opgesom. Liefde, nes die skoner geslag, bly maar onvoorspelbaar en sy kon nie wag om te sien wat hier op Reitz gaan afspeel nie.

Die kinkel hierdie keer is dat daar ’n kursus in onkologie vir Janke opgeduik het wat haar baie opgewonde gemaak het, maar dan is daar ook die teleurstelling dat sy die reeks moet groet om te doen wat gedoen moet word. Sy het wel saam met Lara en Leonè plaas toe gegaan om die nuus aan hom persoonlik oor te dra.

Om die kroon te span, kon sy ook nie die dag op die plaas deurbring nie nadat voedselvergiftiging haar vroeër die oggend in die hospitaal laat beland het.

JD was wel teleurgesteld want hy het ’n konneksie met haar gevoel, maar hy het ook besef hy kan nie in haar pad staan nie.

Maar die boerdery en die plaas het geroep en Lara en Leonè moes kort voor lank hul staal toon met draadspan-werk. So tussen die werkery deur, het JD darem ’n paar pluspunte van hulle kant ontvang, en een daarvan was sy geduld met die groentjies.

“Jôh, nee, dit vat baie lank,” het hy laggend na afloop van die sessie erken. Lara was vir hom ’n baie rustige en vrolike mens met baie geduld. Leonè het hy as baie vriendelik met ’n oop persoonlikheid beskryf. En hy dink altwee sal kan aard op die plaas … maar hy het geskimp dat daar dalk reeds gevoelens is vir een van die twee.

Arno (28), bosbouboer, Tzaneen (Limpopo) 

Arno het Joané, Mariska en Rosanne bale laat dra. Foto: Verskaf

Gaan hierdie mens-mens-boer sy hart verloor? As deel van sy welkom-geskenke aan sy besoekers, het hy vir elkeen ’n sagte teddiebeer gegee – net ingeval hulle iets wil vashou, het hy laggend opgemerk. 

“En hulle mag jou nie vashou nie,” het Reandi bevestig. 

Wat hulle wel toegelaat was om vas te hou, was lusernbale wat hulle in die veld na ’n oopte moes dra om die wild te voer. 

Hy het Mariska as ambisieus ervaar oor die groot stap wat sy buite haar gemaksone geneem het. Alhoewel Joanè aanvanklik stillerig was, het hy dit geniet om te sien hoe sy gemakliker raak. Rosanne is vir hom die omgee-mens wat daarvan hou om ’n groep bymekaar te trek. 

Reandi sê 

“Soos vreemdelinge vriende raak, verander die atmosfeer op die plaas. Soms gespanne, soms lig. Maar áltyd met ’n tikkie afwagting. Net tyd sal leer of hierdie iemand se eerste – én laaste aand op die plaas gaan wees.” 

Inskrywings vir seisoen 19 is oop 

Die vervaardigers van Boer soek ’n vrou is reeds op soek na boere vir die 19de seisoen van die reeks. 

Manlike en vroulike boere van alle ouderdomme mag inskryf, mits hulle ongetroud en ouer as 21 jaar is. 

Boere kan op die volgende maniere inskryf: 

• Besoek www.kyknet.tv om aanlyn in te skryf of ’n inskrywingsvorm af te laai. 

• Bel 079 614 2229. 

• Stuur ’n e-pos na: boer@wolflightsa.com 

Inskrywings sluit om middernag op 9 September 2026. 

The post ‘Boer soek ’n vrou’: Onverwagte nuus vir JD appeared first on rooi rose.