Juwelierslegende Jenna Clifford oorlede

Die bekende Suid-Afrikaanse juwelier, Jenna Clifford, is Dinsdagaand 20 Mei in die teenwoordigheid van haar familie oorlede. Sy was 65 jaar oud.

’n Verklaring deur haar drie dogters, Shayna, Chanelle en Summer, lui dat Clifford vroeër vanjaar met kanker gediagnoseer is. “Sy het behandeling met onwrikbare moed, grasie, waardigheid, krag en eindelose dankbaarheid aangepak,” skryf hulle. “Ongelukkig was die siekte reeds te ver gevorderd, en ons het geweet ons tyd saam met haar sou beperk wees.”

As een van Suid-Afrika se mees ikoniese en geliefde juweliersontwerpers, het Clifford wêreldwyd bekendheid verwerf vir haar unieke skeppings, maar ook vir haar buitengewone gees van liefde, omgee en mentorskap. Haar dogters beskryf haar as “charismaties, uniek, liefdevol, vrygewig en dapper”.

“Ons ma was ’n ikoon, mentor, vriendin en held vir soveel mense. Haar grootste nalatenskap is een van vreugdevolle gee – sy het altyd vrylik en sonder huiwering gegee: haar tyd, haar idees, haar liefde,” lui die verklaring.

Clifford het haar lewe aan die ondersteuning van ander gewy en was passievol daaroor om mense te help om hul volle potensiaal te bereik. “Sy was op haar gelukkigste wanneer sy ander kon help om hul drome te verwesenlik,” sê haar dogters.

Haar bekende handelsmerk, Jenna Clifford, sal voortbestaan onder die sorg van haar familie. “Ons is toegewy daaraan om op die stewige fondament wat sy gelê het, voort te bou en die merkwaardige Jenna Clifford-verhaal voort te sit.”

’n Private begrafnis sal in die komende dae plaasvind, en ’n herdenkingsgeleentheid om Clifford se lewe te vier sal binnekort in Johannesburg gehou word. Besonderhede hieroor sal later gedeel word.

“Ons sal die herinnering aan ons kosbare ma vir altyd koester – soos sy was: beeldskoon, liefdevol en vol lewe.”