Deur Salomé Delport. Foto Pexels
Sakkies onder die oog is …. wel, onooglik. Wat veroorsaak hierdie pofferigheid? Hier is vier van die algemeenste redes vir pofferige oë, met oplossings en maklike selfhelp.
Jy het vet onder jou oë
Nie net vet mense ontwikkel vetsakkies wat op jou wangbeen wil-wil rus nie. Dit kan met enigiemand gebeur, veral as ons ouer raak.
Die rede
Elke oogbal is gekussing in ’n sagte vetlagie om dit teen impakbeserings te beskerm. By party van ons “lek” hierdie vet mettertyd uit, omdat die kollageen- en elastienstruktuur van die vel onder jou oog dunner is en makliker verrek as die velstruktuur van jou wang net onder die oog. Daar is min wat die oogvel stewig hou, en dus versamel die vetlagie as sakkies onder die oog.
Wat kan jy daaraan doen?
Plastiese chirurgie is die beste langtermyn oplossing vir sakkies onder die oog, al is dit aanvanklik duurder as rome, lasers en so meer.
Jy het ptose
Jou boonste ooglid hang oor jou oog, sodat jou oë amper toe lyk. Hangende ooglede kan so hinderlik wees dat mense nie behoorlik kan sien waar om te bestuur of lees nie.
Die redes vir hangende ooglede
Daar is baie redes hiervoor, soos:
• Jou ouderdom: Namate ons verouder, verrek die ligamente in ons ooglidspiere sodat hulle oor jou oog bly hang en jou verhinder om lekker te sien, veral as jy moet opkyk.
• Skade aan die oogspiere en/of senuwees: Die sleutelleidraad hier is, hoe skielik het dit gebeur? As jou ooglid skielik sak laat ’n dokter kyk daarna. Dit kan veroorsaak word deur toestande soos miasthenia gravis en enige iets wat die senuwees na die ooglid of die spiere van die ooglid aantas.
• Jou medisyne: Sekere medikasies, onder andere die opioïed-pynmiddels, veroorsaak sakkies onder die oë. Dit kan ’n teken wees dat jy te veel pynpille gebruik. Gesels met jou dokter, voor jy verdere skade aanrig.
Wat is die beste raad vir ooglede wat toesak?
As dit binne ’n paar dae of weke gebeur, laat jou dokter daarna kyk. As dit oor jare ontwikkel, is dit waarskynlik net ’n teken dat jy verouder. Gelukkig is daar raad vir hierdie een: plastiese chirurgie stel dit maklik reg. En as jy dit kan motiveer sal jou mediese fonds baie moontlik daarvoor betaal.
Sout as oorsaak vir sakkies onder die oog
Wat ons eet beïnvloed selfs ons oë en sout is een van die items wat ons oë onverwags erg kan aantas.
Die rede?
Die gedeelte om jou oog is baie sensitief vir waterterughouding. As jy weggelê het aan soutryke soesji, soja en soortgelyke souterige kosse, kan jy die volgende dag sakkies onder die oog verwag.
Hoe om pofferigheid om jou oë weg te neem – en gou ook
Sout as rede vir sakkies onder jou oë klaar gelukkig baie maklik vanself op. Drink oor die volgende paar uur kort-kort water om die sout te help uitspoel.
As jy egter baie maklik sakkies om jou oë kry en jy vermoed dit het met souterige kos te doen, kan jy gerus jou dokter vra om na jou niere te kyk.
Jou hart is aangetas
As jou oë pofferig is, jou voete swel en jy boonop altyd moeg is, kan sakkies onder die oog ’n teken wees dat jou bloedsomloopstelsel op een of ander manier aangetas is. Gaan vir ’n behoorlike hartondersoek.
Hartprobleme as oorsaak van sakkies onder jou oë is ernstiger. Gewoonlik ontwikkel dit oor jare. Moenie sakkies onder jou oë ignoreer as dit met swelling van jou voete en hande gepaard gaan nie.
Lees ook: Lyk minder moeg
Lees Meer
