15 goed om na te kyk in die 30 sekondes voor jy op jou fiets klim deur Salome Delport. Hooffoto: Wavebreakmedia/istock images
Is jy reg vir nog ’n heerlike, sorgelose rit op jou fiets wat harde oefening soos pret laat voel? Tik gou af:
1 Dra jy die regte klere vir die weer vandag? Oorweeg ’n ekstragroot sonpiek, saam met jou kopskerm, as die son baie skerp is. Onthou armskerms en ’n windweertop as dit koud is. Dit is veral in die winter kouer op ’n fiets as wat ’n mens dink.
2 Het jy sonskerm aangewend, veral op jou neus, ken, ore en die agterkant van jou nek? Beskerm jouself teen velkanker, veral op jou fiets.
Lees ook: Sonslim met sonskerm
3 Is daar enige los toutjies, veters of pante wat iewers in jou fiets se ratte of speke kan vasdraai nie?
4 Dra jy ’n fietsbril?
5 Is jou valhelm se bandjies so ferm dat die hoed nie kan skuif nie maar los genoeg dat dit jou nie knyp nie?
6 Het jy jou sleutels? Jou selfoon? Is hulle op ’n veilige plek waar hulle nie kan uitval nie?
7 Het jy ’n snesie en water? En ’n eetdingetjie as jy ver gaan ry?
8 Is die bande ferm? Is die fietspomp op sy plek?
9 Lig die voorwiel. Draai dit vrylik, of skuur dit op die remblokke? Herhaal dit vir jou fiets se agterwiel.
10 Is jou fietssaal horisontaal en op die regte hoogte? Of het dit gesak?
11 Is die stuurstang reguit? Vorm dit ’n reghoek met die voorwiel, as die voorwiel reguit vorentoe gedraai is?
12 Is jou fiets se ratte en ketting skoon? Loop dit glad en geluidloos?
13 Knyp die voor- en agterremme afsonderlik vas. Voel hulle skerp en sterk genoeg?
14 Is jou slimhorlosie of selfoonapp gestel?
15 Voel jy op en wakker? Is jy op ’n gelukkige plek en gereed om die vreugde van die rit en die natuurskoon rondom jou in te neem?
Geniet!
Lees ook: Hoe fietsfiks is jy?
Lees Meer
