Het jy ooit hierdie tendense gevolg?
Fluweel en ander sweetpakke
Hoewel hierdie materiale vandag weer hoogmode is, sal die kenmerkende sweetpak altyd ikonies aan die 80’s bly. Min mense kon daardie glansende skynsel, tekkies en ’n paar gekleurde sonbrille weerstaan.
Scrunchies
Saam met groot haarstyle kom groot haarbykomstighede. Die bekende “scrunchie” het in elke kleur, grootte en materiaal voorgekom om jou uitrusting op te vrolik. Fluweel en blink metaalkleure was gunstelinge onder bekendes soos Madonna, Janet Jackson en Sarah Jessica Parker.
Kan jy nog onthoug watter soort het jy verkies?
Skouerkussings
Hoe bonkiger, hoe beter. Onthou jy daardie skerp, reghoekige silhoeët wat jou laat lyk of jy uit ’n wetenskapfiksiefilm ontsnap het? Het jy dit saam met ’n miniromp of langbroek gedra?
#rooirosewenk: Hierdie tendens is volgens modekenners besig om terug te keer na die modeplanke …
Spandex
Tesame met ’n kopband en skewe poniestert. Die hoog uitgesnyde leotard en stywe broekie kon enige figuur vleiend laat lyk, jou bene ekstra lank laat voorkom en die bont patrone het goed gekamoefleer. Geen wonder dit was so ’n gesogde oefenuitrusting nie!
Truitjies om die skouers geknoop
Of jy nou van plan was om daardie trui te dra of nie, om jou skouers het dit gehang. Dink aan films soos Grease en Top Gun. Sandy van Grease se sportdrag het veral gou in almal se klerekas gehang, met die truitjie oor die skouers.
Diere-patrone
Patrone was groot nuus in die jare 80, veral die luiperdmotief. Dit was stereotipies met “ryker” mense geassosieer wat dikwels ’n serpie of sybloes in hierdie patroon gedra het.
Kyk hier na ’n paar van rooi rose se 1980-modeblaaie
Kyk uit vir hierdie tendense wat weer kop uitsteek
Buidelsakkies
Hoewel handsakke tydloos is, raak klein rugsakkies en buidelsakkies (beter bekend as “moonbags”) al hoe meer gewild. Dit gaan gepaard met die musiekfees-tendens wat nou groot nuus is.
Groot oorringe
Bonkige oorringe is nou al ’n geruime tydjie op die loopplanke te sien – en dit gaan nêrens nie. Van hoepels, tossels en balle, daar is ’n styl vir elke voorkeur. Vind ’n lengte wat by jou nek pas – die idee is om jou nek slanker te laat lyk.
Hemde met valle en dramatiese moue
Dink aan Meksikaanse- en Marokkaanse-style. Moue wat uitklok of valle maak, skep daardie tikkie luuksheid en beweging aan ’n eenvoudige voorkoms.
Alles denim
Wanneer was denim ooit uit die mode? Denim met detail was hierdie winter op almal se lippe, maar soos in die tagtiger jare, begin denim weer na sy klassieke styl terugkeer – in ’n hooggesnyde ma-snit met ’n bonkige baadjie.
Interessante sonbrille
Dit is deesdae noodsaaklik om in ’n goeie sonbril te belê. Die bekende Ray Ban-brille en refleksieglase is nou met modieuse rame vernuwe, maar dit behou steeds daardie 80’s gevoel.
Kantoorbaadjies
As daar teen hierdie tyd nog nie ’n kantoorbaadjie in jou kas hang nie, is dit tyd. Die klassieke snyersnit sal jou nooit in die steek laat nie. Kikker dit op met kleurvolle skoene en bykomstighede.
Lees Meer
