Ons dokter sê
Dit is moeilik vir haar brein om baie inligting te verwerk. ’n Nuwe omgewing met musiek, die TV en mense wat kom en gaan en oor en weer gesels, is te veel vir haar brein. Hou die tempo rustig en omring haar met die bekende.
Laat haar eerste aankom waar julle gaan kuier. Bring mense een vir een by sodat sy elkeen kan plaas.
Maak seker daar is plek waar sy kan rus en afskakel.
Kom oor jou ego: Sy beledig jou nie deur nie jou naam te onthou nie; sy kán dit nie onthou nie omdat haar brein degenereer.
Sowat 10% van die Baby Boomers gaan Alzheimersiekte ontwikkel. Daar is nog geen raad of kuur daarvoor nie. Ons sal moet leer dat ouderdomsgebreke deel van die normale lewensiklus is en ons kinders deur ons voorbeeld moet leer hoe om dit met humor en liefde as deel van familiewees te hanteer.
Lees ook: Volledige koslys vir die Alzheimer MIND-dieet
Die aftree-oordmatrone sê
Maak plannetjies om elkeen van julle subtiel “bekend te stel” met uitdrukkings soos “Môre, Hannes! Het ons oudste boet lekker geslaap?” So herinner jy haar dadelik aan sy naam en hoe hy inpas. Deurspek jul geselsies met agtergrond-inligting wat vir haar die prentjie inkleur, soos met “Hannes, jou kind is besig! Waar is Tonie nou heen? Sal hy vanaand betyds terug wees om die vleis vir ons Kersete te braai?”
Moenie vra “Onthou Ma nog toe … “Sy onthou nie of onthou verkeerd, en raak verleë. Sê liewer iets soos “Dit was so lekker toe ons laas … ” Jy brei uit, en sy leef mee. As sy onthou, sal sy iets byvoeg.
Vir bejaardes is hul herinneringe kosbaar. Bring gerus albums met al die ou foto’s saam. As julle ’n geskrewe familie- of dorpgeskiedenis het, lees dit voor. Ek sien hoe geniet die oues koerantstories oor die gebeure waarmee hulle grootgeword het.
As sy moeilik is of argumenteer, moenie stry nie. Dit gaan nie oor wie is reg en wie nie. Bestuur liewer die situasie deur haar aandag af te trek met ’n ander aktiwiteit, of deur die omgewing te verander.
Dit is uitstekend vir bejaardes se selfrespek as hulle nuttig voel. Betrek haar met takies binne haar vermoë, soos om die tafel te dek of messegoed te bêre.
Onthou die drukkies. Enkellopendes kry nie meer lyfaanraking nie. As jy kans sien, masseer haar kop, rug of voete. Maar werk saggies, want baie het teer gewrigte.
Lees ook: Alzheimersiekte: Kan jy dit keer?
Lees Meer
