Beestong-broodjie

Genoeg vir 8.

Bestanddele

• 1 kg gepekelde beestong
• 1 ui, ruweg gekap
• 2 wortels, ruweg gekap
• 2 selderystingels, ruweg gekap
• 3 knoffelhuisies, gekneus
• 1 bouquet garni (lourierblaar, pietersielie, roosmaryn en tiemie)
• 2,5 ml (½ t) swartpeperkorrels

Broodjies

• 1 klein rooikool, dun gesny
• 1 klein groenkool, dun gesny
• 1 rooi-ui, dun gesny
• 1 wortel, in dun repies gesny
• 8 sagte broodrolletjies

Mosterdsous

• 15 ml (1 e) olyfolie
• 30 ml (2 e) koekmeel
• 60 ml (¼ k) witasyn
• 125 ml (½ k) kookwater
• 45 ml (3 e) mosterdpoeier
• 60 ml (4 e) suiker
• 125 ml (½ k) mayonnaise
• 15 ml (1 e) korrelmosterd

Metode

1. Sit die beestong saam met die ui, wortels, seldery, knoffelhuisies, bouquet garni en swartpeperkorrels in ’n groot kastrol. Gooi genoeg koue water by sodat die tong heeltemal bedek is.
2. Bring die water tot kookpunt. Laat prut vir 2 uur oor ’n lae hitte, of totdat die tong sag is. Laat in die water afkoel.
3. Trek die vel van die tong af en sny in dun lappies.
4. Meng die kool, ui en wortel.

Mosterdsous

1. Gooi die olie in ’n kastrol en roer die meel by tot ’n gladde pasta vorm.
2. Roer die asyn en water by en bring tot by kookpunt. Klits die res van die bestanddele by tot glad.
3. Sit die beestong op die broodrolletjies saam met die koolslaai en mosterdsous.