Die tiende seisoen van Boer Soek ’n Vrou gaan volgens kykNET groter en beter as tevore wees en dat die program dalk ’n verrassing of twee gaan oplewer.
Van 20 Februarie tot 17 Maart kan boere of plaasbestuurders, manlik of vroulik en van alle ouderdomme, op kykNET se webtuiste by www.kyknet.tv inskryf om deel te wees van die nuwe reeks.
Minki van der Westhuizen, wat weer die aanbieder gaan wees, se raad aan boere wat wil inskryf, is dat hulle net hulself moet wees.
“Volg jou hart, nie jou kop nie, want die liefde wen altyd” – Minki
“Enigiemand hou daarvan om te sien hoe iemand anders liefde vind en dit gee baie mense nuwe hoop, terwyl dit jouself kan herinner aan toe jy ware liefde ervaar het,” sê Minki oor die sukses van Boer Soek ’n Vrou.
Nóg goeie nuus is dat kykNET geluister het na die talle versoeke oor hoe dit met van die vorige deelnemers gaan en hoe die liefde hulle oor die jare sedert hul deename behandel het. Die tiende reeks gaan dus drie episodes bykry wat ’n terugblik gaan gee oor die vorige nege seisoene en waar van die deelnemers hulself in 2017 bevind.
Boer Soek ’n Vrou 10 sal van Oktober op kykNET uitgesaai word.
