Deur Ilse Salzwedel. Foto’s: verskaf deur Christel van den Bergh
“Ek hardloop al van skooldae af, en het op skool daarvan gedroom om die jongste meisie tot nog toe te wees wat die Comrades hardloop. Maar dit het toe nooit gebeur nie,” skerts die borrelende Christel.
David Vlok, haar mede-akteur in die gewilde kykNET-sepie, Getroud Met Rugby, het nou al 21 keer die Comrades gehardloop, en het al meer as een keer voorgestel dat sy dit saam met hom doen. “In 2017 het ek besluit vanjaar gaan ek dit saam met David en sy dogter hardloop, en het in Desember begin oefen. Ek glo ’n mens moet jou drome najaag.” Ironies genoeg is David toe Desember in ’n ongeluk met ’n bromponie, en hy kan nie vanjaar hardloop nie. Maar Christel se man, JP, het ook ingeskryf, en hulle het besluit om die uitdaging saam aan te pak.
Christel sê hoewel hardloop vir haar natuurlik kom, het sy nog nooit sulke ver afstande gehardloop soos wat ’n Comrades vereis nie. Gelukkig stuur die Comrades-organiseerders vir mens ’n oefenprogram, so jy weet presies hoe om voor te berei. JP is gelukkig ook ’n groot langafstandatleet. Ek doen maar net wat my liggaam kan doen, en het ter voorbereiding ’n marathon gehardloop en ook 90 km versprei oor ’n naweek.” Die Vrydag het sy 32 km gehardloop, gevolg deur 28 km die Saterdag en 30 km die Sondag.
“Ek hardloop ook soms saam met die Parkview-drafgroep, en Bruce Fordyce is een van die lede. Hy reken darem ek is op koers met my oefenprogram.”
Lees Meer
