Waar begin mens jou lewe na 23 jaar in Melville oppak? Dit was die eerste kwelvraag wat Frankie Erasmus Opperman in die eerste episode van die nuwe kykNET-dokumentêr, getiteld Frank, oor sy lewe geopper het.
Ja, onse Frank Opperman wat dekades reeds onlosmaaklik deel van die Suid-Afrikaanse vermaaklikheidswêreld is, het getrek. Kaap toe. Daar in die Woodstock. Nuwe dinge, nuwe reekse . . .
Dis juis sy seun, Frankie, ’n regisseur van verskeie TV-reekse waaronder Survival of the Species, Wine, Dine & Stein, wat besluit het om ’n intieme dokumentêr oor sy pa te vervaardig.
Kykers leer Frank Opperman werklik van naderby ken tydens die dokumentêr – die man sonder maskers, die man wat erken hy’s allesbehalwe volmaak, die man wat ook vrese en onsekerheid ken . . .
(Foto: Verskaf/kykNET)
13 goed wat jy dalk nie van Frank geweet het nie
- Wie is Frank?
Frankie Erasmus Opperman, in Johannesburg gebore op 8 Junie 1960, is reeds 45 jaar lank in die bedryf. Sy ma was van ’n gesiene Afrikaanse familie terwyl sy pa onder baie moeilike omstandighede grootgeword het waar armoede en lyding hoogty gevier het. Nou het sy seun, Frankie, besluit om ’n drieledige dokumentêr oor sy pa te maak, pleinweg getiteld Frank.
- Pa, Dadda of Frank?
Een van die eerste hekkies wat oorgesteek moes word: Hoe gaan Frankie sy pa tydens die verfilming van die dokumentêr aanspreek? “Dadda” gaan nie vir jou werk soos toe jy klein was nie, het Frank vir sy seun gesê. “Pa ook nie, ek dink jy kan soos jou suster my net Frank noem.”
- Frank se lewensmaat
Kykers ontmoet ook vir Esmarie Meyer met wie Frank reeds vanaf 2005 in ’n verhouding betrokke is. Die twee het saam ’n dogter, Ena, wat in 2006 gebore is. Op sy beurt is Frankie gebore toe Frank en die aktrise/skrywer Susan Coetzer getroud was, maar hulle paaie het in 1992 uiteen geloop.
- Aftrede?
Terwyl Esmarie dink vanweë verskeie redes was dit hoog tyd dat daar ’n dokumentêr oor Frank gemaak word, was die gesoute akteur effe onseker oor die tydsberekening daarvan.
“Ons is nie in daai soort van ’n beroep wat jy kan gaan ‘ek is 65, ek gaan nou aftree en ek gaan bly in Hartenbos’ nie. En as jy ’n dominee is, dan gaan bly jy in Nature’s Valley.”
- Die lewe was ’n jôl
Frank gesels ook baie eerlik oor die verhouding tussen hom en Frankie – en dat hy nie dieselfde pa vir hom was as wat hy vir Ena tot op haar 19de verjaardag kon wees nie.
Benewens die feit dat Frankie by Susan gebly het, kon hy hom naweke sien . . . maar jôl het ’n groot rol gespeel en hy was nie “die engel Gabriël” nie.
- Analoog-voorkeure
Die digitale kant van die lewe is allermins Frank se sterk punt. “Ek is ’n analogue era guy, en enigiets wat digitaal is, maak my senuweeagtig,” het hy verklap toe Elmarie die lugbraaier in ’n japtrap uitsorteer na hy verskeie kere probeer het om die regte stelling te kry. En Esmarie het dit bevestig: “Selfs ’n gloeilampie is ’n challenge vir hom.”
- Lochie se liedjie
Een van sy vriende, die akteur en kosmens Lochner de Kock, bly ook in Woodstock en hy het Frank se kitaar vir hom reggemaak. Lochner, oftewel Lochie soos Frank hom noem, was natuurlik ook toentertyd die stem agter Sarel Seemonster en Karel Kraai. Maar die kuier het ’n wonderlike verrassing vir Frank ingehou: ’n Liedjie deur Lochner wat Frank self net moet toonset.
“Dit was die eerste gedig wat iemand nog ooit vir my geskryf het,” het ’n duidelik-ontroerde Frank gesê.
- TRUK, teaterblaps en ’n snor wat moes bly
Frank se drama-loopbaan het afgeskop ná sy weermagdae toe hy by die Pretoria Technikon gaan studeer het. Hy het werk gekry by die destydse TRUK (die Transvaalse Raad vir Uitvoerende Kunste).
Dis ook waar sy pad met dié van Marcel van Heerden gekruis het. Hulle het saam in Tartoef en Die Ketter in die Staatsteater opgetree. En Marcel se staaltjie oor Frank se grootste teaterblaps in Die Ketter gaan kykers laat skater van die lag.
(Foto: Verskaf/kykNET)
Boonop was Marcel “Ouboet” in Willie Esterhuizen se eerste Orkney snork nie-fliek – want Frank kon dit nie maak nie. Die rede? Hy was besig met die TV-reeks The Big Time en kon nie sy snor afskeer nie . . . Frank het die rol van ’n Griekse immigrant Chris Karedes in die reeks vertolk.
- Frank wil mense kwaad maak
Alhoewel Frank die rolle geniet wat hy vertolk het – en nog gaan vertolk – verkies hy die rol van ’n booswig, daardie tipe ouens wat mense kwaad maak. Christiaan Olwagen het hom geweldig beïndruk met die eerste reeks van Koek.
“Ek was so bevoorreg om met Koek 2 sekerlik die grootste booswig te speel wat ek nog ooit in my lewe gespeel het.” Maar die “booswig” was ook maar betreklik bang vir sy eerste keer om teenoor Sandra Prinsloo te speel . . .
- TV-reeks oor ou mense
Nooit het Frank kon dink dat sy staande ovasie vir die teatervertoning van Nêrens, Noord-Kaap tydens die Woordfees, vir hom nog ’n ikoniese rol sou besorg nie. Hy het Nico Scheepers, die regisseur, trompop gaan loop na afloop van die vertoning en homself aangebied sou Nico ooit ’n TV-reeks oor ou mense maak.
“Nêrens, Noord-Kaap, het my lewe verander. Daai wat dit altyd was ‘Hei jy, Ouboet, waar’s jou sweetpak?’ . . . dit het nou verander na ‘Hei jy, waar’s jou kierie?’”.
- ’n Skeermes en die trane loop
Daar was een spesifieke toneel in die eerste reeks van Nêrens, Noord-Kaap waar die trane van die produksiespan vryelik gevloei het. Dit was tussen Frank as pa Lourens Adendorff en Geon Nel as sy seun, Frans, toe Frank die woorde “Die lemmetjie moet van onder na bo” geuiter het.
- Geen ego
“Ek leer baie by ou Frankie – as mens en as actor. Jy’s altyd so oop en eerlik en dis altyd vir my so refreshing. Jy gee nie voor nie en jy’t geen ego nie,” het dit van Albert Pretorius gekom, een van sy “seuns” in Nêrens, Noord-Kaap.
“Jy’s rêrig ’n legende, of jy dit nou wil glo of nie.”
- Nooit weer nie
Dit was ook tydens die verfilming van Nêrens, Noord-Kaap waar Frankie finaal die bottel gegroet het. Hy vertel hoe hy by die kroeg vasgehaak het en teen die hele dorp gedrink het.
“Ek het f*ckin omgeslaan – van suip.”
Dit was die keerpunt. Nooit weer nie. Maar, maan hy, jy kan nie windgat daaroor wees nie. “Jy vat hom dag vir dag.”
(Foto: Verskaf/kykNET)
Frank het Woensdag 18 Februarie om 20:00 op kykNET (DStv-kanaal 144) begin. Die reeks is ook op DStv Stream en Catch Up beskikbaar.
Lees ook: Margaret uit Hollywood: Wie is Jacob Elordi?
