In kort is FOMO ’n mengsel van angs, ontoereikendheid en irritasie wat veral deur sosiale media aangehits word. In ’n onlangse opname deur Pharma Dynamics, het meer as 62% van die deelnemers gesê dat hulle in ’n konstante vrees lewe om op iets uit te mis, dat iemand anders met iets baie interessant besig is.
Simptome van FOMO sluit onder andere in: om op jou tande te kners, die heeltyd jou selfoon vas te hou, die oormatige stuur van SMS’e, oneindige ondervraging, kompulsiewe sweet, te twiet wanneer jy in die badkamer is, en selfs om ongenooid by plekke op te daag.
FOMO kan blykbaar selfs jou immuunstelsel verwoes. Die opname het verder ook getoon dat 13% van mense steeds na ’n partytjie sal gaan, al is hulle siek. Die nadeel van sulke optrede is egter dat ernstige verkoue of griep kan ontstaan indien jy jouself te veel druk en nie rus nie. Daar is selfs ’n risiko om siektes soos asma, brongitis en longontsteking te kry.
Hoe hanteer ’n mens FOMO?
# Besef dat jy nie alleen is nie.
# Indien jy die aand besluit om by die huis te bly, maak vrede daarmee en sit jou foon af.
# As iemand twiet oor die feit dat jy “uitmis”, twiet terug en sê hulle moet jou ’n volgende keer nooi.
# Daar sal altyd iemand wees wat iets interessanter as jy doen, so aanvaar dit en gaan aan met jou lewe.
# Leef jou lewe en moenie ’n geïdealiseerde prentjie op Facebook skep nie.
