Grimering groot deel van ‘CATS’ se betowering

Deur Maryke Roberts. Foto’s: GWB Entertainment en Allison Foat

Wanneer die gordyn lig en die karakters van CATS op 10 Desember in die Moederstad  die verhoog oorneem, is dit nie net die ikoniese musiek of die energieke choreografie wat betower nie – dit is ook die gesigte wat lewe kry met opvallende, dierlike detail. Agter hierdie magiese transformasie staan Maria Cave, die grimeer-bestuurder. Sy is ‘n internasionaal-erkende grimeerkunstenaar met ‘n flair vir karakter-ontwerp en ‘n fyn oog vir teater-estetika.

Haar werk word gekenmerk deur presisie, kreatiwiteit en ’n diep begrip van hoe grimering storievertelling versterk – veral in produksies waar gesigsuitdrukkings en karakternuanses noodsaaklik is.

Met haar talent, dissipline en kreatiewe visie help Maria Cave elke aand om die fantasiewêreld van CATS geloofwaardig, kleurvol en lewend te maak—een kwashaal op ’n slag. Met 24 verskillende katte in die musiekblyspel deur Andrew Lloyd Weber, het die grimeerkunstenaars hul hande vol.

CATS is gegrond op Old Possum se Book of Practical Cats deur T.S. Eliot en die musiekblyspel het in 1981 in Londen se West End sy première gehad. Dit het oor 21 onondebroke jare byna 9 000 vertonings in Londen gehad en oor 18 ononderbroke jare op Broadsay bykans 7500 vertonings gehad; rekords gebreek en musiekteater herdefinieer.

Maria het vandeesweek by die Kunstekaap die akteurs wat elke kat vertolk en elkeen verantwoordelik is vir hul eie ikoniese kat-gesig – elk met unieke patrone, kleure en lyne wat die persoonlikheid en rol van die karakter weerspieël – opgelei. Die proses meng fyn tegniek met vinnige uitvoering – akteurs moet daagliks in net ’n paar minute in herkenbare Jellicle-katte omskep word. Hulle werk volgens ‘n grimeer-Bybel om te verseker dat elke vertoning se katte presies dieselfde lyk.

Elke akteur het bykans 2.5 uur met haar deurgebring. Maria doen die een helfte van die gesig en die akteur moet dan die ander helfte self doen. Hulle mag nie enigsins van die grimeer-Bybel afwyk nie.

Maria se werk verseker konsekwentheid, kwaliteit en die kenmerkende styl wat CATS wêreldwyd bekend gemaak het.

So tussen al die werk deur, is daar darem kansie om meer oor Maria te leer.

Sy vertel: “John Napier het die kostuum en stel van die oorspronklike CATS ontwerp en is internasionaal gereken vir sy sukses om die kat- en menslike elemente so soomloos te vermeng in die produksie.

“Toe Nicole Scherzinger in 2014 die hoofrol van Grizabella in die West End herlewing van CATS vertolk het, het ek baie nou met John saamgewerk om dié nuwe Grizabell-voorkoms vir vir Nicole te skep. Toe hy in 2021 die nuwe grimeer-bybel saamgestel het, het hy weer na my uitgereik en daarna is ek aangestel as grimeer-bestuurder en werk regoor die wêreld aan verskillende produksies.”

Maria het by Greasepaint School of Makeup in Londen studeer.

Maria wys vir Jordan Roelfze wat Mr Mistoffelees in die Suid-Afrikaanse produksie speel, hoe om sy grimering korrek aan te wend.

Nege vrae aan Maria:

Elke kat het so ‘n unieke persoonlikheid – hoe vertaal jy daardie karaktertrekke in grimeringontwerp terwyl jy steeds die ikoniese CATS-estetika behou?

Ek het elke grimering geskep uit die ontwerpe wat deur die ontwerper John Napier geteken is. Ek het nou saam met hom gewerk om ‘n voorkoms te verkry wat hy wou hê deur my vermoë as grimeerkunstenaar te gebruik om dit te bereik.

Watter kat het die mees intrige/tydrowende/moeilike grimering?

Munkustrap, die basis vereis baie vermenging en om die kleure reg te kry, dan moet die merke van die pruik en rondom die gesig kom.

Dis eers wanneer daar ‘n hele paar katte bymekaar op die verhoog is, wat die uniekheid van die grimering ten beste vertoon word. Hier is Munkustrap en Gumbie Cat.

Waarom is die grimeerbybel in 2021 oorgedoen?

John wou die grimering versag en sommige van die kleure in die kostuums, pruike en grimering verander.

Hoe het jy besluit om ‘n grimeerkunstenaar te word en teater toe te gaan? Was daar ‘n bepalende oomblik toe jy net geweet het?

Ek was mal oor teater en grimering, ek het in alle aspekte van grimering en pruike opgelei en enigiets en alles gedoen wat voorgekom het. CATS was my eerste West End-produksie, toe dit by die New London Theatre was en ek het as pruik-assistent begin.

Dylan Janse van Rensburg speel Rum Tum Tugger in die Suid-Afrikaanse produksie en hier wys Maria hom hoe om die grimering aan te wend.

Kom jy uit ‘n familie wat by teater betrokke is?

My ma het in ‘n teater as sekretaresse gewerk en baie akteurs ontmoet, insluitend Julie Andrews. Maar eintlik is daar geen teater-betrokkenheid in jy familie nie.

Wat is jou vroegste herinnering aan die magie van teatergrimering se vermoë om ‘n gehoor te vervoer?

Ek onthou dat ek CATS gaan kyk het en verstom was oor die vertoning, veral die grimering.

Elke akteur doen sy eie kat-grimering volgens die grimeer-Bybel. Hier is Mungojerrie en Rumpleteazer.

Die grimering is ongelooflik gedetailleerd, maar moet ook onder intense beligting en beweging standhou. Op watter produkte, tegnieke of truuks vertrou jy om duursaamheid en konsekwentheid te verseker?

Sodra die basis aangewend en korrek gemeng is, is dit die poeier wat dit in plek hou. Dit word met ‘n poeierkwas aangewend en in die vel gerol om dit te fixeer.

CATS word al dekades lank wêreldwyd opgevoer. Hoe balanseer jy die eerbiediging van die klassieke grimeerstyl met die bring van jou eie kreatiewe interpretasie na die produksie?

Ek volg John Napiers se ontwerpe en pas aan by verskillende velkleure, asook gesig- en oogvorms.

Wat is die grootste uitdaging wanneer jy kunstenaars oplei om hul eie grimering aan te wend of te onderhou?

Wanneer ek hierdie grimerings uit die ontwerpe skep, het ek hulle so eenvoudig as moontlik gehou, aangesien sommige kunstenaars nie die vaardighede het nie en dit moeilik vind. My werk is om geduldig, positief en bemoedigend te wees.

Mr Mistoffelees word in die Suid-Afrikaanse produksie deur Jordan Roelfze gespeel. Hier bring hy sy grimering aan vir sy transformasie in ‘n kat.

• CATS word deur Pieter Toerien en GWB Entertainment, Kaapstad Opera en in samewerking met LW Entertainment na Suid-Afrika gebring en open op 10 Desember by die Kunstekaap in Kaapstad en speel tot 11 Januarie, waarna dit op 17 Januarie by The Teatro at Montecasino te sien is. Kaartjies deur Webtickets en die Kunstekaap kaartjieskantoor by (021 421 7695).
• CATS handel oor Jellicle-katte wat bymekaarkom vir hul jaarlikse Jellicle-bal. Tydens die bal kies hul leier, Old Deuteronomy, een kat om na die “Heaviside Layer” op te styg en in ‘n nuwe lewe wedergebore te word. Die musiekblyspel volg verskeie katte terwyl hulle hulself voorstel en verduidelik waarom hulle verdien om gekies te word. Die uitgeworpene Grizabella sing uiteindelik die beroemde “Memory” en word uiteindelik vir wedergeboorte gekies.
• Die voortreflike Suid-Afrikaanse rolverdeling het onder meer vir Cindy Ann Abrahams as Grizabella, King B as Old Deuteronomy, Dylan Janse van Rensburg as Rum Tum Tugger, Che-jean Jupp as Munkustrap en Jordan Roelfze as Mr Mistoffelees.

KYK | CATS se lokprent

Lees ook:  PAS BEKEND | Afrikaanse weergawe van The Office skop in Januarie af!