Heuning-en-gemmer-hoender met sataysous

Genoeg vir 8.

Bestanddele

• 8 hoenderdytjies
• 30 ml (2 e) gekapte knoffel
• 60 ml (¼ k) gekapte gemmer
• 60 ml (¼ k) heuning
• klein handjie vol tiemietakkies
• 125 ml (½ k) olyf- of avokado-olie

Vir die Satay-sous

• 5 ml (1 t) gekapte gemmer
• 5 ml (1 t) gekapte rissies
• 5 ml (1 t) gekapte knoffel
• 60 ml (¼ k) grondboontjiebotter
• 30 ml (2 e) klappermelk
• 30 ml (2 e) sojasous
• hand vol koljanderblare, gekap
• fyn gerasperde skil en sap van 1 lemmetjie
• sout en gemaalde swartpeper

Vir die krakerige Basmatirys

• 125 ml (½ k) geroosterde, gedroogde klapperkrulle
• 125 ml (½ k) geroosterde grondboontjies
• ’n hand vol koljanderblare
• 750 ml (3 k) gaar basmatirys

Metode

1. Meng die knoffel, gemmer, heuning, tiemie en olie saam. Laat lê die hoenderdytjies vir 1 uur of oornag in ’n marinade.
2. Voorverhit die oond tot 200 °C.
3. Pak die hoender op ’n bakplaat, geur na smaak en bak vir 45 min. tot goudbruin en gaar.
4. Maak die Satay-sous: Meng die gemmer, gekapte rissies, knoffel, grondboontjiebotter, klappermelk, sojasous, hand vol koljanderblare, en
   lemmetjie sap en skil. Geur na smaak.
5. Meng die klapperkrulle, grondboontjies, koljanderblare en basmatirys saam.
6. Sit die hoender voor met die satay-sous en neuterige basmatirys.