Kompetisie inskrywings

Jane' Durant

Dorp: KIMBERLEY

Antwoord 1: Ons ma-en-dogter-verhouding is vir ons besonders omdat dit gebou is op ’n diep band van liefde, vertroue en wedersydse begrip. Ons lyk nie net uiterlik baie na mekaar nie, maar deel ook dieselfde waardes, ingesteldheid en lewensuitkyk. Dit maak dat ons mekaar op ’n unieke manier verstaan, selfs sonder woorde. Ons het ’n oop en eerlike verhouding waar ons vry voel om oor enige iets te gesels of dit nou vreugdes, uitdagings, drome of vrese is. Ons is nie net familie nie, maar opreg mekaar se beste vriendinne. Hierdie nabyheid skep ’n veilige ruimte waar ons altyd onsself kan wees, sonder oordeel. Respek speel ’n groot rol in ons verhouding. Ons respekteer mekaar se gevoelens, opinies en grense, en dit help ons om sterk te bly, selfs wanneer ons nie altyd saamstem nie. As daar verskille of misverstande ontstaan, praat ons dit dadelik uit. Ons glo daaraan om probleme met liefde en begrip op te los en nie wrokke of seer in ons harte te dra nie. Wat ons verhouding werklik skaars maak, is die feit dat ons mekaar elke dag kies , om mekaar te ondersteun, aan te moedig en saam te groei. Ons verhouding is nie net een van ma en dogter nie, maar ’n lewenslange vriendskap wat gebou is op opregtheid, deernis en onvoorwaardelike liefde.

Antwoord 2: Een van die mees vormende tye in ons lewens was toe ek sewe jaar oud was, gedurende my Graad 1-jaar, toe my pa in Sierra Leone in Wes-Afrika gaan werk het. In daardie tyd het my ma my en my twee ouer broers alleen grootgemaak. Sy moes nie net die rol van ouer vervul nie, maar ook die volle verantwoordelikheid dra vir die besigheid wat sy en my pa saam opgebou het. My ma se vermoë om sterk te bly staan in tye wat haar lankal moes breek, het ’n blywende indruk op my gemaak. Dit het my geleer wat deursettingsvermoë, opoffering en ware moed beteken. Juis daardie tyd het my respek en bewondering vir haar verdiep en ’n onbreekbare band tussen ons geskep. Ook in moeiliker tye, soos wanneer my ma hospitaal toe moes gaan, was ons altyd daar vir mekaar. Ek sou van vroegoggend tot saans by haar wees, en op my beurt was sy net so onwrikbaar teenwoordig wanneer ek haar nodig gehad het. Hierdie wedersydse ondersteuning het ons verhouding verder versterk en ons geleer hoe belangrik dit is om mekaar nooit alleen te laat voel nie. Die tyd wat ons saam met my broers se kinders deurbring, het ook ’n groot rol gespeel in ons groei. In daardie oomblikke leer my ma my, deur haar voorbeeld, hoe om eendag my eie kinders met geduld, wysheid en onvoorwaardelike liefde groot te maak. Daar is nie een spesifieke gebeurtenis wat ons verhouding laat groei het nie , dit is iets wat oor jare heen natuurlik ontwikkel het. Vandat ek klein is het ons ’n sterk band gehad, en my ma het met al drie haar kinders ’n besonder goeie verhouding. Vandag is ek net dankbaar dat ek nie net haar dogter nie, maar ook haar vriendin kan wees.

Antwoord 3: Ons raad aan ander ma’s en dogters is om mekaar met oop harte en oop ore te benader. Ma’s moet nie hul dogters as ’n bedreiging sien of grootmaak met die ingesteldheid dat “ek is die ma en jy is die kind, daarom kan ek niks by jou leer nie.” Elke dogter het iets om te bied, en wanneer ’n ma bereid is om te luister, bou dit vertroue en ’n veilige ruimte waar ’n dogter gehoor en verstaan voel. Dogters, aan die ander kant, moet probeer om hul ma’s nie net as ouers te sien nie, maar ook as mense en vriende met lewenservaring. Wanneer ’n ma raad gee, kom dit meestal uit liefde en sorg. Deur regtig te luister, kan ’n dogter wysheid ontdek wat haar eie pad in die lewe kan verryk. ’n Goeie verhouding begin vroeg. Ma’s wat van kleins af tyd en moeite insit om hul verhouding met hul dogters te koester, lê ’n sterk fondament vir die toekoms. Daardie band groei saam met die kind en word mettertyd ’n vriendskap wat albei verryk. Vir ma’s en dogters wat dalk tans kwaad of vervreemd is van mekaar, is ons raad eenvoudig: maak vrede. Soms staan trots of seer gevoelens in die pad, sonder dat ons besef watter kosbare verhouding en moontlike vriendskap ons mis. Liefde, vergifnis en eerlike gesprek kan ’n verhouding genees en iets besonders laat groei.