Kompetisie inskrywings
Noeleen Herbst
Dorp: Pretoria
Antwoord 1: My ma is nie net my ma nie, sy is my veilige plek, my raadgewer, my beste vriendin en my grootste ondersteuner. Sy het ’n hart van goud, niks is ooit te veel vir haar kinders nie. Maak nie saak hoe groot of klein die probleem is nie, sy staan altyd gereed met liefde, geduld en wysheid. Ek en sy was nog altyd baie heg. Van kleintyd af tot nou, is sy deel van elke fase van my lewe. As ek onseker is, bang is of net iemand nodig het om te luister, is sy die eerste persoon wat ek bel. Ek mag dalk ’n groot mens wees, maar sy is ’n grootmens-pro! Sy weet altyd presies wat om te sê en hoe om my weer rustig te maak. Sy is die een wat my leer om sterk te wees, maar ook om sag te bly. Sy wys my elke dag wat onvoorwaardelike liefde beteken. Vir my is sy nie net die belangrikste mens in my lewe nie, sy is my anker, my rots en my hart. My verhouding met my ma is spesiaal omdat dit gebou is op liefde, vertroue en ’n band wat niks ooit kan breek nie.
Antwoord 2: Een van die moeilikste tye in ons lewe was toe my ma reeds vroeg met borskanker en vrouedeelkanker gediagnoseer is. As jong dogter was dit vir my ontsettend seer en vreesaanjaend. Ek het nie altyd verstaan hoekom dit met haar moes gebeur nie, maar diep binne my het ek geweet: my ma is ’n yster van ’n vrou. Sy is sterk, sy is dapper, en sy gee nooit op nie. Daardie tyd het ons geleer om mekaar vas te hou, nie net fisies nie, maar met geloof, hoop en onvoorwaardelike liefde. Ek het gesien hoe sy deur pyn, onsekerheid en vrees gaan, maar steeds glimlag vir haar kinders en ons moed inpraat. Dit het my geleer wat ware krag beteken. Vandag is my ma al jare kanker-vry, al sukkel sy steeds met haar gesondheid. Maar elke struikelblok wat oor ons pad kom, vat ons saam aan. Ons weet die Here dra ons, en elke beproewing het ons verhouding net sterker gemaak. Wat ons saam deurgemaak het, het ons band verdiep en ons geleer dat liefde, geloof en samehorigheid enige storm kan oorleef. Sy is nie net my ma nie, sy is my heldin.
Antwoord 3: Ons raad vir ander ma’s en dogters daar buite is: koester mekaar, praat met mekaar en hou mekaar vas, veral in die moeilike tye. Moenie wag vir die perfekte oomblik om liefde te wys of dankie te sê nie. Sê dit nou, wys dit nou, leef dit nou. Lewe gaan nie altyd maklik wees nie. Daar gaan siekte, hartseer, onsekerheid en struikelblokke wees. Maar dis juis in daardie tye wat julle mekaar die meeste nodig het. Wees mekaar se veilige plek, mekaar se skouer om op te huil, en mekaar se grootste aanmoediger. Bou julle verhouding op geloof, respek en onvoorwaardelike liefde. Bid saam, lag saam, huil saam. Onthou: ’n ma en dogter se band is ’n gawe van God, iets kosbaar wat gekoester moet word. En bo alles: moenie ooit ophou glo dat julle saam enigiets kan oorwin nie.
