Kompetisie inskrywings
Jené Jooste
Dorp: Kempton Park
Antwoord 1: Ons het ’n verhouding wat ongelooflik spesiaal is omdat dit gebou is op onvoorwaardelike liefde, begrip en ’n onbreekbare emosionele band. Ons is baie na aan mekaar en deel alles met mekaar. Ons gedagtes, gevoelens, vreugdes en uitdagings. Sonder enige vrees vir oordeel. Wat ons verhouding besonders maak, is hoe diep ons mekaar aanvoel; as sy hartseer is, voel ek haar hartseer, en as sy kwaad is, dra ek dit saam met haar, net soos sy dit saam met my dra. Ons harte beweeg in dieselfde ritme, altyd verbind en altyd bewus van wat die ander een voel. Daar is niks wat ons nie vir mekaar sal doen nie, en daardie wedersydse lojaliteit en toewyding maak ons band net nóg sterker. My ma is nie net my ma nie, maar ook my veilige hawe, my beste vriendin en my grootste bron van krag. Ek weet dat nie elke ma en dogter ’n verhouding soos hierdie het nie, en daarom wil ek ’n voorbeeld wees om vir ander meisies en mammas te wys dat ’n pragtige, liefdevolle en emosioneel verbonden verhouding moontlik is. Ons band bewys dat wanneer liefde, kommunikasie en empatie eerste kom, ’n ma-dogter-verhouding werklik buitengewoon kan wees.
Antwoord 2: Een van die moeilikste tye wat ek en my ma ooit moes deurgaan, was toe my ouma, my ma se ma, oorlede was. Ons drie was ongelooflik na aan mekaar en het ’n diep, onbreekbare band gedeel en om haar te verloor het ’n leemte in ons harte gelaat wat nooit heeltemal gevul kan word nie. Om die pragtige verhouding tussen my ma en haar ma te sien, het my geïnspireer om dieselfde soort band met my ma te hê, want ek het die liefde, respek en krag gesien wat hulle gedeel het. Toe my ouma aan ‘stage’ vier longkanker oorlede is, het ons ’n tyd van intense pyn en hartseer beleef, maar selfs in ons rou het ek en my ma aan mekaar vasgehou. Ons het mekaar bygestaan deur die donkerste oomblikke, mekaar getroos en onvoorwaardelike ondersteuning gegee. In daardie pynlike tyd het ons sterk op God gesteun en op Hom vertrou om ons te dra wanneer ons te swak gevoel het om self te staan. Deur geloof, liefde en saamstaan het ons een van die moeilikste hoofstukke van ons lewens oorleef en daardie ervaring het ons band nog sterker gemaak en ons herinner dat, ongeag hoe swaar die storm is, ons dit altyd saam sal aanpak.
Antwoord 3: Die raad wat ons vir ander ma’s en dogters sou gee, veral vir dié wat nie ’n hegte verhouding het nie of wat saam deur moeilike tye gaan, is om elke dag doelbewus liefde, geduld en begrip te kies. Neem tyd om REGTIG na mekaar te luister, om eerlik en oop te kommunikeer en om ’n veilige ruimte te skep waar gevoelens gedeel kan word sonder vrees of oordeel. Verhoudings word nie oornag sterk nie, dit word gebou deur volgehoue moeite, vergifnis en om daar te wees vir mekaar, selfs wanneer dit moeilik is. In tye van verlies of swaarkry, leun op mekaar eerder as om weg te beweeg en moenie bang wees om op God te vertrou vir krag en leiding nie. Genesing gebeur wanneer harte oop is en wanneer liefde bo trots gekies word. Met moeite, geloof en toewyding het enige ma-dogter-verhouding die potensiaal om te groei tot iets mooi, ondersteunend en betekenisvol.
