Deur Karlien Meiring
In die tweede seisoen van Die brug was Lelani Loots, die vasberade fiksheidsinstrukteur van Centurion, Gauteng, een van die prominentste deelnemers van Noordhuis. As ’n natuurlike leier het sy van die begin af ’n aktiewe rol in die groep se strategie en vordering gespeel. Haar deelname het egter ’n dramatiese wending geneem toe sy deur Noordhuis se leier, Wilhrisca, in ruil vir 300 spykers opgeoffer is – net voor die eindstreep.
Maar dis wat daarna, in die voorlaaste episode gebeur het, wat kykers se monde laat oophang het.
Toe Lelani van die eiland af vertrek het, is sy met ’n aanbod gekonfronteer: Verwyder vyf vlotte van een huis in ruil vir R50 000, of vewyder vyf vlotte van albei huise vir R100 000.
“Toe ek daardie aanbod ontvang het, het alles vir ’n oomblik stil geword. Ek het gedink aan elke persoon in Noordhuis wat hul siel in daardie vlotte gesit het. Maar toe onthou ek weer: Ek’s nie hier om iemand anders se spel te speel nie. Ek’s hier omdat ek iets werd is,” vertel sy.
Sy het besluit om albei spanne te saboteer – ’n moeilike besluit wat vir haar oor meer as net geld gegaan het.
“Ek het gedink ons is verder voor Suidhuis as wat ons was, oeps! Ek’t albei gesaboteer omdat ek besef het dis nie net spanne wat meeding nie, dis mense wat almal vir hulself speel.”
Tog was daar vir ’n oomblik twyfel.
“Skuldgevoelens? Miskien vir ’n minuut. Ek het gegee, geglo, en saam met my huis probeer wen, maar om uitgestem te word omdat ek iemand anders glo nie ’n kans gegee het om die leier te wees nie, was nie regverdig nie. Ek verdien nie die geld omdat ek die vlotte weggevat het nie, maar omdat ek iets gebou het en my waarde van die eerste dag af gewys het.”
Lelani het gewys sy is ’n natuurlike leier – iets wat sy meen uiteindelik haar gekos het.
“Dis asof mense van jou hou solank jy hulle help, lei en vorentoe vat, maar sodra jy self besluite neem wanneer dinge stadig vorder en nuwe leiers nie beheer neem nie, is jy bossy. Ek het net gesorg dat dinge gebeur.”
Uiteindelik het dit nie saakgemaak nie – haar huis het nie eerste die eindstreep gehaal nie. “Dit was bittersoet. Ek was trots op Suidhuis – hulle het dit uit en uit verdien. Maar ek kon nie help om te wonder hoe dinge sou verloop het as ek tot die einde daar was nie.”
En as sy self kon kies wie oor die brug moes stap?
“Ek sou vir Rechaux gestem het. Sy het gebou toe ander gekla het en stil-stil gelei sonder om erkenning te soek. En as dit ek was wat oor die brug moes stap, sou ek gedeel het – maar net met die mense wat dit verdien het.”
View this post on Instagram
Tuis het haar man haar heelpad ondersteun. “Hy weet ek is ’n vegter,” lag sy. “Toe ek terugkom met die R100 000, het hy net gevra: ‘Wag, het jy gebreek of gebou?’ Ek sê toe: ‘Bietjie van albei, Liefie.’ Toe sê hy: ‘Ek’s nie verbaas nie. Jy’t gekry wat jy verdien.’”
En dit verdien het sy beslis. Veral as ’n mens hoor waarmee sy en die ander deelnemers moes saamleef. “Ek het met klein rooi bosluise op my klere en kussing gaan slaap! Ná dag drie het ek net aanvaar hierdie bosluise is ook deel van my span.”
Wat die toekoms betref, is sy oop vir enigiets. “Dalk nóg ’n werklikheidsreeks, dalk iets kreatiefs, dalk iets wat kykers weer sal verras. Een ding is seker: Ek’s nie klaar nie. Ek is mal oor die TV-lewe,” sê sy.
Lees ook: Siobhan Hodgson laat vonke spat as ‘sensuele’ Bernadette in Skemergrond
