Marlo se staatmaker-vrugtekoek

Resep, stilering en fotografie:  Marlo Kitshoff-Carstens, assistent Marlonè Carstens

Bestanddele

1 koek

• 250 g pitlose rosyntjies
• 250 g geel sultanas
• 250 g vrugtekoekmengsel
• 250 g dadels, fyngekap
• 100 g rooi glanskersies, heel
• 250 ml (1 k) brandewyn
• 250 ml (1 k) pekanneute, gekap
• 250 g (1 pak) botter
• 250 ml (1 k) bruinsuiker (treacle)
• 3 eiers
• 5 ml (1 t) vanieljegeursel
• 60 ml (4 e) fyn appelkooskonfyt
• 437 ml (1¾ k) koekmeel
• 5 ml (1 t) bakpoeier
• 2,5 ml (½ t) koeksoda
• 3 ml fyn kaneel
• 1 ml fyn gemmer
• 3 ml gemengde speserye
• knypie fyn neutmuskaat
• 1 ml sout
• nog 187 ml (¾ k) brandewyn vir bo-oor

OORNAG

1. Plaas rosyntjies, sultanas, vrugtekoekmengsel, dadels, rooi glanskersies en brandewyn in groot genoeg mengbak. Bedek en laat staan oornag sodat brandewyn goed in bestanddele kan intrek.
2. Verwyder foelie van mengbak. Gooi pekanneute by en roer deur.

VOER DIE KOEKPAN

1. Voer bodem en kante van ronde koekpan met 2 tot 3 lae bakpapier. 
2. Jy kan ook koekpan met bruinpapierstroke aan buitekant bedek. Bind vas met tou.

Metode

Stel oond op 140 °C.

1. Room botter en bruinsuiker met elektriese klitser saam tot romerig. 
2. Voeg eiers een vir een by en klits goed ná elke byvoeging.
3. Klits vanieljegeursel en appelkooskonfyt by tot gemeng. 
4. Sif koekmeel, bakpoeier, koeksoda, kaneel, gemmer, gemengde speserye, neutmuskaat en sout saam.
5. Roer meelmengsel en vrugtemengsel by bottermengsel tot net gemeng.
6. Skep beslag in voorbereide koekpan.
7. Maak beslag gelyk en druk dan effense holte in middel met groot opskeplepel.
8. Bak vir 2½ uur of totdat toetspen skoon uitkom. 
9. Laat koek effens in koekpan afkoel (ongeveer 15 minute) en giet 187 ml (¾ k ) brandewyn oor sodat dit goed kan intrek. 
10. Laat koek heeltemal afkoel en keer dan koek uit. Trek bakpapier af.
11. Draai koek goed in kleefplastiek toe. Draai laag foelie om en berg in lugdigte houer op koel plek of in yskas vir 30 dae.

WENKE

• Jy kan die bokant van die vrugtekoek net voordat dit oond toe gaan met heel pekanneute en rooi glanskersies afrond, dan lyk dit mooi. 
• Jy kan die vrugtekoek so voorsit of nog bietjie brandewyn bo-oor gooi, ongeveer 60 ml (4 e).