“’n Mens moet braaf wees. Deur so nou en dan uit jou gemaksone te beweeg, kan jou lewe verander en jy sal jouself die meeste van die tyd verbaas tot wat jy eintlik in staat is.”
Sy is gebore en getoë in die Noord-Kaap en was haar hele skoolloopbaan in Douglas, ’n klein dorpie op die oewers van die Vaal.
“Ek het ’n trou-plek met die naam Casa Mila in Douglas en doen voltyds korporatiewe- en troufunksies. Ek bied ’n volledige pakket aan my kliënte wat tafels, blomme en kos insluit.”
Sy is getroud met Hennie en haar twee spruite is Cilliers (13) en Mila (9).
Sy het besluit om vir die program in te skryf want sy het gevoel sy is op ’n punt in haar lewe waar sy lus was vir ’n nuwe uitdaging.
“Nadat ek die inskrywingsvorm gelees het, het ek besef die kompetisie is so in my kraal.”
Sy het ’n Huishoudkundegraad in haar sak, maar skroom nie om op YouTube aan te klop vir bak-wenke nie.
Mareli se bakgeheime
*Moenie die oond oopmaak terwyl jy bak nie. Loer maar eerder deur die venster.
*As jy ’n klomp eiers moet breek, doen dit een vir een in ’n klein bakkie. ’n Vrot eier kan jou hele mengsel bederf.
*Klits jou botterversiersel twee keer solank soos wat jy wou. Hoe langer jy dit klits, hoe ligter is jou versiersel.
*Weeg alles. Sonder ’n skaal is dit maklik om verkeerd af te meet. Ek weeg ook sommer my water en melk en spaar sodoende op die vuil skottels.
*Ek skep my kolwyntjies met ’n roomyslepel (daardie lepels met die skoonkrap meganisme) dan is almal ewe groot en jy spaar baie tyd.
– Mareli se troukoek op Koekedoor wat haar uiteindelik die titel in die sak gejaag het
