Deur Catherine Schenck. Foto Twitter @AJEnglish
Stephen Hawking (8 Januarie 1942 – 14 Maart 2018) was ’n fisikus wat nie toegelaat het dat ’n diagnose van motorneuroonsiekte op die ouderdom van 22, én ’n toenemende verswakkende lyf, hom keer om belangrike idees in kontemporêre kosmologie te ontwikkel nie.
In wetenskaplike kringe het hy naam gemaak in sy soeke na die begrip van swart gate en hoe om die heelal, en alles wat daarin gebeur, te beskryf. In 1988 het hy die boek A Brief History of Time, gemik op ’n breër leserspubliek, uitgereik en dit het hom wêreldwye aandag gegee. Dit was ’n topverkoper volgens die Sunday Times se topverkoperslys vir 237 weke aaneen: 10 miljoen kopieë is verkoop en die teks is in meer as 40 tale vertaal. Dit is egter ook gereken as “die beste boek wat niemand ooit gelees het nie,” omdat dit nie juis maklike leesstof as inhoud gehad het nie. Hawking was bewus hiervan, maar het nie omgegee nie – hy was bekend vir sy sin vir humor, ’n groot deel daarvan wat selfspottend was.
Hy het mense se verbeeldings aangegryp met hoe hy sy lewe gelei het ten spyte van sy siekte. Sy drie kinders het vanoggend ’n persverklaring uitgereik met die woorde: “Ons is baie hartseer dat ons geliefde pa vanoggend oorlede is. Hy was ’n besonderse wetenskaplike en ’n buitengewone man wie se werk en erflating vir baie jare nog sal aanhou lewe. Sy braafheid en volharding saam met sy briljantheid en humor het mense regoor die wêreld geïnspireer.”
Robert, Lucy, en Timothy (sy drie kinders) het verder gesê: “Hy het een keer gesê: “Hierdie sou nie veel van ’n heelal gewees het as dit nie die tuiste was van die mense vir wie jy lief is nie.” Ons sal hom vir ewig mis.”
Lees Meer
