Bly só positief
Die kenners sê ons kry wat ons verwag. As jy rampe en ellende verwag, is dit wat jy gaan kry. Stel jou visier op ’n positiewe uitkoms in, want so dwing jy jou om na die positiewe op die uitkyk te wees.
Versterk dié bewustheid van die goeie deur soggens vir jou beeld in die spieël te sê: “Ek verwag dat iets goeds vandag met my gaan gebeur.”
Lees ook: Wees positief, leef langer
1 Kry ’n ondersteuningsnetwerk
Identifiseer positiewe vriende, kenners en kollegas wat jou kan help om by jou doelwit uit te kom. Hulle sal jou motiveer as jy wankel maar ook jou suksesse saam met jou vier.
2 Wees bewus waaroor jy beheer het en vergeet die res
Die meeste van ons bestee eindelose energie aan kwellinge oor goed waaroor ons geen beheer het nie. Ons laat toe dat dit ons motivering steel en ons verlam.
3 Onthou die volgende …
Hoewel jy nie altyd beheer het oor wat met jou gebeur nie, het jy volle beheer oor hoe jy daarop reageer.
4 Vier jou mylpale
Soms raak ’n mens moedeloos wanneer jy momentum verloor. Die beste is om dan na jou beginpunt te kyk en trots te wees op hoe ver jy reeds gevorder het.
5 Breinspoel jouself tot jy positief vóél
As jy positiewe boeke lees en flieks kyk wat die gees versterk, sal jy ook makliker positief kan dink. Bly weg van droewige stories en tranetrekkers as jou wolkies donker lyk.
6 Leer eerder uit jou foute as om dit te herhaal
Ná ’n mislukking is dit een van die belangrikste dinge om perspektief te kry en die situasie soos ’n buitestander te beoordeel. Dink daaroor na en skryf die oorsake van jou krisis neer, of gesels met ander wat hul wysheid en insig met jou sal deel.
7 Bly weg van negatiewe mense Punt. Sela.
As vriende jou aftrek, of jou kop vol negatiewe dinge oor die ekonomie, politiek, verhoudings en jou beste span prop, verander die geselskap of moenie saampraat nie. Die beste teenmiddel? Kry vrinne wat die silwer randjie in die lewe soek en maklik lag. As jy een het wat jou gedurig bel om oor die lewe te murmureer, sny die gesprek kort.
8 Beplanning kan baie help
Eerstens visualiseer jy ’n positiewe uitkoms, en tweedens kan jy sien waar dinge kan skeefloop en jy kan daarvoor beplan. Navorsingsresultate toon ook dat mense meer positief is wanneer hulle op probleme bedag is.
9 Raak prakties
Kry vir jou ’n geskrewe stuk wysheid, goeie raad, of ’n inspirerende aanhaling en plak dit op jou yskas of spieël waar jy dit elke dag kan sien. Herhaal dit hardop in daardie oomblikke wanneer jy aan jouself begin twyfel.
10 Doen iets gaafs vir iemand anders
Logika wil ons laat glo dat jy beter voel as ander vir jou iets doen, maar navorsing toon dat die gewer die een is wat meer waarde uit die gee kry as die ontvanger!
Lees ook: 10 wenke wat jou kan help om NOU te leef
Kortlys vir positiewe denke
- Gebruik positiewe woorde, soos “Ek kan.”
- Verwerp negatiewe emosies en gedagtes – al is dit net vir ’n paar uur per dag.
- Glo dat jy dinge kan vermag.
- Erken negatiewe situasies en kry maniere waarop jy dit kan hanteer.
- Vergewe jouself.
- Herinner jou daaraan dat dinge erger kon wees.
- Omring jou met die positiewe. Dit geld ook kleure, prente, blomme en mense. Dit het gebeur, kyk nou vorentoe.
- Klop jouself op die skouer en vier jou goeie hoedanighede.
Lees ook: Die pad na selfhernuwing
Lees Meer
