Het jy ’n storie wat jy dink ’n dramareeks kan word? Is daar ’n leefstyl-, realiteits- of dokumentêre reeks wat jy glo gemaak moet word? Dalk het jy ’n fliek wat wag om te gebeur. Wel, nou is jou kans om van daardie droom ’n werklikheid te maak.
Augustus is dit tyd vir die jaarlikse kykNET Silwerskermfees in Kampsbaai, Kaapstad. Kortfilms, speelfilms en dokumentêre is op die program, en vir vier dae draai alles om fantastiese inhoud vir fliekteaters, televisie én stroomdienste.
Lees ook: Nuwe kykNET-reeks verken dramas en intriges van nuuskantoor
Maar die fokus is nie net op inhoud wat reeds vervaardig is nie. kykNET en Showmax se opdraggewende vervaardigers is ook op soek na sterk nuwe konsepte. En dit is waar alle kykers, vervaardigers en ander filmmakers met ’n opwindende idee welkom is om by hierdie partytjie aan te sluit.
Hoe werk dit? Maak ’n oorspronklike, kreatiewe voorstel in enige van die volgende kategorieë:
- kykNET: Drama
- kykNET: Realiteit en vermaak
- kykNET: Dokumentêr
- Afrikaanse speelfilm
- Showmax – Teksgedrewe konsepte (drama/komedie)
- kykNET: Adverteerder-geborgde programme (AFP: Advertiser Funded Programmes). Met ander woorde, programme waarvan ’n borg die vervaardigingskoste dek.
Aansoeke is nou oop en sluit op 6 Junie 2025. Ná die sluiting sal al die aansoeke deur opdraggewende vervaardigers van Multichoice se onderskeie kanale geëvalueer word. Die inskrywers van die topvyfkonsepte in elke kategorie sal dan genooi word om by die Silwerskermfees, wat tussen 20 en 23 Augustus 2025 in Kampsbaai gehou word, hul konsep in persoon aan ’n paneel van besluitnemers voor te lê.
Lees ook: Hier’s die spelers van Die Brug se nuwe seisoen – en die spanning loop reeds hoog!
Die dialoogvereiste vir alle voorstelle is 70% Afrikaans.
Wie weet? Dalk is jou storie reg om verkoop te word.
Om in te skryf, asook vir die reëls en riglyne, klik hier
