2026 skop af met ’n behoorlike knal in Ruiterbosch, die denkbeeldige Kaapse woonbuurt waar die gewilde kykNET-sepie, Suidooster, afspeel.
Daar is diepe hartseer, ou vetes wat weer vlam vat, harte wat versplinter, nuwe ambisies en gevaarlike persoonlikhede – en dit gaan aan die orde van die dag wees.
Hier is die ses grootste storielyne wat in Januarie kykers vasgenael gaan hou:
-
Die Jacobs-susters slaan terug – en Nazeem betaal die prys
Lee-Ann (Portia Joel) en Wade (Dean Smith) ontbloot eindelik Nazeem (Irvine van der Merwe) se dwelmhandel waarby hy vir Carlo (Jadon Booysen) betrek het. Nou is die gort behoorlik gaar!
Die oënskynlike vrede en harmonie wat oor die afgelope maande in die Jacobs-gesin geheers het nadat Nazeem en sy halfsuster, Bridgette (Denise Newman), versoen het, is nou beslis iets van die verlede.
Maar Nazeem is immers nie iemand wat gaan lê nie. Hy is reeds weer besig met slinkse planne om te verhoed dat hy aan die pen ry. Hy draai almal, behalwe die Jacobse, ’n rat voor die oë. Lee-Ann soek sy bloed en saam met Bridgette en Zoë (Lauren Joseph) beraam hulle ’n nuwe plan om Nazeem behoorlik te laat les opsê.
-
Liefde, verlies en trauma: Aiden en Liné se hartverskeurende pad
Die tragiese afsterwe van Jenna (Judi Hattingh) op Nuwejaarsdag skud Aiden en Liné se wêreld tot in sy fondamente. Voor haar dood kry Jenna nog die kans om te hoor dat Aiden Liné wil vra om te trou – ’n oomblik van lig wat tragies kort van duur is.
Wat volg is ’n emosionele wipwarit: Liné hou haarself besig met begrafnisreëlings sonder om werklik te rou. Sy hardloop weg van haar pyn en uiteindelik wil sy net wegkom van alles en verdwyn. Haar motor en besittings word weldra gevind, maar van haar is daar geen teken nie. Ruiterbosch hou asem op . . .
-
Tristan en Angie: Wanneer romanse gevaarlik word
Wat begin het as ’n speelse romanse, verander vinnig in een van Suidooster se donkerste verhoudings tot dusver.
Tristan (Arno Greeff) se jaloesie en agterdog raak al hoe erger: hy kritiseer Angie (Char Carrie) se vriende, haar kleredrag en selfs haar werkbesluite. Wanneer Kaashifa (Jawaahier Petersen) en Frankie (Mienke Ehlers) hul kommer daaroor uitspreek, draai hy teen hulle.
Angie, vasgevang in die warboel van manipulasie, glo telkens dat Tristan homself “probeer verbeter”, maar die situasie versleg by die dag. En dinge raak gevaarlik . . .
-
Bridgette se geheime alter-ego – en Ruiterbosch se nuwe radioster
Bridgette word teen haar sin ’n radio-persoonlikheid wanneer sy noodgedwonge vir Justin (Eden Classens) by Radio Dassie moet inspring. In die hitte van die oomblik skep sy ’n alter-ego, die jong en sogenaamd super-suksesvolle “Cecily”. Die gehoor val onmiddellik vir Cecily se skerp raad en wenke, en Bridgette ontaard onverwags in ’n sensasie. Maar ai, dit skep nuwe kopsere vir Bridgette.
-
Siya staan op vir die bejaardes – en die politiek roep
Wanneer Siya (Gantane Kusch) uitvind dat PanVista beplan om drastiese verbeteringe aan die aftree-oord te maak wat dit onbetaalbaar vir inwoners sal maak, besluit hy genoeg is genoeg.
Sy optog na die maatskappy se kantore misluk, maar dit lei tot ’n groter idee: hy moet sy gemeenskap op politieke vlak dien.
Met Bridgette wat sy veldtog finansier, begin Siya voorberei om vir wyksraadslid te staan. Maar niemand anders nie as die sluwe Nazeem sien hier ’n gulde geleentheid raak en kort voor lank is die duiwel weer behoorlik los in Ruiterbosch.
-
Susan en die rooikat-saak: ’n Stryd vir geregtigheid
Susan (Natasha van der Merwe) se behoefte om haar radioprogram meer impakvol te maak, lei haar na die hofsaak van Oliver (Stefan Erasmus), ’n eko-kryger wat probeer het om rooikatte van ’n boer se plaas te red.
Wat begin as ’n kontroversiële storie word vinnig ’n nuwe missie. Susan kom agter dat beide kante van die storie ’n punt beet het. Sy begin na ’n oplossing soek: die hervestiging van die rooikatte, al kos dit ’n fortuin.
Susan se lewe word vervleg met dié van Oliver – op professionele én persoonlike vlak.
Suidooster, wat vanjaar sy tiende verjaarsdag vier, word weeksdae om 18:00 op kykNET (DStv-kanaal 144) en om 18:30 op kykNET & kie (DStv-kanaal 145) uitgesaai. Dit is ook beskikbaar op DStv Stream en Showmax.
Lees ook: Suidooster se Jenna gesels oor haar groot TV-deurbraak en waar alles begin het
