Hou bekommernis oor jou werk jou wakker?

Hou bekommernis oor jou werk jou wakker? deur Anet Schoeman.

’n Studie in die Verenigde Koninkryk het bevind die meeste werkers boet meer as nege uur se slaap per week in weens bekommernisse oor hul werk, terwyl ’n kwart een keer per week werksverwante nagmerries het.

Hier is ‘n paar wenke vir ’n beter nagrus

1 Maak ’n lysie vir perspektief

Maak vroegaand ’n lysie van al die kwessies by die werk wat jou gespanne maak. Die neerskryf van vrese verskaf soms die nodige perspektief.

2 Takel jou angstighede die volgende oggend

Pak die volgende oggend die bul by die horings en probeer om daadwerklik die bron van jou grootste angstighede te takel.

Lees nog: Hoe om ’n slaapdagboek te hou vir ’n beter nagrus

3 Tel ook jou seëninge wanneer jy skape tel

Tel jou seëninge as jy in die bed lê. Dink aan lekker tye en vreugdes om jou brein te laat ontspan.

4 Skep ’n goeie slaapritueel

Let op jou slaaproetine. Skep ’n ritueel waarin jy voor slapenstyd geleidelik begin afskakel. Bad, luister na strelende musiek, lees ’n boek, verdoof die ligte …

5 Gaan slaap en word wakker op dieselfde tyd

Probeer om elke dag op dieselfde tyd te gaan slaap en opstaan. Selfs oor naweke.

6 Vermy skerms voor slaaptyd

Bly weg van skerms soos televisie, selfoon en rekenaar. Die blou lig keer dat jy vaak word.

7 Klim later in die bed

Gaan later bed toe. As jy te vroeg gaan slaap, lê jy en tob oor kwessies wat jou net wakkerder gaan maak.

8 Slaap alleen

Slaap alleen. Dis nie baie romanties nie, maar ’n moontlikheid wanneer jy desperaat is. Ons almal beweeg sowat 50 tot 60 keer per nag en ’n metgesel kan jou steur. Troeteldiere wat by jou op die bed slaap, onderbreek sowat vyftig persent van mense se slaap.