’n Weesdogtertjie met sagte blonde lokke en helder, bekommerde blou oë steel maklik ’n mens se hart en jy sal enigiets doen om haar te help as sy altyd terneergedruk voel. Wat as sy vasgevang is in ’n gerimpelde vel, dun grys hare en dowwe oë? Wie sal hierdie verskuilde weeskind in háár hartseer bystaan? Wie sal wonder of sy depressief is en gehelp kán word? As jy as volwassene, kind of self as bejaarde wonder of jou hartseer of aggressie eintlik depressie is, kyk na hierdie vraelys. As die antwoorde depressie uitwys, maak al jou moed bymekaar en gaan soek hulp. Jy sal verras wees oor hoe maklik dit is om te kry en hoe groot verskil dit gaan maak aan jou kosbare lewe.
Geriatriese depressieskaal
Jy kan self die vraelys voltooi maar vra gerus dat iemand saam met jou daarna kyk.
Gee jouself een punt vir elke antwoord in rooi.
1. Is jy oor die algemeen tevrede met jou lewe? Ja Nee
2. Moes jy die afgelope tyd aktiwiteite en belangstellings opgee? Ja Nee
3. Voel jy ’n leemte in jou lewe? Voel jou dae lank leeg? Ja Nee
4. Raak jy dikwels verveeld? Ja Nee
5. Is jy meestal in ’n goeie bui? Ja Nee
6. Is jy bang dat iets erg met jou gaan gebeur? Ja Nee
7. Voel jy meestal gelukkig? Ja Nee
8. Voel jy dikwels hulpeloos? Ja Nee
9. Verkies jy om net tuis te bly, eerder as uitgaan of iets aanpak? Ja Nee
10. Voel jy dat jy meer sukkel met jou geheue as die meeste mense? Ja Nee
11. Dink jy die lewe is op hierdie oomblik lekker? Ja Nee
12. Voel jy nutteloos soos jy nou is? Ja Nee
13. Voel jy energiek? Ja Nee
14. Voel jy asof jou situasie hopeloos is? Ja Nee
15. Dink jy die meeste mense is beter af as jy? Ja Nee
Jou telling ……………..
Wat jou punte beteken: Meer as vyf punte dui op depressie.
Lees ook: Depressie: die verkeerdste maniere om dit te hanteer
Wat om te doen as ’n bejaarde depressief is:
Is daar ’n mediese fonds? Sorg dat hy/sy ’n dokter of psigiater spreek.
Is daar nie ’n mediese fonds nie? Ons kliniekstelsel diagnoseer depressie en verskaf medikasie. Bel jou naaste een en vind uit op watter dae hulle bejaardes of psigiatriese pasiënte spreek – dit verskil van provinsie tot provinsie.
Woon jou ouer (of jyself) in ’n aftreeoord? Gesels gerus met die hoof van die oord. Daar is dikwels ’n maatskaplike werker of berader wat spesifiek omsien na emosionele behoeftes onder inwoners.
Gebruik jou ouer (of jy) heelwat medikasie, onder meer slaappille? Slaappille veroorsaak depressie by talle mense. Ander medikasie kan dit egter ook aanwakker. Neem al die medikasie saam na die dokter of apteker, sodat iemand ’n slag kan kyk of daar newe-effekte of kruisreaksies is wat jou ouer se energievlakke en gemoedstoestand kan benadeel. Kyk of die betrokke medikasie met iets anders vervang kan word.
Sluit aan en skakel in. Vind uit watter ondersteuningsgroepe is geskik vir bejaardes en skakel daarby in. Enige ander tipe groep of aktiwiteit kan geweldig baie emosionele ondersteuning bied – van ’n stap- of oefengroepie tot ’n paar mense wat saam musiek luister of ’n televisieprogram volg.
Lees ook: 12 tekens wat wys dat jou depressie beter is
Wat om ook te doen vir depressiewe bejaardes
Lees Meer
