Karoo-lamspastei

Genoeg vir 6-8

Bestanddele

Roomkaasdeeg

• 250 ml (1 k) yskoue botter
• 250 ml (1 k) koue Lancewoodroomkaas
• 250 ml (1 k) koekmeel

Lamsvulsel

• 60 ml (¼ k) olyfolie
• sout en gemaalde swartpeper
• 125 ml (½ k) koekmeel
• 1 kg lamskenkels
• 125 ml (½ k) rooiwyn
• 500 g klein uie, geskil
• 5 ml (1 t) fyn koljander
• 5 ml (1 t) fyn naeltjies
• 750 ml (3 k) hoenderaftreksel
• 1 x 410 g-blik heel geskilde tamaties, gekneus
• 4 lourierblare
• 4 wortels, geskil en oorlangs gesny
• 1 uiering
• 1 eier, liggies geklits

Metode

1. Deeg: Meng die botter, roomkaas en meel in ’n voedselverwerker tot dit net begin bymekaarkom. Bedek met kleefplastiek en sit vir 30 min. in die yskas, langer as dit te sag is, of op ’n warm dag.
2. Vulsel: Verhit die olie in ’n groot kastrol oor hoë hitte. Geur die meel na smaak en rol die skenkels hierin.
3. Skud die ergste meel liggies af en braai die skenkels oraloor tot goudbruin. Geur na smaak.
4. Voeg die rooiwyn bietjie vir bietjie by. Voeg die klein uie, koljander en naeltjies by en braai vir nog 5 min.
5. Gooi die helfte van die aftreksel, tamaties en lourierblare by en prut vir sowat 1½ uur, of tot die vleis van die been begin afval. Gooi kort-kort van die aftreksel by soos benodig.
6. Sit die wortels by prut vir nog 30 min. Geur na smaak en laat staan die vulsel vir ’n paar uur om af te koel en geur te ontwikkel.
7. Rol die deeg op ’n meelbestrooide werkvlak uit tot 4 mm dik. Laat rus vir 20 min. in die yskas.
8. Voorverhit die oond tot 200 °C.
9. Skep die vulsel in ’n pasteibak en bedek met die deeg. Sny die rande wat oorhang netjies af.
10. Sit 1 uiering op die deeg en verf die deeg met die eier.
11. Bak vir sowat 30 min. tot die deeg goudbruin en gaar is.