Rond is nié gesond vir kiets en woefie nie. Hier's tekens dat jou troeteldier oorgewig is

Rond is nié gesond vir kiets en woefie nie.

In Suid-Afrika, volgens die Wêreldgesondheidsorganisasie (WGO), is 39% van volwassenes oorgewig. Boonop toon sommige studies dat byna 70% van vroue en 39% van mans in Suid-Afrika oorgewig of vetsugtig is. Hierdie tendens kom ongelukkig ook by ons troeteldiere voor. Na raming is meer as 50% van troeteldiere wat deur veeartse behandel word oorgewig of vetsugtig.

Tog sien 9 uit 10 diere-ouers hulle troeteldier se oorgewig as normaal. Daarmee saam beskou 92% van troeteldier-eienaars troeteldier vetsugtigheid nie as ’n gesondheidsrisiko nie!

Troeteldiere wat oorgewig is, is minder gelukkig, leef korter lewens en loop ‘n groter risiko om artritis, urinêre toestande, velprobleme, hartsiektes en kanker te ontwikkel. Jou troeteldier hoef nie vetsugtig te wees om hierdie gesondheidsprobleme te loop nie. Om net ’n ekstra kilogram of twee te dra, kan jou troeteldier beïnvloed.

Troeteldier vetsug-feite

Vetsug kan ’n troeteldier se lewe met twee en ’n half jaar verkort
Oorgewig katte is vier keer meer vatbaar vir diabetes en twee en ’n half keer meer vatbaar vir nierstene
Oorgewig en vetsugtige troeteldiere is ook vatbaar vir ’n wye verskeidenheid ander siektes, insluitend hartprobleme en kanker
Oorgewig troeteldiere is minder gelukkig

Troeteldier-ouers se gedrag dra dikwels by tot hulle troeteldiere se oorgewig deurdat hulle lekkernye, wat nié vir diere bedoel is nie, vir hulle dierekinders voer. Biltong, droëwors, kos van die tafel af en, ja, veral sjokolade moenie vir diere gevoer word nie.

Wenke om te keer dat jou troeteldier oorgewig word

Moenie jou troeteldiere “menskos” of lekkernye voer nie. As jy jou troeteldier wil bederf, dink aan alternatiewe eerder as kos, soos ‘n nuwe speelding, ekstra speeltyd en speletjies.
Speel of gaan stap en hardloop met jou troeteldiere sodat hulle oefening kan kry. Bokse, troeteldiertonnels en ‘n opgefrommelde stuk papier is aktiwiteite wat pret en oefening vir jou kat sal verskaf.
As jy dink jou troeteldier kan oorgewig wees, besoek jou veearts vir ‘n assessering. Jou veearts kan die beste plan aanbeveel as jou troeteldier ‘n paar kilo’s moet afskud.
Kies die regte troeteldierkos vir jou spesifieke troeteldier. Indien jou troeteldier reeds oorgewig is, kies troeteldierkos wat geformuleer is om jou troeteldier se metabolisme aan te help.
Volg die voedingsriglyne op die pakkie – om oorvoeding te voorkom, weeg jou troeteldier se kos of gebruik ‘n maatbeker. Dit help om te verseker dat wie ook al jou troeteldier voer, elke keer die regte hoeveelheid kos gee.