Die maand van liefde in Suidooster gaan nie ’n mak maand wees nie – kykers kan hulself daarop voorberei dat hulle emosioneel én moreel uitgedaag gaan word.
In Februarie staar die inwoners van Ruiterbosch, die fiktiewe Kaapse woonbuurt waar Suidooster afspeel, nuwe krisisse in die gesig. Magsmisbruik en diep persoonlike struwelinge is maar net twee van die uitdagings wat vir ingrypende opskuddings gaan sorg.
Ja, so seker soos die wind sal waai gaan die komende weke vir stormsterk drama sorg en kykers moet veral hierdie vyf storielyne dophou:
-
Wanneer magsug belangriker is as die waarheid
Nazeem (Irvine van der Merwe) saai Ruiterbosch se geliefde pastoor, Siya (Gantan Kusch) se paadjie om Ruiterbosch se wyksraadslid te word vol duwweltjies. En tipies Nazeem speel hy vuil – veral omdat sy halfsuster Bridgette Jacobs (Denise Newman) vir Siya ondersteun.
Siya se veldtog wys kykers hoe maklik openbare simpatie gemanipuleer kan word wanneer tragedie, media en politieke ambisie saam in een groot pruttende hutspot beland. Onskuldige mense word as pionne misbruik en sogenaamde “goeie dade” is bloot ’n rookskerm vir wraak en eie belang.
Wat almal natuurlik wil weet is hoeveel skade een persoon kan aanrig voordat die waarheid hom eindelik inhaal? Dis natuurlik as die waarheid ooit die kans kry om te seëvier . . .
-
Die lang pad van herstel ná trauma
Angie (Char Carrie) se lewe is in skerwe as gevolg van haar toksiese verhouding met Tristan (Arno Greeff), maar sy skraap tog die moed bymekaar om haar uit sy manipulerende kloue te wikkel. Maar dan vang Tristan iets aan wat die inwoners van Ruiterbosch tot in hul diepste wese ruk.
Genesing vind ook nie oornag vir Angie plaas nie, want die groot stryd met selfbeeld, skuldgevoelens en vrees lê nog vir haar voor. Tog is daar ook hoop – in vriendskap, ondersteuning en die moed om haar hart weer oop te stel vir liefde.
-
Liefde wat nie volgens plan verloop nie
Die dinamiek tussen Zoë (Lauren Joseph) en Wade (Dean Smith) was nog altyd alles behalwe eenvoudig. En as ’n nuwe ridder op ’n wit perd Zoë se lewe binne-galop, begin ou gevoelens, onsekerheid en verborge verwagtinge onafwendbare spanning skep.
Zoë probeer haar hart beskerm en Wade worstel met jaloesie, iets wat hy nie wil erken nie. Eerlikheid maak soms die seerste, maar dis ook die nodigste.
-
Drome teenoor realiteit: wanneer ’n nuwe lewe lok
Susan (Natasha van der Merwe) en Elana (Esther van Waltsleben) word voor ’n lewensveranderende besluit gestel: hou vas aan stabiliteit, of waag ’n kans met hul toekoms. Die moontlikheid van ’n nuwe begin bring hoop, maar ook vrees.
Wanneer Susan se jonger suster, Linda (Melissa Willering), kom kuier en ’n skokonthulling maak, word Susan en Elana se wêreld behoorlik geskud.
-
Wanneer jou liggaam jou waarsku, maar niemand luister nie
Die Samsodiens kom voor ’n nuwe toets te staan wanneer Rhafiek (Irshaad Ally) begin vrees dat daar iets ernstig met sy gesondheid skort. Aanvanklik word dit afgemaak as stres of lewenstylbesluite wat sy welstand affekteer, maar intussen word ’n ernstige gesondheidskwessie misgekyk. Sy frustrasie neem al hoe meer toe wanneer ander namens hom praat of besluite vir hom probeer neem.
Lees ook: 10 redes waarom jy rooi rose se Februarie-uitgawe móét lees!
