Kougom met xylitol is so goed vir jou dat dit so amper as medisyne eerder as lekkergoed kwalifiseer. Hier is vier goeie redes om xylitolkougom aan te skaf:
1 Dit keer oorinfeksies
’n Splinternuwe ondersoek deur die Universiteit van Toronto wys dit verminder die voorkoms van oorinfeksies met 25% – goeie nuus as jou kind hiermee sukkel.
Ses uit elke tien kinders kry oorinfeksie voor hul eerste verjaardag en teen ses het byna alle kinders al oorinfeksie gehad – pynlike infeksies wat met strek antibiotika soos penisillien behandel moet word.
Jy kan die gebruik van onnodige antibiotika systap – of ten minste soms systap – as jou kind kougom met xylitol teen 10-12gram per dag kan kou sodra ’n verkoue begin kop uitsteek.
Vermoedelik help die kou-aksie die buise van Eustachius oophou sodat die oorvog kan wegdreineer. Xylitol is ook antibakterieel en keer dus bakteriële groei, soos ’n antibiotika.
2 Dit verminder tandbederf met rondom 30%
Soveel ondersoeke bevestig dit dat die American Dental Association in ’n posisieverklaring aanbeveel dat ons kougom en suiglekkers met die versoeters xylitol, sorbitol en mannitol gebruik.
Jy – en jou kinders – moet steeds tande borsel en tandarts toe gaan maar ’n kougom na ete by die werk of na skoolkos is ’n goeie opsie wanneer jy nie kan tande borsel nie.
3 Dit herstel tande
Maar xylitol keer nie net tandbederf nie. Dit keer dit ook om, soos talle ondersoeke wys, waaronder ’n Japannese een waar tandemalje onder die elektronmikroskoop bekyk is. Dit help deur tandminerale soos kalsium terug in jou tandemalje te sit.
4 Jy baat jare en jare lank
Die beste nuus omtrent xylitol is dat die tandversterkende effek jare lank hou. So wys opvolgondersoeke dat mense drie en selfs vyf jaar na ’n tyd van xylitolgebruik nog steeds minder tandbederf het as mense wat nie xylitol gebruik het nie.
Lees Meer
