FOTO'S | Ivan Botha vier 40ste verjaardag in die Waterberge: 'My gesin is my rede vir alles'

Ná die verfilming van die kykNET-dramareeks Een keer om die son se tweede seisoen het Ivan Botha tyd gemaak om ’n besonderse mylpaal te vier: sy 40ste verjaarsdag!

Hoewel hy en vroulief, Donnalee Roberts as een van die Afrikaanse vermaaklikheidsbedryf se talentvolste en mees produktiewe glanspare bekend is, het hierdie viering weinig oor werk gegaan. Vir Ivan het dit eerder gegaan oor dit wat werklik vir hom saak maak: dankbaarheid vir sy gesin en die vasvang van betekenisvolle oomblikke.

Ivan, wat 13 Desember verjaar, se wens vir sy 40ste was eenvoudig.

“Donnalee vra my al die laaste paar jaar wat ek vir my 40ste verjaarsdag wil doen, en my antwoord is nog elke keer dat ek saam met my gesin en ons ouers na my hartsplek in die Waterberge wil gaan,” vertel hy. Mhondoro Safari Lodge & Villa het oor die jare vir hom ’n besondere betekenis gekry en is ’n plek waar hy, soos hy dit stel, “op ’n dieper manier rus”.

Donnalee het seker gemaak dat dié droom ’n werklikheid word. Die gesin, saam met hul kinders Cameron (5) en Luca (2), hul ousus Amélie (16), asook albei stelle grootouers, het drie dae lank by die luukse safarilodge, geleë in die Welgevonden-wildreservaat in die Waterberg-distrik van Limpopo, uitgespan.

“Van die oomblik wat jy daar aankom, is alles net ’n viering. Die diens en mense is ongelooflik, hulle dra jou op hulle hande en maak elke oomblik spesiaal.”

Die dae was gevul met wildritte en bederf, maar die besonderse oomblik wat vir Ivan uitstaan, is ’n sonsak-sjampanje-ervaring in die middel van die bos op sy verjaarsdag.

“Donnalee het gereël dat ons by Fig Tree Plains stop. Saam met die Mhondoro-span het sy vir ’n ongelooflike ervaring gesorg waar ons tussen sebras, rooibokke en renosters die sonsak kon bewonder terwyl ons sjampanje geniet het en vir ’n oomblik kon stil raak.”

Dit was ook hier waar emosies hoog geloop het. Ivan se familie het hom verras met toesprake en gelukwense wat, soos hy erken, “vir ’n traan of twee” gesorg het. Die aand is afgesluit met ’n vyfster-fynproewersete, verjaarsdagkoek en die villa se personeel wat vir hom gesing het.

Vir Ivan bring 40 ’n nuwe bewustheid. “Dit is ’n voorreg om ouer te kan word. Veertig is ’n mylpaal wat my laat stil raak van dankbaarheid,” sê hy. “Dit is vir my ’n tyd van refleksie, oor wat my gesin vir my beteken, en hoe dankbaar ek vir hulle is. My kinders en my ongelooflike vrou is my rede vir alles.”

Natuurlik bring so ’n mylpaal ook nuwe drome, maar vir Ivan bly die kern eenvoudig: “My grootste wens is om alles wat nog kom saam met my gesin te doen en te bereik.”

Sy wens vir die volgende 40 jaar? “Meer oomblikke saam te ervaar, meer te reis, meer te lag, meer stories te vertel en meer in dankbaarheid te leef.”

Intussen is daar ook baie om na uit te sien op die skerm danksy dié kreatiewe egpaar. Een keer om die son, wat in 2024 ’n reusetreffer was, keer op 20 Januarie terug vir ’n tweede seisoen op kykNET. Ivan en Donnalee het saam met Liani Jansen van Rensburg, Marista van Eeden en Almero Welgemoed die reeks geskryf. Ivan, Donnalee en Danie Bester is die vervaardigers, en Ivan is die regisseur.