Elmarie Berry op ‘Lekker & goed’: ‘As ek nie weet wat om te maak nie, begin ek ’n ui opkap’

Carmen Niehaus het met die onmiskenbare geur van rooibos op ’n plaas tussen die berge en fynbos grootgeword en dís hoekom rooibos so ’n lieflike geurige baadjie in Lekker & goed op kykNET aantrek. Of dit nou drankies, bredies of soetgoed is – rooibos word in elkeen van dit aangewend, selfs daar langs die lieflike strandmeer aan die Weskus.

“Daar is soveel skoonheid in eenvoud,” is Carmen se filosofie terwyl sy week na week ongelooflike disse saam met haar gaste voorberei. Soos wat sy in die vierde episode aan Elmarie Berry voorgesit het.

Haar geskiedenis met Elmarie loop ver paaie terug toe Elmarie in 2014 aan ’n kook-kompetisie deelgeneem het en toe reeds vir Carmen met haar vaardigheid beïndruk het.

Deesdae het Elmarie ’n blog waar sy nuwe resepte skep en deel, asook haar ontdekking van nuwe wyne bekend maak. Haar kookboek, The Table, is’n viering van Suid-Afrikaanse en Libanese kookkuns, laasgenoemde danksy haar geliefde ouma van Libanese afkoms.

Haar eie kosreis het op 13-jarige ouderdom afgeskop toe sy ’n koskursus in Bloemfontein bygewoon het. Later van tyd het sy in gastehuise en hotel-kombuise gewerk waar sy waardevolle ondervinding opgedoen het.

Met haar blog het sy besef hoe waardevol foto’s by elke dis is – en toe sommer fotografie ook gaan studeer. Nou trek sy reeds by haar derde kosboek!

Elmarie het gesê daar’s altyd room, regte botter en knoffel in haar yskas. En as sy die slag nie weet wat om te kook nie, begin sy om ’n ui op te knap.

“As die ui eers begin braai, kan jy dink of jy maalvleis wil ingooi . . . gaan ons nou ’n kerrie doen? Gaan ons ’n hoendertjie bysit . . .?” Dis hoe beide Carmen en Elmarie hul denkproses vir ietsie op die tafel uitsorteer.

RESEPTE: SONDAG-KUIER SAAM MET ELMARIE

Gin & Tea

Genoeg vir 4

• 4 sakkies Carmién Turkish Delight
• 250 ml (1 k) kookwater
• 60 ml (¼ k) suiker
• 1 eierwit
• 60 ml (¼ k) granaatsap
• 30 ml (2 e) roosstroop
• 30 ml (2 e) suurlemoensap
• 60 ml (¼ k) jenewer
• 1 kg ys
• 30 g droë frambose, fyn gemaal

METODE

1. Plaas die tee, kookwater en suiker in ’n medium groot pot en kook vir 5 minute.
2. Dreineer deur ’n sif en laat afkoel tot koud.
3. Plaas die eierwit, granaatsap, roosstroop en suurlemoensap saam met die jenewer in ’n mengeldrankie-shaker. Vul met ys en skud goed tot vir sowat 30 sekondes tot goed gemeng.
4. Giet in martini-glase. Sif framboospoeier oor.

Lamsboud met Creamy Mint-rooibossous 

Genoeg vir 6 mense

• 1 lamsboud met skenkelbeen nog aan, indien verkies
• Sout en peper
• 30 ml (2 t) Marmite
• 30 ml (2 t) Dijon-mosterd
• 30 ml (2 t) sagte bruinsuiker
• 30 ml (2 t) olyfolie
• 3 Wildeklawer-uie, in dik skywe gesny
• 1 bol knoffel, gehalveer
• 4 Carmién Creamy Mint groen rooibosteesakkies

Sous

• Sowat 250 ml (1 k) romerige jogurt
• Vars ment vir garnering

METODE

Voorverhit die oond tot 160°C.

1. Vryf die boud in met sout en peper.
2. Meng die Marmite, mosterd, suiker en olyfolie saam en smeer die boud oraloor goed in.
3. Plaas die uieskywe en die knoffel in ’n groot oondpan en plaas die boud bo-op.
4. Maak ’n sterk aftreksel met 375 ml (1½ k) kookwater en die Carmién-teesakkies en giet in die oondpan.
5. Bedek die pan met tinfoelie en oondbraai soos volg: vir ’n mediumgaar boud: laat 20-25 min per 500 g vleis toe plus 20-25 min ekstra (interne temperature: 70 °C).
6. Verwyder die foelie die laaste 20 minute sodat die boud lekker bruin kan braai.
7. Verwyder die boud uit die oondpan en plaas op ’n dienbord. Laat 10 minute rus voordat dit gesny word, maak liggies toe.
8. Sous Voeg jogurt by die pansappe in die oondpan en meng goed. Giet in ’n kastrolletjie en kook af totdat die sous lekker geurig is. Maak fyn met ’n staafmenger, indien verkies, en sit voor saam met die boud.

Tartiflette (afkomstig van die Franse Alpe)

Genoeg vir 6 mense

• 125 ml (½ k) sagte broodkrummels
• 60 ml (¼ k) fyngerasperde parmesaankaas
• Sowat 6-8 groot Wildeklawer-aartappels, gaargemaak, afgekoel en skilletjies afgetrek en in skyfies gesny
• Sout
• Olyfolie
• 2 rooi soetrissies, gehalveer
• 1 Wildeklawer-ui, in ringe gesny
• 4 knoffelhuisies, fyngedruk
• 300 g baba-spinasie
• Sowat 300 g mozzarella-kaas, in skywe gesny
• Paar takkies tiemie
• 80-125 ml (⅓-½ k) Piekenierskloof-witwyn
• Gelatien

Sous

• 250 g baba-tamaties
• 25 ml (5 t) tamatie-pesto
• Basilieblare vir afronding

METODE

Voorverhit die oond tot 190 °C. Voer ’n losboom-koekpan uit met tinfoelie en spuit goed.

1. Kook die aartappels in soutwater tot effe sag, maar nie stukkend gekook. Dreineer.
2. Meng broodkrummels en parmesaankaas en sprinkel helfte daarvan op die bodem en teen die kante van die pannetjie.
3. Pak soetrissies met velkant na bo-op ’n bakplaat. Oondbraai tot die soetrissies swart blasies bo-op vorm en die spekvleis gaar, maar nie bros is nie.
4. Verwyder uit die oond, plaas die soetrissies in ’n plastieksak om af te koel en trek die velletjies af. Sny in groot stukke.
5. Verhit bietjie olie in ’n pan en roerbraai die ui en knoffel daarin tot sag.
6. Pak lae as volg in die broodpannetjie: plaas ’n paar tiemietakkies onderin die pan.
7. Pak ’n enkellaag aartappelskywe bo-op, smeer bietjie van die uiemengsel oor en pak ’n laag kaas bo-op. Pak dan ’n laag soetrissie, sprinkel spinasieblare oor, Herhaal die lae. Sprinkel ’n klein bietjie gelatien oor elke aartappel. Dit help dat hulle beter bymekaarhou. Pak nog tiemietakkies op, giet wyn oor en sprinkel die orige broodkrummelmengsel bo-op.
8. Maak liggies toe met tinfoelie en bak sowat 25-30 minute of tot die kaas goed gesmelt is. Rooster vinnig tot effe bruin bo-op.
9. Sous Roerbraai die baba-tamaties tot hulle net begin oopbars. Roer pesto deur en geur met sout en peper.
10. Laat die tartiflette bietjie afkoel sodat die kaas net effe kan stol en keer dan versigtig op ’n dienbord uit. Skep die tamatiesous bo-oor en rond af met basilieblare.

Beetpiekel op spinasie-pesto 

Lewer sowat 500 ml piekel

Piekel

• 500 ml (2 k) rou appelasyn
• 500 ml (2 k) water met 1 sakkie Carmién Masala Chai Cooking Bags
• 15 ml (1 e) sout
• 125 ml (½ k) suiker

Groente

• 2 bossies Wildeklawer-beet, gaargekook en skilletjie afgestroop terwyl nog warm

Pesto

• 1 bossie spinasie of beetblare of krulkool, gestroop van harde stingel
• Groot handvol basilieblare
• 60 ml (¼ k) sonneblomsaad, gerooster
• 3 knoffelhuisies, fyngedruk
• 60 ml (¼ k) pecorinokaas
• 60 ml (¼ k) Carmién groen rooibostee (gebruik 1 sakkie)
• 80-125 ml (⅓-½ k) olyfolie
• Gerasperde skil en sap van halwe suurlemoen
• Sout en peper

Afronding

• Za’tatar
• Vars mielies, pitte afgesny in repe
• basilieblare

METODE

1. Piekelsous Plaas al die bestanddele vir die piekelsous in ’n kastrolletjie en bring tot kookpunt. Giet oor die gaar bete en laat afkoel. Laat staan oornag of minstens 3 dae.
2. Pesto Plaas die spinasie, beetblare of krulkool en basilieblare saam met die sonneblomsaad, knoffel en kaas in die voedselverwerker en verwerk tot glad. Voeg die tee, olyfolie en suurlemoensap by en geur met sout en peper. Verwerk tot grofglad.
3. Skep die pesto op ’n plat dienbord en rangskik die beetstukkies (sny kleiner) daarop.
4. Sprinkel die za’tatar en mielierepies oor en rond af met basilieblare.

Tiramisu (‘Lig my op’ in Italiaans, aldus Carmen)

Ek maak my eie klappersponsvingers en gebruik dit pleks van die vingerbeskuitjies. Die klapper verlaag die effek van suiker op bloedsuikervlakke. Maar jy kan ook gewone vingerbeskuitjies gebruik.

• 1 baksel klappervingerbeskuitjies (sien ook resep)
• 180 ml (¾ k) afgekoelde sterkgetrekte Carmién Turkish Delight-rooibostee (Turkish Delight moet nie lank getrek word nie) (3-4 sakkies)
• 3 eiergele
• 80 ml (⅓ k) heuning
• 60 ml (¼ k) brandewyn
• 2 houers (230 g elk) geroomde maaskaas

Kakao

• 1 pak donker sjokolade, minstens 70%

 METODE

1. Doop die beskuitjies vinnig in tee en pak die vingerbeskuitjies op die bodem van ’n vierkantige bak.
2. Klits die eiergele en heuning in die menger se bak en plaas in ’n katrol met kookwater, roer tot die bak en mengsel goed warm is.
3. Plaas die bak terug in die menger en klits tot lig en dik.
4. Voeg die brandewyn by en meng.
5. Meng die maaskaas by.
6. Skep oor die beskuitjies, stuif met kakao en rasper die sjokolade oor.
7. Verkoel verkieslik oornag.

Klappervingerbeskuitjies

• 3 eierwitte
• Knippie sout
• 180 ml (¾ k) strooisuiker
• 250 g fyn klapper

METODE

1. Spuit ’n bakplaat met kossproei en voer uit met bakpapier. Spuit weer en stuif met mielieblom. Klits die eierwit tot dit sagte punte vorm, voeg sout by en klits tot styf.
2. Vou die klapper in en verkoel oornag.

METODE

Voorverhit die oond tot 180 °C.

1. Vorm in lang rolletjies met jou hande en plaas ver uitmekaar op die bakplaat. Bak sowat 12 minute of tot gaar.
2. Laat afkoel op die bakplaat en bêre in ’n lugdigte houer.

Lekker & goed word Donderdagaande op kykNET (DStv-kanaal 144) om 17:30 uitgesaai of stroom op DStv Stream.

Lees ook: Sjokolade-piesangbrood