Dra Kersfeesmotiewe met oorgawe

Dra Kersfeesmotiewe in oormaat deur Bea Lingenfelder en Susra Matthee. Hooffoto: Shuttermutts Pet Photography

Met groot motiewe en vrolike patrone wat weer hoogmode is, kan ons nie anders as om aan daardie tradisionele Kerfees-kledingstukke te dink nie. Wat jy dalk eens gedink het is oordadig, is nou perfek vir enige Kersgeleentheid, van ’n familie-ete tot ’n partytjie. Die geheim bly egter om jou styl steeds modieus en stylvol te hou met hierdie prettige item. Hier is ’n paar riglyne om in gedagte te hou:

Vroue

Ons vrouens hou daarvan om stylvol te lyk, daarom is ’n neutrale palet die beste keuse wanneer jy ’n fokusitem daarmee saam dra. Hou by swart of wit wat goed met die Kerskleure sal kontrasteer. Vir ’n vroulike voorkoms is sagvloeiende rompe of rokke altryd ’n wenner en ’n hakskoen daarby gee jou ’n tikkie ekstra glans. ’n Paar deftige sandale werk net so goed. Hou jou bykomstighede minimalisties en eenvoudig.

C’est la Vie: C’est la Vie maak ook drukwerk van jou keuse op aanvraag.

Lees ook: Stylwenke vir die partytjieseisoen

Die beste skoonheidgeskenke vir Kersfees

Mans

Die man wat met sy bonkige Kerspatroontop op ’n familiefoto sal verskyn, is maar skaars. Dit beteken egter nie hy hoef vervelig te lyk nie. Begin klein en dra sokkies in die Kersfeeskleure. ’n Rooi hemp trek ook altyd aandag sonder om dit te oordoen. As dit by broeke kom kan hy steeds daardie lojale denim van hom aantrek. Denim is ’n neutrale kleur wat helder kleure soos rooi of groen goed balanseer. Vir ’n formeler voorkoms is snyersbroek in donkerblou of khaki ’n stylvolle keuse.

Kinders

Wie hou nie daarvan om hul kinders in fraaie uitrustings te klee nie. Daar is baie prettige slagspreuke om van te kies – jou kind mag dalk net die kollig op elke Kersfoto steel!

Dieremaniere

Vir diegene van ons wat ons dierekinders ook wil bederf is daar net soveel oulike opsies – van leibande tot jassies en selfs strikdassies. Nie alle diere is gemaklik met ’n band om die kop of ’n warm jassie om die lyfie nie, daarom sal ’n nekbandjie met ’n Kerspatroon die veiliger keuse wees.