Glutenvrye lasagne

Genoeg vir 4

Bestanddele

Vars pasta

• 125 ml (½ k) tapiokameel
• 125 ml (½ k) mielieblom (Maizena)
• 45 ml (3 e) aartappelmeel
• 5 ml (1 t) sout
• 23 ml (4 ½ t) Xanthan gum
• 2-3 groot eiers
• 30 ml (2 e) olyfolie + ekstra

Lasagne

• 500 g (1 pak) botterskorsiestukke, geskil en in blokkies gesny
• sout en gemaalde swartpeper

Witsous

• 45 ml (3 e) botter
• 30 ml (2 e) mielieblom (Maizena)
• 560 ml (2¼ k) melk
• sout, swartpeper en gerasperde neutmuskaat

Vulsel

• 250 g blokkiesspek, bros gebraai
• 250 ml (1 k) ertjies
• 125 ml (½ k) gerasperde mozzarella

Metode

Pasta

1. Sif die droë bestanddele saam in ’n mengbak.
2. Meng die eiers en olyfolie en gooi ’n bietjie op ’n slag by die droë bestanddele. Roer met ’n houtlepel tot die deeg bymekaarkom.
3. Keer op ’n meelbestrooide werkvlak uit en knie tot glad. Bedek met kleefplastiek en sit vir 30 min. in die yskas.
4. Verhit die oond tot 200 °C.
5. Sit die botterskorsies op ’n bakplaat en sprinkel olyfolie oor. Geur na smaak en bak vir sowat 30 min. tot gaar.
6. Rol die pasta met ’n pastamasjien uit op die tweede kleinste stelling.

Witsous 

1. Smelt die botter oor matige hitte in ’n klein kastrol. Meng die mielieblom by en roer vir 1 min. Haal van die hitte af en gooi die melk geleidelik by. Roer deurentyd.
2. Sit die witsous terug op matige hitte en bring tot kookpunt, maar roer deurentyd. Verlaag die hitte en prut vir nog 1 min. Geur na smaak. Hou eenkant.
3. Pak die bestanddele in lae in ’n 30 cm x 20 cm- bak. Begin met die witsous (onder), gevolg deur die pasta, botterskorsie, spek en ertjies. Herhaal en eindig met die witsous en gerasperde kaas bo-op. Bak vir sowat 40 min.

Lees ook: Hoenderslaai met romerige parmesaan-slaaisous